Aħfer U Insa Huwa Dan Possibbli?
GĦADDA iktar minn nofs seklu minn mindu spiċċat it-Tieni Gwerra Dinjija, fl-1945. Din il-gwerra globali kienet tabilħaqq l-iktar waħda feroċi u għalja fl-istorja kollha tal-bniedem.
It-Tieni Gwerra Dinjija damet għaddejja sitt snin u ħadet il-ħajjiet taʼ madwar 50 miljun ruħ, inkluż nies pajżana. Kien hemm bosta nies oħrajn li ġew immankati fiżikament, mentalment, u emozzjonalment. Għal dawk il-ħafna wħud li ġarrbu dawn is-snin kefrin tal-gwerra, il-ferita li għandhom f’qalbhom meta jiftakru fl-atroċitajiet li seħħew u f’dawk l-għeżież li mitulhom għadha ma feqitx.
Hemm min għadu jiftakar l-atroċitajiet li wettqu n-Nazisti fl-Olokawst, fejn tbiċċru miljuni taʼ vittmi innoċenti. Kemm fl-Ewropa u kemm fl-Asja, twettqu ħafna atroċitajiet minn armati li invadew il-post, fil-waqt li qatlu, stupraw, serqu u tterrorizzaw lil nies pajżana. Imbagħad, insibu wkoll ħafna nies li ġew ivvittimizzati minn attakki mill-ajru li ġabu qerda, mankamenti u mwiet lil mijiet taʼ rġiel, nisa, u tfal innoċenti. Miljuni taʼ suldati tal-gwerra wkoll ġarrbu esperjenzi koroh waqt ġlied f’diversi nħawi tad-dinja.
Ġrieħi Mentali u Emozzjonali
L-għadd kbir taʼ nies li għexu fi żmien it-Tieni Gwerra Dinjija u li għadhom ħajjin illum ma se jinsewhom qatt il-ġrieħi mentali u emozzjonali li batew minħabba l-ġrajjiet terribbli li seħħew dakinhar. Jixtiequ kieku li jinsewhom darba għal dejjem dawk il-memorji taʼ mrar li tant iġibulhom uġigħ taʼ qalb. Imma ma jirnexxilhomx. Għal xi wħud, dawn il-ġrajjiet tal-biżaʼ qishom ħolma kerha li titturmentahom kull darba li jiftakru fihom.
Mill-banda l-oħra, insibu oħrajn li ma jridux jinsew, jew għax jixtiequ vendetta jew inkella għax jixtiequ jagħtu ġieħ lil dawk li tilfu ħajjithom. Flimkien maʼ dan, ħafna huma tal-fehma li l-atroċitajiet tal-passat għandhom jibqgħu ħajjin fl-imħuħ tal-familja umana bit-tama li ma jerġgħux iseħħu atroċitajiet simili.
Ftit tas-snin ilu, bejn l-1994 u l-1995, meta kkommemoraw il-50 anniversarju tad-D day (meta l-Alleati waslu fin-Normandija f’Ġunju taʼ l-1944) u t-tmiem tal-fażi Ewropea tat-tieni gwerra dinjija (f’Mejju taʼ l-1945), l-atmosfera li kien hemm uriet li huwa diffiċli ħafna għal dawk li raw dawn il-ġrajjiet b’għajnejhom stess biex jaħfru u jinsew. Taʼ spiss, kwalunkwe ġest taʼ rikonċiljazzjoni bejn dawk li qabel kienu għedewwa m’għandux ċans li jseħħ. B’hekk, veterani Britanniċi rrifjutaw li jistiednu rappreżentanti Ġermaniżi għall-kommemorazzjonijiet tal-wasla taʼ l-Alleati fin-Normandija.
Rigward l-atroċitajiet li wettqu n-Nazisti fit-Tieni Gwerra Dinjija u d-diffikultà li wieħed jaħfer u jinsa, il-kittieb Vladimir Jankélévitch esprima ruħu b’dan il-mod: “Meta tqis dan l-att kriminali tant diżgustanti, l-istint naturali . . . huwa li turi rabja, tistinka kemm tiflaħ biex ma tinsiex, u tibqaʼ ssus wara l-kriminali—bħalma wegħdu l-imħallfin tat-Tribunal taʼ l-alleati taʼ Nuremburgu—sa truf l-art.” L-istess kittieb kompla: “Kieku nistgħu, indawru l-kliem tat-talba li qal Ġesù lil Alla fil-Vanġelu skond San Luqa u nagħmluh: Mulej, taħfrilhomx, għax jafu x’inhuma jagħmlu.”—Qabbel Luqa 23:34.
B’dispjaċir, mill-1945 ’l hawn, sal-ġurnata tal-lum, atroċitajiet bla għadd oħrajn—fil-Kambodja, fl-Irwanda, fil-Bosnja, biex insemmu ftit minnhom—komplew ixerrdu d-demm mad-dinja kollha. Bħala konsegwenza, dawn l-atroċitajiet ħallew miljuni taʼ nies mejta, flimkien m’għadd kbir taʼ romol u orfni, ħajjiet imħarbta, u memorji orribbli.
Bla dubju taʼ xejn, dan is-seklu 20 kien żmien taʼ krudeltà li qatt ma kien hawn bħalha. Ġara sewwa sew bħalma bassret b’mod korrett il-profezija tal-Bibbja żmien twil ilu dwar din l-era—in-nies saru “kiefra” u “bla mħabba għat-tajjeb.”—2 Timotju 3:1-5; Apokalissi 6:4-8.
X’Għandna Nagħmlu?
Meta jsibu maʼ wiċċhom barbariżmu bħal dan, in-nies jirreaġixxu b’modi differenti. Imma xi ngħidu dwarna? Għandna nibqgħu niftakru? Jew għandna ninsew? Li tiftakar ifisser bilfors li żżomm f’qalbek għadwa qawwija kontra l-għedewwa li kellek qabel, u tirrifjuta li taħfer? Mill-banda l-oħra, li taħfer ifisser bilfors li wieħed jistaʼ jinsa fis-sens li jneħħi għalkollox minn moħħu l-memorji koroh?
Il-Ħallieq taʼ l-umanità, Alla Jehovah, x’jaħseb dwar l-atti terribbli li twettqu fi żmienna u fl-imgħoddi? Se jaħfrilhom lil dawk li għamluhom? U m’huwiex issa tard wisq biex Alla jikkumpensa lill-vittmi maqtulin f’dawn l-atroċitajiet? Teżisti tama soda li xi darba dawn l-atroċitajiet se jispiċċaw, ladarba ilhom iseħħu għal eluf taʼ snin? Alla li Jistaʼ Kollox kif bi ħsiebu eventwalment isewwi dawn il-kwistjonijiet ikkomplikati?
[Stampa fʼpaġna 4]
Tfal taʼ vittmi tal-massakri jinġabru f’kamp tar-refuġjati
[Sors]
UN PHOTO 186797/J. Isaac
[Sors tal-Istampa fʼpaġna 3]
Ritratt tal-U.S. Navy