Yam ning ned sẽn tõe n yãk tɩ tar yõod n yɩɩd yaa a rɩk a meng n kõ a Zeova, n lebg a zakã neda. A Zeova ratame tɩ ned buud fãa maan woto. Bõe yĩnga? A ratame tɩ b yɩ a zo-rãmba, n vɩɩmd wakat sẽn kõn sa. (Tõo. 30:​19, 20; Gal. 6:​7, 8) La a Zeova pa modgd ned baa a ye t’a tũ-a ye. A basame tɩ ned kam fãa yãk a sẽn na n maanega. La ned sẽn deeg lisg sã n kɩɩs Wẽnnaam noyã n maan yel-wẽn-kãsenga, bõe la kãsem-dãmbã segd n maane? A sã n pa tek yam n kos sugri, b segd n yiis-a-la tigingã pʋgẽ. (1 Kor. 5:13) La baa sã n wa yaa woto, a Zeova ket n data ne a sũur fãa tɩ nin-kãng tek yam n lebg n wa a nengẽ. Sɩd me, rẽ naaga bũmb nins sẽn kɩt t’a tʋm a Zeezi t’a wa ki tɩ yɩ maoongã. Yaa sẽn na n pak sor t’a tõe n kõ yel-wẽn-maandb nins sẽn tek yamã sugri. Tõnd Wẽnnaamã sẽn yaa nonglmã sagenda yel-wẽn-maandbã tɩ b tek yam n kos sugri.—Zaka. 1:3; Rom. 2:4; Zak 4:8. w24.08 14 s. a 1-2

Tẽn-tʋmd a Zã sẽn wa n gʋlsd a lɛtr a tãab-n-soabã tɩ neb n da yelgd ziri zãmsg n wat ne welsgo. La sãnda ra ket n “kẽnda sɩdã pʋgẽ.” B ra sakda a Zeova, n ‘ket n kẽnd wa sẽn zems a noyã.’ (2 Zã 4, 6) Nin-kãens sẽn da maand sɩdã ra kõta a Zã sũ-noogo, la kõt a Zeova me sũ-noogo. (Yel. 27:11) Rẽ wilgda tõnd bõe? Maan-sɩd wata ne sũ-noogo. (1 Zã 5:3) Wala makre, d sẽn mi tɩ d noogda a Zeova sũurã kõta tõnd me sũ-noogo. A Zeova sã n neẽ tɩ d zãagda d meng ne dũniyã n maand a raabã, noom-a lame. Malɛgsã sẽn be saasẽ wã me maanda sũ-noogo. (Luk 15:10) Tõnd me sã n ne d tẽed-n-taag sẽn maand sɩda noom-d lame. (2 Tes. 1:4) B sã n wa sãam a Sʋɩtãan dũniyã d sũur na n yɩ noog d sẽn kell n maan sɩd ne a Zeova wã. w24.11 12 s. 17-18

Y sã n yã ned tɩ y yam kẽ-a, wakat a wãn la y segd n gũus n ges-a, n yaool n tɩ togs-a sẽn be y sũurẽ wã? Y sã n yɩ tao-tao n tɩ gom ne a soabã, nebã tõe n wa getame tɩ y yaa ned sẽn pa tagsd tɩ bɩ la a yaool n yãk yam ye. (Yel. 29:20) La y sã n bas tɩ kaoos wʋsgo, b tõe n wa tagsame tɩ y yaa ned yam sẽn yuusdi, sẽn yɩɩd fãa sã n mik t’a soabã bãngame tɩ y yamã kẽ-a lame. (Koɛ. 11:4) Tẽeg-y me tɩ pa tɩlɛ tɩ y kɩs sɩd tɩ y na n kẽe kãadem ne neda, n yaool n togs-a sẽn be y sũurẽ wã ye. La y segd n kɩsa sɩd tɩ yãmb mengã segl n saa kãadem yĩnga, la t’a soabã tõe n yɩɩ ned sẽn zems ne yãmba. La y sã n wa neẽ tɩ ned rata yãmba, y maanda wãna? Sã n mik tɩ y pa rat a soabã, bɩ y modg tɩ y manesmã wilg rẽ vẽenega. Y sã n maan t’a soabã tẽed tɩ y rat-a lame tɩ yaool n pa woto, pa sõma ye.—Efɛɛ. 4:25. w24.05 22-23 s. a 9-10