Ezayi sebrã tõe n bels-d lame

1-2. D sũur sã n wa sãame, wãn to la a Zeova belsd tõndo?

D RIK makr ne biig sũur sẽn na n sãam wʋsg t’a yãbda. Tõe tɩ yaa b zakã rãmb sẽn dat n yik n toeem zaka, t’a miẽ t’a na n loog n basa a zo-rãmbã yĩnga. Leb n tõe tɩ yaa a sẽn tudg n maan bũmb yĩnga. Sã n wa yaa woto, bõe la a ma wã na n maane? A na n maaga a yĩng n kelg-a la a bels-a.

² Biiblã pʋgẽ, a Zeova maka a meng ne pag sẽn nong a biiga, n belsd-a. A yeelame: “Wa pag sẽn belsd a biigã, ma-me na n belsa yãmba.” (Eza. 66:13) A Zeova nonga tõnd n yɩɩd ned buud fãa sẽn nong a kamba. (Eza. 49:15) D sã n wa koms raoodo, wall d sã n wa namsdẽ a Zeova tũnugda ne a Gomdã n belsd-d la a kengd-d raoodo.—Rom. 15:4.

3. Bõe yell la d na n gom sõs-kãngã pʋgẽ?

³ Ezayi sebrã pʋgẽ, a Zeova togsa tõnd bũmb wʋsg sẽn tõe n bels-do. (Eza. 40:1) Yɩɩ Zida nebã sẽn wa n tar zu-loees wʋsg la a Zeova vẽneg a Ezayi t’a gʋls a sebrã n na n bels a nin-buiidã. Rũndã-rũndã sẽn yaa ‘yaoolem wakatã tɩ yɛlã yaa kãn-kãe hal tɩ vɩɩmã lebg toogã,’ tõnd me rata belsgo. (2 Tɩm. 3:1) Sõs-kãngã pʋgẽ, d na n goma Ezayi sebrã vɛrse-rãmb a wãn yelle. Yaa vɛrse-rãmb sẽn tõe n bels-d la b keng-d raood d yɛlã sã n wa tiig n toeeme, d sã n wa ningd d meng taal yel-wẽnd d sẽn maan pĩnd yĩnga, wall d ned sã n wa maan kaalem.

D YƐLÃ SÃ N WA TIIG N TOEEME

4. D yɛlã sã n wa tiig n toeeme, wãn to la tõe n nams-do?

⁴ D yɛlã tõe n wa tiig n toeemame. (Koɛ. 9:11; 1 Kor. 7:31) Wala makre, d tõe n wa tiig n lʋɩɩ bãaga, paam n kõ noorã tõe n wa lebga toogo, zab wall gudgr tõe n wa yika tẽng ning pʋgẽ d sẽn be wã, pa rẽ bɩ yaa a Zeova siglgã n kos-d tɩ d toeem tʋʋmde. D yɛlã sã n toeem woto, d tõe n maanda yɩɩre, wall d pa mi d sẽn maandg ye. D tõe n sokda d meng yaa: ‘M na n maana a wãna?’ A buud paama saam-biig yʋʋr sẽn boond t’a Zozɛfe. A tʋma Betɛllẽ wã yʋʋm piig la a yopoe, tɩ b wa yeel-a t’a bas n lebg so-pakda. A yeelame: “Toeengã yɩɩ toogo. Bala m tʋma Betɛllẽ wã n kaoos wʋsgo. M da pa mi m sẽn maandga, wall bũmb ning sẽn na n paam-m ye.” Bõe la a Zeova yeel Ezayi sebrã pʋgẽ tɩ tõe n bels-do, d yɛlã sã n wa tiig n toeeme?

