Y sã n wa namsdẽ, Zoob sebrã tõe n sõng-y lame

1-2. Bõe n kɩt tɩ d segd n karemd Zoob sebrã?

YÃMB karma Zoob sebrã tɩ nan pa kaoos bɩ? B gʋls-a-la na maan yʋʋm tus a tã la kobs-nu rũndã, la neb wʋsg yeelame t’a naaga sɛb nins b sẽn gʋls tɩ yaa sõma n yɩɩda. Sebr a yembr pʋgẽ b pẽga Zoob sebrã gʋlsdã, bala a tũnuga ne goam võor wʋmb sẽn yaa nana n yaool n yaa goam sẽn tar pãnga, n gʋls-a. Yaa a Moyiiz n gʋls Zoob sebrã. La sɩd-sɩda, sebrã soab yaa Wẽnnaam a Zeova.—2 Tɩm. 3:16.

² Zoob sebrã tara yõod wʋsg Biiblã pʋgẽ. Bõe yĩnga? Bũmb a ye yaa t’a wilgdame tɩ malɛgsã la ninsaalbã fãa segd n yãka yam bũmb sẽn tar yõod wʋsg wɛɛngẽ: Yaa a Zeova yʋʋrã na paam waoogrã wɛɛngẽ. A leb n sõngda tõnd tɩ d bãng bũmb wʋsg a Zeova zʋg-sõma wã wɛɛngẽ, wala a nonglmã, a yamã, a tɩrlmã la a pãngã. Wala makre, b boola a Zeova tɩ “Sẽn-tõe-a-fãa wã” naoor pis-tã la a ye Zoob sebrã pʋgẽ. Rẽ yɩɩda b sẽn bool a Zeova woto Biiblã sɛb a taabã pʋsẽ wã sẽn naag taaba. Sẽn paase, Zoob sebrã wilgda bũmb ning sẽn kɩt tɩ Wẽnnaam bas tɩ namsgã beẽ wã. A leb n tõe n sõnga tõnd tɩ d paam sogsg a taab sẽn pak neb wʋsg leoore.

3. Wãn to la Zoob sebrã kareng tõe n naf tõndo?

³ D sã n karemd Zoob sebrã, yaa wa d sẽn dʋʋd tãnga. D sã n dʋ tãng zugu, d nee bũmb nins sẽn gũbg tõndã sõma. Woto me, d sã n karemd Zoob sebrã, d bãngda a Zeova tagsg sẽn yaa a soab ne tõnd sẽn namsdã vẽenega. Bɩ d bao n bãng Zoob sebrã sẽn tõe n sõng tõnd to-to d sã n wa namsdẽ. D na n bao n bãnga a Zoob kibarã sẽn naf Israyɛll neb kẽer to-to, la a sẽn tõe n naf tõnd rũndã-rũndã to-to. D leb n na n bao n bãnga d sẽn tõe n tall Zoob sebrã n sõng neb a taabã to-to.

WẼNNAAM BASAME TƖ B NAMS A ZOOBE

4. Bõe n kɩt t’a Zoob ra yaa toor fasɩ ne Israyɛll nebã sẽn da be Ezɩptã?

⁴ Israyɛll nebã sẽn wa n yaa yembs n be Ezɩpt n namsdẽ wã, rao a ye yʋʋr sẽn boond t’a Zoob n da be Uuz tẽngã. Tõe tɩ Uuz ra bee kãabg tẽngã yaanga, Arabi nug-rɩtg sẽnese. A Zoob ra tũuda a Zeova ne a sũur fãa, n yaa toor fasɩ ne Israyɛll nebã sẽn da be Ezɩptã sẽn da sɩng bõn-naands pʋʋsgã. (Zoz. 24:14; Eze. 20:8) A Zeova goma a Zoob yell n yeel yaa: “Ned pa be tẽngã zug n yaa wa yẽ ye.”a (Zoob 1:8) A Zoob ra tara arzɛk wʋsgo, n da tar ziir n yɩɩd yaang nebã fãa me. (Zoob 1:3) Yaa vẽeneg t’a Sʋɩtãan sã n da get nin-kãngã yʋʋr sẽn da yi la neb wʋsg sẽn da nandã sẽn tũud Wẽnnaam ne burkĩndã, ra puugda a sũur wʋsgo.

