Ket-y n baood-y n bãngd-y-yã a Zeova n paasdẽ

1. D sã n bʋgsd a Zeova yamã, a bãngrã la a sẽn maan bũmb ninsã zugu, d tagsg yaa wãna?

TÕND Wẽnnaam a Zeova mii bũmb fãa. A yamã pa tar mak-n-taag ye. Sẽn paase, a naana bõn-kãsems wʋsgo. D sã n tags rẽ yelle, d tẽegdame tɩ d pa zem baa fʋɩ a Zeova taoor ye. Tõe tɩ y yeel wa tẽn-tʋmd a Poll yaa: “Ad Wẽnnaam sɩd yaa kõata! Ad a yamã la a bãngrã waooga! Ned pa tõe n wʋm a bʋ-kaoor toor-toorã võore, la ned pa tõe n bãng a soayã ye!”—Rom. 11:33, 34.

2. Bõe n wilgd tɩ d tõe n bãnga a Zeova?

² Baa ne d sẽn pa tõe n bãng bũmb fãa a Zeova zugã, d tõe n bãnga a sẽn yaa Wẽnnaam ning buudã. Bõe n kɩt tɩ d yet woto? Rĩm a Davɩɩd yeela a biig a Salomo yaa: “Bao n bãng fo ba wã Wẽnnaamã la f tũ-a ne f sũur fãa. . . . Fo sã n bao-a, a na n basame tɩ fo yã-a.” (1 Kib 28:9) Kaoosg zugẽ, tẽn-tʋmd a Zã yeela a tẽed-n-taasã yaa: “A Zeezi kõo tõnd yam-vẽenem sẽn na yɩl tɩ d bãng Soab ning sẽn yaa sɩdã.” (1 Zã 5:20) Sẽn paase, a Zeezi meng yeelame tɩ ‘ned ning Biigã sẽn dat n vẽnegã tõe n bãng a Zeova.’—Mat. 11:27.

3. Bõe yell la d na n gom sõs-kãngã pʋgẽ?

³ Neb nins fãa sẽn dɩk b mens n kõ a Zeova wã zoe n mii bũmb wʋsg a zugu. La d pa tõe n bãng a Zeova n sa ye. (Zã 17:3) D na n ket n bãngda bũmb wʋsg a Zeova zugu. Wala makre, d na n bãngda bũmb nins sẽn noogd a sũurã n paasdẽ, la d sẽn tõe n maan to-to n maneg n kɩs-a sɩda. D na n baoo sogsg a tãab leoore. Yaa sogsg sẽn tõe n sõng tõnd tɩ d bãng a Zeova n paase, baa d sẽn tũ-a n kaoos to-to. 1) Bãng a Zeova rat n yeelame tɩ bõe? 2) Bõe yĩng tɩ d segd n ket n baood n bãngd a Zeova n paasdẽ? La 3) bõe la d tõe n maan n bãng a Zeova n paase?

BÃNG A ZEOVA RAT N YEELAME TƖ BÕE?

4. Bõe n wilgd tɩ ned mii a Zeova?

⁴ D sã n ges a Zeova sẽn yeel Zʋɩf-rãmb nins sẽn da na n yi yembdã n lebg n wa wã bũmb ningã, d bãngda bũmb sẽn wilgd tɩ ned mii a Zeova. A yeelame: “Mam na n kõ-b-la sũur sẽn na n kɩt tɩ b bãng maam, tɩ b bãng tɩ mam yaa a Zeova.” (Zer. 24:7) Yaa vẽeneg tɩ Zʋɩf-kãens ra zoe n mii bũmb wʋsg a Zeova zugu. La b sẽn yi yembdã n lebg wa wã poore, b ra segd n modga ne b sũy fãa tɩ bãmb ne a Zeova zoodã pãng paase. Biibl-mit a ye yeelame: “Bãng Wẽnnaam yaa toor fasɩ ne bao n bãng-a hal n lebg a zoa hakɩɩka. Yaa wa karem sebr sẽn gomd nonglem yell sẽn yaa toor fasɩ ne nong nedã.” D sã n miẽ tɩ Wẽnnaam yʋʋr la a Zeova, la tɩ yẽ n yaa Wẽnnaam sɩd-sɩdã bala pa sek ye. D segd n bao n bãnga a sẽn yaa Wẽnnaam ning buudã sõma me.

