१. आपल्या दु:खासाठी देव जबाबदार आहे का?

हे जाणून घेणं का महत्त्वाचं आहे?

दु:खासाठी देवच जबाबदार आहे असं बरेच लोक मानतात आणि म्हणून त्यांचा त्याच्यावरचा विश्‍वास उडाला आहे.

विचार करा

आज बरेच धार्मिक पुढारी देवच आपल्या दु:खासाठी जबाबदार आहे असं शिकवतात. उदाहरणार्थ, ते असं म्हणतात की:

• नैसर्गिक विपत्ती आणून देव आपल्याला शिक्षा देतो.

• देवाला स्वर्गात आणखी जास्त देवदूत हवे असतात म्हणून तो मुलांना आपल्याकडे बोलवून घेतो.

• देव युद्धांचं समर्थन करतो.

या तिन्ही गोष्टींमुळे लोकांना मोठ्या प्रमाणावर दु:ख-कष्ट सोसावे लागतात. पण, असं असू शकतं का की धार्मिक पुढारीच देवाबद्दल खोटं शिकवत असतील? आणि देवाने त्यांना नाकारलं असेल तर?

बायबल काय म्हणतं?

देव आपल्यावर दु:ख आणत नाही.

कारण जर त्याने तसं केलं असतं, तर बायबलमध्ये दिलेल्या त्याच्या गुणांच्या हे विरोधात असतं. जसं की बायबल म्हणतं:

“त्याचे [देवाचे] सर्व मार्ग न्यायाचे आहेत . . . तो न्यायी व सरळ आहे.”—अनुवाद ३२:४.

“देवाकडून दुष्कर्म व्हावे, सर्वसमर्थाकडून अन्याय व्हावा, ही कल्पनाही करायला नको.”—ईयोब ३४:१०.

“सर्वसमर्थ प्रभू विपरीत न्याय करत नाही.”—ईयोब ३४:१२.

देवाबद्दल खोटं शिकवणारे धर्म त्याला मान्य नाहीत.

यात अशा धर्मांचा समावेश आहे, जे शिकवतात की आपल्यावर येणाऱ्‍या दु:खासाठी देवच जबाबदार आहे. तसंच, यात असे धर्मही आहेत जे युद्धात आणि हिंसेत भाग घेतात.

“संदेष्टे माझ्या नामाने असत्य संदेश देतात; मी त्यांना पाठवले नाही, मी त्यांच्याबरोबर बोललो नाही; ते खोटा दृष्टान्त . . . व आपल्या मनातील कपटयोजना संदेशरूपाने तुम्हाला सांगतात.”—यिर्मया १४:१४.

येशूने धार्मिक ढोंगीपणाचा धिक्कार केला.

“मला ‘प्रभू, प्रभू,’ म्हणणारा प्रत्येक जण स्वर्गाच्या राज्यात जाणार नाही, तर स्वर्गातील माझ्या पित्याच्या इच्छेप्रमाणे करणाराच त्या राज्यात जाईल. त्या दिवशी पुष्कळ लोक मला म्हणतील: ‘प्रभू, प्रभू, आम्ही तुझ्या नावाने संदेश दिले नाहीत का? तुझ्या नावाने दुरात्मे काढले नाहीत का? आणि तुझ्या नावाने अनेक अद्‌भुत कृत्ये केली नाहीत का?’ पण, मी त्यांना स्पष्टपणे सांगेन: ‘अरे वाईट कामं करणाऱ्‍यांनो! मी तुम्हाला कधीच ओळखत नव्हतो, माझ्यापुढून निघून जा!’”—मत्तय ७:२१-२३.