Y tõe n paasa y minimã nebã zãmsg wɛɛngẽ

1. Bõe wɛɛngẽ la d segd n paas d minimã, la bõe yĩnga? (2 Tɩm. 4:2) (Ges-y fotã me.)

A ZEEZI yeela a karen-biisã tɩ b ‘sõng nebã tɩ b yɩ a karen-biisi, n zãms-b tɩ b tũ bũmb nins fãa a sẽn yeel-bã.’ (Mat. 28:19, 20) A Zeezi sẽn yeel woto wã wilgdame tɩ kiris-nebã fãa segd n yɩɩ karen-saam-dãmba. Yaa sɩd tɩ yaa a Zeova n takd ‘neb nins sẽn tar yam ning sẽn zems ne vɩɩm sẽn ka sɛtã,’ tɩ malɛgsã me sõngd tõnd sẽn na yɩl tɩ d yã nin-kãens buudã. (Tʋʋ. 13:48; Zã 6:44; Vẽn. 14:6) La tõnd me tara d sẽn segd n maane. Tẽeg-y tẽn-tʋmd a Poll ne a Barnabaas sẽn maan bũmb ningã yelle. Biiblã wilgame tɩ b moona koɛɛgã Ikoniyom tigsg roogẽ wã “hal tɩ b sẽn gom to-to wã kɩt tɩ neb kʋʋng sẽn yaa Zʋɩf-rãmb la Gɛrk-rãmb lebg tẽedba.” (Tʋʋ. 14:1) Vẽenega, a Poll ne a Barnabaas modgame n paam “zãmsg minim wʋsgo.” (Karm-y 2 Tɩmote 4:2.) Yɩta sõma tɩ kiris-nebã fãa modg n paas b minimã nebã zãmsg wɛɛngẽ.

2. Tõe tɩ yaa bõe n kɩt tɩ neb wʋsg tagsd tɩ b pa tõe n paas b minimã nebã zãmsg wɛɛngẽ?

² Tõe tɩ neb kẽer tagsdame tɩ b pa tõe n paas b minimã nebã zãmsg wɛɛngẽ bala b pa karem n zãage, wall tɩ b pa tõe n bilg ned bũmb sõma ye. (Yik. 4:10; Zer. 1:6) Sɩd me Biiblã goma neb sẽn da tagsd tɩ b pa tõe n tʋm tʋʋmd b sẽn kõ-b yelle. Tõe tɩ sãnda tagsdame tɩ b pa mi neb zãmsgo, bala b pa tar Biibl karen-biis wa b taabã ye. La d miime tɩ pa neb nins fãa d sẽn segd koɛɛgã mooneg sasa wã n na n sak n kelg koe-noogã ye. Sẽn paase, nebã na sak n kelgã pa be ne tõnd bal ye. D zoe n yeelame t’a Zeova ne malɛgsã sõngda tõnd tɩ d yãt pʋ-peelem dãmbã. La tõnd me rat n maana d sẽn tõe tɩ d sẽn moond koɛɛgã to-to wã yɩ sõma. Rẽ n so tɩ sõs-kãngã na n sõng-d wʋsgo. A na n wilga bũmb a tãab d sẽn tõe n maan n paas d minimã nebã zãmsg wɛɛngẽ.

WILG-Y TƖ NEBÃ YELL PAK-Y LAME

3. Bõe yĩng t’a Zeezi ra tõogdẽ t’a goamã kẽed nebã?

³ Biiblã yeelame t’a Zeezi ra “mii bũmb ning sẽn be ninsaal sũurẽ.” (Zã 2:25) Gom-kãensã rat n yeelame t’a Zeezi ra mii ninsaalbã tagsa wã la bũmb nins sẽn kɩt tɩ b maand bũmb kẽerã. A Zeezi ra tõogdame t’a goamã kẽed nebã, bala a ra mii bũmb nins sẽn pak-bã. A ra miime tɩ tũudmã taoor dãmb pa sõng nebã tɩ b bãng Wẽnnaam ye. B pʋd n lugla noy la minund ka tɛk sẽn weoogd nin-buiidã. (Mat. 9:36; 23:4) A Zeezi sẽn wa n zãmsd nebã tãngã zugã, a goma zu-loe-kãens yelle. A goamã ra nooma neb wʋsgo, bala a ra gomda bũmb toor-toor sẽn pak-b yelle.

