Sõng-y neb a taabã tɩ b bãng a Zeova

1. Y sã n wa neẽ tɩ y Biibl karen-biig tũuda bũmb nins a sẽn zãmsdã, y tagsg yaa wãna?

Y SÃ N tar Biibl karen-biig t’a wa sɩng tigissã waoongo, n mi n zẽk a nug n leok sokre, pa noom-y sɩda? Y sã n wa neẽ t’a gomda bũmb nins a sẽn tẽedã yell ne neb a taabã, y sũur pa noom sɩda? Kaoosg zugẽ, a sã n wa rɩk a meng n kõ a Zeova n deeg lisgu, y sũ-noogã pa tõe n bãng n bilg ye. La d miime tɩ yaa a Zeova n sõngd ned t’a tõog n maan bõn-kãense. Rẽ n so tɩ d na n pẽg-a rẽ yĩnga.—1 Kor. 3:5-9; 3 Zã 3, 4.

2. Bõe la a Zeova rat tɩ Biibl karen-biisã paame? (1 Tɩmote 2:3, 4)

² Wẽnnaam daabã yaa tɩ “nebã buud fãa paam fãagre, la b paam bãngr hakɩɩk sɩdã zugu.” (Karm-y 1 Tɩmote 2:3, 4.) Rẽnd a Zeova ratame tɩ nebã bãng-a sõma, la b bãng bõn-kãsems nins a sẽn maan la a sẽn nan na n maanã. (Zer. 9:24) La “bãngr hakɩɩkã” yaa bõe? Pa rat n yeel tɩ bãng bũmb kẽer Wẽnnaam zug bal ye. Biibl-mit a ye yeelame tɩ “bãngr hakɩɩkã” bilgda ned sẽn na n bãng Wẽnnaam hal tɩ kɩt t’a rat n maan a sẽn tõe fãa n lebg a zoa. Biibl karen-biig sã n bãng a Zeova sõma, na n kɩtame t’a rat n toeem a sẽn vɩ to-to wã. A sã n maan woto, a tõe n saagdame t’a na n wa paama “vɩɩm sẽn ka sɛtã.”—Zã 17:3.

3. Bõe yell la d na n gom sõs-kãngã pʋgẽ?

³ A Zeova yeelame tɩ d sõng neb a taabã tɩ b bãng-a, tɩ yaa zu-zẽkr ne-do. Sõs-kãngã pʋgẽ, d na n leoka sogsg a tãabo: 1) Bõe yĩng tɩ Biibl karen-biisã segd n bãng a Zeova sõma? 2) Wãn to la d tõe n sõng-b tɩ b bãng a Zeova sẽn yaa Wẽnnaam ning buudã? La 3) bõe la d tõe n maan n sõng-b tɩ b rɩ bũmb nins b sẽn zãmsdã yõodo?

SÕNG-Y Y BIIBL KAREN-BIIGÃ T’A BÃNG A ZEOVA SÕMA

4. D sã n wa zãmsd ned Biiblã, d raabã yaa bõe? (Mark 12:30)

⁴ A Zeezi yeelame tɩ noor ning sẽn yaa kãseng n yɩɩdã yaa noor ning sẽn yeel tɩ d segd n nonga a Zeova ne d sũurã fãa, ne d sɩɩgã fãa, ne d yamã fãa la ne d pãngã fãa wã. (Karm-y Mark 12:30.) Yaa tɩlɛ tɩ Biibl karen-biig bãng a Zeova n yaool n tõog n nong-a woto. D ratame tɩ d Biibl karen-biigã reeg lisg a sẽn nong a Zeova yĩnga, pa a sẽn dat n lebg tõnd wall d tẽed-n-taasã zoa yĩng ye. Leb n pa segd n yɩ a sẽn nong bũmb kẽer a sẽn bãng Biiblã pʋgẽ wã yĩng bal ye. Rẽ n so tɩ d raabã yaa sõng d Biibl karen-biigã t’a bãng a Zeova la a nong-a.

5. Biibl karen-biig sã n nong a Zeova, tõe n kɩtame t’a rat n maan bõe?

⁵ Biibl karen-biig sã n bãng a Zeova la a nong-a, na n kɩtame t’a rat n sak-a. A Zeezi wilgame tɩ ned sã n nong Wẽnnaam, a na n dat n sak-a lame. A yeelame: “Sẽn na yɩl tɩ dũniyã bãng tɩ mam nonga Ba wã, mam maanda wa Ba wã sẽn yeel maam tɩ m maanã bala.” (Zã 14:31) Woto me, Biibl karen-biig sã n nong a Zeova ne a sũur fãa, na n kɩtame t’a rat n sak-a la a kell n maan sɩd ne-a.—1 Zã 5:3.

