M basdame t’a Zeova remsd-ma

Bũmb wʋsg n yɩ maam noogo. La sẽn yɩ maam noog n yɩɩdã yɩɩ neb nins sẽn da tʋmd be wã manesmã. Yaa saam-biis la saam-bi-pogs sẽn yaa kom-bɩɩse, n tʋmd tʋʋmd neb kẽer sẽn tõe n getẽ tɩ wata ne yam-yiisgu. B pa wae n paamdẽ tɩ nebã pẽgd-b b tʋʋmdã yĩng ye. Baa ne rẽ, b tʋmda ne sũ-noogo. B mak-sõngã sõnga maam tɩ m bãng sik f meng n tʋm Wẽnnaam tʋʋmdã sẽn dat n yɛɛlga.

Yʋʋm wʋsg pʋgẽ, a Zeova remsa maam sẽn na yɩl tɩ m tõog n tũ-a sõma. La m na n deng togs-y-la m sẽn bao sɩdã to-to, m sẽn wa n be Budismã tũudum pʋgẽ wã.

M SƖNGA WẼNNAAM BAOOB M SẼN WA N YAA BILFU

Mam doga Sikago sẽn be Ilinowa sẽn yaa Etazĩni soolmẽ wã, n bɩ be. M ma ne m baaba roga kamb a naase, tɩ maam la kãsmã. Mam doagdbã yika Zapõ n wa zĩnd Sikago, b sẽn da tẽed tɩ b vɩɩmã na n yɩɩ sõma Etazĩni wã yĩnga. B ra ratame tɩ tõnd a kambã karem n zãage, n wa lebg nin-bɛda.

Mam doagdbã ra yaa budist-rãmb sẽn pa reemd ne b tũudmã ye. M ma sẽn wa n yaa bilfã, budist-rãmbã pʋʋsg roog n da be b zakẽ wã. A ba wã ne a yap a yiib n yɩ moan-dãmba. Rẽ n so tɩ Budismã yel-maandɩ ra tar yõod wʋsg ne maam m sẽn wa n yaa bilfã. M sã n da yi lekoll n lebg n wa fãa, pipi bũmb m sẽn segd n maan yaa yõog wisdu, la m bao mui ne koom n kõ a Buda bõn-naandgã. Hat daare d ra kẽngda budist-rãmbã pʋʋsg roogẽ, n tɩ yɩɩl yɩɩl a Buda bõn-naandgã taoore. Bõn-naand-kãng ra wõnda sẽn be-a tõnd zakẽ wã. La yẽ soabã ra yaa bedre, tɩ b bolg-a sãnem me.

M ket n tẽrame tɩ m sẽn wa zems yʋʋm a yopoe wã, daar a ye m gesa bõn-naandg ning sẽn da be tõnd zakẽ wã, n sok m meng yaa: ‘Bõe n na n paam maam n kũumã poore?’ Budismã taoor dãmb yetame tɩ ned kũum poore, a lebgda vʋʋsem. Rẽ kɩtame tɩ m da tẽed tɩ daar n wat tɩ m pa na n le beẽ ye. Baa m sã n da lebg vʋʋsem, m pa na n le yɩ ninsaal ye. Rẽ ra sãamda m sũur wʋsgo. Zĩig pʋgẽ, m gesame tɩ m pa tar m sẽn maandg ye.

Mam sẽn wa n kolg yʋʋm piig la a nu wã, m wa getame tɩ Budismã yel-maandɩ nins m sẽn da maandã pa tar neng ye. M da neeme tɩ bũmb n paoog-ma. (Mat. 5:3) M da kɩsa sɩd tɩ Wẽnnaam sẽn vɩ la sẽn yaa pãn-kãseng soab n segd n beẽ, n dat n bãng-a. M da yeta m meng tɩ daar ninga Biiblã tõe n sõng-m lame tɩ m paam m sogsgã leoore. Rẽ n so tɩ m sẽn yã Biibl-kʋdr budist-rãmbã tigr a ye sasa, m daame. Ra yaa La Bible du roi Jacques.

