ശുശ്രൂ​ഷ​യിൽ ‘വിദഗ്‌ധ​മാ​യി പഠിപ്പി​ക്കു​ന്നവർ’ ആയിത്തീ​രു​ക

1. നമ്മൾ ഏതു കഴിവ്‌ വളർത്തി​യെ​ടു​ക്കണം, എന്തു​കൊണ്ട്‌? (2 തിമൊ​ഥെ​യൊസ്‌ 4:2) (ചിത്ര​വും കാണുക.)

യേശു തന്റെ അനുഗാ​മി​ക​ളോട്‌ പറഞ്ഞു: ‘നിങ്ങൾ ആളുകളെ ശിഷ്യ​രാ​ക്കു​ക​യും ഞാൻ നിങ്ങ​ളോ​ടു കല്പിച്ചതെല്ലാം അനുസ​രി​ക്കാൻ അവരെ പഠിപ്പി​ക്കു​ക​യും വേണം.’ (മത്താ. 28:19, 20) എല്ലാ ക്രിസ്‌ത്യാ​നി​ക​ളും പഠിപ്പി​ക്കു​ന്നവർ ആയിരി​ക്കേ​ണ്ട​തുണ്ട്‌ എന്നാണ്‌ ഈ നിർദേശം കാണി​ക്കു​ന്നത്‌. ‘ശരിയായ മനോ​ഭാ​വ​മു​ള്ള​വരെ’ യഹോവ തന്നി​ലേക്ക്‌ ആകർഷി​ക്കും എന്നതും അവരെ കണ്ടെത്താൻ ദൂതന്മാർ നമ്മളെ സഹായി​ക്കും എന്നതും ശരിയാണ്‌. (പ്രവൃ. 13:48; യോഹ. 6:44; വെളി. 14:6) എങ്കിലും നമ്മളും ചില കാര്യങ്ങൾ ചെയ്യേ​ണ്ട​തുണ്ട്‌. അപ്പോ​സ്‌ത​ല​ന്മാ​രായ പൗലോ​സി​ന്റെ​യും ബർന്നബാ​സി​ന്റെ​യും മാതൃക നോക്കാം. അവർ ഇക്കോ​ന്യ​യി​ലെ സിന​ഗോ​ഗിൽ പഠിപ്പി​ച്ച​പ്പോൾ “വലി​യൊ​രു കൂട്ടം ജൂതന്മാ​രും ഗ്രീക്കു​കാ​രും വിശ്വാ​സി​ക​ളാ​യി​ത്തീർന്നു. അത്ര ഫലപ്ര​ദ​മാ​യാണ്‌ അവർ സംസാ​രി​ച്ചത്‌.” (പ്രവൃ. 14:1) അതെ, പൗലോ​സും ബർന്നബാ​സും ‘വിദഗ്‌ധ​മാ​യി പഠിപ്പി​ക്കാ​നുള്ള’ കഴിവ്‌ വളർത്തി​യെ​ടു​ത്തി​രു​ന്നു. (2 തിമൊ​ഥെ​യൊസ്‌ 4:2 വായി​ക്കുക.) ക്രിസ്‌ത്യാ​നി​ക​ളായ നമ്മൾ എല്ലാവ​രും ആ കഴിവ്‌ വളർത്തി​യെ​ടു​ക്കേ​ണ്ട​തുണ്ട്‌.

2. പഠിപ്പി​ക്കാ​നുള്ള പ്രാപ്‌തി മെച്ച​പ്പെ​ടു​ത്താൻ കഴിയി​ല്ലെന്നു ചില ക്രിസ്‌ത്യാ​നി​കൾക്കു തോന്നു​ന്നത്‌ എന്തു​കൊണ്ട്‌?

² വലിയ വിദ്യാ​ഭ്യാ​സ​മോ കഴിവോ ഒന്നും ഇല്ലാത്ത​തു​കൊണ്ട്‌ തങ്ങൾക്കു പഠിപ്പി​ക്കാ​നുള്ള പ്രാപ്‌തി മെച്ച​പ്പെ​ടു​ത്താൻ പറ്റി​ല്ലെന്നു ചിലർ ചിന്തി​ക്കു​ന്നു. ബൈബിൾക്കാ​ല​ങ്ങ​ളി​ലെ ചില പുരു​ഷ​ന്മാർക്കും ഇതു​പോ​ലെ പ്രാപ്‌തി​ക്കു​റവ്‌ തോന്നി​യി​ട്ടുണ്ട്‌. (പുറ. 4:10; യിരെ. 1:6) പിന്നെ, ശുശ്രൂ​ഷ​യിൽ മറ്റുള്ള​വ​രെ​പ്പോ​ലെ നല്ല ഫലങ്ങൾ കിട്ടാതെ വരു​മ്പോൾ അത്‌ തങ്ങളുടെ പഠിപ്പി​ക്കൽ പ്രാപ്‌തി​യു​ടെ കുഴപ്പം​കൊ​ണ്ടാ​ണെന്നു ചിലർ ചിന്തി​ക്കു​ന്നു. നമ്മൾ കാണു​ക​യും സംസാ​രി​ക്കു​ക​യും ചെയ്യുന്ന എല്ലാവ​രും സന്തോ​ഷ​വാർത്ത​യോട്‌ നല്ല രീതി​യിൽ പ്രതി​ക​രി​ക്കില്ല എന്നതു ശരിയാണ്‌. ഇനി ആളുക​ളു​ടെ പ്രതി​ക​രണം പൂർണ​മാ​യും നമ്മുടെ ശ്രമങ്ങളെ ആശ്രയി​ച്ചു​മല്ല ഇരിക്കു​ന്നത്‌. നമ്മൾ കണ്ടതു​പോ​ലെ യഹോ​വ​യും ദൂതന്മാ​രും ആണ്‌ ആത്മാർഥ​ഹൃ​ദ​യരെ കണ്ടെത്താൻ സഹായി​ക്കു​ന്നത്‌. എങ്കിലും രാജ്യ​സ​ന്ദേശം മറ്റുള്ള​വ​രു​ടെ മുന്നിൽ ഏറ്റവും നല്ല രീതി​യിൽ അവതരി​പ്പി​ക്കാ​നാണ്‌ നമ്മൾ ആഗ്രഹി​ക്കു​ന്നത്‌. ഈ ലേഖനം അതിനു സഹായി​ക്കും. ശുശ്രൂ​ഷ​യിൽ വിദഗ്‌ധ​മാ​യി പഠിപ്പി​ക്കാ​നുള്ള കഴിവ്‌ മെച്ച​പ്പെ​ടു​ത്താൻ സഹായി​ക്കുന്ന മൂന്നു കാര്യങ്ങൾ നോക്കാം.

