Kɩs-y-yã a Zeova sẽn yaa yĩngr la tẽng Naabã sɩda

1. Yel-be-bʋs n paam a Zoobe?

YEL-BEED toor-toor n tiig n paam a Zoob sẽn da sakd Wẽnnaam ne a sũur fãa wã. A kambã fãa kiime. B zuu a rũms kẽere, la b kʋ sẽn ketã. Sẽn paase, a tʋm-tʋmdbã fãa la bal kiime. Rẽ poore, bã-kɛgeng n yõk a Zoob mengã. Rẽ fãa kɩtame tɩ nebã pa le nand-a ye. A “zo-rãmbã” togs-a-la goam wʋsg sẽn komsd raood bala. Baa a pagã meng a sẽn da nong wʋsgã komsa raoodo, n sagl-a t’a ‘tʋʋs Wẽnnaam la a ki.’ (Zoob 2:9; 15:4, 5; 19:1-3) Zu-loe-kãensã ra tõe n kɩtame t’a Zoob pa le kɩs Wẽnnaam sɩd ye. B ra tõe n kɩtame t’a sãmbd a Zeova sã n kogenda neb nins sẽn nong-a la b tũud-a wã.

2-3. Zu-loeesã tõe n kɩtame tɩ d wa sãmbd ne bõe, la wãn to la Zoob sebrã tõe n sõng-do?

² ‘Yɛlã sẽn yaa kãn-kãe hal tɩ vɩɩmã lebg toog’ rũndã-rũndã wã, tõnd me tõe n wa paama zu-loe-kɛgemse, tɩ kɩt tɩ yaa toog tɩ d kell n kɩs a Zeova sɩda. (2 Tɩm. 3:1) D sã n wa tar zu-loees wʋsgo, d sũur tõe n sãamame tɩ d maand yɩɩre, n tagsdẽ tɩ yɛlã pa na n tol n maneg ye. Yɛl a woto kɩtame meng tɩ kẽer sãmbd a Zeova sã n nong-b lame, la t’a sã n dat n sõng-b lame.

³ Sã n zoe n yɩɩ woto ne yãmb bɩ y ra koms raood ye. A Zoob wa n bãngame t’a Zeova pa na n tol n daag neb nins sẽn maand sɩd ne-a wã n bas ye. Tõnd me tõe n wa kɩsa a Zeova sɩd zãng-zãng wa a Zoobe. Masã, d na n bao n bãnga Zoob sebrã sẽn tõe n sõng-d to-to tɩ d bãng tɩ d tõe n kɩsa a Zeova sẽn yaa yĩngr la tẽng Naabã sɩd wakat fãa. D na n bãngame me t’a Zeova tara tõog n tõe n kɩt t’a sẽn yeel fãa pidsi, la t’a kogenda tõndo, n kõt-d bũmb nins fãa sẽn yaa tɩlɛ sẽn na yɩl tɩ d kell n tall tẽeb sẽn tar pãngã.

A SƲƖTÃAN YALSA A ZEOVA LA MALƐGSÃ TAOORE

4. Zoob sebrã wilgame t’a Zeova ne malɛgsã sẽn wa n tigim taaba, bõe n maane?

⁴ Zoob sebrã wilgame tɩ daar a ye, “Wẽnnaam kom-dibli wã” tigma taab a Zeova taoor saasẽ, ‘t’a Sʋɩtãan wa kẽ n yals b sʋka.’ (Zoob 1:6) Rẽ n yɩ pipi b sẽn bool a Zeova bɛ-kãsengã Biiblã pʋgẽ tɩ “Sʋɩtãana,” rat n yeel tɩ “Kɩɩsda.” A Zeova basame t’a Sʋɩtãan wa tigis-kãnga, baa ne a sẽn da pa le naag a zakã rãmbã. Rẽ t’a ra zoe n lebga a Zeova bɛya, ne malɛgsã la neb nins sẽn maand sɩd ne Wẽnnaamã bɛya. A Zeova sẽn yeel bũmb ning Sɩngr 3:15 wã n kɩt tɩ d miẽ tɩ rẽ t’a Sʋɩtãan pa le naag a zakã rãmb ye. Gom-kãens wilgda vẽeneg t’a Sʋɩtãan pa naag malɛg-sõamyã wã a Zeova sẽn boond tɩ “pagã” ye.

