34 ഹിസ്കിയ
“യഹോവയോടു പറ്റിനിന്നു”
യഹോവയെ ഒരുപാടു സ്നേഹിച്ച ചുരുക്കം ചില യഹൂദാരാജാക്കന്മാരിൽ ഒരാളായിരുന്നു ഹിസ്കിയ. എന്നാൽ അദ്ദേഹത്തിന്റെ അപ്പനായ ആഹാസ് ഒരു ദുഷ്ടരാജാവായിരുന്നു. അയാൾ വ്യാജദൈവങ്ങളെ ആരാധിക്കുകയും അങ്ങനെ ചെയ്യാൻ ജനത്തെ പ്രേരിപ്പിക്കുകയും ചെയ്തു. കൂടാതെ ക്രൂരരായ ആ ദൈവങ്ങൾക്ക് തന്റെ ആൺമക്കളിൽ ഒരാളെയെങ്കിലും ബലിയർപ്പിച്ചിട്ടുമുണ്ട്. (2 രാജാ. 16:2-4; 2 ദിന. 28:1, 3) അതുകൊണ്ടുതന്നെ ഹിസ്കിയയുടെ ബാല്യകാലം അങ്ങേയറ്റം പേടിപ്പെടുത്തുന്നതും സങ്കടകരവും ആയിരുന്നിരിക്കണം. എങ്കിലും മുതിർന്നുവന്നപ്പോൾ അദ്ദേഹം അപ്പന്റെ മോശം മാതൃക പിന്തുടർന്നില്ല. ആഹാസ് മരിച്ചപ്പോൾ ഹിസ്കിയ രാജാവായി. 25 വയസ്സുണ്ടായിരുന്ന അദ്ദേഹം സത്യാരാധന പുനഃസ്ഥാപിക്കാനായി ധൈര്യത്തോടെ നടപടികൾ സ്വീകരിച്ചു.
ഹിസ്കിയ യഹോവയുടെ ആലയം വീണ്ടും തുറന്ന് അതിന്റെ കേടുപാടുകൾ മാറ്റി. അദ്ദേഹം അവിടെയുണ്ടായിരുന്ന വിഗ്രഹങ്ങളെല്ലാം നീക്കിക്കളഞ്ഞു. യഹോവയുടെ സേവനത്തിലെ തങ്ങളുടെ ഉത്തരവാദിത്വങ്ങൾ വീണ്ടും ചെയ്യാൻ ലേവ്യരോടും പുരോഹിതന്മാരോടും ആവശ്യപ്പെടുകയും ചെയ്തു. എന്നിട്ട് യരുശലേമിൽ അദ്ദേഹം വലിയ തോതിൽ പെസഹ ആചരിക്കാനുള്ള ക്രമീകരണങ്ങൾ ചെയ്തു. അതിനുവേണ്ടി പത്തു-ഗോത്ര വടക്കേ രാജ്യമായ ഇസ്രായേലിൽ ഉള്ളവരെപ്പോലും ക്ഷണിക്കുന്നതിന് അവിടേക്കു സന്ദേശവാഹകരെ അയച്ചു. ചിലർ ആ സന്ദേശവാഹകരെ പരിഹസിച്ചെങ്കിലും മറ്റു ചിലർ വരാൻ തയ്യാറായി. ഹിസ്കിയയുടെ ആ നല്ല മാതൃക, ഇസ്രായേലിലും യഹൂദയിലും ഉള്ളവർക്കു തങ്ങൾ ആരാധിച്ചിരുന്ന വിഗ്രഹങ്ങളും വ്യാജാരാധനയ്ക്കുള്ള ഉയർന്ന സ്ഥലങ്ങളും നശിപ്പിക്കാൻ വേണ്ട ധൈര്യം നൽകി. അതുപോലെ 700 വർഷം മുമ്പ് യഹോവ പറഞ്ഞിട്ട് മോശ ഉണ്ടാക്കിയ താമ്രസർപ്പത്തെയും അവർ നശിപ്പിച്ചുകളഞ്ഞു. കാരണം ഇസ്രായേല്യർ അതിനെയും ആരാധിച്ചുതുടങ്ങിയിരുന്നു.
