सेवाकार्यातील आपली कौशल्ये सुधारण्यासाठी—व्यापारी क्षेत्रात प्रचार कार्य करा

हे का महत्त्वाचं: कित्येक लोक कामासाठी दिवसातील अनेक तास घराबाहेर असतात. अशा लोकांपर्यंत राज्याचा संदेश पोहचवायचा असेल तर आपण त्यांना त्यांच्या कामाच्या ठिकाणी भेटू शकतो. व्यापारी क्षेत्रात प्रचार कार्य केल्यानं आपल्याला आनंद मिळू शकतो आणि चांगले परिणामही मिळू शकतात. कारण घरोघरच्या कार्यामध्ये बरीच घरं बंद असू शकतात पण व्यापारी क्षेत्रात शक्यतो दुकानं बंद नसतात. आणि दुकानात काम करणारे लोक, गिऱ्‍हाईक मिळवण्यासाठी सर्वांबरोबर चांगलं वागतात. या क्षेत्रात चांगले परिणाम मिळवण्यासाठी प्रचारकांनी व्यवहारकुशलतेनं वागलं पाहिजे आणि त्यांचा पेहराव सभ्य असला पाहिजे. (२ करिंथ. ६:३) म्हणून व्यापारी क्षेत्रात किती वेळा आणि कोण-कोण प्रचार कार्य करत आहे यावर सेवा पर्यवेक्षकांनी काळजीपूर्वक लक्ष ठेवलं पाहिजे.

हे कसं करावं:

दुकानात काम करणाऱ्‍या व्यक्‍तीचा जास्त वेळ घेतला तर दुसऱ्‍यांदा कदाचित ती आपल्याशी बोलणार नाही किंवा मालक आपल्याला तिच्याशी बोलू देणार नाही म्हणून तुमचं सादरीकरण छोटंच राहू द्या.
दुकानात कमी गर्दी असते अशा वेळी त्यांना भेटा, जसं की सकाळच्या वेळी.
आधी मालकासोबत किंवा मॅनेजरसोबत बोलण्याचा प्रयत्न करा. तुम्ही मैत्रिपूर्ण रीत्या असं बोलू शकता: “बरेच लोक दिवसा घरी भेटत नाहीत, म्हणून आम्ही त्यांना कामावर भेटण्याचा प्रयत्न करत आहोत.” त्यांच्याबरोबर थोडक्यात बोलून त्यांना एक पत्रिका, नियतकालिक, किंवा दुसरं कोणतंही साहित्य द्या. आपण सेल्समन आहोत असं त्यांना वाटू नये म्हणून अनुदानाविषयी स्वतःहून काही सांगू नका. पण त्यांनी विचारलं तरच या योजनेबद्दल सांगा.
मालकानं किंवा मॅनेजरनं चांगल्याप्रकारे तुमचं बोलणं ऐकून घेतलं तर तिथं काम करणाऱ्‍यांशी बोलायची परवानगी मागा. किंवा काही ठिकाणी लोक जेवणासाठी, विश्रांतीसाठी जिथं बसतात तिथं काही साहित्य ठेवण्याची तुम्ही परवानगी मागू शकता. जेणेकरून त्यांच्या जेवणाच्या सुट्टीत ते हे साहित्य वाचू शकतात.
चर्चा करण्यासाठी विचार करून विषय निवडा.
परिस्थितीनुसार वागा आणि फेरबदल करायला तयार राहा. उदाहरणार्थ, दुकानात गिऱ्‍हाईक आलं असेल, किंवा दुकानातील व्यक्‍ती कामात असेल तर तिचं काम होईपर्यंत थांबा आणि मग बोला.

या महिन्यादरम्यान हे करून पाहा:

तुमच्या कौटुंबिक उपासनेत, व्यापारी क्षेत्रात कसं बोलावं याचं एक छोटंसं सादरीकरण तयार करून त्याचा सराव करा. अशा क्षेत्रात तुम्हाला कार्य करण्याची संधी मिळाली तर तुम्ही या सादरीकरणाचा उपयोग करू शकता.