5. A Sʋɩtãan sẽn yeel bũmb ningã, la a Zeova sẽn leok-a to-to wã sõngda tõnd tɩ d bãng bõe?

⁵ A Zeova kɩtame tɩ b gʋls bũmb ning sẽn maan tigsgã sẽn zĩnd saasẽ wã sasa wã Biiblã pʋgẽ. A Sʋɩtãan sẽn yeel bũmb ningã wilga vẽeneg t’a kisa neb nins sẽn maand sɩd ne Wẽnnaamã, n dõt-ba. (Zoob 1:9; ges-y Vẽnegr 12:10.) A Zeova sẽn leok to-to wã wilgda tõnd bũmb sẽn kengd raoodo. Wilgdame t’a tũnugda ne a pãngã sẽn ka to wã n maand sẽn zems la sẽn yaa tɩrg wakat fãa. Leb n wilgdame t’a Zeova sẽn yaa Sẽn tõe-yã fãa wã, yẽ n yãkd malɛgsã la ninsaalbã sẽn tar sor n tõe n maanã, la b sẽn pa tar sor n na n maane.

A ZEOVA WILGDA MALƐGSÃ LA NINSAALBÃ B SẼN PA TAR SOR N NA N MAANE

6. Tigsg ning sẽn zĩnd saasẽ wã sasa, wãn to la a Zeova wilg t’a mii bũmb fãa? (Zoob 1:7, 8)

⁶ Karm-y Zoob 1:7, 8. Tigsg ning sẽn zĩnd saasẽ wã sasa, a Zeova wilgame tɩ yaa yẽ n yãkd bũmb ning yell b sẽn na n gomã. A soka a Sʋɩtãan yaa: “Fo gũus n gesa mam tʋm-tʋmd a Zoob bɩ?” Bõe yĩng t’a sok woto? Yaa t’a ra zoe n mii vẽeneg t’a Sʋɩtãan rat n maka a Zoobe. Masã, bɩ d ges a Zeova sẽn tall a pãn-kãsengã n sõng a Zoob to-to.

7. Sã n yaa ne Zoob 1:10, 11, bõe la a Sʋɩtãan yeel neb nins sẽn tũud a Zeova wã wɛɛngẽ?

⁷ Karm-y Zoob 1:10, 11. A Zeova n yaa yĩngr la tẽng Naabã, n tar sor n na n maan bũmb ning fãa a sẽn date. (Zer. 32:17; Dãn. 4:35) La a maanda sẽn yaa tɩrg wakat fãa. Baasgo, a Sʋɩtãan yeelame t’a Zeova tara a pãngã n maand sẽn pa zemse. A yeelame tɩ Wẽnnaam ningda neb wa a Zoob bark sẽn na yɩl tɩ b tũ-a. A yeelame me tɩ ninsaalbã tũuda a Zeova, rẽ sẽn nafd-bã yĩng bala. Bõe la a Zeova yãk yam n maane?

8-9. Bõe la a Zeova kõ a Sʋɩtãan sor t’a maane? Bõe la a yeel-a t’a ra maane, la bõe yĩnga? (Zoob 1:12) (Ges-y fotã me.)

⁸ Karm-y Zoob 1:12. A Zeova kõo a Sʋɩtãan weer t’a wilg a sẽn yetã sã n yaa sɩda. La a wilg-a-la a sẽn pa tar sor n na n maan me. A yeel-a-la vẽeneg yaa: “Ra sɩɩs [a Zoob] mengã ye!” Yɩɩ malɛgsã fãa taoor la a Zeova sẽn wilg a Sʋɩtãan bũmb ning a sẽn pa tar sor n na n maanã. A Sʋɩtãan da segd n tũu no-kãnga. A ra pa tar tõog n na n maan tɩ zʋʋg bũmb ning a Zeova sẽn kõ-a sor t’a tõe n maanã ye. Ket n yaa woto rũndã-rũndã. Rẽnd a Zeova tũnuga ne a pãngã n kogl a Zoobe, la a wilg t’a yaa Wẽnnaam sẽn yaa nonglem, t’a sẽn maand fãa yaa tɩrga.

⁹ A Sʋɩtãan pipi makrã pa yãk neng baa bilf ye. A Zoob kell n maana sɩd ne a Ba sẽn be saasẽ wã. (Zoob 1:22) La a Sʋɩtãan ra ket n dat n mak-a lame.