4. Wãn to la d tõe n wilg tɩ nebã yell pak-d lame? (Ges-y fot-rãmbã me.)

⁴ D tõe n wilgame tɩ neb nins d sẽn moond koɛɛgã yell pak-d lame, d sẽn na n bao n bãng bũmb nins sẽn namsd-bã. Zu-loeesã yaa wʋsg a Sʋɩtãan dũniyã pʋgẽ. Dẽnd neb nins d sẽn moondã ned kam fãa tara a zu-loɛɛga. D sã n ning rẽ d yamẽ, tõe n sõng-d lame tɩ d zoe nebã nimbãanega. Wala makre, tõe tɩ bũmb n maan y sẽn beẽ wã tɩ kɩt tɩ nebã maand yɩɩre. Tõe tɩ roagdb kẽer maanda yɩɩr yel-beed sẽn tõe n paam b kambã lekollẽ wã yĩnga. Tõe me tɩ tʋʋm paoong yaa toog wʋsg yãmb sẽn beẽ wã. Mams-y n ges-y vɩɩmã sẽn segd n yɩ toog to-to ne neb nins sẽn pa mi Biiblã sẽn pʋlem bũmb ninsã.—2 Tɩm. 3:1; Eza. 65:13, 14.

5. Bõe n kɩt t’a Zeezi ra yaa toor ne Fariziyẽ-rãmbã? (Matiye 11:28-30)

⁵ Nebã yell ra pak a Zeezi. A manesem sẽn da yaa to-to ne-bã ra wilgda rẽ. Fariziyẽ-rãmbã ra pa woto ye. B ra paoogda nebã n tagsdẽ tɩ b ka võor ye. (Mat. 23:13; Zã 7:49) A Zeezi yẽ ra nanda nebã la a maand-b neere. A ra yaa “sũ-maasem soab la sik-m-meng soaba.” Rẽ n kɩt t’a ra yaa karen-saam-sõngo. (Karm-y Matiye 11:28-30.) Tõnd me segd n maanda neb nins d sẽn moondã neer la d nand-ba.

6. Koɛɛgã mooneg sasa, d sã n seg ned sẽn pa rat n kelge, wall t’a sũur yik ne-do, bõe la d segd n maane?

⁶ Neb kẽer pa rat n kelg d koɛɛgã, wall b yikda b sũur ne-do. D sã n wa seg neb a woto, bõe la d segd n maane? A Zeezi yeelame tɩ d ra maan n lebs ye. A yeelame meng tɩ d ‘maand sẽn kis-b tõndã neere,’ tɩ d “ningd sẽn kãabd-b tõnd wẽngã zut barka,” la d “pʋʋsd neb nins sẽn tʋʋd tõndã yĩnga.” (Luk 6:27, 28) Bũmb sẽn na n sõng-d tɩ d tõog n maan dẽ, yaa d sẽn na n tẽeg tɩ tõe tɩ yaa bũmb n kɩt tɩ b pa rat n kelg tõndo. Yaa sɩd tɩ kẽer kisa tõndo. La sãnda nengẽ, yaa zu-loɛɛg la b tar b zakã pʋgẽ wall bũmb n kɩt tɩ b maand yɩɩre. Tõe me tɩ yaa tõnd sẽn wa wakat ningã n pa zemse. Sẽn yaa a soab fãa, d segd n tũu saglg Biiblã sẽn kõ. A yeelame: “Bɩ y goamã tall yamleoog wakat fãa wa b yugla yamsem, sẽn na yɩl tɩ y bãng y sẽn segd n leok ned kam fãa to-to.” (Kolo. 4:6) D sã n kʋmd nebã n baood n bãngd bũmb nins sẽn pak-bã na n sõng-d lame tɩ d sũur da yiki, la sõng-d me tɩ d yɩ karen-saam-sõngo.