5. Bõe la a Zeova pʋlem tõnd tɩ be Ezayi 42:16 pʋgẽ? (Ges-y fotã me.)

⁵ Karm-y Ezayi 42:16. A Zeova pʋlmame t’a na n sõnga neb nins sẽn yaa wa zoensã tɩ b kẽn so-bugs b sẽn pa wae n tũudẽ zugu, la t’a na n kɩtame tɩ likã lebg vẽenem. D yɛlã sã n wa tiig n toeeme, tõe n kɩtame tɩ d getẽ tɩ d yaa wa ‘zoanga,’ tɩ d kẽnda ‘so-bugs d sẽn pa wae n tũudẽ zugu,’ “lik pʋgẽ” la “so-rʋd” zugu. D tõe n getame tɩ yaa wa d pasgda kãgre, n pa mi bũmb ning sẽn be d taoorã ye. La a Zeova pʋlmame tɩ baa d yɛlã sẽn wa n yaa a soaba, a na n ket n wilgd-d-la sore, la t’a pa na n tol n daag-d n bas ye. A na n gãda d nugu, n ta tõnd likã pʋgẽ, n kɩt tɩ vẽenem zĩnd d sorã zugu, la a sarem kunkubã. Wãn to la a Zeova maand rẽ? A tũnugda ne a Gomdã la a siglgã n kõt-d saglse. (Yɩɩn. 119:105; Eza. 30:21) A leb n tũnugda ne d tẽed-n-taasã la neb a taab n sõngd-d sõng-vẽenega. Baa d sã n wa pa mi d sẽn maandga, d tõe n kɩsa sɩd t’a Zeova na n sõng-d-la a sẽn nong-dã yĩnga, la t’a wʋmda d yɛlã võore.—Eza. 41:10; 1 Pɩy. 5:6, 7.

6. D yɛlã sã n wa tiig n toeeme, d tõe n kɩsa sɩd ne bõe?

⁶ A Zozɛf sẽn yaa saam-biig ning yell d sẽn zoe n gomã wilga a Zeova sẽn sõng yẽ ne a pagã ne nonglem to-to, b sẽn yi Betɛllẽ wã poore. A yeelame: “Wakat kãng sẽn pa yɩ nana wã, d ra neeme t’a Zeova sõngd-d-la ne nonglem. A tũnuga ne saam-biisã la saam-bi-pogsã n sõng-do. A ra sõngd-d lame tɩ d paamd bũmb nins sẽn yaa tɩlɛ ne-dã, la a ra belsd-d wakat ning fãa d sẽn dat belsgo, n ket n maand woto.” Y yɛlã sã n wa tiig n toeeme, baa sã n wõnd na n yɩɩ toog wʋsgo, yãmb me tõe n basa y yam t’a Zeova na n kõ-y-la pãnga, la t’a na n wilg-y-la sore. (Eza. 54:10; 58:11) A Zozɛf paasame: “Tõnd yɩɩn-noog a ye goam n noom maam. A yeelame: ‘M pa mi beoog sẽn na n yɩ a soab ye. La m miime t’a Zeova na n sõng-m lame.’a Baa yɛlã sẽn mi n pa wa d sẽn datã, d kɩsa sɩd t’a Zeova na n sõng-d lame.”

D SÃ N WA NINGD D MENG TAAL YEL-WẼND D SẼN MAAN PĨND YĨNGA

7. Bõe n namsd neb kẽere?

⁷ D sã n maan yel-wẽn-kãseng n vẽneg n togs kãsem-dãmbã, b na n sõng-d-la b sẽn nong-dã yĩnga. Rẽ poore, d na n maana d sẽn tõe fãa n da le wa maan yel-wẽn-kãng buud ye. (Yel. 28:13; Zak 5:14-16; 1 Zã 1:9) La baa a Zeova sã n kõ-d sugri, d tõe n ket n ningda d meng taale. D tõe n sokda d meng yaa: ‘A Zeova sɩd kõ-m-la sugr bũmb ning m sẽn maanã yĩng sɩda?’ (2 Kor. 2:7) D tõe n wʋma tagsg a woto võore, bala yɩl n yĩm yel-wẽnd d sẽn maan pa nana ye. Rĩm a Davɩɩd yeelame yaa: “Mam yel-wẽndã yĩnga, laafɩ ka be mam kõabã pʋgẽ ye.” A paasame: “Mam pa le tõe n tags sõma ye. Mam komsa raood zãnga.” (Yɩɩn. 38:3, 8) Yãmb sã n mi n ningd y meng taal yel-wẽnd y sẽn maan pĩnd yĩnga, Ezayi sebrã tõe n bels-y lame.

8-9. Bõe la a Zeova yeel Ezayi 1:18 wã tɩ wilgdẽ t’a sã n kõ sugri, a kõo sugr zãng-zãnga?

⁸ Karm-y Ezayi 1:18. A Zeova rɩka makr n wilg t’a sã n na n kõ sugri, a kõta sugr zãng-zãnga. A yeelame tɩ baa tõnd yel-wẽnã “sã n yaa moomde,” b na n lebga “pɛɛlg wa sa-lamdo.” Bũmb sẽn yaa moomd sã n bol d fuugu, yɩl t’a yi yaa toogo. La a Zeova yeelame t’a sã n kõ-d sugri, yaa wa a sẽn pek d yel-wẽnã tɩ yi zãnga, n pa na n tol n le tẽeg-b yell ye.

