यहेज्केल

१८ मग यहोवाकडून परत मला संदेश मिळाला. तो मला म्हणाला: २ “इस्राएलमध्ये ती कुठली म्हण वापरली जाते? हीच ना, की ‘आंबट द्राक्षं वडिलांनी खाल्ली, पण दात मात्र मुलांचे आंबले’?+

३ ‘पण, मी माझ्या जीवनाची शपथ घेऊन सांगतो, यापुढे इस्राएलमध्ये ही म्हण वापरली जाणार नाही,’ असं सर्वोच्च प्रभू यहोवा म्हणतो. ४ ‘पाहा! सगळ्यांच्या जिवावर माझा हक्क आहे. जसा वडिलांच्या जिवावर, तसाच मुलाच्या जिवावरही माझा हक्क आहे. जो कोणी* पाप करतो, तोच मरेल.

५ समजा एक नीतिमान माणूस आहे. तो नेहमी न्यायाने वागतो आणि योग्य ते करतो. ६ तो डोंगरांवर मूर्तींपुढे अर्पण केलेली बलिदानं खात नाही.+ इस्राएलच्या घराण्याच्या घृणास्पद मूर्तींकडे* आशेने पाहत नाही. शेजाऱ्‍याच्या बायकोसोबत व्यभिचार करत नाही,+ किंवा मासिक पाळी चालू असलेल्या स्त्रीसोबत शरीरसंबंध ठेवत नाही.+ ७ तो कोणालाही वाईट वागणूक देत नाही.+ उलट, कर्जदाराने त्याच्याकडे जे काही गहाण ठेवलं होतं ते तो परत करतो.+ तो कोणालाही लुबाडत नाही.+ उलट, तो भुकेल्या माणसाला आपल्या घासातला घास देतो+ आणि ज्याच्या अंगावर कपडे नाहीत त्याचं अंग झाकतो.+ ८ तो व्याज घेत नाही किंवा कोणाचाही गैरफायदा घेऊन नफा कमवत नाही;+ तो अन्यायाने वागत नाही.+ दोन व्यक्‍तींमध्ये तो योग्य न्याय करतो.+ ९ मला विश्‍वासू राहण्यासाठी तो माझ्या कायद्यांप्रमाणे चालतो आणि माझे न्याय-निर्णय* पाळतो. असा हा नीतिमान माणूस नक्की जिवंत राहील,’+ असं सर्वोच्च प्रभू यहोवा म्हणतो.

१० ‘पण समजा, त्याला असा एक मुलगा आहे, जो चोऱ्‍यामाऱ्‍या करतो,+ खून करतो+ किंवा यांपैकी कुठलीही गोष्ट करतो. ११ म्हणजे, (त्याच्या वडिलांनी जरी यांपैकी कुठल्याही गोष्टी केल्या नसल्या, तरी) तो डोंगरांवर मूर्तींपुढे अर्पण केलेली बलिदानं खातो, शेजाऱ्‍याच्या बायकोसोबत व्यभिचार करतो, १२ गोरगरिबांना आणि गरजूंना वाईट वागणूक देतो,+ लोकांना लुटतो, एखाद्याने गहाण ठेवलेली वस्तू परत करत नाही, घृणास्पद मूर्तींकडे आशेने पाहतो,+ किळसवाणी कामं करतो,+ १३ व्याज घेतो आणि एखाद्याचा गैरफायदा घेऊन नफा कमवतो.+ अशी सगळी घृणास्पद कामं केल्यामुळे तो मुलगा जिवंत राहणार नाही; त्याला नक्कीच ठार मारलं जाईल. आणि त्याच्या मृत्यूसाठी तोच जबाबदार असेल.

१४ पण समजा असा एक मुलगा आहे, ज्याने आपल्या वडिलांनी केलेली सगळी पापं पाहिली आहेत. पण तो स्वतः तशी कामं करत नाही. १५ तो डोंगरांवर मूर्तींपुढे अर्पण केलेली बलिदानं खात नाही, इस्राएलच्या घराण्याच्या घृणास्पद मूर्तींकडे आशेने पाहत नाही, शेजाऱ्‍याच्या बायकोसोबत व्यभिचार करत नाही. १६ तो कोणालाही वाईट वागणूक देत नाही, कर्जदाराने गहाण ठेवलेली वस्तू बळकावत नाही किंवा कोणालाही लुबाडत नाही. उलट, तो भुकेल्या माणसाला आपल्या घासातला घास देतो आणि ज्याच्या अंगावर कपडे नाहीत त्याचं अंग झाकतो. १७ तो गोरगरिबांवर जुलूम करत नाही, व्याज घेत नाही आणि कोणाचाही गैरफायदा घेऊन नफा कमवत नाही. उलट, तो माझ्या कायद्यांप्रमाणे चालतो आणि माझे न्याय-निर्णय पाळतो. असा मुलगा नक्की जिवंत राहील; वडिलांनी केलेल्या अपराधांमुळे तो मरणार नाही. १८ त्याच्या वडिलांनी मात्र लोकांची फसवणूक केली, आपल्या भावाला लुटलं आणि आपल्या लोकांमध्ये वाईट कामं केली. म्हणून त्याचे वडील नक्की मरतील; ते स्वतःच्या अपराधांमुळे मरतील.