5. Bõe yĩng t’a Zeova bas tɩ b nams a Zoobe? (Zoob 1:20-22; 2:9, 10)

⁵ A Sʋɩtãan yeelame t’a Zoob sã n paam zu-loeese, a na n basa Wẽnnaam tũubu. (Zoob 1:7-11; 2:2-5) A Zeova ra nonga a Zoob wʋsgo. La a Sʋɩtãan sẽn wa ne no-koeemd ningã leokr ra tara yõod wʋsgo, t’a Zeova kõ-a sor t’a nams a Zoobe, sẽn na yɩl tɩ b bãng a sẽn yeelã sã n yaa sɩd bɩ pa sɩda. (Zoob 1:12-19; 2:6-8) A Sʋɩtãan kʋʋ a Zoob rũm-bɛdã la a rũm-bõonegã ne a kamb piigã, la a kɩt tɩ nod-tãoods yõk a Zoob sẽn sɩng ne a na-sɩlpamã n tãag a zug tẽn-sʋkã. La baa ne a Sʋɩtãan sẽn maan woto fãa wã, a Zoob kell n gãda a burkĩndã kãn-kãe. (Karm-y Zoob 1:20-22; 2:9, 10.) Kaoosg zugẽ, a Zeova kɩtame t’a Zoob le paam laafɩ, paoong la yʋ-noogo, la a kõ-a kamb piig n paase. A leb n maana yel-solemd n kɩt t’a Zoob vɩɩmd yʋʋm koabg la pis-naas n paase, n tõog n yã a kamb la a yagens zãmaan a naase. (Zoob 42:10-13, 16) Tõe tɩ wãn to la a Zoob kibarã naf neb pĩnd wẽndẽ, la wãn to la a tõe n naf tõnd rũndã-rũndã?

6. Tõe tɩ wãn to la a Zoob kibarã naf Israyɛll nebã? (Ges-y fotã me.)

⁶ Sẽn da tõe n naf Israyɛll nebã to-to. Israyɛll nebã vɩɩmã ra pa nana b sẽn wa n be Ezɩptã ye. Wala makre, a Zozuwe ne a Kalɛɛb yɩɩ yembs b sẽn wa n yaa bõonegã. Rẽ poore yɩɩ tɩlɛ tɩ b yeeb yʋʋm pis-naas we-raoogẽ wã, baa ne bãmb mensã sẽn pa beegã. Israyɛll nebã sã n bãnga a Zoob kibarã la a yɛlã sẽn baas to-to wã, yaa vẽeneg tɩ sõnga bãmb ne b kambã la b yagensã tɩ b bãng soab ning sẽn yaa sabab tɩ ninsaalbã namsdẽ wã vẽenega. Ra tõe n sõng-b lame me tɩ b bãng bũmb ning sẽn kɩt tɩ Wẽnnaam bas tɩ namsgã beẽ wã, la maan-sɩd ne burkĩnd sẽn tar yõod wʋsg a nifẽ wã võore.

7-8. Wãn to la Zoob sebrã tõe n sõng ned sẽn namsde? Rɩk-y makre.

⁷ Sẽn tõe n naf tõnd to-to. Zu-bʋko, rũndã-rũndã neb wʋsg pa le tẽed Wẽnnaam, b sẽn pa wʋmd bũmb ning sẽn kɩt tɩ Wẽnnaam bas tɩ yel-beed paamd nin-sõma wã võorã yĩnga. Ra yaa woto ne a Hazɛllb sẽn be Ruwãnda wã. A sẽn wa n yaa bilfã, a ra tẽeda Wẽnnaam. La yɛlã wa n toeemame. A roagdbã kaoo b kãadmã, t’a ma tɩ kẽ kãadem ne rao a to. La ra-kãng ra namsda a Hazɛll wʋsgo. A sẽn wa n yaa pʋg-sadã, rao n yõg-a. A Hazɛll kẽnga a tũudmã zĩigẽ sẽn na yɩl n paam belsgo, la a pa paam ye. A Hazɛll wa n gʋlsa Wẽnnaam lɛtre. A gʋlsame yaa: “Wẽnnaam, mam pʋʋsa foo naoor wʋsgo. Mam maoome n na n maan sẽn yaa sõma, la fo lebsa maam wẽnga. Masã, m na n basa foo la m maan bũmb ning fãa sẽn na n kõ-m sũ-noogo.” D sã n yã neb sẽn tagsd wa a Hazɛll tɩ yaa Wẽnnaam n kɩt tɩ b namsdẽ, pa sãamd d sũur sɩda?