TIKD-Y WẼNNAAM GOMDÃ N ZÃMSD NEBÃ

7. Bõe la a Zeezi ra tikd n zãmsd nebã? (Zã 7:14-16)

⁷ A Zeezi ra pa tikd a meng bãngr n zãmsd nebã ye. A ra tikda Wẽnnaam Gomdã. A sẽn da bilgd Wẽnnaam Gomdã võor to-to wã kɩtame tɩ nebã ra tõe n wʋm a võor nana-nana la b tẽegd rẽ yelle. Biiblã yeelame t’a Zeezi ‘ra pa zãmsd nebã wa gʋlsdbã ye.’ A sẽn da zãmsd nebã to-to wã ra ‘lingd-b-la wʋsgo.’ (Mark 1:22) Gʋlsdbã sã n da na n zãms nebã, b ra wae n tikda tũudum taoor dãmb yʋy sẽn yi goama. La a Zeezi yẽ ra togsda nebã Wẽnnaam Gomdã sẽn yete. Baa ne a Zeezi sẽn zĩnd saasẽ ne Wẽnnaam nand t’a wa tẽngã zugã, a pa tik a bãngrã n gom sẽn na yɩl tɩ nebã pẽg-a wall a kɩt tɩ b tags tɩ b pa mi baa fʋɩ ye. A ra tikda Wẽnnaam Gomdã n wilgd nebã Wẽnnaam daabã. (Karm-y Zã 7:14-16.) A Zeezi kõo a karen-biisã mak-sõngo.

8. Wãn to la a Pɩyɛɛr rɩk a Zeezi togs-n-taare?

⁸ A Zeezi karen-biisã me ra tikda Wẽnnaam Gomdã n zãmsd nebã. Wala makre, tẽn-tʋmd a Pɩyɛɛr sẽn wa n na n sõs ne nebã yʋʋmd 33 Pãntekotã daarã, a tika Wẽnnaam Gomdã zugu. A Pɩyɛɛr ra pa ned sẽn karem n zãag ye. La a sẽn bilg Biiblã bãngr-goam sẽn pids a Zeezi zug to-to wã kẽe nebã. (Tʋʋ. 2:14-37) Woma biisi. Bala “neb nins sẽn sak a Pɩyɛɛr goamã ne sũ-noogã reega lisgu. Baraare, na maan neb tus a tãab n paase.”—Tʋʋ. 2:41.

9. Bõe yĩng tɩ d segd n tikd Wẽnnaam Gomdã zug n zãmsd nebã?

⁹ Tʋʋm-teoog kae d sẽn tõe n tũnug ne tɩ d goamã kẽ nebã n ta Biiblã ye. (Ebre. 4:12) Rẽ n so tɩ d segd n tikd Biiblã n zãmsd nebã. D rat n ‘moona koɛɛgã,’ pa tõnd mensã tagsg ye. (2 Tɩm. 4:2) Yel-bũn 2:6 yeelame: “A Zeova meng n kõt yam. Bãngr la yam-vẽenem yita a noorẽ.” Rẽnd d sã n tikd Biiblã n zãmsd nebã, d kõt-b-la weer tɩ b kelgd a Zeova sẽn yete. (Mal. 2:7) D ratame tɩ nebã bãng tɩ yam ning b sẽn tõe n paam Biiblã pʋgẽ wã sõmblem yɩɩda ninsaalbã yam hal zĩig sẽn zãre. Biiblã sẽn yetã yita d Naandã nengẽ, n tõe n sõng-d tɩ d paam yam la sũ-noogo.—2 Tɩm. 3:16, 17.