ആളുക​ളിൽ താത്‌പ​ര്യം കാണി​ക്കു​ക

3. യേശു​വിന്‌ ആളുക​ളു​ടെ ഹൃദയത്തെ സ്‌പർശി​ക്കാ​നാ​യത്‌ എന്തു​കൊണ്ട്‌?

³ യേശു​വി​നു ‘മനുഷ്യ​രു​ടെ ഹൃദയ​ത്തിൽ എന്താ​ണെന്ന്‌ അറിയാ​മാ​യി​രു​ന്നു’ എന്നു ബൈബിൾ പറയുന്നു. (യോഹ. 2:25) ആളുകൾ എന്തൊ​ക്കെ​യാണ്‌ ചിന്തി​ക്കു​ന്ന​തെ​ന്നും എന്തു​കൊ​ണ്ടാണ്‌ അവർ അങ്ങനെ ചിന്തി​ക്കു​ന്ന​തെ​ന്നും യേശു​വിന്‌ അറിയാ​മാ​യി​രു​ന്നു എന്നാണ്‌ ഇതു കാണി​ക്കു​ന്നത്‌. ആളുക​ളു​ടെ ആവശ്യങ്ങൾ മനസ്സി​ലാ​ക്കി​യ​തു​കൊ​ണ്ടാണ്‌ യേശു​വിന്‌ അവരുടെ ഹൃദയത്തെ തൊടാ​നാ​യത്‌. ആളുകൾ ആത്മീയ​മാ​യി പട്ടിണി​യി​ലാ​ണെ​ന്നും അനേകം പാരമ്പ​ര്യ​ങ്ങ​ളും മനുഷ്യ​രു​ണ്ടാ​ക്കിയ നിയമ​ങ്ങ​ളും കാരണം അവർ അടിച്ച​മർത്ത​പ്പെ​ട്ടവർ ആണെന്നും യേശു മനസ്സി​ലാ​ക്കി. (മത്താ. 9:36; 23:4) അതു​കൊ​ണ്ടു​തന്നെ മലയിലെ പ്രസം​ഗ​ത്തിൽ, യേശു അവരുടെ ജീവിതം മെച്ച​പ്പെ​ടു​ത്താൻ സഹായി​ക്കുന്ന കാര്യങ്ങൾ പറഞ്ഞു​കൊ​ടു​ത്തു. തങ്ങളുടെ ജീവി​തത്തെ നേരിട്ട്‌ ബാധി​ക്കുന്ന വിഷയ​ങ്ങ​ളെ​ക്കു​റിച്ച്‌ യേശു പറയു​ന്നതു കേട്ട​പ്പോൾ പല ആളുക​ളെ​യും അതു ശരിക്കും സ്‌പർശി​ച്ചു.

4. ആളുക​ളിൽ താത്‌പ​ര്യ​മു​ണ്ടെന്നു നമുക്ക്‌ എങ്ങനെ കാണി​ക്കാം? (ചിത്ര​ങ്ങ​ളും കാണുക.)

⁴ ശുശ്രൂ​ഷ​യിൽ കണ്ടുമു​ട്ടു​ന്ന​വ​രു​ടെ ഉത്‌ക​ണ്‌ഠകൾ മനസ്സി​ലാ​ക്കാൻ ശ്രമി​ച്ചു​കൊണ്ട്‌ നമുക്ക്‌ അവരിൽ താത്‌പ​ര്യ​മു​ണ്ടെന്നു കാണി​ക്കാ​നാ​കും. നമ്മൾ കാണുന്ന ഓരോ വ്യക്തി​യും സാത്താന്റെ ഈ ദുഷ്ട​ലോ​ക​ത്തി​ലെ ഏതെങ്കി​ലു​മൊ​ക്കെ പ്രശ്‌നങ്ങൾ നേരി​ടു​ന്ന​വ​രാ​യി​രി​ക്കും. അത്‌ ഓർക്കു​ന്നത്‌ നമ്മുടെ പ്രദേ​ശത്തെ ആളുക​ളോ​ടു സഹാനു​ഭൂ​തി​യോ​ടെ ഇടപെ​ടാൻ നമ്മളെ സഹായി​ക്കും. ഉദാഹ​ര​ണ​ത്തിന്‌, അടുത്തി​ടെ നടന്ന ഒരു സംഭവം നമ്മുടെ പ്രദേ​ശ​ത്തു​ള്ള​വരെ ടെൻഷ​ന​ടി​പ്പി​ക്കു​ന്നു​ണ്ടോ? സ്‌കൂ​ളിൽ പോകുന്ന മക്കളുടെ സുരക്ഷ​യെ​ക്കു​റിച്ച്‌ മാതാ​പി​താ​ക്കൾക്ക്‌ ഉത്‌ക​ണ്‌ഠ​യു​ണ്ടോ? നമ്മുടെ പ്രദേ​ശത്ത്‌ തൊഴി​ലി​ല്ലായ്‌മ കൂടു​ത​ലാ​ണോ? “ബുദ്ധി​മു​ട്ടു നിറഞ്ഞ” ഈ സമയത്ത്‌, ബൈബിൾ നൽകുന്ന പ്രത്യാശ ഇല്ലാതെ ജീവി​ക്കേ​ണ്ടി​വ​രുന്ന ആളുക​ളു​ടെ അവസ്ഥ മനസ്സിൽക്കാ​ണാൻ ശ്രമി​ക്കുക.—2 തിമൊ. 3:1; യശ. 65:13, 14.