⁸ La Zoob sebrã sõng-d lame tɩ d bãng tɩ pa Wẽnnaam n yaa sabab tɩ d namsdẽ ye. Yaa a Sʋɩtãana. D bãngame me tɩ ned sã n namsdẽ, d pa segd n tags t’a kẽebda a sẽn bʋd ye. Gʋls-sõamyã yeelame tɩ ‘wakat buud fãa, yel-lingdem tõe n tiig n paama d fãa.’ (Koɛ. 9:11; Zoob 4:1, 8) Sẽn paase d bãngame tɩ zu-loees sasa d sã n kell n maan sɩd ne a Zeova, d kõt-a-la weer t’a leok a Sʋɩtãana. Sõngdame t’a yʋʋrã paam waoogre. (Zoob 2:3; Yel. 27:11) D sũur nooma ne bũmb nins Biiblã sẽn sõng tõnd tɩ d bãngã. Bala masã, d wʋmda bũmb ning sẽn kɩt tɩ tõnd ne d nebã mi n namsdẽ wã võore. A Hazɛll wa n zãmsa Biiblã ne a Zeova Kaset rãmbã, n bãng tɩ pa Wẽnnaam n kɩt t’a nams ye. A yeelame: “M le pʋʋsa Wẽnnaam ne m sũur fãa. M yeela a Zeova tɩ m sẽn da yeel tɩ m na n bas-a lame wã, sɩd-sɩda m pa bas-a ye. M yeela woto m sẽn da pa mi-a sõma wã yĩng bala. Masã m bãngame t’a Zeova nonga maam. M yaa n paama sũ-noogo, tɩ m sũur noom ne m meng me.” D sẽn mi bũmb ning sẽn kɩt tɩ Wẽnnaam bas tɩ namsgã beẽ wã pa noom-d sɩda? Bɩ d ges a Zoob kibarã sẽn tõe n sõng-d to-to, d sã n wa tar zu-loeese.

A ZOOB KIBARÃ SẼN TÕE N SÕNG-D TO-TO TƖ D TÕOG TOOGO

9. Bilg-y-yã a Zoob yɛlã sẽn da yaa to-to, a sẽn wa n zĩ tompɛglmẽ wã. (Zak 5:11)

⁹ Mams-y n ges-y-yã a Zoob sẽn nams to-to wã: A ra zĩi tompɛglem pʋgẽ t’a yĩngã pid ne nod-tãoodse, hal tɩ toogã namsd-a. A yĩn-gãongã kʋɩɩme n lagsdẽ, t’a faag wʋsgo. A pa le tar pãng n tõe n maan bũmb wʋsg ye. A zĩ n zagemda a yĩngã ne sa-pees bala, n gomd a toogã yell n pa basdẽ ye. La a Zoob ra pa maood n na n kell n vɩɩmd bal ye. A ra tõogda toogo. (Karm-y Zak 5:11.) Bõe n sõng a Zoob t’a kell n maan sɩd ne Wẽnnaam?

10. Bõe n wilgd t’a Zoob pelga a pʋg n gom ne a Zeova?

¹⁰ A Zoob togsa a Zeova yɛlã sẽn da namsd-a to-to wã. (Zoob 10:1, 2; 16:20) Wala makre, sak a 3 pʋgẽ, a Zoob wilga a sũurã sẽn sãam to-to yel-beedã sẽn paam-a t’a ra tudg n tagsdẽ tɩ yaa a Zeova n kɩt t’a namsdẽ wã yĩnga. Rẽ poore yẽ ne a zo-rãmb a tãabã wẽe no-koɛɛma, t’a wilg vẽeneg t’a kẽnda ne burkĩndi. Naoor wʋsgo, yaa a Zeova meng la a ra gomd ne. A Zoob goamã wilgdame tɩ wakat n zĩnd t’a ra tagsdẽ t’a yaa tɩrg n yɩɩd Wẽnnaam. (Zoob 10:1-3; 32:1, 2; 35:1, 2) La a wa n sak n deegame tɩ yẽ sẽn da maood n na n wilg t’a kẽnda ne burkĩndã ra mi n kɩtame t’a “gomd n pa tagsdẽ” ye. (Zoob 6:3, 26) Sak 31 wã pʋgẽ, a Zoob yeelame t’a ratame tɩ Wẽnnaam leok-a n wilg t’a pa tar taal ye. (Zoob 31:35) La a Zoob ra pa segd n yeel Wẽnnaam t’a leok-a n wilg a sẽn namsdã võor ye.