10. Bõe la d tõe n maan n sõng Biibl karen-biig t’a bãng t’a sẽn zãmsd bũmb ningã yita Biiblã pʋgẽ?

¹⁰ Y sã n wa segend y meng n na n tɩ zãms ned Biiblã, bɩ y tags n ges y sẽn na n maan to-to t’a bãng tɩ zãmsgã tika Biiblã zugu. Sõng-y y Biibl karen-biigã t’a bãng tɩ fot-rãmbã la video-rãmbã tõe n sõngame tɩ d wʋm bũmb võor nana-nana, la tɩ sebr ning y sẽn zãmsdã meng yaa Biiblã. Rẽ n so tɩ y segd n karem vɛrse-rãmb sẽn na n sõng y karen-biigã t’a wʋm bũmb ning y sẽn karemdã võore, la y sõng-a t’a tags vɛrse-kãens zugu. Y sã n wilg y Biibl karen-biigã fot wall video poore, bɩ y sõng-a t’a bãng rẽ sẽn wilgd yam ning d sẽn tõe n dɩk Biiblã pʋgẽ. Pa tɩlɛ tɩ y gom wʋsg wall y karem vɛrse-rãmb wʋsg ye. Vɛrse kareng fãa poor bɩ y maag y yĩng n sõng y karen-biigã t’a wʋm a võor sõma. Sã n yaa tɩlɛ bɩ y karem vɛrse wã n yɩlme. Woto, karen-biigã na n nee vẽeneg tɩ yaa Biiblã la y zãmsda, pa sebr a to, fot wall video ye.—1 Kor. 2:13.

11-12. a) Wãn to la d tõe n wilg tɩ d maanda sũ-mar ne d Biibl karen-biisã? (Tʋʋma 17:1-4) (Ges-y fotã me.) b) Bõe la neb kẽer pa mi Biiblã wɛɛngẽ, la bõe la d tõe n maan n sõng-ba?

¹¹ Tõe n yɩɩ toog ne Biibl karen-biig t’a wʋm bũmb ning võore. Sã n wa yaa woto, bɩ y kell n zãms-a ne “sũ-mare.” Pa karen-biisã fãa n wʋmd bũmb võor nana ye. Biiblã goam kẽer võor wʋmb yaa nana ne tõndo. La yɩl tɩ neb kẽer tõog n wʋm b võor sõma rɩkda sẽka. Wala makre, a Poll sẽn wa n be Tesalonikã a moona Zʋɩf-rãmbã naoor wʋsg n bilg-b Gʋls-sõamyã võor tɩ kẽer yaool n wa sak n lebg tẽedba.—Karm-y Tʋʋm 17:1-4.

¹² Bũmb a to d sẽn tõe n maan n wilg tɩ d maanda sũ-mar yaa d sẽn na n sok karen-biigã sogsg n bãng a tagsgo, la d modg n da gom wʋsg ye. Kelg-y-yã-a neer la y bao n bãng bũmb ning sẽn kɩt t’a tagsd woto wã võore. Rẽ poor bɩ y yãk vɛrse-rãmb y sẽn na n karem n sõng-a t’a wʋm Wẽnnaam tagsg sẽn yaa a soab ne bũmb ning yell y sẽn gomdã. Tẽeg-y me tɩ neb kẽer zɩ n yã Biible, n pa mi bũmb ning sẽn be a pʋgẽ ye. Sã n yaa woto ne y karen-biigã, y tõe n baoo Biibl n wilg-a. Y leb n tõe n tika Dũni-paalgã lebgr zĩig ning sẽn yaa “Y sẽn na n bãng bũmb ning Wẽnnaam Gomdã pʋgẽ” wã, n wilg y Biibl karen-biigã bũmb nins a sẽn tõe n bãng Biiblã pʋgẽ. Wala makre, y tõe n karma vɛrse a ye bɩ a yiib sẽn be sokr 15 wã tẽngr n wilg-a Biiblã sẽn tõe n sõng-a to-to t’a paam sũ-noog hakɩɩka. Y sã n sõng y Biibl karen-biisã tɩ b bãng Biiblã goam sẽn tar yõod to-to wã, b na n tũuda bũmb nins y sẽn zãmsd-bã, la b rat n bãngd n paasdẽ.

