Welgd-y y mo-yõsã tao-tao

D rɩk makre. Ned kõbr sã n kaooge, yaa tɩlɛ t’a paam tɩ logtor ges a yelle. Rẽ la kõbrã na n wa tonge, tɩ zabdmã sa. B sã n pa ges a yell sõma, zabdmã tõeeme n pa sa tao-tao ye. Sẽn yaa wẽng menga, kõbrã tõeeme n pa tong sõma ye.

Yãmb ne y tẽed-n-taag moor sã n yõsg taab me, y segd n maana bũmb tao-tao n welg yellã. Sã n pa rẽ, y zoodã tõe n sãamame tɩ nams-y n kaoose. Sũ-kẽk tõe n wa paama pãng y sʋka, hal tɩ y pa le rat n yɩ zo-rãmb ye. A Zeezi yeelame: “Bɩ f yɩ tao-tao n maneg f yell ne f zabd-n-taaga.” (Mat. 5:25) Rẽ n so tɩ y segd n pelg y pʋg n gom ne y zoa wã n bao n welg yellã. La maan-y rẽ ne bʋgsem. Bũmb a yiib n tõe n kɩt tɩ woto maaneg yɩ toogo.

Pipi, y tõeeme n pa rat n welg yellã, y sẽn pa mi y sẽn na n gom rẽ yell to-to yĩnga.b D gom a Evodi ne a Sẽntiis sẽn zĩnd pipi kiris-nebã wakatẽ wã yelle. Tõe tɩ mo-yõsr n da be b sʋka, tɩ b pa tõe n welg-a ye. D tõe n yeelame tɩ yellã kaoosame, bala a Poll sẽn da be hal Rommã wʋma rẽ kibare. A sagl-b lame tɩ b maan b sẽn tõe fãa n le zems taaba. (Fili. 4:2) B sã n da sik b mens n sõs ne taab ne pʋ-peelem la b kõ taab sugri, b ra tõogd n le yɩɩ zo-rãmba.

Yiibu, y tõe n getame tɩ yaa y to wã yelle, la tɩ yaa yẽ n segd n kos sugri. La sẽn tar yõod n yɩɩd yaa y kell n yɩ zo-rãmba, pa wilg ãnda n be bʋʋm tɩ ãnda ka bʋʋm ye. Ned kõbr sã n kaoog tɩ logtor na n tɩp-a, a pa na n feesd n dat tɩ b togs-a sẽn sɩng to-to tɩ kõbrã wa kaoogã ball-ball ye. Rẽ n so tɩ y sã n wa na n sõs ne y zoa wã, bɩ y pa segd n baood n na n wilg ãnda n tar taal ye. Tẽeg-y tɩ y zoodã tara yõod wʋsgo, la tɩ y segd n maana y sẽn tõe fãa n kell n yɩ zo-rãmba.

Y sã n tara yell ne y tẽed-n-taag bɩ y bao n welg-a rũndã menga, tɩ y zoodã ra sãam ye. “Ra bas-y tɩ wĩndgã tɩ lʋɩ tɩ y sũurã ket n nan pa sig ye.” (Efɛɛ. 4:26) Y sã n modgd n welgd y mo-yõsã tao-tao, y sõngdame tɩ “zems-n-taar” ket n be d sʋka.—Efɛɛ. 4:1-3.