5. ഒരു അധ്യാ​പകൻ എന്ന നിലയിൽ യേശു പരീശ​ന്മാ​രിൽനിന്ന്‌ വ്യത്യ​സ്‌ത​നാ​യി​രു​ന്നത്‌ എങ്ങനെ? (മത്തായി 11:28-30)

⁵ യേശു തന്റെ കേൾവി​ക്കാ​രെ സ്‌നേ​ഹി​ച്ചു. യേശു​വി​ന്റെ ഇടപെ​ട​ലിൽനിന്ന്‌ അവർക്ക്‌ അതു മനസ്സി​ലാ​ക്കാ​നു​മാ​യി. സാധാ​ര​ണ​ക്കാ​രെ തീരെ താഴ്‌ന്ന​വ​രാ​യും വെറു​ക്ക​പ്പെ​ട്ട​വ​രാ​യും കണ്ടിരുന്ന പരീശ​ന്മാ​രിൽനിന്ന്‌ എത്രയോ വ്യത്യ​സ്‌ത​നാ​യി​രു​ന്നു യേശു. (മത്താ. 23:13; യോഹ. 7:49) ആളുക​ളോ​ടു ദയയോ​ടെ​യും ആദര​വോ​ടെ​യും ആണ്‌ യേശു ഇടപെ​ട്ടത്‌. “സൗമ്യ​നും താഴ്‌മ​യു​ള്ള​വ​നും” ആയിരു​ന്ന​തു​കൊണ്ട്‌ യേശു നല്ലൊരു അധ്യാ​പ​ക​നാ​യി​രു​ന്നു. (മത്തായി 11:28-30 വായി​ക്കുക.) നമുക്കും ശുശ്രൂ​ഷ​യിൽ കണ്ടുമു​ട്ടു​ന്ന​വ​രോ​ടു ദയയോ​ടെ​യും ആദര​വോ​ടെ​യും ഇടപെ​ടാം.

6. ആളുകൾ നമ്മുടെ സന്ദേശ​ത്തോ​ടു താത്‌പ​ര്യം കാണി​ക്കാ​തി​രി​ക്കു​ക​യോ എതിർക്കു​ക​യോ ചെയ്യു​മ്പോൾ അവരോ​ടു ദയയോ​ടെ​യും ആദര​വോ​ടെ​യും ഇടപെ​ടാൻ നമുക്ക്‌ എങ്ങനെ കഴിയും?

⁶ ചിലർ നമ്മുടെ സന്ദേശ​ത്തോ​ടു താത്‌പ​ര്യം കാണി​ക്കാ​തി​രി​ക്കു​ക​യോ എതിർക്കു​ക​യോ പോലും ചെയ്‌തേ​ക്കാം. അപ്പോൾ എങ്ങനെ പ്രതി​ക​രി​ക്കണം? എതിർപ്പു​കൾ വെറുതേ സഹിച്ചു​നി​ന്നാൽ മാത്രം മതിയോ? ‘നിങ്ങളെ വെറു​ക്കു​ന്ന​വർക്കു നന്മ ചെയ്യാ​നും നിങ്ങളെ ശപിക്കു​ന്ന​വരെ അനു​ഗ്ര​ഹി​ക്കാ​നും നിങ്ങളെ അപമാ​നി​ക്കു​ന്ന​വർക്കു​വേണ്ടി പ്രാർഥി​ക്കാ​നും’ പോലും യേശു നിർദേ​ശി​ച്ചു. (ലൂക്കോ. 6:27, 28) ആരെങ്കി​ലും നമ്മളോ​ടു മോശ​മാ​യി പെരു​മാ​റു​മ്പോൾ, അതിന്‌ എന്തെങ്കി​ലും കാരണം ഉണ്ടായി​രി​ക്കു​മെന്നു ചിന്തി​ക്കു​ന്നെ​ങ്കിൽ അവരോ​ടു ദയയോ​ടെ ഇടപെ​ടാൻ എളുപ്പ​മാ​യി​രി​ക്കും. ശരിയാണ്‌, ചിലരു​ടെ ലക്ഷ്യം നമ്മുടെ പ്രസം​ഗ​പ്ര​വർത്തനം നിറു​ത്തി​ക്കുക എന്നതു​ത​ന്നെ​യാണ്‌. എന്നാൽ മറ്റു ചിലരു​ടെ കാര്യ​ത്തിൽ, നമ്മൾ അവരുടെ വീട്ടിൽ ചെന്ന ദിവസം കുടും​ബ​പ്ര​ശ്‌ന​മോ മറ്റെ​ന്തെ​ങ്കി​ലും ടെൻഷ​നോ കാരണം അവർ വിഷമ​ത്തി​ലാ​യി​രു​ന്നി​രി​ക്കും. അതു​കൊ​ണ്ടാ​കാം അവർ മോശ​മാ​യി ഇടപെ​ട്ടത്‌; അല്ലാതെ നമ്മളോ​ടുള്ള ദേഷ്യം​കൊ​ണ്ടാ​യി​രി​ക്കില്ല. എന്തുത​ന്നെ​യാ​യാ​ലും നമ്മൾ ഈ ഉപദേശം അനുസ​രി​ക്കണം: “എപ്പോ​ഴും നിങ്ങളു​ടെ വാക്കുകൾ, ഉപ്പു ചേർത്ത്‌ രുചി​വ​രു​ത്തി​യ​തു​പോ​ലെ ഹൃദ്യ​മാ​യി​രി​ക്കട്ടെ. അങ്ങനെ​യാ​കു​മ്പോൾ, ഓരോ​രു​ത്തർക്കും എങ്ങനെ മറുപടി കൊടു​ക്ക​ണ​മെന്നു നിങ്ങൾ അറിഞ്ഞി​രി​ക്കും.” (കൊലോ. 4:6) ആളുക​ളോ​ടു സഹാനു​ഭൂ​തി ഉണ്ടെങ്കിൽ, ആളുക​ളു​ടെ ആവശ്യങ്ങൾ മനസ്സി​ലാ​ക്കാൻ ശ്രമി​ക്കു​ന്നെ​ങ്കിൽ അവർ എങ്ങനെ ഇടപെ​ട്ടാ​ലും നമ്മൾ അവരെ സഹായി​ക്കാൻ ശ്രമി​ക്കും. അങ്ങനെ നല്ല അധ്യാ​പ​ക​രാ​കാ​നും നമുക്കു കഴി​ഞ്ഞേ​ക്കും.