5. Rĩm a Zoziyas kibarã tõe n sõng-d lame tɩ d bãng bõe, bao n bãng a Zeova wã wɛɛngẽ?

⁵ D sã n bãngd a Zeova n paasdẽ, d bãngda bũmb nins sẽn noom-a la bũmb nins sẽn pa noom-a wã me n paasdẽ. Rĩm a Zoziyas mak-sõngã wilgda rẽ. Biiblã goma a yelle, n yeel yaa: “A naamã yʋʋm a nii-n-soabã, a sẽn wa n nan ket n yaa biiga, yẽ sɩnga a yaab a Davɩɩd Wẽnnaamã baoobo.” (2 Kib 34:3) A Zoziyas bao n bãnga bũmb wʋsg Wẽnnaam zugu, la a pa tek woto bal ye. A ra tũuda bũmb nins a sẽn bãngã. A Zeova tũnuga ne no-rɛɛs a Zeremi n yeel t’a Zoziyas ra kaooda buud ne tɩrlem la a maand sẽn yaa tɩrga, la t’a ra sõngda “b sẽn namsd b rãmbã ne naong rãmbã.” Rẽ poore, a Zeova sokame yaa: “Pa woto n wilgd tɩ ned mii maam sɩda?”—Zer. 22:15, 16.

6. Yɩɩn-sõamyã 9:10 wilgdame tɩ d sã n bãngd a Zeova n paasdẽ, na n kɩtame tɩ d maan bõe?

⁶ Karm-y Yɩɩn-sõamyã 9:10. D sã n bãngd a Zeova n paasdẽ, d sẽn kɩs-a sɩd to-to wã me na n paasdame. Yɩɩ woto ne tẽn-tʋmd a Polle. B sẽn wa n yõk a Poll n pag bãens roog tɩ wakat ning b sẽn na n kʋ-a wã kolgdẽ wã, a yeelame yaa: “Yãnd pa tar maam ye. Bala mam mii Soab ning mam sẽn tẽ wã.” (2 Tɩm. 1:12) Bũmb nins a Poll sẽn bãng a Zeova zugã, n paas bũmb nins fãa a Zeova sẽn maan n sõng-a a vɩɩmã tõrã kɩtame t’a ra kɩs-a sɩd zãng-zãnga. A Poll ra kɩsa sɩd t’a Zeova pa na n yĩm yẽ la bũmb nins fãa a sẽn maan a tʋʋmdã pʋgẽ wã yelle, la t’a na n wa vʋʋg-a lame.

BÕE YĨNG TƖ D SEGD N KET N BAOOD N BÃNGD A ZEOVA N PAASDẼ?

7. D sã n tũ a Zeova n kaoos yʋʋm wʋsgo, d tõeeme n wa pa le maand bõe?

⁷ D sẽn wa n bãng a Zeova paalmã, d ra maanda modgr sẽn na yɩl n ket n bãngd-a n paasdẽ. La d sã n tũ-a yʋʋm wʋsgo, d tõeeme n wa pa le maand modgr wʋsg rẽ wɛɛngẽ ye. Bõe yĩnga? D sã n wa karemd Biiblã d ye, wall d naaga d tigingã neb n zamsd Biiblã tigsg sasa, d wae n tagsda bũmb nins d sẽn bãngdã sẽn tõe n naf tõnd mengã to-to, wall d sẽn tõe n tall-b n sõng neb a taabã to-to wã yell n yɩɩda. Rẽ zemsame. Bala Biiblã sagend-d lame tɩ d maan woto. (2 Tɩm. 3:16, 17) La bũmb yõod sẽn yɩɩd rẽ n be, tɩ d segd n tags a yelle. (Yɩɩn. 25:8-10) D segd n mi n soka d meng yaa: ‘Bõn-kãngã wilgda maam bõe Wẽnnaam a Zeova zugu?’a

