ഉൾക്കാഴ്‌ച കാണി​ച്ചാൽ നിങ്ങൾ “വിജയി​ക്കും”

1-2. എന്താണ്‌ ഉൾക്കാഴ്‌ച, അതു നമ്മളെ എങ്ങനെ സഹായി​ക്കും?

എപ്പോ​ഴെ​ങ്കി​ലും അർഹി​ക്കുന്ന ബഹുമാ​നം കിട്ടാ​തെ​പോ​യ​താ​യി നിങ്ങൾക്കു തോന്നി​യി​ട്ടു​ണ്ടോ? നിങ്ങളെ ആരെങ്കി​ലും തെറ്റി​ദ്ധ​രി​ക്കു​ക​യോ വേദനി​പ്പി​ക്കു​ക​യോ ചെയ്‌തി​ട്ടു​ണ്ടോ? പേടി തോന്നുന്ന ഒരു സാഹച​ര്യ​ത്തി​ലൂ​ടെ നിങ്ങൾ കടന്നു​പോ​യി​ട്ടു​ണ്ടോ? ഉണ്ടെങ്കിൽ ഈ സാഹച​ര്യ​ങ്ങ​ളി​ലൊ​ന്നും നല്ല രീതി​യിൽ പ്രതി​ക​രി​ക്കാൻ അത്ര എളുപ്പ​മ​ല്ലെന്ന്‌ നിങ്ങൾ മനസ്സി​ലാ​ക്കി​യി​ട്ടു​ണ്ടാ​കും. എന്നാൽ ഇതു​പോ​ലെ​യുള്ള സന്ദർഭ​ങ്ങ​ളിൽ നമ്മളെ സഹായി​ക്കുന്ന ഒരു ഗുണ​ത്തെ​ക്കു​റിച്ച്‌ തിരു​വെ​ഴു​ത്തു​കൾ പറയുന്നു; അതാണ്‌ ഉൾക്കാഴ്‌ച.

² ഉൾക്കാഴ്‌ച എന്നത്‌ പുറമേ കാണു​ന്ന​തിന്‌ അപ്പുറ​ത്തേക്ക്‌ നോക്കാ​നുള്ള ഒരാളു​ടെ കഴിവാണ്‌. ഒരു കാര്യം എന്തു​കൊ​ണ്ടാ​യി​രി​ക്കാം സംഭവി​ച്ചത്‌, അല്ലെങ്കിൽ ഒരാൾ ഒരു പ്രത്യേ​ക​വി​ധ​ത്തിൽ ഇടപെ​ട്ടത്‌ എന്തു​കൊ​ണ്ടാ​യി​രി​ക്കാം എന്നൊക്കെ മനസ്സി​ലാ​ക്കാൻ അതു സഹായി​ക്കും. അങ്ങനെ ഉൾക്കാഴ്‌ച കാണി​ക്കു​മ്പോൾ ജ്ഞാന​ത്തോ​ടെ​യും വകതി​രി​വോ​ടെ​യും പ്രവർത്തി​ക്കാൻ നമുക്കു കഴിയും. ഉദാഹ​ര​ണ​ത്തിന്‌, ‘നാവിനെ’ നിയ​ന്ത്രി​ക്കാ​നും എപ്പോ​ഴാണ്‌ ‘മിണ്ടാ​തി​രി​ക്കേ​ണ്ടത്‌’ എന്നു മനസ്സി​ലാ​ക്കാ​നും ഉൾക്കാഴ്‌ച നമ്മളെ സഹായി​ക്കും. (സുഭാ. 10:19; സങ്കീ. 4:4) ദേഷ്യം വരു​മ്പോൾ അതു നിയ​ന്ത്രി​ക്കാ​നും മറ്റുള്ള​വ​രോട്‌ ക്ഷമിക്കാ​നും അതു സഹായി​ക്കും. ഇനി, ഉൾക്കാ​ഴ്‌ച​യുള്ള ഒരാൾക്ക്‌ ഉപദേ​ശ​മോ തിരു​ത്ത​ലോ സ്വീക​രി​ക്കാ​നും എളുപ്പ​മാ​യി​രി​ക്കും. (സുഭാ. 19:20) ഇത്തരത്തിൽ നമ്മൾ ഉൾക്കാഴ്‌ച കാണി​ക്കു​ന്നെ​ങ്കിൽ അത്‌ യഹോ​വയെ സന്തോ​ഷി​പ്പി​ക്കു​മെന്നു മാത്രമല്ല നമുക്കു​ത​ന്നെ​യും നമുക്കു ചുറ്റു​മു​ള്ള​വർക്കും പ്രയോ​ജ​ന​വും ചെയ്യും. പ്രത്യേ​കിച്ച്‌, പെട്ടെന്നു പൊട്ടി​ത്തെ​റി​ക്കാ​നോ വികാ​രങ്ങൾ നിയ​ന്ത്രി​ക്കാ​നോ ബുദ്ധി​മു​ട്ടു തോന്നുന്ന സാഹച​ര്യ​ങ്ങ​ളിൽ ഈ ഗുണം കൂടുതൽ ഉപകാ​ര​പ്പെ​ടും. ഉൾക്കാഴ്‌ച എങ്ങനെ​യാണ്‌ താഴ്‌മ​യോ​ടി​രി​ക്കാ​നും ശാന്തത കൈവി​ടാ​തി​രി​ക്കാ​നും യഹോ​വ​യിൽ പൂർണ​മാ​യി ആശ്രയി​ക്കാ​നും സഹായി​ക്കു​ന്ന​തെന്ന്‌ മൂന്നു ബൈബിൾ ഉദാഹ​ര​ണ​ങ്ങ​ളി​ലൂ​ടെ നമുക്ക്‌ ഇപ്പോൾ നോക്കാം.

അഹങ്കാരം ഒഴിവാ​ക്കുക, താഴ്‌മ കാണി​ക്കു​ക

3. ആരായി​രു​ന്നു നയമാൻ?