6. Biibl karen-biig sã n bãng a Zeova sõma, wãn to la na n sõngd-a t’a bãngd n yãkd yam? Rɩk-y makre.

⁶ Biibl karen-biig sã n bãng a Zeova sõma, sõngd-a lame t’a bãngd n yãkd yam. D rɩk makre. Ned sã n dat n bãng montɛɛr zombgo, a sã n get neb a taabã sẽn kẽnd to-to ne montɛy wã, wall a karemd sebr sẽn wilgd montɛɛr sẽn zombd to-to bala pa sek ye. A segd n baoo sẽk n zãmse. Rẽ la a na n bãng montɛɛr zombg sõma. Woto me, pa Biiblã zãmsg bal n na n sõng karen-biig t’a wa nong a Zeova ye. Yaa a sẽn na n tũud bũmb nins a sẽn zãmsdã, n neẽ tɩ nafd-a lame. A sã n bãngd a Zeova n paasdẽ, n neẽ t’a sẽn tũud a Zeova noyã nafd-a lame, na n sõngd-a lame t’a bãngd n yãkd yam yell buud fãa pʋgẽ.

7. Bõe n sõng a Zozɛf t’a bãng n yãk yam?

⁷ A Zozɛf sẽn da mi a Zeova sõma wã sõng-a lame, a Potifaar pagã sẽn wa n dat t’a kẽ ne-a wã. Tõe tɩ hal a Zozɛf yãadmẽ, a bãngame t’a Zeova sẽn wa n naan a Ãdmã, a naana pʋg-yɛng n kõ-a. Tõe me t’a bãnga bũmb ning sẽn maane, b sẽn wa n mak n na n deeg a Abrahaam pag a Saara wã. (Sɩng. 2:24; 20:3, 6) Tõe tɩ kiba-kãens sõnga a Zozɛf t’a bãng a Zeova tagsg sẽn yaa a soab ne kãadmã, la ne pag ne rao lagengã. A Zozɛf sẽn da mi a Zeova sõma wã yĩnga, a zãgsame t’a kõn kẽ ne a Potifaar pagã, n yeel yaa: “Mam na n yɩɩ wãn n maan bõn-wẽng a woto fãa, n beeg Wẽnnaam?” (Sɩng. 39:7-9) A Zozɛf ra mii sẽn yaa sõma la wẽng a Zeova nifẽ. A bãngame t’a sã n sak pagã raabã, na n sãama Wẽnnaam sũuri. Rẽ sõnga a Zozɛf t’a bãng n yãk yam. D sã n sõng d Biibl karen-biisã tɩ b bãng a Zeova sõma, bãmb me na n yãkda yam sẽn noom-a.

SÕNG-Y-YÃ T’A BÃNG A ZEOVA SẼN YAA WẼNNAAM NING BUUDÃ

8. Wãn to la y tõe n tall Vɩɩmd-y wakat sẽn kõn sa! sebrã, n sõng y Biibl karen-biig t’a bãng a Zeova?

⁸ Wãn to la y tõe n sõng y Biibl karen-biig t’a bãng a Zeova sẽn yaa Wẽnnaam ning buudã? A Zeova soka a Zoob sogsg n sõng-a t’a bãng bũmb wʋsg yẽ mengã zugu. A sok-a-la sogsg pis-nu la zaka. (Zoob 38:1–41:34) Tõnd me tõe n sokda d karen-biigã sogsgo. Sogsg nins sẽn be Vɩɩmd-y wakat sẽn kõn sa! sebrã pʋgẽ wã yaa sẽn na n sõng karen-biigã bilf-bilf t’a bãng a Zeova sẽn yaa Wẽnnaam ning buudã sõma. (Ges-y zĩ-gũbrã: “Sogsg sẽn tõe n sõng-d tɩ d zãms d karen-biisã.”) Tũnug-y ne sogs-kãens n sõng y karen-biigã t’a bãng a Zeova.

9-10. a) Bõe la y Biibl karen-biigã tõe n maan t’a sã n karemd Biiblã bɩ sõngd-a t’a bãngd a Zeova n paasdẽ? (Zak 5:11) b) Rɩk-y makr n wilg Biiblã kibar sẽn tõe n sõng-d to-to tɩ d bãng sẽn noom a Zeova wall sẽn pa noom-a.

