यहेज्केल
१७ यहोवाकडून मला परत एकदा असा संदेश मिळाला: २ “मनुष्याच्या मुला, इस्राएलच्या घराण्याला एक कोडं घाल आणि त्यांना एक दाखला सांग.+ ३ तू त्यांना म्हण, ‘सर्वोच्च प्रभू यहोवा असं म्हणतो: “मोठे पंख असलेला, लांब पिसारे आणि भरपूर रंगीबेरंगी पिसं असलेला एक भला मोठा गरुड+ लबानोनला+ आला. त्याने येऊन एका देवदाराच्या झाडाचा शेंडा घेतला.+ ४ त्या झाडाची सर्वात वरची कोवळी डहाळी त्याने तोडली, आणि ती व्यापाऱ्यांच्या देशात* नेऊन त्याने ती व्यापाऱ्यांच्या शहरात लावली.+ ५ मग त्याने देशातलं काही बी घेतलं+ आणि ते एका सुपीक शेतात पेरलं. त्याने ते वाळुंजाच्या झाडासारखं भरपूर पाणी असलेल्या ठिकाणी लावलं. ६ पुढे ते बी अंकुरलं आणि त्यातून एक द्राक्षवेल उगवली. ती वेल कमी उंचीची असून जमिनीवर सगळीकडे पसरली होती.+ तिची पानं आतल्या बाजूला वळली होती आणि तिची मुळं तिच्याखाली वाढत गेली. अशा प्रकारे, त्या बीपासून एक द्राक्षवेल उगवली आणि तिला कोवळ्या डहाळ्या आणि फांद्या फुटल्या.+
७ त्यानंतर, मोठे पंख आणि लांब पिसारे असलेला+ दुसरा एक गरुड तिथे आला.+ तेव्हा, त्याच्याकडून पाणी मिळावं म्हणून त्या वेलीने मोठ्या आनंदाने त्याच्याकडे आपली मुळं पसरवली; तिला ज्या ठिकाणी लावण्यात आलं होतं, त्यापासून दूर तिने त्या गरुडाच्या दिशेने आपली मुळं पसरवली. तिने आपली पानं आणि फांद्याही त्याच्या दिशेने पसरवल्या.+ ८ खरंतर, तिला फांद्या फुटाव्यात, फळं यावीत आणि ती एक मोठी वेल व्हावी, म्हणून तिला आधीच भरपूर पाणी असलेल्या ठिकाणी, एका सुपीक शेतात लावण्यात आलं होतं.”’+
९ तू लोकांना असं सांग, ‘सर्वोच्च प्रभू यहोवा असं म्हणतो: “ती खरंच बहरेल का? तिचे अंकुर सुकून जावेत आणि तिची फळं सडून जावीत, म्हणून कोणी तिला मुळासकट उपटून टाकणार नाही का?+ खरंतर ती इतकी वाळून जाईल, की तिला मुळासकट उपटून काढायला मजबूत हाताची किंवा खूप लोकांची गरज पडणार नाही. १० तिला जरी एका जागेवरून काढून दुसऱ्या जागी लावण्यात आलेलं असलं, तरी ती खरंच बहरेल का? पूर्वेकडचा वारा वाहू लागला, की ती पूर्णपणे जळून जाणार नाही का? ज्या ठिकाणी ती बहरली होती, तिथेच ती सुकून जाईल.”’”