ദൈവ​വ​ചനം ഉപയോ​ഗി​ക്കു​ക

7. ആളുകളെ പഠിപ്പി​ച്ച​പ്പോൾ താൻ ദൈവ​വ​ച​ന​ത്തി​ലാണ്‌ ആശ്രയി​ക്കു​ന്ന​തെന്ന്‌ യേശു എങ്ങനെ​യാണ്‌ കാണി​ച്ചത്‌? (യോഹ​ന്നാൻ 7:14-16)

⁷ യേശു സ്വന്തം ജ്ഞാനത്തിൽ ആശ്രയി​ക്കു​ന്ന​തി​നു പകരം ദൈവ​വ​ച​ന​ത്തിൽനി​ന്നാണ്‌ പഠിപ്പി​ച്ചത്‌. ആ വിവരങ്ങൾ ആളുക​ളു​ടെ ജീവി​ത​ത്തിൽ എങ്ങനെ​യാണ്‌ പ്രയോ​ജനം ചെയ്യു​ന്ന​തെന്നു ലളിത​മാ​യി, ഓർത്തി​രി​ക്കാൻ പറ്റുന്ന രീതി​യിൽ വിശദീ​ക​രിച്ച്‌ കൊടു​ത്തു. “ശാസ്‌ത്രി​മാ​രെ​പ്പോ​ലെയല്ല, അധികാ​ര​മു​ള്ള​വ​നാ​യി​ട്ടാ​ണു യേശു പഠിപ്പി​ച്ചത്‌”എന്ന്‌ ബൈബിൾ പറയുന്നു. ആളുകൾ അതുകണ്ട്‌ “അതിശ​യി​ച്ചു​പോ​യി.” (മർക്കോ. 1:22; “ശാസ്‌ത്രി​മാ​രെ​പ്പോ​ലെയല്ല” എന്ന പഠനക്കു​റിപ്പ്‌ കാണുക.) അക്കാലത്തെ ശാസ്‌ത്രി​മാർ ആദരണീ​യ​രായ റബ്ബിമാ​രു​ടെ വാക്കുകൾ ഉദ്ധരി​ച്ചു​കൊ​ണ്ടാണ്‌ പഠിപ്പി​ച്ചി​രു​ന്നത്‌. എന്നാൽ യേശു ദൈവ​വ​ച​ന​ത്തിൽനി​ന്നാണ്‌ ഉദ്ധരി​ച്ചത്‌. മുമ്പ്‌ സ്വർഗ​ത്തിൽ ജീവി​ച്ചി​രുന്ന ദൈവ​പു​ത്രൻ എന്ന നിലയിൽ യേശു​വിന്‌ അപാര​മായ ജ്ഞാനം ഉണ്ടായി​രു​ന്നു. അതെല്ലാം ഉപയോ​ഗി​ച്ചു​കൊണ്ട്‌ ആളുകളെ അമ്പരപ്പി​ക്കാ​നോ തങ്ങൾ തീരെ അറിവി​ല്ലാ​ത്ത​വ​രാ​ണെന്ന തോന്നൽ അവരിൽ ഉണ്ടാക്കാ​നോ യേശു​വി​നു കഴിയു​മാ​യി​രു​ന്നു. എന്നാൽ അതിനു പകരം യേശു ദൈവ​ത്തി​ന്റെ ഇഷ്ടത്തെ​യും ദൈവ​വ​ച​ന​ത്തെ​യും കേന്ദ്രീ​ക​രി​ച്ചാണ്‌ പഠിപ്പി​ച്ചത്‌. (യോഹ​ന്നാൻ 7:14-16 വായി​ക്കുക.) തന്റെ അനുഗാ​മി​കൾ മറ്റുള്ള​വരെ എങ്ങനെ പഠിപ്പി​ക്കണം എന്ന കാര്യ​ത്തിൽ യേശു ഏറ്റവും നല്ല മാതൃക വെച്ചു.

8. പത്രോസ്‌ എങ്ങനെ​യാണ്‌ യേശു​വി​ന്റെ മാതൃക അനുക​രി​ച്ചത്‌?