³ നമ്മൾ ശരിക്കും വിജയി​ക്ക​ണ​മെ​ങ്കിൽ അഹങ്കാരം ഒഴിവാ​ക്കേ​ണ്ട​തുണ്ട്‌. (1 പത്രോ. 5:5) ഉൾക്കാഴ്‌ച അതിനു സഹായി​ക്കും. എങ്ങനെ? നയമാന്റെ മാതൃക നോക്കുക. ഇസ്രാ​യേ​ലിന്‌ വടക്കുള്ള സിറിയ എന്ന രാജ്യ​ത്താണ്‌ അദ്ദേഹം ജീവി​ച്ചി​രു​ന്നത്‌. നയമാൻ ഒരു പ്രമുഖ വ്യക്തി​യാ​യി​രു​ന്നു, സിറിയൻ സൈന്യ​ത്തി​ന്റെ അധിപൻ. എന്നാൽ അദ്ദേഹം കുഷ്‌ഠ​രോ​ഗ​ത്താൽ വല്ലാതെ കഷ്ടപ്പെ​ടു​ക​യാ​യി​രു​ന്നു.—2 രാജാ. 5:1.

4. അടിമ​പ്പെൺകു​ട്ടി​യു​ടെ വാക്കു​ക​ളോട്‌ നയമാൻ പ്രതി​ക​രിച്ച വിധം അദ്ദേഹം ജ്ഞാനി​യാ​ണെന്ന്‌ കാണി​ച്ചത്‌ എങ്ങനെ?

⁴ നയമാന്റെ ഭാര്യക്ക്‌ സഹായ​ത്തി​നാ​യി ഇസ്രാ​യേ​ല്യ​യായ ഒരു അടിമ​പ്പെൺകു​ട്ടി ഉണ്ടായി​രു​ന്നു. നയമാന്റെ രോഗം മാറ്റാൻ കഴിവുള്ള ഒരു പ്രവാ​ചകൻ ഇസ്രാ​യേ​ലിൽ ഉണ്ടെന്ന്‌ ആ പെൺകു​ട്ടി നയമാന്റെ ഭാര്യ​യോട്‌ പറഞ്ഞു. (2 രാജാ. 5:2, 3) എന്നാൽ അതു കേട്ട​പ്പോൾ ‘ശത്രു​രാ​ജ്യ​ത്തു​നിന്ന്‌ വന്ന നിസ്സാ​ര​യായ ഈ അടിമ​പ്പെൺകു​ട്ടി എനിക്കു ഗുണം ചെയ്യുന്ന എന്തു കാര്യം പറയാ​നാണ്‌’ എന്നു വേണ​മെ​ങ്കിൽ നയമാന്‌ ചിന്തി​ക്കാ​മാ​യി​രു​ന്നു. പക്ഷേ അവളുടെ വാക്കുകൾ അഹങ്കാ​ര​ത്തോ​ടെ തള്ളിക്ക​ള​യു​ന്ന​തി​നു പകരം നയമാൻ അതെക്കു​റിച്ച്‌ ചിന്തിച്ചു, താഴ്‌മ​യോ​ടെ ആ വാക്കുകൾ ഗൗരവ​മാ​യി എടുത്തു. തന്റെ രോഗം മാറു​ന്ന​തി​നാ​യി ഇസ്രാ​യേ​ലി​ലേക്കു പോകാൻ സിറിയൻ രാജാ​വിൽനിന്ന്‌ അദ്ദേഹം അനുവാ​ദ​വും വാങ്ങി.—2 രാജാ. 5:4, 5.

5. ഇസ്രാ​യേ​ലിൽ എത്തിയ​പ്പോൾ നയമാന്‌ എന്താണ്‌ സംഭവി​ച്ചത്‌?

⁵ തന്റെ കുഷ്‌ഠം സുഖ​പ്പെ​ടു​മെന്ന പ്രതീ​ക്ഷ​യോ​ടെ നയമാൻ ഇസ്രാ​യേൽ രാജാ​വായ യഹോ​രാ​മി​ന്റെ കൊട്ടാ​ര​ത്തി​ലെത്തി. എന്നാൽ അദ്ദേഹത്തെ കണ്ടപ്പോൾ, സിറിയൻ രാജാവ്‌ താനു​മാ​യി വഴക്കി​നു​വ​രാൻ ശ്രമി​ക്കു​ക​യാ​ണെന്ന്‌ യഹോ​രാം ചിന്തിച്ചു. എലീശ പ്രവാ​ചകൻ അതെക്കു​റിച്ച്‌ കേട്ട​പ്പോൾ നയമാനെ തന്റെ അടു​ത്തേക്ക്‌ അയയ്‌ക്കാൻ രാജാ​വി​നോ​ടു പറഞ്ഞു. (2 രാജാ. 5:6-9) എന്നാൽ നയമാൻ പ്രതീ​ക്ഷി​ച്ച​തു​പോ​ലെ​യൊ​ന്നു​മല്ല പിന്നീട്‌ കാര്യങ്ങൾ നടന്നത്‌. നയമാനെ സ്വീക​രി​ക്കാ​നോ അദ്ദേഹ​ത്തോട്‌ സംസാ​രി​ക്കാ​നോ എലീശ പ്രവാ​ചകൻ വീടിന്‌ പുറ​ത്തേ​ക്കു​പോ​ലും വന്നില്ല. പകരം സുഖ​പ്പെ​ടു​ന്ന​തി​നാ​യി നയമാൻ എന്താണ്‌ ചെയ്യേ​ണ്ട​തെന്ന്‌ ഒരു ദൂതനെ അയച്ചു​കൊണ്ട്‌ പറയുക മാത്ര​മാണ്‌ ചെയ്‌തത്‌.—2 രാജാ. 5:10.

