ESOMO 8
Abrahamu na Sara mubowa oMungu
Hakuhi n’omuyi we Babeli habya oghundi muyi owabya akahulwa mo Uru. Mwabya abandu ababya bakaramya eyindi miungu mingyi omo mwanya w’eriramya Yehova. Aliwe e Uru yabya omulume mughuma oyo wabya akaramya Yehova musa. Erina liwe lyabya Abrahamu.
Yehova mwabwira Abrahamu ati: ‘Ulue omo kihugho kyaghu, eyiri abatunga baghu, ughende omo kihugho ekyo ngendikukangania.’ Neryo oMungu mwamulagha ati: ‘Ukendisyabya kihanda kinene, kandi ngendisyakolera abandu b’ebindu bingyi bibuya erilabira iwe.’
Abrahamu syabya asi eyo Yehova akamutuma, aliwe abya ayiketere Yehova. Neryo Abrahamu, Sara mukali wiwe, Tera tata wiwe, n’omwana wa mughala wabo, ye Loti, mubasenga ebindu byabo, neryo busana n’obwowa bamatsuka olughendo olwabya luli.
Abrahamu abya n’emyaka 75 omughulu iye n’ekihanda kiwe bahika omo kihugho ekyo Yehova aby’anzire ibalangira. Kyabya kikahulwa mo ekihugho kye Kanana. Eyo, oMungu mwakania na Abrahamu n’erimulagha ati: ‘Ekihugho kyosi ekyo wamalangira, nasyahakyo abana baghu.’ Aliwe Abrahamu na Sara babya ibabirikekeluha kandi isibawite n’omwana n’omughuma. Neryo Yehova angaberererye ati omulaghe wiwe oyo?
“Busana n’erikirirya, Abrahamu mwowa. . . . Neryo mwaghenda omo kihugho ekyo bangamuhere mo mwandu. Mwaghenda nomo anabya isyasi eyo akaya.”—Abaebrania 11:8