“मुलं यहोवाकडून मिळालेला वारसा आहेत”

“वारसा” हा शब्द ऐकल्यावर तुमच्या मनात काय येतं? कदाचित तुम्ही पैशांचा, जमिनीचा किंवा वाडवडिलांकडून मिळालेल्या एखाद्या मौल्यवान वस्तूचा विचार कराल. वारसा कोणत्याही रूपात असला, तरी तो आपल्यासाठी खूप मौल्यवान असतो आणि आपण तो जिवापाड जपतो.

बायबलमध्ये मुलांना “यहोवाकडून मिळालेला वारसा” म्हटलंय. (स्तो. १२७:३) त्यामुळे ख्रिस्ती आईवडील त्यांच्या मुलांना यहोवाने दिलेली अनमोल भेट समजतात. त्यांना सुरक्षित ठेवायला आणि त्यांच्या शारीरिक आणि भावनिक गरजा पूर्ण करायला ते शक्य ते करतात. तसंच, ते त्यांना यहोवासोबत जवळचं नातं जोडायलाही मदत करतात.

पण दुःखाची गोष्ट म्हणजे, आज बरेच आईवडील त्यांच्या मुलांना देवाकडून मिळालेली भेट समजत नाहीत. (यश. ४९:१५; २ तीम. ३:१-३) तसंच, इतर काहींना त्यांच्या मुलांची मनापासून काळजी घ्यायची इच्छा तर असते, पण काही अव्हानांमुळे त्यांना तसं करणं जड जातं. मग ही आव्हानं कोणती आहेत? यहोवा आईवडिलांकडून कोणती अपेक्षा करतो? आणि आईवडिलांना आपल्या मुलांचा चांगल्या प्रकारे सांभाळ करायला कशामुळे मदत होईल?

आव्हानं

• लोकांचा दबाव. काही देशांमध्ये जोडप्यांना जितकी जास्त मुलं असतात, तितका त्यांना समाजात मान असतो. म्हणून काही जोडपी घरच्यांकडून किंवा नातेवाइकांकडून येणाऱ्‍या दबावामुळे, आपली ऐपत नसतानाही बरीच मुलं होऊ देतात.

• भविष्याची चिंता. काही देशांमध्ये अन्‍नटंचाई असल्यामुळे किंवा वैद्यकीय सुविधा कमी असल्यामुळे लहान मुलांच्या मृत्यूचं प्रमाण खूप जास्त आहे. त्यामुळे काही आईवडील असा विचार करतात, की आपण जर जास्त मुलं होऊ दिली तर निदान त्यांतली काही मुलं तरी जगतील. तसंच, काही देशांमध्ये सरकारं वृद्धांच्या मदतीसाठी योजना करत नाहीत. अशा देशांमधले लोक म्हातारपणी मदत व्हावी म्हणून जास्त मुलं होऊ देतात.

• कुटुंब नियोजन. काही देशांमध्ये गर्भनिरोधक साधनं सहजासहजी उपलब्ध नसतात. तर काही ठिकाणी कमी दर्जेची साधनं उपलब्ध असल्यामुळे लोक त्यांचा वापर करत नाहीत. कारण त्यांना वाटतं, की त्यामुळे त्यांच्या शरीराला नुकसान होऊ शकतं. तसंच, काही ठिकाणी ही साधनं विकत घेणं लोकांना परवडण्यासारखं नसल्यामुळे ते त्यांचा वापर करत नाहीत.a

यहोवा आईवडिलांकडून कोणती अपेक्षा करतो?