GOMD-Y-YÃ A ZEOVA YELL N YƖƖDA

13. D sã n wa zãmsd neda, ãnda yell la d segd n gomd n tɩ yɩɩda? Rɩk-y makre.

¹³ D sã n wa zãmsd ned Biiblã, d raabã yaa d sõng-a t’a bãng a Zeova, n bao n lebg a zoa. (Zak 4:8) Zĩ-kãng wɛɛngẽ, d tõe n dɩka makr ne d sẽn na n widg tors n dat n sõng ned t’a yã bũmb likẽ. D pa na n wẽnemd torsã n tees d meng ye. D na n teesa bũmbã. Woto me d sã n wa zãmsd ned Biiblã, d na n gomda a Zeova yell n yɩɩda, d pa na n bao n wilg d bãngr ye.

14. Bõe la d tõe n maan n sõng d Biibl karen-biig t’a bao n ta a Zeova yam?

¹⁴ D sã n wa zãmsd ned Biiblã, d raabã yaa d sõng-a t’a tʋll n ta a Zeova yam. (Yel. 27:11) D pa zãmsd-a noy a sẽn segd n tũ n tõog n lebg a Zeova Kaset soab bal ye. D raabã yaa a sak n toeeme, a sẽn dat n ta a Zeova yam yĩnga. Wala makre, sã n yaa toog ne d Biibl karen-biig t’a bas minim-wẽnga, d tõe n sok-a lame yaa: “Bõe yĩng t’a Zeova pa rat tɩ d maan bõn-kãngã? Bõe yĩng t’a Zeova rat tɩ y bas bũmb sẽn noom-y maanego? Wãn to la no-kãngã wilgd t’a Zeova nong-y lame?” D sã n sõng d Biibl karen-biigã t’a tags a Zeova la a zʋg-sõma wã zugu, na n sõng-a lame t’a bãng t’a Zeova yaa d Ba sẽn nong-d wʋsgo, tɩ rẽ kɩt t’a rat n ta a yam.

KET-Y N PAASD-Y Y MINIMÃ NEBÃ ZÃMSG WƐƐNGẼ

15. Bõe la y tõe n maan n ket n paasd y minimã nebã zãmsg wɛɛngẽ?

¹⁵ Y tõe n kosa a Zeova t’a sõng-y tɩ y tags y sẽn zãmsd nebã to-to wã zug n ges bũmb sã n pa rat manegre. (1 Zã 5:14) Y segd n tʋmame tɩ zems ne y sẽn pʋʋsd n kotẽ wã. Wala makre, y na n modgd n dɩta zãmsg ning d sẽn paamd tigissã sasa wã yõodo. Y leb n tõe n kosa koe-moond sẽn tar minim t’a yãag-y y Biibl zãmsg sasa, tɩ rẽ poor t’a kõ-y saglse. Tẽeg-y me tɩ baa yãmb sã n mii bũmb ning y sẽn zãmsdã sõma, y Biibl karen-biigã pa mi ye. Y sã n wa segend zãmsgã bɩ y ning y meng y Biibl karen-biigã zĩigẽ, n bao n bãng bũmb ning sẽn tõe n yɩ toog ne-a. Zãmsgã sasa bɩ y sõng Biibl karen-biigã t’a bãng zãmsgã sẽn tõe n naf-a to-to, la bõn-sõma nins a Zeova sẽn pʋlem tõndã. Rẽ tõe n kɩtame t’a bao n lebg a Zeova zoa, la kɩt t’a paam sũ-noog hakɩɩka.—Yɩɩn. 1:1-3.

16. D sã n modg n paas d minimã nebã zãmsg wɛɛngẽ, wãn to la na n naf tõndo?

¹⁶ Sõng ned t’a bãng a Zeova kõta tõnd sũ-noog wʋsgo. Dũni-paalgã pʋgẽ la d na n maneg n tʋm tʋʋm-kãng wʋsgo. Woto wã, d sã n wa moond koe-noogã bɩ d ket n wilgdẽ tɩ nebã yell pak-d lame, n tikd d zãmsgã Wẽnnaam Gomdã zug la d gomd a Zeova yell n yɩɩda. D sã n maan woto, d minimã nebã zãmsgã wɛɛngẽ wã na n paasdame.