⁹ D sã n sɩng Biiblã zãmsg ne neda, d sagend-a lame t’a karemd Biiblã n pa vaandẽ ye.a La bõe la d tõe n maan n sõng-a, t’a sã n karemd Biiblã bɩ a bãngd a Zeova n paasdẽ? D tõe n sagl-a lame t’a sã n wa karemd Biiblã kibar bɩ a sok a meng yaa: “Bõe yĩng t’a Zeova kɩt tɩ b gʋls kiba-kãngã Biiblã pʋgẽ? Wãn to la kibarã tõe n sõng maam tɩ m bãng a Zeova sẽn yaa Wẽnnaam ning buudã?” Karen-biig a Zak maana woto, a sẽn wa n na n gom a Zoob kibarã yellã. A wilgame tɩ kibarã sõng-d lame tɩ d bãng t’a Zoob tõoga toogo. La pa rẽ bal ye. A goma a Zeova nonglmã la a nimbãan-zoeerã yell me.—Karm-y Zak 5:11.

¹⁰ D ratame tɩ d Biibl karen-biig sã n wa karemd Biiblã kibar fãa bɩ a bãng kibarã sẽn tõe n sõng-a to-to t’a bãng sẽn noom a Zeova wall sẽn pa noom-a. Wala makre, d Biibl karen-biigã tõe n gesa Vɩɩmd-y wakat sẽn kõn sa! sebrã zĩig ning b sẽn gʋlse: “Sɩng-y Biiblã karengã,” n yeel-d t’a yãka yam n na n karem kibar ning sẽn gomd b sẽn lob a Dãniyɛll gɩgma bokẽ wã yellã. Sã n yaa woto, bõe la d tõe n maan n sõng-a? D tõe n sagl-a lame t’a sã n wa karemdẽ bɩ a sok a meng yaa: ‘Bõe yĩng t’a Zeova fãag a Dãniyɛlle? Rẽ sõngda maam tɩ m bãng tɩ bõe n noom a Zeova?’ (Dãn. 6:10, 22) A leb n tõe n soka a meng yaa: ‘Bõe n paam neb nins sẽn dõd a Dãniyɛllã? Rẽ sõngda maam tɩ m bãng tɩ bõe la a Zeova kis-yã?’ (Dãn. 6:4, 5, 24) Sẽn na n baase, d tõe n sagl-a lame t’a tags n ges bõe me la kibarã tõe n sõng-a t’a bãng a Zeova zugu.—Dãn. 6:26, 27.

11. Bõe yĩng tɩ tar yõod tɩ d sõng d Biibl karen-biigã t’a bãng t’a Karen-saambã meng-meng yaa a Zeova?

¹¹ D Biibl karen-biig sã n yeel-d t’a sũur nooma ne bũmb nins a sẽn zãmsd Biiblã pʋgẽ wã, noom-d-la wʋsgo. La d segd n sõng-a lame t’a bãng tɩ yaa a Zeova sẽn yaa Karen-saam-kãsengã n sõngd-a t’a bãngd bõn-kãense. (Eza. 30:20, 21) D karen-biigã tõe n wa pʋʋs-d-la bark bũmb nins d sẽn sõngd-a t’a bãngdẽ wã yĩnga, wall a pẽg-d menga. Pẽgr a woto pa wẽng ye. La d segd n sõng-a lame t’a bãng tɩ yaa a Zeova n tog ne pẽgrã la barkã pʋʋsgo.

SÕNG-Y-YÃ T’A RƖ BŨMB NINS A SẼN ZÃMSDÃ YÕODO

12-13. Biibl karen-biig sã n mi a Zeova sõma wãn to la na n sõng-a, a sã n wa karemd Biiblã kibar võor wʋmb sẽn yaa toog ne-a? (Ges-y fotã me.)