⁸ യേശു​വി​ന്റെ ശിഷ്യ​ന്മാ​രും ആളുകളെ പഠിപ്പി​ച്ച​പ്പോൾ ദൈവ​വ​ച​ന​ത്തിൽ ആശ്രയി​ച്ചു. ഉദാഹ​ര​ണ​ത്തിന്‌, എ.ഡി. 33-ലെ പെന്തി​ക്കോ​സ്‌ത്‌ ദിവസം പത്രോസ്‌ അപ്പോ​സ്‌തലൻ നടത്തിയ പ്രസം​ഗ​ത്തെ​ക്കു​റിച്ച്‌ ചിന്തി​ക്കുക. പത്രോസ്‌ അത്ര വലിയ വിദ്യാ​ഭ്യാ​സ​മുള്ള ആളൊ​ന്നു​മാ​യി​രു​ന്നില്ല. എന്നിട്ടും യേശു​വിൽ നിറ​വേ​റിയ പ്രവച​നങ്ങൾ അദ്ദേഹം തിരു​വെ​ഴു​ത്തു​കൾ ഉപയോ​ഗിച്ച്‌ വിശദീ​ക​രി​ച്ച​പ്പോൾ അത്‌ ആളുക​ളു​ടെ ഹൃദയത്തെ സ്‌പർശി​ച്ചു. (പ്രവൃ. 2:14-37) എന്തായി​രു​ന്നു ഫലം? “പത്രോ​സി​ന്റെ ഉപദേശം സന്തോ​ഷ​ത്തോ​ടെ സ്വീക​രി​ച്ചവർ സ്‌നാ​ന​മേറ്റു. അന്ന്‌ ഏകദേശം 3,000 പേർ അവരോ​ടൊ​പ്പം ചേർന്നു.”—പ്രവൃ. 2:41.

9. മറ്റുള്ള​വരെ പഠിപ്പി​ക്കു​മ്പോൾ ദൈവ​വ​ചനം ഉപയോ​ഗി​ക്കേ​ണ്ടത്‌ എന്തു​കൊണ്ട്‌?

⁹ നമ്മുടെ കേൾവി​ക്കാ​രു​ടെ ഹൃദയത്തെ സ്വാധീ​നി​ക്കാൻ ദൈവ​വ​ച​ന​ത്തോ​ളം ശക്തിയുള്ള മറ്റൊ​ന്നു​മില്ല. (എബ്രാ. 4:12) അതു​കൊണ്ട്‌ ആളുകളെ പഠിപ്പി​ക്കു​മ്പോൾ നമ്മൾ ബൈബിൾ ഉപയോ​ഗി​ക്കണം. നമ്മൾ സ്വന്തം ആശയങ്ങളല്ല ‘ദൈവ​വ​ച​ന​മാണ്‌ പ്രസം​ഗി​ക്കേ​ണ്ടത്‌.’ (2 തിമൊ. 4:2) സുഭാ​ഷി​തങ്ങൾ 2:6 പറയുന്നു: “യഹോ​വ​യാ​ണു ജ്ഞാനം നൽകു​ന്നത്‌; ദൈവ​ത്തി​ന്റെ വായിൽനി​ന്നാണ്‌ അറിവും വകതി​രി​വും വരുന്നത്‌.” അതു​കൊണ്ട്‌ നമ്മൾ ദൈവ​വ​ച​ന​ത്തിൽനിന്ന്‌ പഠിപ്പി​ക്കു​മ്പോൾ ഒരർഥ​ത്തിൽ യഹോ​വയെ സംസാ​രി​ക്കാൻ അനുവ​ദി​ക്കു​ക​യാണ്‌. (മലാ. 2:7) മനുഷ്യർ നൽകുന്ന ഏതൊരു ഉപദേ​ശ​ത്തെ​ക്കാ​ളും വളരെ മികച്ച​താണ്‌ ദൈവ​വ​ച​ന​ത്തി​ലെ ഉപദേ​ശ​ങ്ങ​ളെന്ന്‌ ആളുകൾ അറി​യേ​ണ്ട​തുണ്ട്‌. കാരണം അതിലെ വാക്കുകൾ ദൈവ​പ്ര​ചോ​ദി​ത​മാണ്‌. സ്രഷ്ടാ​വി​നെ സന്തോ​ഷി​പ്പി​ക്കാ​നും നമുക്കു​തന്നെ സന്തോ​ഷ​വും സംതൃ​പ്‌തി​യും ഉള്ള ജീവിതം ഉണ്ടായി​രി​ക്കാ​നും സഹായി​ക്കുന്ന അറിവു​കൾ അതിലുണ്ട്‌.—2 തിമൊ. 3:16, 17.

10. ബൈബിൾവി​ദ്യാർഥി​യു​ടെ ശ്രദ്ധ ദൈവ​വ​ച​ന​ത്തി​ലേക്കു കൊണ്ടു​വ​രാൻ നമുക്ക്‌ എങ്ങനെ കഴിയും?