मुलांच्या गरजा पुरवाव्यात. यहोवाने आईवडिलांना त्यांच्या अल्पवयीन मुलांची काळजी घ्यायची जबाबदारी सोपवली आहे. त्यासाठी आईवडिलांनी मेहनत करावी आणि त्यांच्या प्रत्येक मुलाची अन्‍न, वस्त्र आणि निवाऱ्‍याची गरज पूर्ण करावी असं यहोवाला वाटतं. तसंच, त्यांनी मुलांना शालेय शिक्षण पुरवण्याचीसुद्धा गरज आहे. पण त्यासाठी मुलांना आपल्यापासून दूर बोर्डिंग स्कूलला पाठवायची गरज नाही. उलट आपली मुलं मोठी होईपर्यंत ती आपल्यासोबतच राहावी या गोष्टीची प्रत्येक ख्रिस्ती आईवडील खातरी करतात. आणि ते आपल्या मुलांना जीवनात उपयोगी पडतील अशी कौशल्य शिकून घ्यायलाही मदत करतात. तसंच, ते प्रत्येक मुलाला वेळ देतात. त्यामुळे मुलांना प्रेमाची आणि सुरक्षेची जाणीव होते. पण या सगळ्या गोष्टी करण्यासाठी आईवडिलांनी श्रीमंत असणं गरजेचंय का? नाही. यहोवा अशी अपेक्षा करत नाही. खरंतर, यहोवाने त्याच्या लाडक्या मुलाची जबाबदारी एका गरीब, पण कष्टाळू जोडप्यावर सोपवली.—मत्त. १३:५५, ५६; लूक २:२४.

बायबल तत्त्व: “जो स्वतःच्या माणसांच्या, आणि विशेषतः आपल्या कुटुंबातल्या सदस्यांच्या गरजा पुरवत नाही, त्याने विश्‍वास नाकारला आहे. तो विश्‍वास नसलेल्या माणसापेक्षाही वाईट आहे.”—१ तीम. ५:८.

यहोवाला माहीत आहे, की आईवडिलांचं वय झाल्यावर त्यांना मुलांच्या मदतीची गरज पडू शकते. खरंतर मुलं जेव्हा त्यांच्या वयस्कर आईवडिलांना गरजेच्या गोष्टी पुरवण्याची व्यवस्था करतात, तेव्हा ते त्यांचा आदर करत असल्याचं दाखवतात. (निर्ग. २०:१२; १ तीम. ५:४) पण आपल्या मुलांनी आपल्यासाठी काय केलं पाहिजे याचा विचार करण्याऐवजी, आपण आपल्या मुलांसाठी काय करू शकतो याचा विचार आईवडिलांनी करावा असं यहोवाला वाटतं.—२ करिंथ. १२:१४.

यहोवाबद्दल शिकवावं. मुलांनी यहोवावर प्रेम करावं आणि त्याची उपासना करावी, म्हणून त्यांना योग्य शिक्षण देण्याची जबाबदारीही आईवडिलांवर आहे. आणि ही जबाबदारी सगळ्यात महत्त्वाची आहे असं यहोवाला वाटतं.—अनु. ६:६, ७.

बायबल तत्त्व: “[मुलांना] यहोवाच्या शिस्तीत आणि शिक्षणात वाढवत राहा.”—इफिस. ६:४.

आईवडिलांना आपल्या मुलांचा चांगल्या प्रकारे सांभाळ करायला कशामुळे मदत होईल?

आधीच योजना बनवा. जर तुम्ही कुटुंब वाढवायची योजना करत असाल, तर तुमच्या परिस्थितीचा काळजीपूर्वक विचार करा. उदाहरणार्थ, तुम्हाला जर बरीच मुलं झाली, तर तुम्हाला त्या प्रत्येकाच्या खाण्या-पिण्याची, कपड्यालत्त्याची आणि शिक्षणाची जबाबदारी पेलता येईल का? जर तसं नसेल, तर किती मुलं होऊ द्यायची याबद्दल तुमच्या जोडीदाराशी बोला. कारण तुम्हाला प्रत्येक मुलाला यहोवाच्या इच्छेप्रमाणे वाढवावं लागणार आहे. आपण ठरवल्याप्रमाणेच आपल्या जीवनात सगळं घडणार नाही हे यहोवाला माहीत आहे. (उप. ९:११) असं असलं तरी, तुम्ही मुलांना वाढवण्यासाठी जी मेहनत घ्याल त्यावर यहोवा नक्की आशीर्वाद देईल.

बायबल तत्त्व: “मेहनत करणाऱ्‍यांच्या योजना नक्कीच यशस्वी होतात, पण जे उतावीळपणे वागतात त्यांच्यावर गरिबी आल्याशिवाय राहत नाही.”—नीति. २१:५.