M sẽn wa n tar yʋʋm piig la a yopoe wã, daar a ye, saam-biig yʋʋr sẽn boond t’a Wilson Bashou sega maam sor noore. A soka maam yaa: “Fo mii bũmb ning Wẽnnaam sẽn pʋlem tɩ wat beoog-daarã bɩ?” Rẽ kɩtame tɩ d sõs Biiblã sẽn yetã zug n kaoose. A Wilson wa karma Vẽnegr 17:1 la a sok maam yaa: “Fo tagsdame tɩ ‘koom sẽn yaa wʋsgã’ pʋg-yoodrã sẽn zao a zugã makda bõe?” Tɩ m yeel tɩ m pa mi ye. A wilga maam vɛrse 15 wã sẽn yeel tɩ koomã makda buud toɛy-toɛyã. Mam sẽn bãng t’a Zeova Kaset rãmbã sã n yã Biiblã vɛrse võor wʋmb sẽn yaa toogo, b tikda vɛrse-rãmb a taab n bao n wʋm a võorã yɩ-m-la noog wʋsgo. Nand t’a Wilson looge, a kõo maam La vérité qui conduit à la vie éternelle sebrã. Seb-kãng toeema mam vɩɩmã.

Rasem piig poore, m kẽnga m pipi tigsg Rĩungã roogẽ. M pa na n tol n yĩm b sẽn deeg maam sõma to-to wã ye. Rẽ tɛka, m pa vaal tigsg ye. A Wilson wa n sɩnga Biiblã zãmsg ne maam. M da nonga Biiblã zãmsg wʋsgo, hal tɩ daar ning bɩ d mi n zãms lɛɛr a nii. Mam sẽn sɩng Biiblã zãmsgã sãama m doagdbã sũur wʋsgo, tɩ b ra maand b sẽn tõe fãa n dat tɩ m base. La m sẽn da bãngd Biiblã n paasdẽ wã kɩtame tɩ m maneg n kɩs sɩd t’a sẽn yetã yaa sɩda. M deega lisg yʋʋmd 1983.

M BASA INIVƐRSITE WÃ N LEBG SO-PAKDA

M sẽn wa n na n deeg lisgã tɩ m karemda inivɛrsite a ye yʋʋr sẽn yi pʋgẽ, n na n wa lebg logtore. M doagdbã monga b mens bũmb wʋsg sẽn na yɩl tɩ m kẽng inivɛrsite-kãng pʋgẽ. M da tõe n kell n karmame, la m da rat n kẽesa m meng zãng a Zeova tʋʋmdã pʋgẽ, n maan m sẽn tõe fãa a Zeova yĩnga.

M baaba sẽn bãngã, a yeela maam yaa: “Fo sã n bas inivɛrsite wã, f na n yii zakã pʋgẽ.” M sũurã sãamame, tɩ m pa mi m sẽn maandg ye. M nonga m doagdbã, n pa rat n maan bũmb n sãam b sũur ye. Rẽ n so tɩ m da mi n yi inivɛrsite wã zakẽ ne yʋngo, n pʋʋs a Zeova n yeel yaa: “Zeova, m bõos tɩ f sõng-m tɩ m bãng n yãk yam.” M wa n yãka yam n na n bas inivɛrsite wã, tɩ m baaba yeel maam tɩ m yi zakẽ wã. Mam boola a Wilson n togse, t’a yeel tɩ m tõe n waa yẽ nengẽ. Mam wʋka m teedã fãa n sui kor-yɛng pʋgẽ, n kẽ biis n kẽng a zakẽ wã. M tẽrame tɩ zĩig pʋgẽ, m yamã gãanda bãane hal tɩ m pa tõe n bãng n bilg ye. M da miime tɩ m sẽn yãk yam ningã yaa sõma.

M da getame tɩ m yaa wa liuul b sẽn da yõke, t’a paam n fʋsge. M yaa n paama m meng n na n kẽes m meng zãng a Zeova tʋʋmdã pʋgẽ. M lebga so-pakd yʋʋmd 1984.