10. Bõe yĩng t’a Zeova bas t’a Sʋɩtãan le mak a Zoobe? (Zoob 2:2-6)

¹⁰ Karm-y Zoob 2:2-6. So-kãnga, a Sʋɩtãan ra rat n maana a Zoob bũmb sẽn yaa wẽng wʋsg sẽn na yɩl t’a bas Wẽnnaam tũubu. A Sʋɩtãan yeelame tɩ sã n yaa tɩlɛ, a Zoob na n sak n tʋʋsa Wẽnnaam sẽn na yɩl n kell n vɩɩmde. Sẽn na yɩl n wilg t’a Sʋɩtãan yaa pʋ-yagda, a Zeova kõ-a-la sor t’a lob a Zoob bã-kɛgenga. La a Zeova le wilg-a-la bũmb a sẽn pa segd n maane, n yeel yaa: “Ra yãk a yõorã ye.” Ra yaa tɩlɛ ne a Sʋɩtãan t’a tũ noor ning a Zeova sẽn kõ-a wã. Rẽnd a Zeova le wilgame tɩ yẽ n yaa Naab sẽn ka to wã, bala a Sʋɩtãan da pa tõe n maan a Zoob bũmb sẽn zʋʋg a Zeova sẽn kõ-a sor t’a tõe n maanã ye.

A ZEOVA KƖTAME T’A ZOOB NAMSGÃ SA

11. Wãn to la a Zeova keo a Zoobe? (Zoob 42:10-13)

¹¹ Karm-y Zoob 42:10-13. Sẽn wa n lebg vẽeneg t’a Zoob na n kell n maana sɩd ne a Zeova wã, a Zeova pa sak t’a Sʋɩtãan le nams-a ye. A kɩtame t’a Zoob namsgã sa. So-kãng me, a Sʋɩtãan ra pa tõe n gɩdg a Zeova t’a pa maan a sẽn yãk yam n na n maanã ye. A ra pa le tar sor n na n maan a Zoob wẽng ye.

12. Mak-bʋg n wilgd t’a Zeova kogenda neb nins sẽn kɩs sɩd t’a tõe n fãag-b lame wã?

¹² A Zeova tũnuga ne a pãngã n kogl neb wʋsg sẽn maan sɩd ne-a tõnd wakatã. Wala makre, yʋʋmd 1945 wã, Alemayn soolmẽ wã, sodaas n modg a Zeova Kaset rãmb kobs-yi la pis-tã tɩ b kẽn ne nao n yi kã de kõnsãntrasiyõ pʋg n kẽng mogrã noore. B ra ratame tɩ b sã n ta be bɩ b kʋ-ba. La baa sorã sẽn da yaa wok wʋsgã, a Zeova Kaset soab baa a ye pa ki sorã zug ye. B gʋlsa lɛtr n gom bũmb ning sẽn paam-bã yelle, n yeel t’a Zeova fãaga bãmb wa a sẽn fãag kom-bɩɩs a tãabã sẽn da yaa Ebre-rãmbã wʋng sẽn wɩng wʋsgã pʋgẽ wã. Kom-bɩ-kãens põsame n yi bugmẽ wã, tɩ bug-zõos yũug ra ka be b zut meng ye. Woto me, a Zeova Kaset rãmb kobs-yi la pis-tã wã paama nams-toaag n põse. B tẽebã paama pãng n yɩɩd pĩndã. A Zeova kõ-b-la pãng la raoodo. B ra getame me t’a Zeova fãag-b-la wa a sẽn fãag a Dãniyɛll gɩgma wã bokẽ wã. Rẽ tɛka, b maneg n yãka yam n na n kell n tũ a Zeova wakat sẽn kõn sa yĩnga. B yeelame tɩ paam n tũ a Zeova wakat sẽn kõn sa yĩngã n yaa keoor sẽn yaa kãseng n tɩ yɩɩda.—Ges-y Dãniyɛll 3:27; 6:22.