6. (എ) ദൂതന്റെ നിർദേ​ശ​ങ്ങ​ളോട്‌ നയമാൻ അഹങ്കാ​ര​ത്തോ​ടെ പ്രതി​ക​രി​ച്ചത്‌ എന്തു​കൊ​ണ്ടാ​യി​രി​ക്കാം? (ബി) നയമാന്റെ ഭൃത്യ​ന്മാർ ഉൾക്കാഴ്‌ച കാണി​ച്ചത്‌ എങ്ങനെ, എന്തായി​രു​ന്നു ഫലം? (2 രാജാ​ക്ക​ന്മാർ 5:13, 14)

⁶ നയമാൻ ആദ്യം എലീശ​യു​ടെ ദൂതൻ പറഞ്ഞ കാര്യ​ങ്ങ​ളോട്‌ നല്ല രീതി​യി​ലല്ല പ്രതി​ക​രി​ച്ചത്‌. അദ്ദേഹം ‘ദേഷ്യം സഹിക്കാൻ വയ്യാതെ തിരികെ പോയി.’ (2 രാജാ. 5:11, 12) എന്തു​കൊ​ണ്ടാണ്‌ അദ്ദേഹം അങ്ങനെ പ്രതി​ക​രി​ച്ചത്‌? ഉയർന്ന ഒരു സൈനിക ഉദ്യോ​ഗ​സ്ഥ​നായ തനിക്ക്‌ കിട്ടേണ്ട ബഹുമാ​നം എലീശ തന്നില്ല എന്ന്‌ അദ്ദേഹം ചിന്തി​ച്ചു​കാ​ണും. കൂടാതെ എലീശ​യു​ടെ നിർദേ​ശങ്ങൾ കേട്ട​പ്പോൾ അതു സിറി​യ​യോ​ടുള്ള അനാദ​ര​വാ​യും അദ്ദേഹ​ത്തി​നു തോന്നി​യി​ട്ടു​ണ്ടാ​കും. എന്തുത​ന്നെ​യാ​ണെ​ങ്കി​ലും സുഖ​പ്പെ​ടാ​നുള്ള ആഗ്രഹം വേണ്ടെ​ന്നു​വെച്ച്‌ അദ്ദേഹം വീട്ടി​ലേക്കു തിരി​കെ​പ്പോ​കാൻ തീരു​മാ​നി​ച്ചു. എന്നാൽ അദ്ദേഹ​ത്തി​ന്റെ ഭൃത്യ​ന്മാർ ഉൾക്കാഴ്‌ച കാണി​ച്ചു​കൊണ്ട്‌ ഒന്നുകൂ​ടി ചിന്തി​ക്കാൻ അദ്ദേഹ​ത്തോ​ടു യാചിച്ചു. അപ്പോൾ നയമാൻ തന്റെ അഹങ്കാരം മാറ്റി​വെച്ച്‌ എലീശ​യു​ടെ നിർദേ​ശങ്ങൾ താഴ്‌മ​യോ​ടെ അനുസ​രി​ച്ചു. അങ്ങനെ അദ്ദേഹം സുഖ​പ്പെ​ടു​ക​യും ചെയ്‌തു!—2 രാജാ​ക്ക​ന്മാർ 5:13, 14 വായി​ക്കുക.

7. നയമാന്റെ അനുഭ​വ​ത്തിൽനിന്ന്‌ നമ്മൾ എന്താണ്‌ പഠിക്കു​ന്നത്‌? (സുഭാ​ഷി​തങ്ങൾ 22:4) (ചിത്ര​ങ്ങ​ളും കാണുക.)

⁷ നമുക്ക്‌ എന്തു പഠിക്കാം? നമ്മൾ ഒരു കാര്യത്തെ വീക്ഷി​ക്കുന്ന വിധം എപ്പോ​ഴും ശരിയാ​യി​രി​ക്ക​ണ​മെ​ന്നില്ല. അതു​കൊണ്ട്‌ നമ്മൾ ഒരു കാര്യം ചെയ്യു​ന്ന​തി​നു മുമ്പ്‌ നന്നായി ചിന്തി​ച്ചു​കൊണ്ട്‌ ഉൾക്കാഴ്‌ച കാണി​ക്കണം. നമ്മുടെ തീരു​മാ​ന​ങ്ങളെ നിയ​ന്ത്രി​ക്കാൻ വികാ​ര​ങ്ങളെ അനുവ​ദി​ക്കാ​തി​രി​ക്കു​മ്പോ​ഴും നമ്മൾ ഉൾക്കാഴ്‌ച കാണി​ക്കു​ക​യാ​യി​രി​ക്കും. ഇനി താഴ്‌മ​യോ​ടെ​യി​രി​ക്കാ​നും ഉൾക്കാഴ്‌ച ഒരാളെ സഹായി​ക്കും. എന്നു പറഞ്ഞാൽ, നമുക്ക്‌ എല്ലാ കാര്യ​ങ്ങ​ളും അറിയി​ല്ലെന്ന്‌ നമ്മൾ അംഗീ​ക​രി​ക്കും. ചില​പ്പോൾ ഒരു കാര്യം നന്നായി മനസ്സി​ലാ​ക്കാൻ നമുക്കു മറ്റുള്ള​വ​രു​ടെ, പ്രത്യേ​കിച്ച്‌ യഹോ​വ​യു​ടെ സഹായം വേണ്ടി​വ​ന്നേ​ക്കാം. നയമാൻ അതുവരെ യഹോ​വ​യു​ടെ ഒരു ആരാധ​ക​ന​ല്ലാ​യി​രു​ന്നു. എന്നിട്ടും ഇസ്രാ​യേ​ല്യ​യായ അടിമ​പ്പെൺകു​ട്ടി​യു​ടെ​യും തന്റെ ഭൃത്യ​ന്മാ​രു​ടെ​യും, ഏറ്റവും പ്രധാ​ന​മാ​യി യഹോ​വ​യു​ടെ പ്രതി​നി​ധി​യായ എലീശ​യു​ടെ​യും വാക്കുകൾ താഴ്‌മ​യോ​ടെ ശ്രദ്ധി​ച്ചു​കൊണ്ട്‌ അദ്ദേഹം ഒരു പരിധി​വരെ ഉൾക്കാഴ്‌ച കാണിച്ചു. നയമാന്‌ തന്റെ അഹങ്കാരം മാറ്റി​വെ​ക്കാൻ കഴിഞ്ഞു. അങ്ങനെ വിജയ​ത്തി​ലേക്കു നയിക്കുന്ന ഒരു തീരു​മാ​ന​മെ​ടു​ക്കാ​നും അദ്ദേഹ​ത്തി​നാ​യി. അതു​കൊണ്ട്‌ നമ്മൾ ഒരു കാര്യം പറയു​ന്ന​തി​നോ ചെയ്യു​ന്ന​തി​നോ മുമ്പ്‌ ഒന്നു നിറുത്തി ചിന്തി​ക്കേ​ണ്ട​തുണ്ട്‌. ഉദാഹ​ര​ണ​ത്തിന്‌, നമുക്ക്‌ അംഗീ​ക​രി​ക്കാൻ പറ്റാത്ത ഒരു ഉപദേശം ഒരാൾ ബൈബി​ളിൽനിന്ന്‌ കാണി​ച്ചു​ത​രു​ക​യോ അല്ലെങ്കിൽ നമുക്കു പൂർണ​മാ​യും മനസ്സി​ലാ​കാത്ത ഒരു നിർദേശം ലഭിക്കു​ക​യോ ചെയ്യു​ന്നെ​ന്നി​രി​ക്കട്ടെ. നമ്മൾ അതി​നോ​ടു പ്രതി​ക​രി​ക്കാൻപോ​കുന്ന വിധം നമ്മുടെ ഉള്ളിൽ താഴ്‌മ​യു​ണ്ടെ​ന്നാ​ണോ അഹങ്കാ​ര​മു​ണ്ടെ​ന്നാ​ണോ കാണി​ക്കുക എന്ന്‌ ഒന്നു ചിന്തി​ക്കാ​നാ​കും.—സുഭാ​ഷി​തങ്ങൾ 22:4 വായി​ക്കുക.