¹² Biibl karen-biig sã n dat t’a sẽn bãngd bũmb nins a Zeova zugã naf-a, a segd n tũuda rẽ. Wãn to la y tõe n sõng y karen-biigã t’a rɩ bũmb nins a sẽn zãmsdã yõodo? Pipi, sõng-y-yã-a t’a bãng t’a sã n wa karemd kibar Biiblã pʋgẽ n pa wʋmd a võore, a segd n tẽega bũmb nins a sẽn zoe n mi a Zeova zugã yelle. Wala makre, a sã n wa karemd kibar sẽn gomd a Zeova sẽn kao neb bʋʋd yelle, a tõe n sokda a meng yaa: ‘Bõe yĩng t’a Zeova kʋ neb kẽer la a bas sãnda tɩ b kell n vɩɩmde?’ Bõe la y tõe n maan n sõng y Biibl karen-biigã t’a tags neere, n wʋm kibarã võore?

¹³ Y tõe n sagla y Biibl karen-biigã t’a tags bũmb nins a sẽn zoe n mi a Zeova zugã yelle. Wala makre, a zoe n miime t’a Zeova nifẽ vɩɩmã tara yõod wʋsgo. (2 Pɩy. 3:9) A Zeova maana bũmb wʋsg sẽn na yɩl n fãag tõndo, baa d sẽn yaa yel-wẽn-maandbã. (Efɛɛ. 2:4, 5) Woto wã, a Zeova na n sɩbga ned sẽn pa segd ne rẽ sɩda? La ned sã n segd ne sɩbgre, a Zeova na n bas-a lame n pa sɩbg sɩda? (Yik. 34:6, 7) Wakat ninga, Biiblã sã n na n togs bũmb a Zeova sẽn maane, a pa wilgd bũmb ning sẽn kɩt t’a maan dẽ wã ball-ball ye. La pa tɩlɛ tɩ d bãng bũmb fãa n yaool n kɩs sɩd t’a Zeova sẽn maanã yaa tɩrg ye. D mii d Wẽnnaamã. D kɩsa sɩd t’a maanda sẽn yaa tɩrg wakat fãa.

14. Y Biibl karen-biigã ne tigingã ned a to moor sã n wa pa noomẽ, wãn to la y tõe n sõng-a?

¹⁴ Bũmb ning y Biibl karen-biigã sẽn bãng a Zeova zugã leb n tõe n sõng-a-la zĩig a to wɛɛngẽ. Mams-y wa y Biibl karen-biigã sẽn na n sɩng tigissã waoongo, tɩ yẽ ne tigingã ned a to moor wa pa noomẽ ye. Tõe tɩ nin-kãng maana bũmb n sãam a sũuri. Sã n wa yaa woto, bõe la y tõe n maan n sõng-a? Y tõe n sagl-a lame t’a tẽeg a Zeova sẽn get saam-biisã la saam-bi-pogsã to-to wã yelle. Bõe la a Zeova maan n wilg t’a nong-b lame, baa sẽn pa yɩ nana wã? (Zã 3:16) A Zeova nifẽ, tõnd zems-n-taarã yõod taa zĩ-bʋgo? (Yɩɩn. 133:1) D sã n maand d sẽn tõe fãa sẽn na yɩl tɩ zems-n-taar kell n zĩnd d sʋka, a tagsg yaa wãna? (2 Kor. 13:11) Sõng-y y karen-biigã t’a bãng tɩ d sã n maand d sẽn tõe fãa n zʋʋgd d tẽed-n-taasã kong-bõonegã n get b zʋg-sõma wã, nooma a Zeova.

15-16. a) Biibl karen-biig sã n wa segd n yãk yam bũmb sẽn tar yõod wʋsg wɛɛngẽ, wãn to la a tõe n dɩk a Zeezi togs-n-taare? (Zã 8:29) b) Bõe la a Maariyan maan n sõng a Biibl karen-biigã t’a bãng n yãk yam? (Ges-y fotã me.)

¹⁵ Sẽn na n baase, y tõe n sõnga y Biibl karen-biigã t’a tikd bũmb nins a sẽn mi a Zeova zugã n bãngd n yãkd yam. Y tõe n wilga y Biibl karen-biigã Vɩɩmd-y wakat sẽn kõn sa! sebrã sak 35 soabã gom-zug sẽn yaa: “D sẽn tõe n maan to-to tɩ d yam-yãkr yɩ sõma” wã. La y Biibl karen-biigã sã n pʋʋs la a maan vaeesg n ket n pa mi a sẽn na n yãk yam ning yẽ? Tõe t’a yãa Biiblã sagls wʋsg sẽn gomd a zu-loɛɛgã yelle, n pa mi saglg ning sẽn yaa sõma ne yẽ n tɩ yɩɩd ye. Sã n wa yaa woto, y tõe n sagl-a lame t’a tags a Zeezi mak-sõngã yelle. Bõe n da sõngd a Zeezi t’a bãngd n yãkd yam? A yeelame: “Mam maanda bũmb nins sẽn noom [m Ba] wã wakat fãa.” (Karm-y Zã 8:29.) Y tõe n sagla y Biibl karen-biigã t’a sok a meng yaa: ‘M sã n tik bũmb nins m sẽn maan vaeesg n yã wã, la bũmb nins m sẽn zoe n mi a Zeova zugã, m tõe n yeelame tɩ yam-yãk-bʋg n na n yɩ-a noogo?’ Sõng-y-yã-a t’a bãng tɩ yam-yãkr ning fãa sẽn na n yɩ a Zeova noog yaa sõma.