Mam sẽn wa n yaa so-pakdã, a Zeova sõnga maam tɩ m bɩɩs zʋg-sõma. Wala makre, tõog-toogo. Daar a ye, bũmb wʋsg n kɩt tɩ m da tõe n yãk yam n pa yi koɛɛgã mooneg ye. M da komsa raoodo, bala m pa paam ned tɩ d na n naag taab n moon koɛɛgã daar-n-kãng zaabr ye. Baa ne rẽ, m yii koɛɛgã moonego. M sẽn moon lɛɛr a yiib poore, m yãka yam n na n moon etaas pʋgẽ la m bas a woto. M da yaame, tɩ m sẽn yaa m yembrã me ra pa noom-m ye. Sẽn paase, ra yaa wa saagã rat n niime. M da sokda m meng m sã n pa segd n basa koɛɛgã mooneg woto. M sẽn wa n dʋʋd etaas a tãab-n-soabã, m sega bi-bɩɩg sẽn yaa Filipin neda. M tagsa m sũurẽ yaa: ‘Yaa vẽeneg t’a pa na n sak n kelg ye.’ La m tudgame! Bi-bɩɩgã sakame n sɩng Biiblã zãmsgo, n wa lebg a Zeova Kaset soaba.

M BÃNGA BŨMB WƲSG SẼN TAR YÕOD BURKILIN BETƐLLẼ WÃ

Yʋʋmd 1985 wã, b boola maam Burkilin Betɛllẽ wã. Rẽ tɩ m zĩnda ne a Wilson yʋʋm a yi. M sẽn ta be wã, b kɩtame tɩ m tɩ tʋm sɛbã yiisg zĩigẽ wa m sẽn zoe n togs sɩngrẽ wã. Daar a ye, m wa n tʋmda ne masĩni, n wa tudg n maan bũmb tɩ sãam sɛbã pagd bãmb kobse. Saam-biisã yeela maam tɩ m togs taoor lʋɩtã bũmb ning sẽn maanã. M wilg-a-la sẽn sɩng to-to tɩ m wa tudgã, la bũmb sẽn tar yõod la m pa maane: M pa kos sugr ye. Taoor lʋɩtã bʋka a meng n yeel maam yaa: “D sã n mi n tudg fãa, yɩta sõma tɩ d kos sugri.” Rẽ kɩtame tɩ m bãng tɩ sak n deeg tɩ f kongame la f kos sugr tara yõod wʋsgo.

Mam sẽn yã Betɛllẽ tʋm-tʋmdb nins sẽn kʋʋlã mak-sõngã me sõng-m lame tɩ m bãng sõng neb a taabã sẽn dat n yɛɛlga. Daar a ye, tõnd zĩndame n na n dɩ, tɩ saam-biig a Milton Henschel sẽn da yaa Siglgã taoor lʋɩtb Sull nedã zĩ tõnd taablẽ wã. Baraare nebã ra yaa wʋsgo, tɩ sẽn pʋɩt-b rɩɩbã ra maand yɩɩre. Tõnd a kom-bɩɩsã ra yẽgemda rɩɩbã sẽn pa wat tao-tao wã yĩnga. La saam-biig a Henschel yikame, n sõng sẽn pʋɩt-b rɩɩbã n pʋɩ koomã, burã la bɛɛrã. M pa na n tol n yĩm a sẽn maan bũmb ningã yell ye. Kɩtame tɩ m tags a Zeezi sẽn sõng a tẽn-tʋmdbã to-to wã yelle.—Zã 13:3-5.

“YƖTA SÕMA TƖ FO ZÃMS ZAPONEEMDO!”

Yʋʋmd 1987 wã, m kẽnga Zapõ. M sẽn yã saam-biisã yẽesmã la b sik-m-mengã yɩ-m-la noogo. M da rat n sõng-b lame n moon koɛɛgã, la yellã yaa tɩ m pa zãms Zaponeemd ye. Mam sẽn lebg n wa wã, saam-bi-poak a Michiko Oda sẽn tʋmd Betɛllẽ wã yeela maam yaa: “Yɩta sõma tɩ fo zãms Zaponeemdo!” M sɩd maana woto. M da pa mi t’a saglgã na n toeema m vɩɩmã woto fãa ye.