ദേഷ്യം ഒഴിവാ​ക്കുക, ശാന്തത കാണി​ക്കു​ക

8. ശാന്തത​യോ​ടി​രി​ക്കാൻ നമുക്കു ബുദ്ധി​മു​ട്ടു തോന്നു​ന്നത്‌ എപ്പോ​ഴാ​യി​രി​ക്കാം?

⁸ നമ്മളെ അസ്വസ്ഥ​പ്പെ​ടു​ത്തുന്ന ഒരു സാഹച​ര്യ​മു​ണ്ടാ​കു​മ്പോൾ ദേഷ്യ​ത്തോ​ടെ പ്രതി​ക​രി​ക്കു​ന്ന​തി​നു പകരം ശാന്തരാ​യി​രി​ക്കാൻ ഉൾക്കാഴ്‌ച നമ്മളെ സഹായി​ക്കും. എന്നാൽ അത്‌ എപ്പോ​ഴും അത്ര എളുപ്പമല്ല എന്നതു ശരിയാണ്‌. കാരണം മറ്റുള്ളവർ നമ്മളോട്‌ ദയയി​ല്ലാ​തെ സംസാ​രി​ക്കു​മ്പോ​ഴോ അനീതി​യോ​ടെ പെരു​മാ​റു​മ്പോ​ഴോ നമുക്കു വിഷമം തോന്നി​യേ​ക്കാം. (എഫെ. 4:26) ദാവീ​ദും അബീഗ​യി​ലും സംഘർഷം നിറഞ്ഞ ഒരു സാഹച​ര്യ​ത്തിൽ എങ്ങനെ​യാണ്‌ ഉൾക്കാഴ്‌ച കാണി​ച്ച​തെന്ന്‌ നമുക്കു നോക്കാം.

9. ദാവീ​ദി​ന്റെ അപേക്ഷ​യോട്‌ നാബാൽ പ്രതി​ക​രി​ച്ചത്‌ എങ്ങനെ​യാണ്‌?

⁹ ഇതാണ്‌ സാഹച​ര്യം: ദാവീ​ദും കൂടെ​യു​ള്ള​വ​രും പാരാൻ വിജന​ഭൂ​മി​യിൽ അഭയാർഥി​ക​ളാ​യി കഴിയു​ക​യാണ്‌. (1 ശമു. 25:1) അവി​ടെ​യാ​യി​രു​ന്ന​പ്പോൾ നാബാൽ എന്നൊരു ധനിക​നായ വ്യക്തി​യു​ടെ ആട്ടിൻപ​റ്റ​ത്തെ​യും ഇടയന്മാ​രെ​യും അവർ സംരക്ഷി​ക്കു​മാ​യി​രു​ന്നു. (1 ശമു. 25:15, 16) അങ്ങനെ​യി​രി​ക്കെ ആടുക​ളു​ടെ രോമം കത്രി​ക്കുന്ന സമയം വന്നപ്പോൾ നാബാ​ലി​നെ ആശംസ അറിയി​ക്കാ​നും ആദര​വോ​ടെ കുറച്ച്‌ ഭക്ഷണം ചോദി​ക്കാ​നും വേണ്ടി ദാവീദ്‌ തന്റെ കൂടെ​യുള്ള പുരു​ഷ​ന്മാ​രെ അദ്ദേഹ​ത്തി​ന്റെ അടു​ത്തേക്ക്‌ അയച്ചു. (1 ശമു. 25:6-8) എന്നാൽ ദാവീ​ദും പുരു​ഷ​ന്മാ​രും തനിക്കു ചെയ്‌തു​തന്ന ഉപകാ​ര​ത്തോട്‌ നാബാൽ ഒരു നന്ദിയും കാണി​ച്ചില്ല. പകരം അയാൾ വന്നവ​രോട്‌ വളരെ പരുഷ​മാ​യി ഇടപെട്ടു. ദാവീ​ദി​നെ​യും കൂടെ​യു​ള്ള​വ​രെ​യും അപമാ​നി​ക്കുന്ന രീതി​യിൽ സംസാ​രി​ക്കു​ക​പോ​ലും ചെയ്‌തു.—1 ശമു. 25:10, 11.

