L-Atroċitajiet X’inhi s-Soluzzjoni t’Alla?
L-ATROĊITAJIET kif jistgħu jiġu evitati? X’inhi s-soluzzjoni? Meta nistudjaw l-istorja, naraw kemm hu ovvju li s-soluzzjonijiet umani fallew. Fil-fatt, hemm element kbir taʼ kontradizzjoni, jekk mhux ipokresija għalkollox, fil-mod kif il-mexxejja umani ffaċċjaw is-suġġett.
Per eżempju, ikkunsidra s-sena 1995. Din immarkat il-50 anniversarju tat-tmiem taʼ l-Olokawst min-Nazisti fit-Tieni Gwerra Dinjija, u taʼ l-isplużjoni tal-bomba atomika. Dik is-sena, diversi mexxejja tad-dinja attendew għaċ-ċerimonji kommemorattivi li saru f’ħafna partijiet tad-dinja. Għala? Sabiex jittrasmettu sens taʼ stmerrija għal dawn l-atroċitajiet biex b’hekk qatt ma jerġgħu jseħħu. Madankollu, xi osservaturi f’dawn iċ-ċerimonji nnotaw doża morra taʼ kontradizzjoni.
Ipokresija
F’dawn iċ-ċerimonji ferm imxandrin, ir-rappreżentanti reliġjużi u governattivi kollha riedu li jitqiesu bħala benefatturi jew għallinqas jevitaw li jitqiesu bħala nies ħżiena. Madankollu, ġnus li kkundannaw l-atroċitajiet tal-passat bnew imħażen għall-armamenti, billi pprovdew somom kbar taʼ flus għal dak l-għan. Fl-istess ħin, dawn ma solvewx problemi vitali bħall-ġuħ, id-degradazzjoni morali, u t-tniġġis, waqt li taʼ spiss jgħidu li m’għandhomx biżżejjed flus.
Ir-reliġjon tad-dinja tipprova tikteb verżjonijiet taʼ l-istorja li jaħbu s-silenzju twil tagħha fuq l-atroċitajiet tad-dittatorjati u ma jikxfuhiex talli ħadmet minn taħt magħhom. Dawn ir-reliġjonijiet ma għamlu xejn biex iwaqqfu lin-nies taʼ l-istess reliġjon milli jbiċċru lil xulxin. Per eżempju, fit-Tieni Gwerra Dinjija, il-Kattoliċi qatlu lil Kattoliċi u l-Protestanti qatlu lil Protestanti minħabba li kienu taʼ nazzjonalitajiet differenti u fuq naħiet opposti. Iż-żewġ naħiet stqarrew li huma Kristjani imma pprattikaw dak li kien totalment kontra t-tagħlim taʼ Ġesù. (Mattew 26:52; Ġwann 13:34, 35; 1 Ġwann 3:10-12; 4:20, 21) Reliġjonijiet oħrajn għamlu l-istess ħaġa. Illum, f’diversi partijiet tad-dinja, għadhom qed isiru atroċitajiet minn membri taʼ dawn ir-reliġjonijiet.
Fi żmien Ġesù, il-mexxejja reliġjużi kienu ipokriti. Ġesù ddenunzjahom, billi qalilhom: “Ħażin għalikom, intom il-kittieba u l-Fariżej, uċuħ b’oħra! Intom tibnu l-oqbra lill-profeti, iżżejjnu l-monumenti tal-ġusti, u tgħidu, ‘Kieku konna fi żmien missirijietna ma konniex nissieħbu magħhom u nxerrdu demm il-profeti,’ u b’hekk weħidkom tagħtu xhieda li intom ulied il-qattiela tal-profeti!” (Mattew 23:29-31) Dawk il-mexxejja reliġjużi stqarrew li huma devoti imma kienu ipokriti li ppersegwitaw lil Ġesù u d-dixxipli tiegħu.