Kiuug a wãn poore, b kɩtame tɩ m kẽng Zaponeemd tiging a ye sẽn da be Niuyork pʋgẽ. Mam sẽn zãms Zaponeemdã sõng-m lame tɩ m tõog n tʋm a Zeova tʋʋmdã n paase. Yʋʋmd 1989 wã, m maana m pipi rasem a tãab tigis-kãseng ne Zaponeemd Losãnzelɛs sẽn be Kaliforni wã. Mam yamã kẽe saam-bi-poak a ye sẽn naag n maan darmã. Yaa so-pakd yʋʋr sẽn boond t’a Miwako Onami.

Maam ne a Miwako kẽe kãadem yʋʋmd 1992. Rẽ poore, b sakame t’a wa naag maam n tʋm Burkilin Betɛllẽ wã. A Miwako yaa saam-bi-poak sẽn tagsd a taabã yelle, la sẽn nong neb sõngre. A mak-sõngã sõnga maam tɩ m maneg n tar manesem-sõng ne neb a taabã. M getame t’a yaa kũun a Zeova sẽn kõ maam. Wakat buud fãa, a kɩtdame tɩ m sũur noomẽ.

D TƲMA ZAPÕ BETƐLLẼ WÃ, LA D WA LEBG SO-PAKDBA

A Miwako ba wã ne a ma wã fãa sẽn da be Zapõ wã wa n lʋɩɩ bãag tɩ pa nana ye. Saam-biisã sakame tɩ d na n tɩ tʋm Zapõ Betɛllẽ wã, sẽn na yɩl n pẽneg a Miwako roagdbã n tõog n ges b yelle. D yik n kẽnga be yʋʋmd 1999 wã.

Zapõ Bɛtɛllã tʋm-tʋmdb reega tõnd sõma. Pa yã n kaoos la d minim beenẽ vɩɩmã ye. Zapõ saam-biisã la saam-bi-pogsã tara zʋg-sõma wʋsgo. Wala makre, b yaa kõatba, la b nong sãamb reegre. Mam dɩkda b togs-n-taare, n bɩɩsd zʋg-sõma n paasdẽ. Tʋʋmã wɛɛngẽ, b pa maand laas-laas ye. B mii naag taab n tʋm me. Bõe yĩnga? Yaa tɩ Zapõ nebã getame tɩ d sã n naag taab n tʋm zems-n-taar pʋgẽ nebã fãa nafr yĩnga, yõodã yɩɩda f sẽn na n tõog n maan bũmb f yembre. B mak-sõngã sõnga maam tɩ m bãng tɩ m sã n wa tʋmd ne neb a taaba m segd n tʋma ne sik-m-menga, la tɩ m sã n tõog n maan baa yaa bõn-kɩdga m sũur segd n yɩɩ noogo, bala sõngdame t’a Zeova raabã pidsdẽ.

Baa ne rẽ, Zapõ nebã minimdã sẽn yaa toor ne Etazĩni nebã kɩtame tɩ m mi n pa wʋmd b sẽn maand yɛl kẽer to-to wã võor ye. Yɩɩ tɩlɛ tɩ m bɩɩs sũ-mar la tõog-m-menga. Bilf-bilfu m wa n toeema m tagsgã, n kɩs sɩd tɩ sẽn yaa yam ning fãa la d yãk-yã, sã n mik tɩ d tũu a Zeova siglgã saglse, a na n ninga barka. Sɩd me, yaa a Zeova n kɩtd tɩ bũmb nins d sẽn maandã yãkd nenga.