8. D sã n bãngd a Zeova n paasdẽ, tõnd ne yẽ zoodã lebgda wãn-wãna? (Yɩɩn-sõamyã 73:24-28)

⁸ D sã n bãngd a Zeova n paasdẽ, tõnd ne yẽ zoodã pãng me paasdame. Wala makre, y sã n karem Biiblã, y sã n ges jw teledifiziyõ sõsga, wall y sã n kẽng tigis-kãseng poore, y tagsg mi n yaa wãn ne a Zeova? Naoor wʋsgo, kɩtdame tɩ y maneg n neẽ t’a Zeova nong-y lame, tɩ yãmb me maneg n nong-a. Bõe yĩnga? Bala y bãnga bũmb a Zeova zug n paase, tɩ kɩt tɩ y rat n pẽg-a la y pʋʋs-a barka. Yɩɩn-gʋlsdã sẽn bʋgs a Zeova sẽn da wilgd to-to t’a nong-a lame wã zugã poore, a yeelame: “Wẽnnaam yaa mam sũurã pĩiga, la m pʋɩɩr wakat fãa yĩnga.” (Karm-y Yɩɩn-sõamyã 73:24-28.) Tõnd me tagsg yaa woto. D sã n modgd n bãngd a Zeova n paasdẽ, d na n maneg n neeme tɩ d sẽn paam n yaa a zo-rãmbã yaa zu-zẽkre, tɩ kɩt tɩ d sũur yaa noog ne rẽ.

9. D sã n tagsd a Zeova yelle, wãn to la sõngd tõndo? Rɩk-y makre.

⁹ Biiblã yeelame tɩ d tagsd a Zeova yelle. Woto rat n yeelame tɩ d tẽegd bũmb nins d sẽn bãng a zugã yelle, la d tagsd d manesmã sẽn tõe n yɩ-a noog bɩ sẽn tõe n sãam a sũurã yell wakat fãa. D sã n maand woto, na n sõngd-d lame tɩ d bãngd n yãkd yam. (Yel. 3:5, 6) Wala makre, sãam-biis la sãam-bi-pogs wʋsg nong n tara b pagã wall b sɩdã fot b biruẽ wã, b korgẽ wall b portaablã zugu. Rẽ sõngd-b lame tɩ b wae n tagsd b to wã yelle, la tẽegd-b tɩ b nong-a-la wʋsgo. Sõngd-b lame me tɩ b ra wa maan bũmb b sẽn mi tɩ pa noom b to wã, wall sẽn na n sãam a sũur ye. Woto me, d sã n wae n tagsd a Zeova yelle, na n sõngame tɩ d yãkd yam sẽn noom-a.—Yɩɩn. 19:13, 14.

10. D sã n bãngd a Zeova n paasdẽ, bõe la d na n tõogd n maand sõma?

¹⁰ A Zeova naana tõnd a meng wõnego, tɩ kɩt tɩ d tõe n dɩk a togs-n-taare. (Sɩng. 1:26) D sã n bãngd a Zeova sẽn yaa Wẽnnaam ning buudã n paasdẽ, na n sõngd-d lame tɩ d tõogd n dɩkd a togs-n-taar sõma. Gʋlsdbã ne Fariziyẽ-rãmbã ra pa maand woto ye. A Zeezi ning-b-la taale, bala b ra mii baa Tõogã yel-bõonesã, n yaool n “pa sakd Tõogã bũmb nins sẽn tar yõod n yɩɩdã, sẽn yaa tɩrlem, nimbãan-zoeer la kɩs-sɩdã ye.” (Mat. 23:23) D pa rat n yɩ wa nin-kãens ye. D modgdame n baood n bãngd Biiblã noyã la a saglsã sẽn tõe n sõng tõnd tɩ d bãng bũmb nins a Zeova zugã. D sã n maand woto, na n sõngd-d lame tɩ d rɩkd a togs-n-taar sõma.—1 Zã 4:8, 11.

BÕE LA D TÕE N MAAN N BÃNG A ZEOVA N PAASE?

11. Ãnda n sõng-y tɩ y bãng a Zeova?

¹¹ Ãnda n sõng yãmb tɩ y bãng a Zeova? Tõe tɩ yɩɩ y roagdbã n karem Biiblã kibay la b tik bũmb nins a Zeova sẽn naanã, n sõng-y tɩ y bãng a sẽn yaa Wẽnnaam ning buudã. Pa rẽ bɩ yɩɩ a Zeova Kaset soab n wa n moon-y koɛɛgã, tɩ y sak n zãms Biiblã. Tõe t’a talla Vɩɩmd-y wakat sẽn kõn sa! sebrã wall sebr a to, n sõng-y tɩ y bʋgs Biiblã kibay zugu, la bũmb nins a Zeova sẽn naanã zug n bãng a sẽn yaa Wẽnnaam ning buudã.b (Nee. 8:8; Tʋʋ. 14:17) La d segd n ket n baood n bãngda a Zeova n paasdẽ. D na n goma rẽ yell masã.