11. A Zoob sẽn gom a burkĩndã yellã, a Zeova leok-a-la wãn-wãna?

¹¹ La rũndã-rũndã, d miime t’a Zoob sẽn da gomd woto wã, yaa yẽ ne a Zeova zoodã sẽn da tar pãngã, la a sẽn da kɩs sɩd tɩ Wẽnnaam na n kaoo a bʋʋdã tɩrgã yĩnga. La a Zeova sẽn wa n na n leok a Zoob sob-kãseng pʋgẽ wã, a pa togs-a bũmb ning sẽn kɩt t’a namsdẽ wã ball-ball ye. A leb n pa ning a Zoob taal a sẽn wilg yɛlã sẽn namsd-a to-to wã, la a sẽn yeel t’a pa tar taalã yĩng ye. A Zeova maaga a yĩng n sõng a Zoob t’a rems a tagsgã, wa ba sẽn maan to-to ne a biiga. A sẽn maan woto wã sɩd nafa a Zoobe. Kɩtame t’a Zoob sik a meng n sak n deeg t’a bãngrã paoodame, la sõng-a t’a tek yam n kos sugr a sẽn gom n pa reng n tagsã yĩnga. (Zoob 31:6; 40:4, 5; 42:1-6) Tõe tɩ wãn to la kiba-kãng naf neb pĩnd wẽndẽ, la wãn to la a tõe n naf tõnd rũndã-rũndã?

12. Tõe tɩ wãn to la a Zoob kibarã sõng Israyɛll nebã?

¹² Sẽn da tõe n naf Israyɛll nebã to-to. Tõe tɩ Israyɛll nebã rɩka yam bũmb ning sẽn paam a Zoobã pʋgẽ. D gom a Moyiiz yelle. A sẽn wa n yaa Israyɛll buudã taoor lʋɩtã, a paama zu-loees wʋsgo. Bũmb toor-toor n maan n sãam a sũuri, la koms a raoodo. La a pa maan wa Israyɛll nebã sẽn yaa tõatbã sẽn da wae n yẽgemd ne a Zeova wã ye. A sã n da tar zu-loɛɛg fãa, a kota a Zeova sõngre. (Yik. 16:6-8; Sõd. 11:10-14; 14:1-4, 11; 16:41, 49; 17:5) Wakat n zĩnd me tɩ Wẽnnaam kibl a Moyiiz tɩ yɩ tɩlɛ t’a tõog toogo. Wala makre, Israyɛll nebã sẽn wa n be Kadɛɛs tɩ b sẽn da segd n yeeb we-raoogẽ wã yʋʋm pis-naasã kolg saabã, a Moyiiz “yiisa goam a noorẽ wã n pa yaas n tagse,” n pa kõ a Zeova ziir ning a sẽn segd ne wã ye. (Yɩɩn. 106:32, 33) Rẽ kɩtame t’a Zeova pa sak t’a Moyiiz kẽ kãabg tẽngẽ wã ye. (Tõo. 32:50-52) Tõe t’a Zeova sẽn kibl a Moyiiz woto wã sãama a sũuri, la a sika a meng n sake. Tõe t’a Zoob kibarã sõnga Israyɛll neb a taab sẽn zĩnd a Moyiiz wakatã poore, tɩ b tõog n mao ne b zu-loeese. Neb nins sẽn da maan sɩdã sã n bʋgs kiba-kãng zugu, ra tõe n sõng-b lame tɩ b bãng b sẽn tõe n togs a Zeova sẽn be-b sũurẽ to-to, la sõng-b tɩ b bãng tɩ b pa segd n tags tɩ b yaa tɩrs n yɩɩd a Zeova ye. Ra tõe n sõng-b lame me tɩ b bãng b sẽn tõe n sik b meng n sak a Zeova kiblg to-to.