¹⁰ ഒരു ബൈബിൾപ​ഠ​ന​ത്തി​നു തയ്യാറാ​കു​മ്പോൾ വിദ്യാർഥി​യു​ടെ ശ്രദ്ധ ബൈബി​ളി​ലേക്കു കൊണ്ടു​പോ​കാൻ എന്തു ചെയ്യാ​നാ​കു​മെന്നു ചിന്തി​ക്കുക. നമ്മൾ ചിത്ര​ങ്ങ​ളും വീഡി​യോ​ക​ളും ഒക്കെ ഉപയോ​ഗി​ക്കു​മെ​ങ്കി​ലും ബൈബി​ളാണ്‌ പ്രധാന പാഠപു​സ്‌തകം എന്നു വിദ്യാർഥി​ക്കു മനസ്സി​ലാ​കണം. അതു​കൊണ്ട്‌ പ്രധാ​ന​പ്പെട്ട ബൈബിൾവാ​ക്യ​ങ്ങൾ വായി​ക്കു​ക​യും അതെക്കു​റിച്ച്‌ ചിന്തി​ക്കാൻ വിദ്യാർഥി​യെ സഹായി​ക്കു​ക​യും ചെയ്യുക. ചിത്ര​ങ്ങ​ളോ വീഡി​യോ​ക​ളോ ഉപയോ​ഗി​ക്കു​മ്പോൾത്തന്നെ അതിലെ അടിസ്ഥാന ബൈബിൾത​ത്ത്വ​ങ്ങൾ വിദ്യാർഥി​ക്കു മനസ്സി​ലാ​കു​ന്നു​ണ്ടെന്ന്‌ ഉറപ്പു​വ​രു​ത്തണം. അതിനർഥം നിങ്ങൾ ഒരുപാട്‌ സംസാ​രി​ക്കു​ക​യോ പാഠത്തി​ലെ എല്ലാ വാക്യ​ങ്ങ​ളും വായി​ക്കു​ക​യോ ചെയ്യണ​മെന്നല്ല. പകരം വായി​ക്കുന്ന വാക്യ​ത്തി​ലെ ആശയം നന്നായി മനസ്സി​ലാ​ക്കാൻ വിദ്യാർഥി​ക്കു സമയം കൊടു​ക്കുക. ചില​പ്പോൾ അത്‌ ഒന്നുകൂ​ടെ വായി​ക്കേ​ണ്ടി​വ​ന്നേ​ക്കാം. ഇങ്ങനെ​യെ​ല്ലാം ചെയ്യു​മ്പോൾ നിങ്ങൾ നടത്തു​ന്നത്‌ ഒരു പുസ്‌ത​ക​ത്തി​ന്റെ പഠനമോ ചിത്ര​ത്തി​ന്റെ പഠനമോ വീഡി​യോ​യു​ടെ പഠനമോ ആയിരി​ക്കില്ല, പകരം ഒരു ബൈബിൾപ​ഠനം ആയിരി​ക്കും.—1 കൊരി. 2:13.

11-12. (എ) ബൈബിൾവി​ദ്യാർഥി​ക​ളു​ടെ കാര്യ​ത്തിൽ നമുക്ക്‌ എങ്ങനെ ക്ഷമ കാണി​ക്കാം? (പ്രവൃ​ത്തി​കൾ 17:1-4) (ചിത്ര​വും കാണുക.) (ബി) ചിലർക്കു ബൈബി​ളി​നെ​ക്കു​റിച്ച്‌ എന്ത്‌ അറിയില്ല, നമുക്ക്‌ എങ്ങനെ അവരെ സഹായി​ക്കാ​നാ​യേ​ക്കും?

¹¹ വിദ്യാർഥി​ക്കു ചില പോയി​ന്റു​കൾ മനസ്സി​ലാ​ക്കാൻ ബുദ്ധി​മുട്ട്‌ തോന്നുന്ന സമയത്ത്‌, നമ്മൾ ‘ദൈവ​വ​ചനം പ്രസം​ഗി​ക്കു​ന്നത്‌ അങ്ങേയറ്റം ക്ഷമയോ​ടെ’ ആയിരി​ക്കണം എന്ന കാര്യം ഓർക്കാം. എല്ലാവ​രും ഒരേ വേഗത​യിൽ പുരോ​ഗ​മി​ക്ക​ണ​മെ​ന്നില്ല. മനസ്സി​ലാ​ക്കാൻ വളരെ എളുപ്പ​മാ​ണെന്നു നമുക്കു തോന്നുന്ന ചില സത്യങ്ങൾ ഉൾക്കൊ​ള്ളാൻ ചിലർക്കു കുറച്ചു​കൂ​ടി സമയ​മെ​ടു​ത്തേ​ക്കാം. പൗലോസ്‌ തെസ്സ​ലോ​നി​ക്യ​യി​ലെ ജൂതന്മാ​രോ​ടു പല തവണ തിരു​വെ​ഴു​ത്തു​ക​ളിൽനിന്ന്‌ ന്യായ​വാ​ദം ചെയ്‌ത​ശേ​ഷ​മാണ്‌ ചിലർക്കു കാര്യം പിടി​കി​ട്ടി​യത്‌.—പ്രവൃ​ത്തി​കൾ 17:1-4 വായി​ക്കുക.

¹² ക്ഷമ കാണി​ക്കാ​നാ​കുന്ന മറ്റൊരു വിധം, ചോദ്യ​ങ്ങൾ ചോദി​ച്ചു​കൊണ്ട്‌ ഉള്ളിലു​ള്ളതു പറയാൻ വിദ്യാർഥി​യെ അനുവ​ദി​ക്കു​ന്ന​താണ്‌. നമ്മൾ അധികം സംസാ​രി​ക്കാ​തെ, അവർ പറയു​ന്നതു ശ്രദ്ധി​ച്ചു​കേൾക്കു​ക​യും അവരുടെ ചിന്തകൾ മനസ്സി​ലാ​ക്കാൻ ശ്രമി​ക്കു​ക​യും വേണം. എന്നിട്ട്‌ അതെക്കു​റിച്ച്‌ ദൈവ​ത്തി​ന്റെ ചിന്ത തിരി​ച്ച​റി​യാൻ സഹായി​ക്കുന്ന തിരു​വെ​ഴു​ത്തു​കൾ വായിച്ച്‌ ചർച്ച ചെയ്യുക. ഇനി ചിലർക്ക്‌ ബൈബിൾ തീരെ പരിച​യ​മു​ണ്ടാ​കില്ല. അതിൽ എന്താണ്‌ ഉള്ളതെ​ന്നും അവർക്ക്‌ അറിയി​ല്ലാ​യി​രി​ക്കും. അങ്ങനെ​യു​ള്ള​വരെ അച്ചടിച്ച ബൈബി​ളി​ന്റെ ഒരു കോപ്പി കാണി​ക്കു​ന്നതു നല്ലതാ​യി​രി​ക്കു​മോ? അതു​പോ​ലെ, പുതിയ ലോക ഭാഷാ​ന്ത​ര​ത്തി​ന്റെ തുടക്ക​ത്തി​ലുള്ള “ദൈവ​വ​ച​ന​ത്തിന്‌ ഒരു ആമുഖം” എന്ന ഭാഗം ഉപയോ​ഗി​ച്ചു​കൊണ്ട്‌ ബൈബി​ളിൽ എന്തുമാ​ത്രം വിവര​ങ്ങ​ളാ​ണു​ള്ള​തെ​ന്നും കാണി​ച്ചു​കൊ​ടു​ക്കാ​നാ​കും. ബൈബിൾ എങ്ങനെ​യാണ്‌ അവരുടെ ജീവി​ത​ത്തിൽ പ്രയോ​ജനം ചെയ്യു​ന്ന​തെ​ന്നും അവർക്ക്‌ സന്തോഷം കൊടു​ക്കു​ന്ന​തെ​ന്നും വ്യക്തമാ​ക്കി​ക്കൊ​ടു​ക്കാൻ നിങ്ങൾക്കു ചില​പ്പോൾ അതിലെ 15-ാം ചോദ്യ​ത്തി​നു കീഴി​ലുള്ള ഒന്നോ രണ്ടോ വാക്യങ്ങൾ ഉപയോ​ഗി​ക്കാ​നാ​യേ​ക്കും. ചുരു​ക്ക​ത്തിൽ, ബൈബിൾവി​ദ്യാർഥി​കൾക്കു ദൈവ​വ​ച​ന​ത്തി​ന്റെ ശക്തി കാണി​ച്ചു​കൊ​ടു​ക്കു​ന്നെ​ങ്കിൽ നിങ്ങളു​ടെ പഠിപ്പി​ക്കൽരീ​തി കൂടുതൽ ഫലപ്ര​ദ​മാ​കും.