12-13. D sã n karem Biiblã, bõe la d tõe n bãng a Zeova zugu? Rɩk-y makre. (Zeremi 39:15-18) (Ges-y fotã me.)

¹² Pipi, d sã n karemd Biiblã la d zãmsd-a, d bãngda a Zeova n paasdẽ. Wakat ninga, b mi n sõdga Wẽnnaam zʋg-sõma Biiblã pʋgẽ. (Yik. 34:6, 7) La naoor wʋsgo, b mi n goma neb la b yam-yãkr toor-toor yelle. Y sã n wa karemd kiba-kãens bɩ y tags n ges b sẽn tõe n sõng-y tɩ y bãng bũmb ning a Zeova zugu.

¹³ Wala makre, y sã n karem Zeremi 38:6-13, y mikdame tɩ b gomda Etiyopi ned a Ebɛɛd-melɛk yelle. No-rɛɛs a Zeremi ra bee yell pʋgẽ, t’a tɩ fãag-a. Tõe tɩ y zoe n nee bũmb y sẽn tõe n maan n dɩk a Ebɛɛd-melɛk togs-n-taare. A sõnga a Zeremi baa sẽn da pa nana wã. A wilgame t’a tara raood wʋsgo, la t’a nonga a tẽed-n-taasã. La y nee kiba-kãngã sẽn tõe n sõng-y tɩ y bãng bũmb ning a Zeova zug bɩ? (Karm-y Zeremi 39:15-18.) Wala makre, bõe la b yeel kibarã pʋgẽ tɩ wilgdẽ t’a Zeova yaa sõm-mita, t’a kaooda bʋʋd ne tɩrlem, la t’a pa bakd neda? Bõe me la kiba-kãngã sõng-y tɩ y bãng a Zeova zugu? Y sã n wa karemd Biiblã fãa, bɩ y baood n bãngd a Zeova zʋg-sõma wã n paasdẽ, tɩ rẽ poor bɩ y pʋʋs-a bark la y pẽg-a a zʋg-sõma wã yĩnga.

14. D sã n wa get bũmb nins a Zeova sẽn naanã, bõe me la d segd n maan tɩ naf-do?

¹⁴ Yiibu, d sã n bʋgsd bũmb nins Wẽnnaam sẽn naanã zugu, d bãngd-a lame n paasdẽ. (Yɩɩn. 145:9, 10) La d sã n get bũmb nins a Zeova sẽn naanã bala, pa sek ye. Bãngdb kẽer bao n bãnga rũms bɩ tɩɩs sõma, la b pa mi Wẽnnaam zʋg-sõma wã ye. B sʋkã neb kẽer meng n pʋd yetẽ tɩ Wẽnd ka ye. Tẽn-tʋmd a Poll yeelame tɩ baa “ned sẽn pa tõe n yã Wẽnnaamã, hal dũniyã naaneg tɛka, ninsaal tõe n bãngame tɩ Wẽnnaam yaa pãng sẽn ka sɛt soaba, la t’a sɩd yaa Wẽnnaam, rẽ sẽn yaa vẽeneg bõn-naandsã sʋkã yĩnga.” (Rom. 1:20) Biibl a yembr pʋgẽ, b lebga vɛrse-kãngã goamã n yeel tɩ “ned sẽn tagsd sõma tõe n yãa” Wẽnnaam zʋg-sõma wã. Rẽnd d sã n dat n bãng a Zeova sẽn naan bũmb ninsã sẽn tõe n sõng tõnd to-to tɩ d bãng a sẽn yaa Wẽnnaam ning buudã, d segd n tagsda sõma.