१९ पण तुम्ही म्हणाल: “वडिलांच्या अपराधांचा दोष मुलावर का येणार नाही?” कारण, मुलगा नेहमी न्यायाने वागला आणि योग्य ते करत राहिला. त्याने माझे कायदे पाळले आणि त्यांप्रमाणे तो चालला. म्हणून तो नक्की जिवंत राहील.+ २० जो कोणी* पाप करतो, तोच मरेल.+ वडिलांच्या अपराधाचा दोष मुलावर येणार नाही, आणि मुलाच्या अपराधाचा दोष त्याच्या वडिलांवर येणार नाही. जो नीतीने वागतो त्यालाच त्याच्या नीतिमत्त्वाचं फळ मिळेल. आणि जो दुष्टपणे वागतो त्यालाच त्याच्या दुष्टपणाचं फळ मिळेल.+

२१ पण जर एखाद्या दुष्ट माणसाने आपली सगळी पापं सोडून दिली आणि तो माझ्या कायद्यांप्रमाणे चालला, नीतीने आणि न्यायाने वागला, तर तो मरणार नाही; तो नक्की जिवंत राहील.+ २२ त्याने केलेल्या कोणत्याही अपराधांचा हिशोब ठेवला जाणार नाही.*+ नीतीने वागत असल्यामुळे तो जिवंत राहील.’+

२३ सर्वोच्च प्रभू यहोवा म्हणतो, ‘एखादा दुष्ट माणूस मरतो, तेव्हा मला आनंद होतो का?+ त्याने आपला दुष्टपणा सोडून द्यावा आणि जिवंत राहावं, असंच मला वाटत नाही का?’+

२४ पण जर एखादा नीतिमान माणूस नीतीने वागायचं सोडून वाईट कामं* करायला लागला, दुष्ट माणसासारखी घृणास्पद कामं करायला लागला, तर तो जिवंत राहील का? त्याने केलेली कोणतीही नीतीची कामं आठवली जाणार नाहीत.+ त्याच्या अविश्‍वासूपणामुळे आणि त्याने केलेल्या पापामुळे तो मरेल.+

२५ पण तुम्ही म्हणाल: “यहोवा अन्यायाने वागतो.”+ पण हे इस्राएलच्या घराण्यातल्या लोकांनो! मी अन्यायाने वागतो,+ की तुम्ही अन्यायाने वागता?+

२६ एखादा नीतिमान माणूस नीतीने वागायचं सोडून वाईट कामं करू लागला, तर तो मरेल; तो आपल्याच दुष्टपणामुळे मरेल.

२७ पण जर एखाद्या दुष्ट माणसाने आपली सगळी पापं सोडून दिली आणि तो नीतीने आणि न्यायाने वागू लागला, तर तो आपला जीव वाचवेल.+ २८ आपल्या अपराधांची जाणीव होऊन तो जर मागे वळला, तर तो नक्की जिवंत राहील; तो मरणार नाही.

२९ पण इस्राएलचं घराणं म्हणेल: “यहोवा अन्यायाने वागतो.” पण इस्राएलच्या घराण्यातल्या लोकांनो! मी अन्यायाने वागतो,+ की तुम्ही अन्यायाने वागता?’

३० ‘म्हणून हे इस्राएलच्या घराण्यातल्या लोकांनो, ऐका! मी तुमच्यापैकी प्रत्येकाचा त्याच्या कामांप्रमाणे न्याय करीन,’+ असं सर्वोच्च प्रभू यहोवा म्हणतो. ‘तुमचे अपराध तुमच्यासाठी अडखळण ठरू नयेत आणि तुमच्यावर दोष येऊ नये, म्हणून तुम्ही तुमच्या सगळ्या अपराधांपासून मागे वळा. ३१ तुम्ही जे अपराध करत होता, ते सोडून द्या.+ तुमची विचार करायची पद्धत आणि तुमचं मन बदला.+ हे इस्राएलच्या घराण्यातल्या लोकांनो! तुम्ही का उगाच आपला जीव गमावता?’+

३२ ‘कोणाच्याही मृत्यूने मला आनंद होत नाही,’+ असं सर्वोच्च प्रभू यहोवा म्हणतो. ‘म्हणून मागे वळा आणि जिवंत राहा.’”+