13. D sã n wa tar zu-loeese, d tõe n basa d yam ne bõe? (Ges-y fot-rãmbã me.)

¹³ Yɛlã mi n wa looga tõnd me, tɩ yaa wa b lob-d-la gɩgma bokẽ. (1 Pɩy. 5:8-10) Sã n wa yaa woto, d mi n tõe n komsa raood wʋsgo, n sokd d mens zu-loeesã sã n na n saame. Yell a woto sasa d sã n tẽeg a Zoob kibarã yelle, tõe n sõng-d lame. D tõe n basa d yam t’a Zeova tara tõog n na n kɩt tɩ d zu-loeesã sa. Tõe n yɩɩ rũndã-rũndã, wall dũni-paalgã pʋgẽ. A Zeova sẽn yãk wakat ning n na n sãam dũni-kãnga wã sã n ta, a pa na n bas tɩ daar-n-yɛng meng loog ye.

A ZEOVA NONGA SẼN MAAND-B SƖD NE YẼ WÃ

14-15. Bõe la a Zeova rat n maan n kõ neb nins sẽn maand sɩd ne-a wã, la bõe yĩnga? (Zoob 14:15) (Ges-y fotã me.)

¹⁴ Karm-y Zoob 14:15. Tõnd Ba sẽn be saasẽ wã maanda sɩd ne neb nins sẽn maand sɩd ne-a wã. A nong-b-la wʋsgo, hal tɩ b sã n ki bɩ a yãgd n na n wa vʋʋg-ba. A Zeova sã n wa vʋʋgd sẽn ki-bã dũni-paalgã pʋgẽ, sũ-no-kãseng n na n zĩndi.—Eza. 65:17.

¹⁵ Baa a Zoob namsgã saab poore, a kell n vɩɩmda a Sʋɩtãan dũniyã pʋgẽ. La Biiblã yeelame t’a Zeova ning-a-la bark wʋsgo. A kɩtame t’a paam laafɩ, la a kõ-a bõn-sõma n yɩɩd pĩndã. Bark nins a Zoob sẽn paamã yaa bũmb nins a Zeova sẽn na n kõ-a beoog-daarã reng-n-lɛmbga. A Zeova wilgame t’a ratame tɩ neb nins sẽn maand sɩd ne-a wã paam sũ-noog hakɩɩka, la vɩɩm sẽn tar barka. Sɩd me, a Zeova na n kõo neb nins fãa sẽn maand sɩd ne-a wã weer tɩ b lebg neb sẽn zems zãnga, n vɩɩmd tẽngã sẽn na n lebg arzãnã pʋgẽ. (Vẽn. 21:3, 4) Yĩngr la tẽng Naabã n dat n maana rẽ. D sã n wa tar zu-loees n tẽeg rẽ yelle, pa kengd d raood sɩda?

16. Bõe me n kɩt tɩ d tõe n kɩs a Zeova sẽn yaa yĩngr la tẽng Naabã sɩda?

¹⁶ Baa a Zeova sẽn paas a Zoob vɩɩmã woglmã, a wa n baas n kiime. La a Zeova sẽn yaa yĩngr la tẽng Naabã, pãng sẽn ka to soabã tara tõog n tõe n vʋʋg kũum. (Tõo. 32:39) Rẽnd ned baa a ye pa tõe n gɩdg a Zeova t’a pa vʋʋg neb nins a sẽn nongã ye. Wakat ning a sẽn yãkã sã n ta, a na n maana rẽ.—Rom. 8:38, 39.

KƖS-Y-YÃ A ZEOVA SƖD ZÃNG-ZÃNGA

17. Bõe n wilgd t’a Sʋɩtãan pa tõog n menes a Zeova nin-buiidã?

¹⁷ A Zoob kibarã wilgda vẽeneg tɩ d tõe n kɩsa a Zeova sɩd zãng-zãnga. D sũur yaa noog ne a Zeova, a sẽn pa bas t’a Sʋɩtãan menes a nin-buiidã. Na maan neb milyõ a wɛ n tũud a Zeova rũndã-rũndã, tɩ wilgdẽ t’a yaa pãng sẽn ka to soaba. Goosneema-rãmb sẽn tar pãng la tũudum taoor dãmb n mao naoor wʋsg n na n kɩt t’a Zeova Kaset rãmbã bas a tũub la koɛɛgã moonego, la b pa tõog ye. Bala a Zeova sõngda tõndo. (Eza. 54:17) Baa fʋɩ pa tõe n gɩdg tõnd tɩ d pa moon koɛɛgã n wilg nebã t’a Zeova n yaa Wẽnnaam sɩd-sɩdã, la t’a Sʋɩtãan yaa pʋ-yagd la nin-kʋʋd ye. Baa d sã n kii pa sa ye. Bala a Zeova na n wa vʋʋga neb nins sẽn maan sɩd ne-a n tãag kũumã.—Ooze 13:14.