15. Bõe la a Patrik maand n bãngd a Zeova n paasdẽ, la wãn to la d tõe n dɩk a togs-n-taare? (Ges-y fotã me.)

¹⁵ Tõnd sʋkã neb wʋsg bee galʋ-tẽns pʋsẽ, tɩ tɩɩs la rũms wʋsg kae b sẽn beẽ wã ye. Baa sã n yaa woto ne yãmba, y ket n tõe n gesa bũmb nins a Zeova sẽn naanã n dɩk yam. A Patrik maanda woto. A bee Brazavɩll sẽn yaa Kõngo tẽn-bedrã pʋgẽ. A yeelame: “Daar fãa, m modgdame n ges bũmb a Zeova sẽn naane. M wae n yãta bõn-kɩds la liuuli sẽn saad n baood rɩɩbo. Daar a ye, m yãa liuuli sẽn maand b tʋko. B tõog n talla bũmb toor-toor b sẽn tõe n paam tẽngã pʋgẽ n maan tʋko, n lob b gɛlã.” La a Patrik pa ges liuuli wã bal ye. A tagsa Naandã yell me. A yeelame: “Mam bãngame t’a Zeova geta a bõn-naandsã fãa yelle, baa b rãmb nins sẽn pa zem baa fʋɩ wã. Rẽ kɩtame tɩ m kɩs sɩd tɩ m yell paka a Zeova, la t’a na n sõngd-m lame tɩ m paamd bũmb nins sẽn yaa tɩlɛ ne-mã wakat fãa.”

16. Bõe n sõng a Zeezi ma a Maari t’a bãng a Zeova n paase, la wãn to la d tõe n dɩk a togs-n-taare? (Ges-y fotã me.)

¹⁶ Bũmb a tãab-n-soab d sẽn tõe n maand n bãngd a Zeova n paasdẽ yaa d sẽn na n bʋgsd a sẽn sõngd tõnd to-to wã zugu. Yaa woto la a Zeezi ma a Maari maan-yã. A ra zoe n mii a Zeova sõma, ‘n paam a barkã’ me. (Luk 1:30) La a Zeova wa n kõ-a-la tʋʋmd sẽn tar yõod wʋsg la sẽn da pa nana. A ra segd n doga Wẽnnaam Biigã, n wub-a. A Zeova tũnuga ne malɛk a Gabriyɛll n paas a Elizabɛt sẽn da yaa a Maari roagdã n keng a Maari raoodo, la a wilg-a t’a bas a yam t’a na n sõng-a lame. A bʋgsa bũmb ning sẽn paam-a wã sẽn tõe n sõng-a t’a bãng a Zeova zugã, n bãng t’a yaa pãn-kãseng soaba, nimbãan-zoɛta, t’a pa bakd ned n sõnge, la t’a geta sik-m-mens rãmbã yelle. (Luk 1:46-55) A Maari sũur da nooma ne a Zeova sẽn sõng-a wã. Tõnd me sã n paam t’a Zeova sõng-d “d sẽn wat n dat sõngr wakate,” noom-d lame. (Ebre. 4:16) A Zeova sã n sõng-y fãa bɩ y sok y meng yaa: ‘Rẽ sõngda maam tɩ m bãng bõe a Zeova zugu? A Zeova zʋg-sõma-bʋs la rẽ wilgd maam?’

D PA NA N TOL N BÃNG A ZEOVA N SA YE

17-18. Bõe yĩng tɩ d tõe n yeel tɩ d pa na n tol n bãng a Zeova n sa?

¹⁷ Dũni-paalgã pʋgẽ, d na n maneg n bãnga a Zeova n paase. D na n paama seb-pindem-paal sẽn wilgd tõnd a Zeova sẽn dat tɩ d maan bũmb ninsã. (Vẽn. 20:12) D na n paam n bãnga bõn-naandsã n paase, tɩ kɩt tɩ d maneg n bãng a Zeova. (Eza. 11:6-9) Bõn-paal me la a Zeova na n maane, tɩ kɩt tɩ d bãng-a n paase. Wala makre, a na n vʋʋga d zo-rãmbã la d neb nins sẽn maan kaalmã, la a sõng-d tɩ d lebg neb sẽn zems zãnga.

¹⁸ D pa na n tol n bãng a Zeova n sa ye. A sɩng n bee hal wakat sẽn ka sɩngre. Rẽnd “a yamã pa tar koak ye.” (Yɩɩn. 90:2; 147:5) D “pa na n tol n bãng tʋʋmd ning Wẽnnaam sẽn tʋmã sɩngr n tãag a baasg ye.” (Koɛ. 3:11) Woto wã, baa d sẽn sɩng a Zeova tũubã sẽn kaoos to-to bɩ d ket n tũnugd ne segb buud fãa d sẽn paame, n baood n bãngd d Ba wã sẽn nong-dã n paasdẽ.