യഹോ​വ​യി​ലേക്ക്‌ ശ്രദ്ധ ക്ഷണിക്കുക

13. പഠിപ്പി​ക്കു​മ്പോൾ നമ്മൾ ആരി​ലേ​ക്കാണ്‌ ശ്രദ്ധ ക്ഷണി​ക്കേ​ണ്ടത്‌, ഒരു ഉദാഹ​രണം പറയുക.

¹³ യഹോ​വയെ അറിയാ​നും യഹോ​വ​യോ​ടു കൂടുതൽ അടുക്കാ​നും കേൾവി​ക്കാ​രെ സഹായി​ക്കുക എന്നതാണു നമ്മുടെ ലക്ഷ്യം. (യാക്കോ. 4:8) അതു മനസ്സി​ലാ​ക്കാൻ ഒരു ഉദാഹ​രണം നോക്കാം. ഒരാളെ ഇരുട്ടത്ത്‌ ഒരു വസ്‌തു കാണി​ച്ചു​കൊ​ടു​ക്കാൻ ടോർച്ച്‌ ഉപയോ​ഗി​ക്കു​മ്പോൾ നമ്മൾ വെട്ടം അടിക്കു​ന്നത്‌ ആ വസ്‌തു​വി​ലേ​ക്കാ​യി​രി​ക്കും, അല്ലാതെ നമ്മളി​ലേക്ക്‌ ആയിരി​ക്കില്ല. ഇതു​പോ​ലെ, നമ്മൾ മറ്റുള്ള​വരെ പഠിപ്പി​ക്കു​മ്പോൾ നമ്മളി​ലേക്കല്ല യഹോ​വ​യി​ലേ​ക്കാണ്‌ അവരുടെ ശ്രദ്ധ തിരി​ക്കേ​ണ്ടത്‌.

14. യഹോ​വ​യെ​ക്കു​റിച്ച്‌ കൂടുതൽ ചിന്തി​ക്കാൻ വിദ്യാർഥി​യെ നമുക്ക്‌ എങ്ങനെ സഹായി​ക്കാം?

¹⁴ ബൈബിൾപ​ഠ​ന​ത്തി​ന്റെ സമയത്ത്‌ യഹോ​വയെ സന്തോ​ഷി​പ്പി​ക്കാ​നുള്ള ആഗ്രഹം വിദ്യാർഥി​യു​ടെ ഉള്ളിൽ വളർത്താൻ ശ്രമി​ക്കുക. (സുഭാ. 27:11) ഒരു യഹോ​വ​യു​ടെ സാക്ഷി​യാ​കാൻ എന്തൊക്കെ മാറ്റങ്ങൾ വരുത്ത​ണ​മെന്നു വിദ്യാർഥി​ക്കു വെറുതേ പറഞ്ഞു​കൊ​ടു​ക്കാ​നല്ല നമ്മൾ ശ്രമി​ക്കു​ന്നത്‌. പകരം അവർ യഹോ​വയെ സന്തോ​ഷി​പ്പി​ക്കു​ന്ന​തി​നു​വേണ്ടി മാറ്റങ്ങൾ വരുത്താ​നാണ്‌ നമ്മൾ ആഗ്രഹി​ക്കു​ന്നത്‌. ഉദാഹ​ര​ണ​ത്തിന്‌, ഒരു മോശം ശീലം മറിക​ട​ക്കാൻ ബൈബിൾവി​ദ്യാർഥി ബുദ്ധി​മു​ട്ടു​ന്നെന്നു വിചാ​രി​ക്കുക. അദ്ദേഹ​ത്തോട്‌ ഇങ്ങനെ​യൊ​ക്കെ ചോദി​ക്കാ​നാ​കും: “യഹോവ എന്തു​കൊ​ണ്ടാണ്‌ ഈ ശീലം വെറു​ക്കു​ന്നത്‌? നിങ്ങൾക്ക്‌ ഒരുപാട്‌ ഇഷ്ടമുള്ള ഒരു കാര്യം വേണ്ടെ​ന്നു​വെ​ക്കാൻ യഹോവ പറയു​ന്നത്‌ എന്തു​കൊ​ണ്ടാ​യി​രി​ക്കും? ദൈവം ആവശ്യ​പ്പെ​ടുന്ന ഈ കാര്യം ദൈവം നിങ്ങളെ സ്‌നേ​ഹി​ക്കു​ന്നു​ണ്ടെന്നു കാണി​ക്കു​ന്നത്‌ എങ്ങനെ​യാണ്‌?” ഇങ്ങനെ യഹോ​വ​യെ​ക്കു​റിച്ച്‌ കൂടുതൽ ചിന്തി​ക്കാൻ വിദ്യാർഥി​യെ സഹായി​ക്കു​മ്പോൾ യഹോവ എത്ര സ്‌നേ​ഹ​വാ​നായ ഒരു പിതാ​വാ​ണെന്ന്‌ അദ്ദേഹ​ത്തിന്‌ കൂടുതൽ മനസ്സി​ലാ​കും. അത്‌ യഹോ​വയെ സന്തോ​ഷി​പ്പി​ക്കാ​നുള്ള ആഗ്രഹം വിദ്യാർഥി​യിൽ വളർത്തും.