Mam wae n makda remsg ning m sẽn paam Betɛllẽ wã ne remsg ning a Moyiiz sẽn paamã. A Zeova sõnga a Moyiiz t’a bɩɩs sik-m-menga, a sẽn wa n yaa pe-kɩɩm n kaoos yʋʋm pis-naasã. Ma-me karem n zãaga wa a Moyiizi. M da basame tɩ karengã kɩt tɩ m lebg wuk-m-meng soaba, la ned sẽn teeg a menga. La Betɛllã sõnga maam tɩ m bɩɩs sik-m-menga, la m teeg a Zeova. A Zeova remsa maam yʋʋm wʋsg pʋgẽ, wa a sẽn dems a Moyiiz ne sũ-marã.

D gesa a Miwako roagdbã yell n maan yʋʋm pisi la a naas n tãag b kũum. D ra boonda a Miwako roagdbã la logtoɛɛmb nins sẽn get b yellã ne telefõn naoor wʋsgo. Ra mi n yaa tɩlɛ tɩ d tall-b n kẽng logtor yiri, wall d kẽng logtor yir n tɩ ges-ba. Woto fãa ra wata ne yɩɩre. A Miwako ma a Masako bãagã wa n paama pãnga, hal tɩ yik n kẽn meng lebg toog ne-a. Wa n lebga toog ne-a t’a kẽnd tigissã la a yit koɛɛgã moonego. A kũumã sẽn wa n kolgã, a ra zaoo puus-puus tɩ b tusd-a. La baa ne zu-loe-kãensã fãa, a sẽn nong a Zeova to-to wã pa tol n boog ye. A sã n da wa gomd bũmb nins a sẽn tẽedã yelle, a nengã ra bee laado. A Masako ra tũuda Wẽnnaam ne a sũur fãa la a tar sũ-noog baa yɛlã sẽn yaa to-to, tɩ yaa mak-sõng m sẽn dat n dɩke.

Yʋʋmd 2024, d vɩɩmã toeema fasɩ. D sẽn tʋm Betɛllẽ wã yʋʋm pis-tã la zak poore, b kɩtame tɩ d lebg so-pakdba. Rũndã-rũndã, d yaa zall so-pakdb n be Okinawa ko-sʋk tẽngã pʋgẽ. Sodaas kã n be beenẽ, tɩ d paamd n moond sodaasã ne b zagsã rãmba. Zãmsg ning d sẽn paam Betɛllẽ wã sõngame tɩ d sẽn lebg so-pakdbã, yɛlã pa yɩ toog wʋsg ne-d ye. D modgd n siginda d sẽkã sõma, la d moond koɛɛgã ne yẽesem n pa sãamd d sẽkã ye. A Zeova ning-d-la bark tɩ d sõng neb tɩ b lebg a Kaset rãmba, hal tɩ d yaa wa zag-yɛng neba. D maneg n nee vẽeneg tɩ tara yõod tɩ d nong nebã. Maam ne a Miwako pʋʋsda a Zeova bark daar fãa, d sẽn paam n yaa zall so-pakdbã yĩnga.

M KET N DATAME T’A ZEOVA REMSD-MA

Rũndã-rũndã, m baaba ne m ma pa le zabd ne maam m sẽn tũud a Zeova wã yĩng ye. La bãmb mensã nan pa yãk yam n na n tũ a Zeova ye. La a Zeezi pʋlmame tɩ neb nins sẽn na n bas b zags rãmb sẽn na yɩl n lebg a karen-biisã na n paama sẽn yɩɩd rẽ naoor koabga. (Mark 10:29, 30) M yãame tɩ pʋlen-kãng sɩd pidsame. Dũniyã gill zugu, neb wʋsg n wilg tɩ b nonga maam wa b zakã neda, hal tɩ m pa tõe n sõd-b n sa ye.

Mam ket n tara La vérité qui conduit à la vie éternelle sebr ning a Wilson sẽn kõ maamã. M sã n get seb-kãnga, m tẽegda m sẽn baoo a Zeova to-to t’a sõng-m tɩ m yã-a wã. (1 Kib 28:9) M yãka yam n na n kell n sak t’a Zeova rems-ma, la m sõng neb a taabã tɩ b bãng sɩdã n wa paam vɩɩm sẽn ka sɛtã.