18. Bõe yĩng tɩ d pa segd n yɛɛs sẽn wat beoogo?

¹⁸ D sã n bʋgsd a Zoob kibarã zugu, kɩtdame tɩ d bas d yam t’a Zeova na n kell n zĩnda ne tõnd baa sẽn wa n yaa a soaba. D pa na n yɛɛs sẽn wat beoog ye. To-kãsengã sasa, a Sʋɩtãan ne a poorẽ dãmbã na n wa getame t’a Zeova nin-buiidã ka pãnga, n bao n na n menes-ba. La a Zeova na n wilgame tɩ yẽ n yaa yĩngr la tẽng Naab wa a sẽn maan to-to a Zoob wakatẽ wã. A pa na n bas t’a Sʋɩtãan menes a nin-buiidã ye. Ka la bilfu, a Zeova na n kɩtame tɩ yɛl nins fãa a Sʋɩtãan sẽn wa ne wã sa. B na n loba a Sʋɩtãan ne a zĩn-dãmbã bog-zulungã pʋgẽ, n pag-b be yʋʋm tusri. (Luk 8:31; Vẽn. 20:1-3) Yʋʋm tusrã poore, b na n sãama a Sʋɩtãan ne a poorẽ dãmbã fãa. (Vẽn. 20:10) B na n bedsa a Sʋɩtãan zugã wa a Zeova sẽn pĩnd n togsã. B na n sãam-a-la wakat sẽn kõn sa yĩnga.—Sɩng. 3:15; Rom. 16:20.

19. Bark-bʋs la neb nins sẽn kɩs a Zeova sɩd zãng-zãngã na n paam ka la bilfu? (Ges-y fotã me.)

¹⁹ D yãgdame tɩ dũni-paalgã wa, bala wakat kãnga d na n lebga neb sẽn zems zãnga, la d paam sũ-noog hakɩɩka. Vɩɩmã na n yɩɩ noog wʋsgo, hal tɩ d pa tõe n bãng n bilg ye. A Zeova yeelame: “Ade! Mam maanda bũmbã fãa paalse.” (Vẽn. 21:5) Mams-y n ges-y-yã. A Ãdem ne a Awa kɩɩsgã tɛka, rẽ n na n yɩ pipi a Sʋɩtãan ne a poorẽ dãmbã sẽn pa na n tõog n le maan ninsaalbã wẽnga, wall b kɩt tɩ b tʋm tʋʋm-beed ye. Sɩd na n yɩɩ yolsg tɛkẽ! Y pa na n le kẽ yʋng n pa gũs y sẽn maand yɩɩr yĩng ye. Neb nins sẽn na n põs Armagedõ zabrã sasa wã na n yãa yel-soalem sẽn maand dũniyã gill zugu. Bãad-dãmbã na n paama laafɩ. Sẽn paase, d neb nins sẽn ki wã na n vʋʋgame. Wakat kãnga, d na n paama vɩɩm sẽn tar bark la sũ-noogo, vɩɩm ning d saasẽ Ba wã sẽn sɩng n dat tɩ d paamã.

20. Bõe la y yãk yam n na n maane?

²⁰ Rũndã-rũndã sẽn yaa yaoolem wakatã d pa tõe n pa paam zu-loees ye. Yaa tɩlɛ tɩ d tall raoodo, n tõog n kell n maan sɩd ne Wẽnnaam. Rẽ n so tɩ d rat n kell n kɩs a Zeova sɩd zãng-zãnga, la d teel a naam sẽn ka to wã. D rat n ket n wilgdame tɩ d nonga d Ba a Zeova, la t’a Sʋɩtãan yaa pʋ-yagda. D tõe n basa d yam tɩ d sã n kell n maan sɩd ne a Zeova sẽn yaa yĩngr la tẽng Naabã d beoog na n yɩɩ neere, bala a yãgdame n na n keo neb nins sẽn maand sɩd ne-a wã tɩ gale.