10. ദാവീ​ദും അബീഗ​യി​ലും എങ്ങനെ​യാണ്‌ ഉൾക്കാഴ്‌ച കാണി​ച്ചത്‌? (1 ശമുവേൽ 25:32, 33) (ചിത്ര​വും കാണുക.)

¹⁰ നിങ്ങളാ​യി​രു​ന്നു ദാവീ​ദി​ന്റെ സ്ഥാന​ത്തെ​ങ്കിൽ നിങ്ങൾക്ക്‌ അപ്പോൾ എന്തു തോന്നു​മാ​യി​രു​ന്നു? ദാവീ​ദിന്‌ വളരെ​യ​ധി​കം ദേഷ്യം തോന്നി​യ​തിൽ അത്ഭുത​മൊ​ന്നു​മില്ല. ശരിക്കും പറഞ്ഞാൽ നാബാ​ലി​നെ കൊല്ലാ​നുള്ള ദേഷ്യം ദാവീ​ദി​നു​ണ്ടാ​യി​രു​ന്നു. (1 ശമു. 25:13, 21, 22) അതുതന്നെ ചെയ്യാൻ ദാവീദ്‌ പോകു​മ്പോ​ഴാണ്‌ നാബാ​ലി​ന്റെ വിവേ​ക​മുള്ള ഭാര്യ അബീഗ​യിൽ ദാവീ​ദി​നെ തടഞ്ഞത്‌. എങ്ങനെ​യാണ്‌ അബീഗ​യിൽ ഉൾക്കാഴ്‌ച കാണി​ച്ചത്‌? അങ്ങേയറ്റം ദേഷ്യ​ത്തോ​ടെ ദാവീദ്‌ പ്രതി​ക​രി​ച്ചെ​ങ്കി​ലും അദ്ദേഹം ശരിക്കും നല്ലൊരു മനുഷ്യ​നാ​ണെന്ന്‌ അവൾ മനസ്സി​ലാ​ക്കി. അതു​കൊണ്ട്‌ അബീഗ​യിൽ ഉദാര​മാ​യി സമ്മാനങ്ങൾ കൊടു​ക്കു​ക​യും താഴ്‌മ​യോ​ടെ ചില നല്ല ഉപദേ​ശങ്ങൾ നൽകു​ക​യും ചെയ്‌തു​കൊണ്ട്‌ ദാവീ​ദി​ന്റെ ദേഷ്യം തണുപ്പി​ക്കാൻ ശ്രമിച്ചു. (1 ശമു. 25:18, 23-31) ദാവീ​ദും ഉൾക്കാഴ്‌ച കാണിച്ചു. യഹോ​വ​യു​ടെ വീക്ഷണ​മാണ്‌ അബീഗ​യി​ലി​ന്റെ വാക്കു​ക​ളിൽ കാണു​ന്ന​തെന്ന്‌ ദാവീദ്‌ മനസ്സി​ലാ​ക്കി. അങ്ങനെ ആ വാക്കു​കൾക്ക്‌ ശ്രദ്ധ കൊടു​ത്ത​തു​കൊണ്ട്‌ ദാവീ​ദി​നു ശാന്തനാ​കാ​നും ഗുരു​ത​ര​മായ ഒരു തെറ്റ്‌ ഒഴിവാ​ക്കാ​നും കഴിഞ്ഞു.—1 ശമുവേൽ 25:32, 33 വായി​ക്കുക.

11. ദേഷ്യം തോന്നുന്ന സാഹച​ര്യ​ത്തിൽ ഉൾക്കാഴ്‌ച കാണി​ക്കു​ന്നത്‌ നമ്മളെ എങ്ങനെ സഹായി​ക്കും? (സുഭാ​ഷി​തങ്ങൾ 19:11)

¹¹ നമുക്ക്‌ എന്തു പഠിക്കാം? ദേഷ്യം തോന്നാൻ ന്യായ​മായ കാരണങ്ങൾ ഉള്ളപ്പോ​ഴും ശാന്തമാ​യി പ്രതി​ക​രി​ക്കാൻ ഉൾക്കാഴ്‌ച സഹായി​ക്കും. ദേഷ്യ​ത്തോ​ടെ​യുള്ള നമ്മുടെ വാക്കു​ക​ളും പ്രവൃ​ത്തി​ക​ളും കാരണ​മു​ണ്ടാ​യേ​ക്കാ​വുന്ന കുഴപ്പ​ങ്ങ​ളെ​ക്കു​റിച്ച്‌ ഉൾക്കാ​ഴ്‌ച​യുള്ള ഒരാൾ ചിന്തി​ക്കും. (സുഭാ​ഷി​തങ്ങൾ 19:11 വായി​ക്കുക.) യഹോ​വ​യു​ടെ ചിന്ത എന്താ​ണെന്ന്‌ ദാവീ​ദി​നെ ഓർമി​പ്പി​ച്ച​പ്പോൾ അദ്ദേഹ​ത്തി​നു തന്റെ ദേഷ്യം നിയ​ന്ത്രി​ക്കാ​നാ​യി. നിങ്ങൾക്കും ഒരു സാഹച​ര്യ​ത്തിൽ അസ്വസ്ഥ​ത​യോ ദേഷ്യ​മോ ഉണ്ടാകു​ന്നെ​ങ്കിൽ ചിന്തി​ക്കാ​തെ പെട്ടെന്ന്‌ പ്രതി​ക​രി​ക്കാൻ തോന്നി​യാ​ലും അങ്ങനെ ചെയ്യരുത്‌. (യാക്കോ. 1:19) യഹോ​വ​യോട്‌ പ്രാർഥി​ക്കുക. എന്നിട്ട്‌ ആ കാര്യ​ത്തിൽ യഹോ​വ​യു​ടെ ചിന്ത എന്താ​ണെന്ന്‌ മനസ്സി​ലാ​ക്കാൻ സമയ​മെ​ടു​ക്കുക. അതു ശാന്തരാ​യി​രി​ക്കാൻ നിങ്ങളെ സഹായി​ച്ചേ​ക്കും.