“तुमच्यापैकी असा कोण आहे की ज्याला एक बुरूज बांधायचा असेल, तर तो आधी बसून खर्चाचा हिशोब लावणार नाही? आणि तो पूर्ण करायची आपली ऐपत आहे की नाही याची खातरी करणार नाही?”—लूक १४:२८.

यहोवाला पहिली जागा द्या. कुटुंबात यहोवाच्या उपासनेला पहिली जागा द्या. तुमच्या मुलांना यहोवावर प्रेम करायला शिकवा. त्यांना सभांमध्ये लक्ष द्यायला आणि त्यांतून शिकायला मदत करा. दर आठवडी कौटुंबिक उपासना करा. मुलांना प्रचार करायला शिकवा. तुमची जबाबदारी तुमच्या मोठ्या मुलांवर किंवा नातेवाइकांवर सोपवू नका. मुलांना यहोवावर प्रेम करायला शिकवण्यासाठी खूप वेळ द्यावा लागतो आणि मेहनत घ्यावी लागते. पण त्यातून मिळणाऱ्‍या आनंदाची तुलना तुम्ही कशाशीच करू शकत नाही.

बायबल तत्त्व: “माझी मुलं सत्याच्या मार्गावर चालत राहतात हे ऐकून मला जितका आनंद होतो, तितका दुसऱ्‍या कोणत्याही गोष्टीने होत नाही.”—३ योहा. ४.b

यहोवावर भरवसा ठेवा. कुटुंब वाढवण्याबद्दल किंवा मुलांचं संगोपन करण्याबद्दल तुमच्या आजूबाजूच्या लोकांची वेगवेगळी मतं असू शकतात. पण त्यांचं ऐकण्यापेक्षा यहोवावर भरवसा ठेवा आणि त्याने दिलेल्या तत्त्वांचं पालन करा.

जर तुम्ही जास्त मुलं न होऊ द्यायचं ठरवलं, तरी म्हातारपणात यहोवा तुम्हाला एकटं सोडणार नाही याची खातरी ठेवा. मुलांना “म्हातारपणाची काठी” समजू नका. ‘म्हातारपणात माझं कसं होईल’ अशी चिंता करू नका. कारण यहोवाने तुमची काळजी घ्यायचं वचन दिलंय आणि तो त्याचं वचन कधीच मोडणार नाही.—यहो. २३:१४.

बायबल तत्त्व: “यहोवावर अगदी मनापासून भरवसा ठेव आणि स्वतःच्या समजशक्‍तीवर अवलंबून राहू नकोस. तुझ्या सर्व कार्यांत त्याची आठवण ठेव, म्हणजे तो तुझे मार्ग मोकळे करेल.”—नीति. ३:५, ६.

“मी तरुण होतो आणि आता म्हातारा झालोय, पण आजपर्यंत मी एकाही नीतिमान माणसाला निराधार झालेलं, किंवा त्याच्या मुलाबाळांना अन्‍नासाठी भीक मागत असलेलं पाहिलं नाही.”—स्तो. ३७:२५.

“आधी देवाचं राज्य आणि त्याचं नीतिमत्त्व मिळवण्याचा प्रयत्न करत राहा. मग या सगळ्या गोष्टीही तुम्हाला दिल्या जातील.”—मत्त. ६:३३.

खरंच, मुलं यहोवाकडून मिळालेली एक अनमोल भेट आहे. जेव्हा ख्रिस्ती आईवडील यहोवाकडून मिळालेल्या या भेटीची मनापासून काळजी घेतात, तेव्हा त्याला किती आनंद होत असेल! ते आपल्या मुलांच्या शारीरिक, भावनिक आणि आध्यात्मिक गरजा पूर्ण करतात. ते कुटुंबाचं नियोजन करतात आणि लोक काय म्हणतील याचा विचार करण्याऐवजी यहोवाच्या तत्त्वांचं पालन करतात. असं करून ते दाखवतात की त्यांची मुलं त्यांच्यासाठी “यहोवाकडून मिळालेला वारसा” आहेत.