११ मग पुन्हा एकदा मला यहोवाकडून असा संदेश मिळाला: १२ “जरा त्या बंडखोर घराण्याला जाऊन विचार, ‘या सगळ्या गोष्टींचा काय अर्थ होतो हे तुम्हाला समजत नाही का?’ तू त्यांना म्हण, ‘बघा! बाबेलचा राजा यरुशलेमला आला आणि तिथल्या राजाला आणि अधिकाऱ्यांना बाबेलला घेऊन गेला.+ १३ पुढे त्याने राजाच्या वंशातल्या एकाला+ घेऊन त्याच्याशी करार केला आणि त्याला शपथ घ्यायला लावली.+ नंतर तो देशातल्या प्रतिष्ठित माणसांना आपल्यासोबत घेऊन गेला.+ १४ देशाने खाली पडावं, पुन्हा कधीच आपलं डोकं वर काढू नये आणि फक्त त्याचा करार पाळूनच देशातल्या लोकांचं अस्तित्व टिकून राहावं म्हणून त्याने असं केलं.+ १५ पण यहूदाच्या राजाने बाबेलच्या राजाविरुद्ध बंड केलं.+ त्याने इजिप्तकडून मोठं सैन्य+ आणि घोडे मागवण्यासाठी आपले दूत तिथे पाठवले.+ पण, तो खरंच यशस्वी होईल का? अशा गोष्टी करणाऱ्याला शिक्षा होणार नाही का? करार मोडूनही तो वाचेल का?’+
१६ ‘सर्वोच्च प्रभू यहोवा म्हणतो, “मी माझ्या जीवनाची शपथ घेऊन सांगतो, तो बाबेलमध्येच मरेल; ज्याने* त्याला* राजा बनवलं, ज्याची शपथ त्याने तुच्छ लेखली आणि ज्याचा करार त्याने मोडला, तो राजा जिथे राहतो तिथेच तो मरेल.+ १७ बाबेलचे सैनिक जेव्हा शहरातल्या अनेकांना मारून टाकायला शहराभोवती दगड-मातीचा ढिगारा रचतील आणि भिंत उभारून शहराला वेढा घालतील, तेव्हा फारोची मोठी सेना आणि त्याच्या सैनिकांच्या असंख्य तुकड्या कुठल्याच कामी येणार नाहीत.+ १८ त्याने शपथ तुच्छ लेखून करार मोडला. वचन देऊनही त्याने या सगळ्या गोष्टी केल्या, म्हणून तो वाचणार नाही.”’
१९ ‘म्हणून सर्वोच्च प्रभू यहोवा असं म्हणतो: “त्याने माझी शपथ तुच्छ लेखली आणि माझा करार मोडला, म्हणून मी माझ्या जीवनाची शपथ घेऊन सांगतो, की याचे परिणाम मी त्याच्याच माथ्यावर मारीन.+ २० मी त्याच्यावर माझं जाळं टाकीन आणि तो त्यात अडकेल.+ मी त्याला बाबेलला घेऊन जाईन आणि माझ्याशी अविश्वासूपणे वागल्याबद्दल मी तिथे त्याचा न्याय करीन.+ २१ त्याच्या सैन्यातली पळून गेलेली सर्व माणसं तलवारीने मारली जातील, आणि उरलेल्यांची सगळीकडे पांगापांग होईल.+ तेव्हा तुम्हाला कळून येईल, की मी यहोवा स्वतः हे बोललोय.”’+
२२ ‘सर्वोच्च प्रभू यहोवा म्हणतो: “मी मोठ्या देवदार झाडाच्या शेंड्यावरून एक डहाळी घेईन+ आणि ती लावीन; मी त्याच्या अगदी वरच्या छोट्या फांद्यांतून एक कोवळी डहाळी घेईन+ आणि एका मोठ्या, उंच पर्वतावर स्वतः ती लावीन.+ २३ मी इस्राएलच्या एका उंच पर्वतावर ती लावीन; तिला फांद्या फुटतील, फळं येतील आणि ती एक मोठं देवदाराचं झाड बनेल. तिच्याखाली सगळ्या प्रकारचे पक्षी राहतील आणि तिच्या फांद्यांच्या सावलीत ते विसावा घेतील. २४ मग सगळ्या झाडांना कळून येईल, की मी स्वतः यहोवानेच मोठ्या झाडाला खाली पाडलं आणि छोट्या झाडाला उंच केलं.+ मीच हिरव्यागार झाडाला सुकवून टाकलं आणि सुकलेल्या झाडाला बहर आणला.+ मी यहोवा स्वतः हे बोललोय आणि मी स्वतः ते पूर्णही केलंय.”’”