⁹ A Zeova maana woto ne rĩm a Davɩɩde. Baa ne a Davɩɩd sẽn yo la a maan sɩlem tɩ b kʋ nedã, a wa n teka yam t’a Zeova kõ-a sugri. Kaoosg zugẽ, a wa n yeelame t’a Davɩɩd tũu yẽ ne burkĩndi. (2 Sãm. 11:3, 4, 14, 15; 12:13; 1 Rĩm. 9:4, 5) A Zeova sã n tagsd a Davɩɩd yelle, a sẽn tẽr yaa a sẽn maan sɩd ne-a wã, pa yel-wẽn nins a sẽn maanã ye. Woto me, d sã n maan yel-wẽnd n tek yam n kos sugri, a Zeova kõt-d-la sugr ne nonglem, la a sõng-d tɩ d kell n tũ-a ne sũur-kaset sẽn yaa yɩlemde. D sã n wa ningd d meng taal yel-wẽnd d sẽn maan pĩnd yĩnga, bõe me n be Ezayi sebrã pʋgẽ n tõe n bels-do?

10. Bõe la b yeel Ezayi 38:17 pʋgẽ tɩ kengd raoodo?

¹⁰ Karm-y Ezayi 38:17 ne notã. D tõe n lebga goam nins b sẽn lebg tɩ “yãmb loba m yel-wẽnã fãa y poorẽ wã” tɩ “yãmb yãka m yel-wẽnã fãa y taoor” me. Dẽnd vɛrse-kãngã wilgdame tɩ ned sẽn maan yel-wẽn sã n tek yam n kos sugri, yaa wa a Zeova rɩkda a yel-wẽnã n lob a poorẽ wã n pa na n le yã-b wall a tags b yell ye. Sebr a yembr pʋgẽ, b yeelame tɩ b ra tõe n lebga vɛrse-kãngã goamã n yeel yaa: “Yãmb kɩtame tɩ yaa wa mam zɩ n maan yel-wẽnd ye.” Dẽnd a Zeova sã n kõ tõnd sugri, a nifẽ yaa wa d zɩ n maan yel-wẽnd ye. A Zeova sã n kõ-d sugri, a pa na n le wa tẽeg d pĩnd yel-wẽnã yelle, n ning-d taal wall a sɩbg-d rẽ yĩng ye. A yẽesa d yel-wẽnã zãnga. A pʋlmame: “Mam pa na n tẽeg f yel-wẽnã yell ye.” (Eza. 43:25) Pa kengd raood sɩda? A Zeova sẽn yaa Bʋ-kaood sẽn ka to wã sã n pa ningd-d taale, zemsame tɩ d ningd d meng taal sɩda?

11. Baa d sã n maana yel-wẽn-kãsems pĩndã, bõe la a Zeova geta? (Ges-y fotã me.)

¹¹ D sã n wa ningd d meng taal yel-wẽn d sẽn maan pĩnd yĩnga, d segd n tẽega bũmb nins a Zeova sẽn pʋlm-dã. A sã n kõ-d sugri, a kõ-d-la sugr zãng-zãnga. Baa d sẽn maan yel-wẽn pĩndã, a nand-d lame, n pa na n tẽegd d yel-wẽnã yell wa ninsaalbã sẽn pa zems zãngã sẽn mi n maandẽ wã ye. (Eza. 57:16) Sẽn tar yõod a Zeova nifẽ wã pa d sẽn da yaa ned ning buud pĩndã ye. Yaa d sẽn yaa ned ning buud rũndã-rũndã, la d sẽn modgd n na n wa lebg ned ning buudã. (Eza. 55:7) Wẽnnaam a Zeova sẽn yaa nonglem la sug-kõatã pa noom-d sɩda? Woto wã, bɩ d ra bas tɩ yel-wẽn nins d sẽn maan pĩndã kɩt tɩ d pa paam sũ-noog rũndã-rũndã, la bark nins sẽn watã ye.

D NED SÃ N WA MAAN KAALEM

12. D ned sã n maan kaalem, wãn to la tõe n nams-do?

¹² D ned sã n maan kaalem zabdame, tɩ sũ-sãamsã tõe n kaoos wʋsgo. Wakat ninga, d tõe n sokda d meng bõe yĩng t’a Zeova bas tɩ d nedã ki. A buud paama saam-biig a ye yʋʋr sẽn boond t’a Mikayɛlle. Roog n yõk bugum, t’a ba wã ne a ma wã ki bugmã pʋgẽ. A yeelame: “M sũur sãama wʋsgo. M sũur da yika ne a Zeova, a sẽn bas tɩ b ki wã yĩnga. M miime tɩ pa yẽ n kʋ-b ye. La a pa kogl-b me ye.” Tõe tɩ yãmb me sũur zoe n sãama wa a Mikayɛlle. Yell a woto sasa, Ezayi sebrã gom-bʋs n tõe n bels-yã, la kɩt tɩ y tẽed manegre?