12. ഉൾക്കാഴ്‌ച കാണി​ക്കാ​നും ശാന്തരാ​യി​രി​ക്കാ​നും മറ്റുള്ള​വർക്കു നമ്മളെ എങ്ങനെ സഹായി​ക്കാ​നാ​കും?

¹² യഹോ​വ​യു​ടെ ചിന്ത മനസ്സി​ലാ​ക്കാൻ ദാവീ​ദി​നെ സഹായി​ക്കു​ന്ന​തിന്‌ യഹോവ അബീഗ​യി​ലി​നെ ഉപയോ​ഗി​ച്ചു. ഒരു കാര്യത്തെ ഉൾക്കാ​ഴ്‌ച​യോ​ടെ കാണാൻ നമ്മളെ സഹായി​ക്കു​ന്ന​തി​നും യഹോ​വ​യ്‌ക്കു മറ്റുള്ള​വരെ ഉപയോ​ഗി​ക്കാ​നാ​കും. അതു​കൊണ്ട്‌ നമ്മളെ ദേഷ്യം​പി​ടി​പ്പി​ക്കുന്ന ഒരു സംഭവം നടന്നാൽ അതി​നോ​ടു പ്രതി​ക​രി​ക്കു​ന്ന​തി​നു മുമ്പ്‌ പക്വത​യുള്ള ഒരു ക്രിസ്‌ത്യാ​നി​യോട്‌ സംസാ​രി​ക്കു​ന്നതു നല്ലതാ​യി​രി​ക്കും. യഹോ​വ​യു​ടെ വീക്ഷണം എന്താ​ണെന്നു മനസ്സി​ലാ​ക്കാൻ ആ വ്യക്തിക്കു നിങ്ങളെ സഹായി​ക്കാ​നാ​യേ​ക്കും. (സുഭാ. 12:15; 20:18) ഇനി, നമ്മുടെ ഒരു സുഹൃത്ത്‌ അത്തര​മൊ​രു സാഹച​ര്യ​ത്തി​ലൂ​ടെ​യാണ്‌ കടന്നു​പോ​കു​ന്ന​തെ​ങ്കിൽ നമുക്ക്‌ അബീഗ​യി​ലി​നെ അനുക​രി​ക്കാ​നാ​കു​മോ? ആ വിഷയ​ത്തിൽ യഹോ​വ​യു​ടെ വീക്ഷണം മനസ്സി​ലാ​ക്കാൻ നമുക്ക്‌ ആ സുഹൃ​ത്തി​നെ സഹായി​ക്കാ​നാ​കു​മോ? ഉൾക്കാഴ്‌ച കാണി​ക്കാ​നും ശാന്തരാ​യി​രി​ക്കാ​നും നമ്മൾ മറ്റുള്ള​വരെ സഹായി​ക്കു​മ്പോൾ യഹോവ ആ ശ്രമങ്ങളെ ഉറപ്പാ​യും അനു​ഗ്ര​ഹി​ക്കും.

പേടി ഒഴിവാ​ക്കുക, യഹോ​വ​യിൽ ആശ്രയി​ക്കു​ക

13. പേടി തോന്നു​മ്പോൾ ഉൾക്കാഴ്‌ച നമ്മളെ എങ്ങനെ​യാണ്‌ സഹായി​ക്കു​ന്നത്‌?

¹³ ചില​പ്പോ​ഴൊ​ക്കെ പേടി തോന്നുന്ന സാഹച​ര്യ​ങ്ങൾ നമുക്കു നേരി​ടേ​ണ്ടി​വ​ന്നേ​ക്കാം. എന്നാൽ അതെല്ലാം യഹോ​വ​യു​ടെ മഹത്തായ ശക്തിയു​മാ​യി താരത​മ്യം ചെയ്യു​മ്പോൾ എത്ര നിസ്സാ​ര​മാ​ണെന്നു മനസ്സി​ലാ​ക്കാൻ ഉൾക്കാഴ്‌ച നമ്മളെ സഹായി​ക്കും. (സങ്കീ. 27:1) ഏതൊരു സാഹച​ര്യ​ത്തെ​യും നേരി​ടാൻ, അത്‌ എത്ര പ്രതീ​ക്ഷ​യ​റ്റ​താ​ണെന്ന്‌ തോന്നി​യാ​ലും അതിനെ മറിക​ട​ക്കാൻ യഹോ​വ​യ്‌ക്കു സഹായി​ക്കാ​നാ​കും. യോന പ്രവാ​ച​കന്റെ ജീവിതം അതാണ്‌ നമ്മളെ പഠിപ്പി​ക്കു​ന്നത്‌. അദ്ദേഹം ഒരു ആത്മീയ​മ​നു​ഷ്യൻ ആയിരു​ന്നു. പക്ഷേ ബുദ്ധി​മു​ട്ടുള്ള ഒരു നിയമനം കിട്ടി​യ​പ്പോൾ അതിൽ വിജയി​ക്കാൻ അദ്ദേഹം കൂടുതൽ ഉൾക്കാഴ്‌ച കാണി​ക്കേ​ണ്ട​തു​ണ്ടാ​യി​രു​ന്നു.

