ख्रिस्ती जीवन

आठवड्यादरम्यान होणाऱ्‍या सभेचं नवीन वैशिष्ट्य

जानेवारी २०१८ पासून आठवड्यादरम्यानच्या सभेत, न्यू वर्ल्ड ट्रान्सलेशन ऑफ द होली स्क्रिपचर्स याच्या ऑनलाईन अभ्यास आवृत्तीमध्ये (nwtsty) असलेल्या अभ्यासासाठी माहिती आणि मिडिया यांचा समावेश असेल. ही आवृत्ती तुमच्या भाषेत सध्या जरी उपलब्ध नसली, तरीही सभेत यांचा समावेश केला जाईल. त्यामुळे तुमची सभेची तयारी अधिक अर्थपूर्ण बनेल आणि सर्वात महत्त्वाची गोष्ट म्हणजे तुमचा प्रेमळ पिता यहोवा याच्यासोबत तुमचा नातेसंबंध आणखी मजबूत होईल.

अभ्यासासाठी माहिती

यामुळे बऱ्‍याच शास्त्रवचनांबद्दलची सांस्कृतिक, भौगोलिक आणि भाषेशी संबंधित खोलवर माहिती तुम्हाला मिळेल.

मत्तय १२:२०

मिणमिणती वात: बायबल काळात, जैतुनाच्या तेलाने भरलेला मातीचा लहान दिवा घरात वापरला जायचा. त्यातली जवसाची वात, तेल वर ओढून ज्योतीला तेल पुरवत असे. “मिणमिणती वात” यासाठी जो ग्रीक शब्द वापरण्यात आला आहे, तो कदाचित अशा वातीला सूचित करत असावा जी विझलेली आहे किंवा विझण्याच्या बेतात आहे, पण तिच्यात लहानशी ठिणगी अजूनही बाकी आहे. यशया ४२:३ मध्ये येशू कशा प्रकारे दया दाखवेल, याबद्दल भविष्यवाणी करण्यात आली होती. नम्र आणि दुःखीकष्टी लोकांमध्ये असलेली आशेची ठिणगी तो कधीच विझू देणार नाही.

मत्तय २६:१३

खरं: ग्रीक शब्द आमेन हा मूळचा हिब्रू शब्द आहे. याचा अर्थ “असंच होवो” किंवा “खात्रीने” असा होतो. एखादं विधान करताना, वचन देताना किंवा भविष्यवाणी करताना येशूने अनेकदा या शब्दाने सुरुवात केली. असं करण्याद्वारे तो जे काही बोलत आहे, ते विश्‍वसनीय व खरं आहे यावर त्याने जोर दिला. येशूने वापरलेला आमेन किंवा खरं हा शब्द फक्‍त शुभवर्तमानात वाचायला मिळतो. संपूर्ण योहानच्या शुभवर्तमानात येशूने “आमेन” हा शब्द दोनदा सोबत वापरला, तेव्हा त्याचं भाषांतर ‘अगदी खरं’ असं करण्यात आलं आहे.—योह १:५१.

मिडिया

फोटो, चित्रं, संवाद नसलेले व्हिडिओ आणि ॲनिमेशन यांद्वारे बायबलमधली बारीकसारीक माहिती समजायला मदत होते.

बेथफगे, जैतुनांचा डोंगर आणि जेरुसलेम

या लहान व्हिडिओत एक रस्ता दाखवला आहे. जेरुसलेमच्या पूर्वेकडे असलेलं इट्युर (कदाचित बायबल काळातल्या बेथफगे) इथून हा रस्ता जैतुनांच्या डोंगरातल्या सर्वात उंच शिखरापर्यंत जातो. बेथफगेच्या पूर्वेकडे आणि जैतुनांच्या डोंगराच्या पूर्वेकडच्या उतारावर बेथानी आहे. जेरुसलेममध्ये असताना येशू आणि त्याचे शिष्य सहसा बेथानीमध्ये मुक्काम करायचे. आज ते छोटं शहर एल अजारिए म्हणून ओळखलं जातं. या नावाचा अरबी भाषेत अर्थ “लाजरचे ठिकाण” असा होतो. येशू नक्कीच मार्था, मरीया आणि लाजरच्या घरी थांबला असावा. (मत्त २१:१७; मार्क ११:११; लूक २१:३७; योह ११:१) या व्हिडिओत दाखवलेल्या मार्गाने येशू त्यांच्या घरातून जेरुसलेमला गेला असावा. इ.स. ३३ च्या निसान ९ ला, जैतुनांच्या डोंगरावरून गाढवीच्या पिल्लावर बसून येशू जेरुसलेमला आला, तेव्हा त्याने बेथफगेपासून जेरुसलेमला जाणाऱ्‍या रस्त्याचा वापर केला असावा.

बेथानी ते बेथफगेचा रस्ता
बेथफगे
जैतुनांचा डोंगर
किद्रोन खोरे
मंदिराचा डोंगर

टाचेतल्या हाडातला खिळा

११.५ सेंमी लांबीचा लोखंडी खिळा, माणसाच्या टाचेच्या हाडात घुसवल्याच्या हस्तकृतीचा हा फोटो आहे. खिळा ठोकलेल्या हाडाचा अवशेष, रोमन काळातला असून १९६८ मध्ये जेरुसलेमच्या उत्तर भागात खोदकाम करताना सापडला. माणसाला लाकडी खांबावर खिळण्यासाठी खिळ्यांचा वापर केला जायचा, असा पुरातत्वशास्त्रीय पुरावा मिळतो. रोमी सैनिकांनी येशूला वधस्तंभावर खिळण्यासाठी, कदाचित अशाच खिळ्यांचा वापर केला असावा. हा अवशेष, अस्थीपेटी म्हटलं जाणाऱ्‍या एका दगडी पेटीत सापडला. मृत व्यक्‍तीचं शरीर कुजल्यानंतर तिची हाडं अशा अस्थीपेटीत ठेवली जायची. यावरून असं दिसतं, की वधस्तंभावर खिळलेल्या व्यक्‍तीला पुरलं जाऊ शकत होतं.—मत्त २७:३५.