13. Bõe la a Zeova pʋlem tõnd tɩ be Ezayi 25:8 pʋgẽ?

¹³ Karm-y Ezayi 25:8. A Zeova pʋlmame t’a “na n sãama kũum wakat fãa yĩnga.” Mams-y vɩɩmã sẽn na n yɩ to-to, kũum sã n wa pa le beẽ. Y sũur pa na n tol n le sãam y ned sẽn maan kaalem yĩng ye. (Eza. 35:10) Y pa na n le yã y ned sẽn gãe kũum koglg pʋgẽ, wall y ned b sẽn mumd tɩ sãam y sũuri ye. Y na n bee ne y nebã wakat fãa, tɩ y fãa tar laafɩ. Pʋlen-kãngã pa belgr ye. A na n pidsame, bala yaa a Zeova sẽn yaa soab ning sẽn tõe n kɩt tɩ yɩ wã n pʋlme.—Vẽn. 21:4, 5.

14. Y sã n tagsd kũum vʋʋgrã yelle, wãn to la nafd-yã? (Ezayi 26:19) (Ges-y fotã me.)

¹⁴ Karm-y Ezayi 26:19. A Zeova pa pʋlem t’a na n kɩtame tɩ kũum sa bal ye. A pʋlmame me t’a na n vʋʋga d neb nins sẽn maan kaalmã. A goma b yell n yeel yaa: “Mam kũ-rãmbã na n yikame.” Woto wilgdame t’a Zeova getame tɩ b yaa yẽ rẽnda. B bee a pʋ-tẽerẽ wã. Wakat ning a sẽn yãkã sã n ta, a na n vʋʋg-b lame. Tɩɩg sẽn zelg sã n paam koom, a vʋʋgdame. Woto me, a Zeova sẽn yaa soab ning nengẽ la vɩɩmã yitã na n kɩtame tɩ neb nins sẽn ki wã le vʋʋge. Wakat kãng sɩd na n yɩɩ sũ-noog wakate!—Ges-y Mark 5:42.

15. Wãn to la a Zeova sẽn pʋlem tɩ kũum na n vʋʋgame wã tõe n bels tõnd d ned kũum poore?

¹⁵ D ned sã n maan kaalem, yaa sɩd tɩ Wẽnnaam sẽn pʋlem t’a na n wa vʋʋga sẽn ki-bã pa kɩtd tɩ d sũ-sãamsã sa ye. La d sẽn mi t’a Zeova pa yĩm d neb nins sẽn maam kaalmã yellã belsd-d lame. Yɩɩ woto ne a Mikayɛll sẽn yaa saam-biig ning yell d sẽn zoe n gomã. A yeelame: “Ezayi 26:19 goamã sõng-m lame tɩ m bãng t’a Zeova nonga m doagdbã. B bee a pʋ-tẽerẽ wã, n na n kell n pa be n tãag wakat ning a sẽn yãk n na n vʋʋg-bã. M sã n tagsd rẽ yelle belsd-m lame la kengd m daoodo.” Yɩta sõma tɩ tõnd me mi n mams wakat ning d sẽn na n le yã d neb nins sẽn maan kaalmã. D sã n maand woto, belsd-d lame.

16. Biiblã vɛrse-bʋg n bels-y zu-loees sasa?

¹⁶ D goma Ezayi sebrã vɛrse-rãmb a wãn yelle, vɛrse-rãmb sẽn tõe n bels-d d yɛlã sã n wa tiig n toeeme, d sã n wa ningd-d meng taal yel-wẽn d sẽn maan pĩnd yĩnga, la d ned sã n wa maan kaalem. A Zeova sẽn tũnugd ne a Gomdã n belsd tõndã pa noom-d sɩda? (Yɩɩn. 94:19) Biiblã vɛrse n bels-y wʋsg zu-loees sasa bɩ? Sã n yaa woto, y sã n tõe bɩ y rɩk-a ne zugu, wall y bao sebr n gʋls a goamã n tabl zĩig y sẽn na n wae n yãtẽ. Woto la d saasẽ Ba a Zeova goamã na n belsd-yã.