13. Wãn to la a Zoob kibarã tõe n sõng-d tɩ d tõog toogo? (Ebre-rãmbã 10:36)

¹³ Sẽn tõe n naf tõnd to-to. Tõnd a kiris-nebã me segd n tõoga toogo. (Karm-y Ebre-rãmb 10:36.) Tõe tɩ y bẽeda bã-kɛgenga, wall y maanda yɩɩr wʋsgo, pa rẽ bɩ zu-loees n be y zakã pʋgẽ. Tõe tɩ y ned bɩ y zoa n maan kaalem, pa rẽ bɩ y maooda ne zu-loees a taaba. Wakat ninga neb a taabã no-goamã wall b manesmã tõe n sãama y sũur n paase. (Yel. 12:18) La Zoob sebrã wilgda tõnd tɩ d tõe n togsa a Zeova sẽn be d sũurẽ wã, n kɩs sɩd t’a kelgdame. (1 Zã 5:14) Baa d sã n pʋʋsdẽ tɩ wa lebg wa d ‘gomdame n pa tagsdẽ’ wa sẽn yɩ to-to a Zoob nengẽ wã, a pa na n ning-d taal ye. A pʋd n na n kõ-d-la pãng la yam tɩ d tõog toogo. (2 Kib 16:9; Zak 1:5) Sẽn paase, a na n kibl-d lame tɩ zems wa a sẽn maan to-to ne a Zoobã. Zoob sebrã leb n tõe n sõng-d lame tɩ d bãng d manesem sẽn segd n yɩ to-to d sã n wa paam sagls bɩ kiblg sẽn yit a Zeova Gomdã pʋgẽ, a siglgã wall d tẽed-n-taas tẽeb sẽn bɩ nengẽ. (Ebre. 12:5-7) A Zoob sika a meng n sak kiblgã tɩ naf-a. Tõnd me sã n sak remsgo, na n naf-d lame. (2 Kor. 13:11) Ad Zoob sebrã sɩd sõng-d lame tɩ d bãng bũmb wʋsg sẽn tar yõodo. Masã, bɩ d bao n bãng d sẽn tõe n tall a Zoob kibarã n sõng neb a taabã to-to.

D SẼN TÕE N TALL ZOOB SEBRÃ N SÕNG NEB A TAABÃ TO-TO

14. Ned sã n sok-y tɩ bõe yĩng tɩ namsgã beẽ, wãn to la y tõe n leok-a?

¹⁴ Koɛɛgã mooneg sasa, y zoe n sega ned t’a sok-y tɩ bõe yĩng tɩ namsgã beẽ bɩ? Wãn to la y leok a sokrã? Tõe tɩ y tika Biiblã n wilg-a bũmb ning sẽn maan Edɛn zẽedã zĩigẽ wã. Tõe tɩ y reng n wilg-a lame t’a Sʋɩtãan sẽn lebg malɛg-wẽngã yaga ziri, n kɩt tɩ d yaab a Ãdem ne a Awa kɩɩs Wẽnnaam. (Sɩng. 3:1-6) Rẽ poore, tõe tɩ y wilg-a lame tɩ yaa a Ãdem ne a Awa kɩɩsgã n kɩt tɩ ninsaalbã namsdẽ la b kiidẽ. (Rom. 5:12) Sẽn na n baase, tõe tɩ y wilg-a lame tɩ Wẽnnaam basame tɩ kaoos sẽn na yɩl n wilg t’a Sʋɩtãan sẽn yeelã yaa ziri, la t’a kɩtame tɩ b moond koe-noog n wilgdẽ t’a na n wa kɩtame tɩ namsgã fãa sa, tɩ ninsaalbã vɩɩmd wakat sẽn kõn sa. (Vẽn. 21:3, 4) Y sã n leok sokrã woto yaa sõma, n tõe n sõng a soabã t’a bãng namsgã sẽn be wã võore.