14. യഹോവ കൊടുത്ത നിയമനം സ്വീക​രി​ക്കാൻ യോന​യ്‌ക്ക്‌ പേടി തോന്നി​യത്‌ എന്തു​കൊ​ണ്ടാ​യി​രി​ക്കാം?

¹⁴ പേടി തോന്നുന്ന ഒരു നിയമനം യോന​യ്‌ക്ക്‌ യഹോ​വ​യിൽനിന്ന്‌ കിട്ടി. നിനെ​വെ​യി​ലേക്ക്‌ ചെന്ന്‌ അവി​ടെ​യു​ള്ള​വരെ ന്യായ​വി​ധി സന്ദേശം അറിയി​ക്കുക എന്നതാ​യി​രു​ന്നു അത്‌. (യോന 1:1, 2) ആ നിയമനം നിങ്ങൾക്കാണ്‌ കിട്ടി​യി​രു​ന്ന​തെ​ങ്കിൽ നിങ്ങൾക്ക്‌ എന്തു തോന്നു​മാ​യി​രു​ന്നു? ഇസ്രാ​യേ​ലിൽനിന്ന്‌ അസീറി​യൻ നഗരമായ നിനെ​വെ​യിൽ എത്താൻ ഏതാണ്ട്‌ ഒരു മാസം നടക്കേ​ണ്ടി​വ​രും. ഇനി, അക്രമ​ത്തി​നും ക്രൂര​ത​യ്‌ക്കും പേരു​കേ​ട്ട​വ​രാ​യി​രു​ന്നു അസീറി​യ​ക്കാർ. ‘രക്തച്ചൊ​രി​ച്ചി​ലി​ന്റെ നഗരം’ എന്നു​പോ​ലും നിനെ​വെയെ വിളി​ച്ചി​ട്ടുണ്ട്‌. (നഹൂം 3:1, 7) അതു​കൊ​ണ്ടാ​യി​രി​ക്കാം ആ നിയമനം സ്വീക​രി​ക്കു​ന്ന​തി​നു പകരം ഓടി​പ്പോ​കാൻ യോന തീരു​മാ​നി​ച്ചത്‌.—യോന 1:3.

15. യഹോ​വ​യിൽ കൂടുതൽ ആശ്രയി​ക്കാൻ യോന​യ്‌ക്ക്‌ എങ്ങനെ​യാണ്‌ കഴിഞ്ഞത്‌? (യോന 2:6-9)

¹⁵ ഒരു കപ്പൽ കയറി നിനെ​വെ​യിൽനിന്ന്‌ ദൂരെ​പ്പോ​കാൻ ശ്രമിച്ച യോന​യു​ടെ ജീവൻ അപകട​ത്തി​ലാ​യി. എന്നാൽ യഹോവ യോനയെ അത്ഭുത​ക​ര​മാ​യി രക്ഷിച്ചു​കൊണ്ട്‌ തന്റെ മഹാശക്തി അദ്ദേഹത്തെ ഓർമി​പ്പി​ച്ചു. (യോന 1:15, 17) അങ്ങനെ യോന ഒരു പാഠം പഠിച്ചു. തന്റെ നിയമ​ന​ത്തി​ലെ പേടി​പ്പെ​ടു​ത്തുന്ന വശങ്ങളി​ലേക്കല്ല, ഏതൊരു അപകട​ത്തിൽനി​ന്നും തന്നെ രക്ഷിക്കാൻ കഴിവുള്ള യഹോ​വ​യി​ലേക്കു നോക്കാൻ യോന​യ്‌ക്കു കഴിഞ്ഞു. (യോന 2:6-9 വായി​ക്കുക.) അതു​കൊ​ണ്ടു​തന്നെ യഹോവ വീണ്ടും ഒരു അവസരം കൊടു​ത്ത​പ്പോൾ യോന മടിച്ചു​നിൽക്കാ​തെ ആ നിയമനം സ്വീക​രി​ച്ചു. യോന നിനെ​വെ​യി​ലേക്കു പോയി. അവിടെ അദ്ദേഹ​ത്തി​ന്റെ പ്രവർത്തനം വലി​യൊ​രു വിജയ​മാ​യി​രു​ന്നു.—യോന 3:5.

16. പേടി തോന്നുന്ന സാഹച​ര്യ​ങ്ങ​ളിൽ ഉൾക്കാഴ്‌ച നമ്മളെ എങ്ങനെ സഹായി​ക്കും? (സുഭാ​ഷി​തങ്ങൾ 29:25) (ചിത്ര​ങ്ങ​ളും കാണുക.)