Lezzjonijiet Mgħallmin mill-Bibbja
Hemm lezzjonijiet x’wieħed jieħu mill-istorja sekulari, imma l-Bibbja hija s-sors taʼ lezzjonijiet bl-iktar benefiċċju. Hi ma tafdax ix-xogħol taʼ l-interpretazzjoni taʼ l-istorja f’idejn il-ġudizzju jew il-preġudizzju tal-bniedem. Il-Bibbja tispjega l-istorja u l-futur mill-mod kif jaħsibha Alla.—Isaija 55:8, 9.
L-Iskrittura titkellem dwar ġrajjiet sbieħ u koroh kif ukoll dwar nies tajbin u ħżiena. Spiss tistaʼ tittieħed lezzjoni tajba, li tkun fi qbil mar-rieda t’Alla, minn dawn ir-rakkonti. Wara li semma diversi ġrajjiet mill-istorja taʼ l-Iżraeliti tal-qedem, l-appostlu Pawlu kkonkluda: “Dan kollu ġralhom b’eżempju, u nkiteb bi twiddiba għalina.” (1 Korintin 10:11) Ġesù nnifsu ħareġ lezzjoni mill-istorja meta qal lid-dixxipli tiegħu: “Ftakru fil-mara taʼ Lot!”—Luqa 17:32.
Dak li Alla Jiftakar u Dak li Jinsa
Mill-Bibbja nitgħallmu li Alla jiftakar u jinsa individwi fuq il-bażi taʼ l-azzjonijiet tagħhom. Lil dawk li jidinbu imma juru ndiema, Alla jaħfrilhom “ħafna.” (Isaija 55:7) Jekk wieħed mill-agħar jindem u “jerġaʼ lura minn ħtijietu u jagħmel il-ħaqq u s-sewwa, . . . Ħtijietu . . . ma niftakarhomlux.”—Eżekjel 33:14-16.
Pawlu kiteb li “Alla m’hux se jkun hekk inġust li jinsa dak li intom għamiltu u l-imħabba li wrejtu lejn ismu.” (Lhud 6:10) B’hekk, Jehovah se jbierek lil dawk li jiftakarhom b’mod favorevoli. Il-leali Ġob talab: “M’hux li kont taħbini f’Art l-Imwiet . . . u tiffissali żmien li tiftakar fija.”—Ġob 14:13.
Għall-kuntrarju, Alla se jittratta maʼ dawk il-ħżiena li ma jindmux fi qbil mal-kliem li Hu qal lil Mosè: ‘Inħassru mill-ktieb tiegħi.’ (Eżodu 32:33) Iva, lil dawn il-ħżiena Alla se jinsiehom għal dejjem.
L-Imħallef Finali
Alla hu l-Imħallef finali taʼ l-istorja. (Ġenesi 18:25; Isaija 14:24, 27; 46:9-11; 55:11) Skond il-ġudizzju superjuri tiegħu, hu m’huwiex se jinsa d-diversi atroċitajiet li seħħew kontra l-umanità. Fil-jum taʼ l-għadab bi stmerrija ġusta tiegħu, hu se jiġġudika lin-nies responsabbli kollha u lill-istituzzjonijiet.—Apokalissi, kapitli 18, 19.
Fost dawn se jkun hemm is-sistema sħiħa tar-reliġjon falza, mogħtija l-isem simboliku fl-Iskrittura bħala “Babilonja l-Kbira.” Dwarha hemm miktub: “Għax dnubietha saru ħemel għoli sas-sema, u Alla ftakar fl-għemejjel ħżiena tagħha.”—Apokalissi 18:2, 5.
Dawn ir-reliġjonijiet suppost li kellhom jgħallmu lis-segwaċi tagħhom biex jagħmlu t-tajjeb imma naqsu li jagħmlu dan. B’hekk, il-Kelma t’Alla tgħid dwar ir-reliġjon tad-dinja kollha: “U fiha nstab id-demm tal-profeti u tal-qaddisin u tal-maqtulin kollha fuq l-art.” (Korsiv tagħna.) (Apokalissi 18:24) Minħabba li naqsu li jgħallmu lill-membri tagħhom biex iħobbu lil għajrhom u lil xulxin, dawn ir-reliġjonijiet huma mixlijin bi ħtija tad-demm.