15. Wãn to la d tõe n tall Zoob sebrã n sõng ned t’a bãng namsgã sẽn be wã võore? (Ges-y fot-rãmbã me.)

¹⁵ D ges d sẽn tõe n tik Zoob sebrã me n leok sokrã to-to. Tõe tɩ masã tɛka, y na n tikda rẽ me n sõngd nebã. Y tõe n deng yeela a soabã t’a soka sokr sẽn tar yõod wʋsgo. Rẽ poore y tõe n yeel-a lame t’a Zoob sẽn yɩ ned sẽn da maand sɩdã soka sokr a woto buudu, a sẽn wa n namsdẽ wã. A ra tagsdame meng tɩ yaa Wẽnnaam n kɩt t’a namsdẽ. (Zoob 7:17-21) Ned ning y sẽn sõsd ne wã sã n bãng tɩ hal sẽn kaoose, nebã sɩng n baood n na n bãnga bũmb nins sẽn kɩt tɩ d namsdẽ wã, tõe n yɩ-a-la noogo. Rẽ poore y tõe n yeel-a lame tɩ Zoob sebrã wilgdame tɩ yaa a Sʋɩtãan n da kɩt t’a namsdẽ, pa Wẽnnaam ye. A Sʋɩtãan namsa a Zoobe, a sẽn da rat n wilg tɩ ninsaalbã tũuda a Zeova rẽ sẽn nafd-bã yĩng bala. Y tõe n yeelame me tɩ baa sẽn pa Wẽnnaam n kɩt t’a Zoob namsã, a basame t’a namse, tɩ wilgdẽ t’a kɩsa sɩd tɩ neb nins sẽn tar tẽebã na n wilgame t’a Sʋɩtãan yaa pʋ-yagda. Sẽn na n baase, y tõe n wilgame tɩ Wẽnnaam wa n ninga a Zoob bark a sẽn kell n maan sɩdã yĩnga. Rẽnd d tõe n sõnga nebã tɩ b bãng tɩ pa a Zeova n kɩt tɩ b namsdẽ, tɩ bels-ba.

16. Kiba-bʋg n wilgd tɩ Zoob sebrã tõe n sõnga ned sẽn namsde?

¹⁶ D ges Zoob sebrã sẽn sõng a Mario to-to. Yʋʋmd 2021 wã, saam-bi-poak a ye n da moond koɛɛgã ne telefõnne, n bool a Mario n karem vɛrse t’a kelge. Vɛrse wã wilgame tɩ Wẽnnaam pʋlma bõn-sõma tɩ watẽ la tɩ baa masã menga a kelgda d pʋʋsgã. Saam-bi-poakã soka a Mario a tagsg sẽn yaa a soab ne vɛrse wã sẽn yeel bũmb ningã, t’a yeel tɩ saam-bi-poakã sẽn wa n boondẽ wã tɩ yẽ gʋlsda lɛtr n na n bas la a kʋ a menga. A paasame: “M tẽeda Wẽnnaam, la yibeoogã m da sokda m meng Wẽnnaam sã n pa raag-m n base.” Saam-bi-poakã le wa n boola a Mario tɩ b gom a Zoob namsgã yelle. A Mario yeelame t’a rat n karma Zoob sebrã zãnga. Rẽ n so tɩ saam-bi-poakã tool-a liyẽ a sẽn tõe n tũnug ne n kẽ jw.org n karem Gʋls-sõamyã, Dũni-paalgã lebgre. Baasa wãna? A Mario sakame n sɩng Biiblã zãmsgo, n bãngd Wẽnnaam ning sẽn wilg t’a yell pak-a lame wã n paasdẽ, hal tɩ noom-a wʋsgo.

17. Bõe n kɩt tɩ y sũur noom ne a Zeova sẽn kɩt tɩ b gʋls a Zoob kibarã a Gomdã pʋgẽ wã? (Zoob 34:12)

¹⁷ Sɩd-sɩda, Wẽnnaam Gomdã tara pãng n tõe n sõng neda, baa ned sẽn namsde. (Ebre. 4:12) D sẽn paam tɩ Wẽnnaam kɩt tɩ b gʋls a Zoob kibarã Biiblã pʋgẽ wã pa noom-d wʋsg sɩda? (Zoob 19:23, 24) Zoob sebrã sõng-d lame tɩ d kɩs sɩd tɩ “hakɩɩka, Wẽnnaam pa maand sẽn yaa wẽng ye.” (Karm-y Zoob 34:12.) A leb n sõng-d lame tɩ d bãng bũmb ning sẽn kɩt tɩ Wẽnnaam bas tɩ namsgã beẽ wã, la d sẽn tõe n tõog toog to-to. Sẽn paase, a tõe n sõng-d lame tɩ d bels neb nins sẽn namsdã. Sõsg ning sẽn pʋgdã pʋgẽ, d na n yãa Zoob sebrã sẽn tõe n sõng-d to-to tɩ d bãng n kõ ned saglga.