വിദഗ്‌ധ​മാ​യി പഠിപ്പി​ക്കു​ന്ന​തിൽ തുടർന്നും മെച്ച​പ്പെ​ടു​ക

15. വിദഗ്‌ധ​മാ​യി പഠിപ്പി​ക്കു​ന്ന​തിൽ തുടർന്നും മെച്ച​പ്പെ​ടാൻ നിങ്ങൾക്ക്‌ എന്ത്‌ ചെയ്യാ​നാ​കും?

¹⁵ പഠിപ്പി​ക്കുന്ന കാര്യ​ത്തിൽ എവി​ടെ​യാണ്‌ പുരോ​ഗ​മി​ക്കേ​ണ്ട​തെന്നു മനസ്സി​ലാ​ക്കാൻ സഹായി​ക്ക​ണേ​യെന്ന്‌ നിങ്ങൾക്ക്‌ പ്രാർഥി​ക്കാ​നാ​കും. (1 യോഹ. 5:14) മീറ്റി​ങ്ങു​ക​ളി​ലൂ​ടെ യഹോവ നൽകുന്ന പരിശീ​ലനം നന്നായി പ്രയോ​ജ​ന​പ്പെ​ടു​ത്തി​ക്കൊണ്ട്‌ ആ പ്രാർഥ​ന​യ്‌ക്കു ചേർച്ച​യിൽ പ്രവർത്തി​ക്കു​ക​യും ചെയ്യാം. അതു​പോ​ലെ ബൈബിൾപ​ഠ​ന​ത്തിന്‌ നല്ല അധ്യാ​പ​ക​രായ ചില സഹോ​ദ​ര​ങ്ങളെ കൂടെ കൂട്ടാ​നാ​കും. എന്നിട്ട്‌ നിങ്ങൾ എവി​ടെ​യാണ്‌ മെച്ച​പ്പെ​ടേ​ണ്ട​തെന്ന്‌ അവരോ​ടു ചോദി​ക്കാം. ഇനി, പാഠഭാ​ഗം നിങ്ങൾക്കു നല്ല പരിച​യ​മു​ണ്ടെ​ങ്കി​ലും വിദ്യാർഥിക്ക്‌ അത്‌ അങ്ങനെയല്ല എന്ന കാര്യ​വും ഓർക്കണം. പഠിക്കുന്ന ഭാഗം വിദ്യാർഥി​യു​ടെ കണ്ണിലൂ​ടെ കാണാൻ ശ്രമി​ക്കുക. എന്നിട്ട്‌ നമ്മുടെ സന്ദേശം ശരിക്കും ഒരു സന്തോ​ഷ​വാർത്ത​യാ​ണെന്ന്‌ തിരി​ച്ച​റി​യാൻ അവരെ സഹായി​ക്കുക. അത്‌ യഹോ​വ​യു​ടെ ഒരു അടുത്ത സുഹൃ​ത്താ​കാ​നും യഥാർഥ​സ​ന്തോ​ഷം കണ്ടെത്താ​നും വിദ്യാർഥി​യെ പ്രേരി​പ്പി​ക്കും.—സങ്കീ. 1:1-3.

16. വിദഗ്‌ധ​മാ​യി പഠിപ്പി​ക്കാ​നുള്ള പ്രാപ്‌തി മെച്ച​പ്പെ​ടു​ത്തു​ന്നത്‌ നമുക്ക്‌ എങ്ങനെ പ്രയോ​ജനം ചെയ്യും?

¹⁶ യഹോ​വ​യെ​ക്കു​റിച്ച്‌ മറ്റുള്ള​വരെ പഠിപ്പി​ക്കു​മ്പോൾ കിട്ടുന്ന സന്തോഷം വാക്കു​കൾകൊണ്ട്‌ വർണി​ക്കാ​നാ​കില്ല. പഠിപ്പി​ക്കാ​നുള്ള ഈ പ്രാപ്‌തി പുതിയ ലോക​ത്തിൽ കൂടുതൽ ആവശ്യം വരും. അതു​കൊണ്ട്‌ സന്തോ​ഷ​വാർത്ത പ്രസം​ഗി​ക്കു​മ്പോൾ നമുക്കു തുടർന്നും ആളുക​ളു​ടെ കാര്യ​ത്തിൽ താത്‌പ​ര്യം കാണി​ക്കു​ക​യും ദൈവ​വ​ചനം ഉപയോ​ഗി​ക്കു​ക​യും ആളുക​ളു​ടെ ശ്രദ്ധ യഹോ​വ​യി​ലേക്കു കൊണ്ടു​പോ​കു​ക​യും ചെയ്യാം. അങ്ങനെ ശുശ്രൂ​ഷ​യിൽ വിദഗ്‌ധ​മാ​യി പഠിപ്പി​ക്കാ​നുള്ള പ്രാപ്‌തി മെച്ച​പ്പെ​ടു​ത്താം.