¹⁶ നമുക്ക്‌ എന്തു പഠിക്കാം? മനുഷ്യ​രോ​ടുള്ള പേടി യഹോ​വയെ സേവി​ക്കു​ന്ന​തിൽനിന്ന്‌ നമ്മളെ പിന്നോ​ട്ടു വലിക്കാൻ നമ്മൾ ആഗ്രഹി​ക്കു​ന്നില്ല. (സുഭാ​ഷി​തങ്ങൾ 29:25 വായി​ക്കുക.) തന്റെ ജീവി​ത​ത്തി​ലു​ണ്ടായ സംഭവ​ങ്ങ​ളെ​ക്കു​റിച്ച്‌ ചിന്തി​ച്ചു​കൊണ്ട്‌ യോന ഉൾക്കാഴ്‌ച കാണി​ച്ച​പ്പോൾ നിയമ​ന​ത്തി​ലെ ബുദ്ധി​മു​ട്ടു​ക​ളി​ലേക്കു നോക്കു​ന്ന​തി​നു പകരം സഹായി​ക്കാ​നുള്ള യഹോ​വ​യു​ടെ ശക്തിയി​ലേ​ക്കാണ്‌ താൻ നോ​ക്കേ​ണ്ട​തെന്ന്‌ അദ്ദേഹ​ത്തി​നു മനസ്സി​ലാ​യി. ഇതു​പോ​ലെ​തന്നെ നമ്മളും മുൻകാ​ല​ങ്ങ​ളിൽ യഹോവ നമ്മളെ സഹായി​ക്കു​ക​യും സംരക്ഷി​ക്കു​ക​യും ചെയ്‌ത​തി​നെ​ക്കു​റിച്ച്‌ ചിന്തി​ക്കു​ന്നെ​ങ്കിൽ പേടിയെ മറിക​ട​ക്കാൻ നമുക്കും കഴിയും. അതു​പോ​ലെ സഹോ​ദ​രീ​സ​ഹോ​ദ​ര​ന്മാ​രു​ടെ മാതൃ​ക​ക​ളെ​ക്കു​റി​ച്ചും ഓർക്കാ​നാ​കും. പേടി തോന്നുന്ന സാഹച​ര്യ​ങ്ങൾ നേരി​ട്ട​പ്പോ​ഴോ ബുദ്ധി​മു​ട്ടുള്ള ഒരു നിയമനം കിട്ടി​യ​പ്പോ​ഴോ അവർ യഹോ​വ​യിൽ ആശ്രയി​ച്ചു​കൊണ്ട്‌ വിജയ​ക​ര​മാ​യി അതിനെ എങ്ങനെ​യാണ്‌ നേരി​ട്ട​തെന്നു നമുക്കു ചിന്തി​ക്കാ​നാ​കും.a (എബ്രാ. 13:6) അങ്ങനെ യഹോ​വ​യിൽ പൂർണ​മാ​യി ആശ്രയി​ച്ചു​കൊ​ണ്ടും മറ്റുള്ള​വരെ അതിനു സഹായി​ച്ചു​കൊ​ണ്ടും നമുക്ക്‌ ഉൾക്കാഴ്‌ച കാണി​ക്കാം.

ഉൾക്കാഴ്‌ച നേടുക, അതു കാത്തു​സൂ​ക്ഷി​ക്കു​ക

17. നമുക്ക്‌ എങ്ങനെ കൂടുതൽ ഉൾക്കാഴ്‌ച നേടാം?

¹⁷ നമ്മൾ പഠിച്ച​തു​പോ​ലെ, ബുദ്ധി​മു​ട്ടു നിറഞ്ഞ സാഹച​ര്യ​ങ്ങളെ വിജയ​ക​ര​മാ​യി നേരി​ടാൻ ഉൾക്കാഴ്‌ച നമ്മളെ സഹായി​ക്കും. എങ്ങനെ നമുക്ക്‌ കൂടുതൽ ഉൾക്കാഴ്‌ച നേടാ​നാ​കും? യഹോ​വ​യാണ്‌ ഉൾക്കാ​ഴ്‌ച​യു​ടെ ഏറ്റവും വലിയ ഉറവിടം. ദൈവം അത്‌ തന്റെ വചനത്തി​ലൂ​ടെ​യും പരിശു​ദ്ധാ​ത്മാ​വി​ലൂ​ടെ​യും തന്റെ ആരാധ​കർക്കു കൊടു​ക്കു​ന്നു. (നെഹ. 9:20; സങ്കീ. 32:8) നല്ല തീരു​മാ​ന​ങ്ങ​ളെ​ടു​ക്കാ​നും വികാ​രങ്ങൾ നിയ​ന്ത്രി​ക്കാ​നും സഹായി​ക്കുന്ന നല്ല ഉപദേ​ശങ്ങൾ യഹോവ തന്നിട്ടുണ്ട്‌. (സങ്കീ. 119:97-101) അതു​കൊണ്ട്‌ ബൈബിൾ പറയുന്ന കാര്യങ്ങൾ ശ്രദ്ധ​യോ​ടെ പരി​ശോ​ധി​ക്കു​ക​യും യഹോ​വ​യോ​ടു പരിശു​ദ്ധാ​ത്മാ​വി​നാ​യി പ്രാർഥി​ക്കു​ക​യും ചെയ്യു​മ്പോൾ നമുക്ക്‌ ഉൾക്കാഴ്‌ച നേടാ​നാ​കും. അങ്ങനെ ഓരോ സാഹച​ര്യ​ത്തെ​യും യഹോവ കാണു​ന്ന​തു​പോ​ലെ കാണാ​നും ആ സമയത്ത്‌ നമ്മൾ എന്തു ചെയ്യാ​നാ​ണോ യഹോവ പ്രതീ​ക്ഷി​ക്കു​ന്നത്‌ അതു​പോ​ലെ ചെയ്യാ​നും നമുക്കാ​കും.—സുഭാ. 21:11, അടിക്കു​റിപ്പ്‌.

18. നിങ്ങൾ എന്തു ചെയ്യാ​നാണ്‌ തീരു​മാ​നി​ച്ചു​റ​ച്ചി​രി​ക്കു​ന്നത്‌?

¹⁸ യഹോ​വ​യോ​ടു നമുക്ക്‌ ഉൾക്കാ​ഴ്‌ച​ക്കാ​യി ചോദി​ച്ചു​കൊ​ണ്ടി​രി​ക്കാം. തുടർന്നും അതിനെ വളരെ മൂല്യ​മുള്ള ഒന്നായി കാണാം. (സങ്കീ. 14:2) അങ്ങനെ ചെയ്യു​ന്നെ​ങ്കിൽ “ഉൾക്കാ​ഴ്‌ച​യു​ടെ വഴിയിൽനിന്ന്‌” നമ്മൾ മാറി​പ്പോ​കില്ല. (സുഭാ. 21:16) പകരം എല്ലാ സമയത്തും എല്ലാ സാഹച​ര്യ​ത്തി​ലും ഉൾക്കാഴ്‌ച കാണി​ക്കാൻ നമ്മൾ തീരു​മാ​നി​ച്ചു​റ​യ്‌ക്കും. അപ്പോൾ നമുക്ക്‌ ‘വിജയി​ക്കാ​നാ​കും!’