¹⁶ Sili pag a ye n da zãmsd Biiblã, n wa segd n yãk yam bũmb sẽn tar yõod wʋsg wɛɛngẽ. B pʋlm-a-la tʋʋmd kiuug yaood sẽn yaa wʋsgo, t’a zakã rãmb pẽdgd-a n dat t’a sake. La a sã n sak tʋʋmdã, a pa na n le tõogd n kẽnd tigissã n pa vaandẽ ye. A Maariyan sẽn yaa saam-bi-poak ning sẽn da zãmsd-a Biiblã yeelame: “Mam sagl-a lame t’a tags n ges a sẽn na n yãk yam ningã sã n na n yɩɩ a Zeova noog bɩ na n sãama a sũuri. Sẽn paase, m sagl-a lame t’a pʋʋs a Zeova n gom rẽ yelle, la a maag a yĩng n ges a Zeova sẽn na n leok-a to-to. A zãgsa tʋʋmdã. La sẽn pa yã n kaoose, a paama tʋʋmd a to sẽn kõt-a weer t’a tõe n kẽnd tigissã n pa vaandẽ ye.” A Maariyan pa wilg a Biibl karen-biigã yam ning a sẽn segd n yãkã ye. A sõng-a lame t’a tags bũmb nins a sẽn zoe n mi a Zeova zugã yelle, n bãng n yãk yam. Kɩtame tɩ Biibl karen-biigã ne a Zeova zoodã pãng paase. A Maariyan goma a Biibl karen-biigã yell n yeel yaa: “A bãngame tɩ d sã n lʋɩɩs a Zeova raabã maaneg taoore, a geta d yelle.”

NEB NINS SẼN MI A ZEOVA SÕMA WÃ PAAMDA BARK TOOR-TOORE

17. Sẽn yɩɩd fãa, bõe la Biibl karen-biisã segd n bãnge?

¹⁷ D sã n zãmsd ned Biiblã a bãngda bũmb wʋsg sẽn tar yõodo. Wala makre, a bãngda Biiblã sẽn yet bũmb ning sẽn ki-bã wɛɛngẽ, a Zeezi sẽn ki tɩ yɩ maoongã võore, la Wẽnnaam Rĩungã sẽn na n wa maan bũmb ninsã. A leb n bãngda a Zeova Kaset rãmbã sẽn sigl to-to wã. Wala makre, d sẽn maand bũmb nins d tigissã sasa, la kãsem-dãmbã ne Siglgã taoor lʋɩtb Sull nebã sẽn tʋmd tʋʋm ninsã. La pa bõn-kãens bal la d rat tɩ d karen-biisã bãng ye. Sẽn yɩɩd fãa, d ratame tɩ b bãng a Zeova sõma.

18. Bark-bʋs la neb nins sẽn mi a Zeova wã paamda?

¹⁸ D sẽn paam n sõngd neb a taabã tɩ b bãngd a Zeova wã yaa zu-zẽkr tɛkẽ! Neb nins sẽn mi a Zeova la b tũud-a wã paamda vɩɩm sẽn tar bark rũndã-rũndã menga. (Yɩɩn. 25:12-15) La beoog sẽn wate, neb nins fãa sẽn mi a Zeova sẽn yaa “Soab ning sẽn yaa sɩdã” na n paama vɩɩm sẽn ka sɛtã. (1 Zã 5:20) La pa rẽ bal ye. Biiblã yeelame t’a Zeova “mii” neb nins sẽn modg n bãng-a la b nong-a wã. (1 Kor. 8:3) Hakɩɩka, Wẽnnaam Sẽn-tõe-a-fãa wã mii tõndo, n boond tõnd t’a zo-rãmba. Woto pa bark tɛkẽ sɩda?