Dinja Ġdida fil-Qrib!
Fl-aħħarnett, iż-żmien meta l-ħażen se jinqered huwa fil-qrib. (Sofonija 2:1-3; Mattew 24:3, 7-14) Imbagħad, se jasal iż-żmien meta ‘lanqas biki, għajat jew tbatija ma jkun hemm iżjed’ għal dawk li jgħixu fuq l-art ferħanin. (Apokalissi 21:3-5) L-atroċitajiet u l-massakri mhux se jidhru iktar għax il-ħakma taʼ l-art se tittieħed mingħand il-bnedmin u se tingħata lis-Saltna tas-sema t’Alla f’idejn il-“Prinċep tas-sliem,” Ġesù Kristu.—Isaija 9:5, 6 [9:6, 7, NW]; Danjel 2:44; Mattew 6:9, 10.
F’dak iż-żmien il-profezija taʼ Salm 46:10 [46:9, NW] se tkun twettqet kompletament: “[Alla] iwaqqaf il-gwerer sa tarf l-art.” Dik il-paċi se tibqaʼ għal dejjem għax, kif ibassar Isaija 2:4, “ebda ġens ma jerfaʼ x-xabla kontra ġens ieħor, u s-sengħa tal-gwerra ma jitgħallmuhiex iżjed.” B’hekk, Salm 37:11 ibassar: “Imma l-ġwejdin għad jirtu l-art, u bi sliem kotran jitgħaxxqu.” Iva, imbagħad se jingħad li “issa li strieħet u kkwitat l-art kollha, nfexxew f’għajat taʼ ferħ.”—Isaija 14:7.
Dan kollu jfisser li hemm dinja ġdida taʼ tjieba fil-qrib. U f’dik id-dinja ġdida, taħt il-ħakma tas-Saltna tas-sema t’Alla, se sseħħ ġrajja meraviljuża oħra—l-irxoxt tal-mejtin! Il-Kelma t’Alla tiggarantixxi: “Kemm it-tajbin u kemm il-ħżiena għad iqumu minn bejn l-imwiet.”—Atti 24:15.
Waqt li kien fuq l-art, Ġesù wera dan billi qajjem lin-nies mill-mewt. Per eżempju, meta qajjem lil waħda żagħżugħa, ir-rakkont jgħid: “Minnufih it-tfajla qamet, u qabdet timxi; . . . U [dawk li kienu qed josservaw] baqgħu miblugħin bil-għaġeb.” (Mark 5:42) Fl-irxoxt dawk li nqatlu fl-atroċitajiet, kif ukoll oħrajn li ilhom mejtin, se jiġu mqajmin mill-mewt u se jingħataw l-opportunità li jgħixu għal dejjem fuq l-art magħmula ġenna. (Luqa 23:43) U maż-żmien “ma jitfakkarx iżjed l-imgħoddi, f’moħħ ħadd aktar ma jiġi.”—Isaija 65:17.
Tkun qed taġixxi b’mod għaqli jekk int takkwista għarfien eżatt tal-Kelma t’Alla, il-Bibbja, u tagħmel ir-rieda tiegħu. Imbagħad Alla se jiftakrek b’mod favorevoli meta hu se jsolvi għal dejjem il-problema taʼ l-atroċitajiet u jerġaʼ jagħti l-ħajja lill-vittmi. Ġesù qal: “Din hi l-ħajja taʼ dejjem, li jagħrfu lilek, Alla waħdek veru, u lil Ġesù Kristu, li inti bgħatt.”—Ġwann 17:3.
[Stampi fʼpaġna 8, 9]
Alla se jittrasforma din l-art f’ġenna mimlija paċi
[Stampi fʼpaġna 10]
Alla se jneħħi l-effetti taʼ l-atroċitajiet tal-passat billi jqajjem lill-mejtin