കുറെ വർഷങ്ങളായി, പേടിപ്പെടുത്തുന്ന എന്തോ സംഭവിക്കാൻപോകുന്നതായി ഹിസ്കിയയ്ക്കു തോന്നുന്നുണ്ടായിരുന്നു. കാരണം യഹോവ അതെക്കുറിച്ച് നേരത്തേതന്നെ അവർക്കു മുന്നറിയിപ്പു കൊടുത്തിരുന്നു. അതുതന്നെയാണു സംഭവിച്ചതും. ഹിസ്കിയ ഭരണം തുടങ്ങി കുറച്ച് വർഷങ്ങൾ കഴിഞ്ഞപ്പോൾ അസീറിയക്കാർ വടക്കേ രാജ്യത്തെ ആക്രമിക്കുകയും അവിടെയുള്ള മിക്കവരെയും ബന്ദികളായി പിടിച്ചുകൊണ്ടുപോകുകയും ചെയ്തു. അടുത്തത് യഹൂദയായിരിക്കുമോ എന്നു ഹിസ്കിയ ഭയന്നിട്ടുണ്ടാകണം. കാരണം ഇസ്രായേലിൽ ഉള്ളവരെപ്പോലെതന്നെ അവിശ്വസ്തരായിരുന്നു യഹൂദയിൽ ഉള്ളവരും, ശരിക്കും പറഞ്ഞാൽ അവരെക്കാൾ മോശം. യഹോവ തന്റെ പ്രവാചകന്മാരെ ഉപയോഗിച്ച് യഹൂദയ്ക്കും മുന്നറിയിപ്പുകൾ കൊടുത്തിരുന്നു. യഹോവ പറയുന്നതൊന്നും ഒരിക്കലും നടക്കാതെ പോകില്ലല്ലോ. അതുകൊണ്ട് അസീറിയക്കാർ ഇപ്പോൾ യഹൂദയെ ആക്രമിക്കാനായി വരുന്നതു കണ്ടപ്പോൾ ഹിസ്കിയയ്ക്കു ഭയം തോന്നിയതിൽ അതിശയമില്ല.
വൈകാതെ അസീറിയൻ രാജാവായ സൻഹെരീബും സൈന്യവും യഹൂദയെ ആക്രമിക്കാനായി വന്നു. ഹിസ്കിയയുടെ ഭരണത്തിൻകീഴിലുള്ള നഗരങ്ങൾ ഓരോന്നായി അയാൾ പിടിച്ചെടുത്തു. സാധ്യതയനുസരിച്ച് ഏതാണ്ട് ഈ സമയത്താണു ഹിസ്കിയയ്ക്കു ഗുരുതരമായ രോഗം പിടിപെടുന്നത്. അദ്ദേഹം മരിച്ചുപോകുമെന്ന് ഉറപ്പായിരുന്നു. അങ്ങനെ സംഭവിച്ചാൽ അദ്ദേഹത്തിന് അതുവരെ ഒരു മകൻ ജനിച്ചിട്ടില്ലാത്തതുകൊണ്ട് ദാവീദിന്റെ രാജവംശം നിലനിറുത്താനാകുമായിരുന്നില്ല. അസുഖം മാറാനായി വിശ്വാസത്തോടെ അദ്ദേഹം യഹോവയോട് ഉള്ളുരുകി പ്രാർഥിച്ചു. യഹോവ ആ പ്രാർഥന കേട്ടു. ഹിസ്കിയയുടെ ആയുസ്സ് 15 വർഷംകൂടി നീട്ടിക്കൊടുത്തുകൊണ്ട് യഹോവ അദ്ദേഹത്തോടു സ്നേഹം കാണിച്ചു. എങ്കിലും അസീറിയക്കാരുടെ ഭീഷണി അപ്പോഴും മുന്നിലുണ്ടായിരുന്നു.
യഹോവയുടെ വിശുദ്ധനഗരമായ യരുശലേമിനെ സംരക്ഷിക്കാൻ ഹിസ്കിയ പരമാവധി ശ്രമിച്ചു. അതിനുവേണ്ടി സൻഹെരീബ് ആവശ്യപ്പെട്ട പണം മുഴുവനും ഹിസ്കിയ കൊടുത്തു. ആ വലിയ തുക കിട്ടിയെങ്കിലും നഗരത്തെ ആക്രമിക്കാനുള്ള തന്റെ പദ്ധതി ഉപേക്ഷിക്കാൻ സൻഹെരീബ് തയ്യാറായില്ല. അതേസമയം ഒരു ആക്രമണമുണ്ടായാലും നഗരത്തെ സംരക്ഷിക്കാൻ ഹിസ്കിയ ഒരു പുതിയ മതിൽ പണിതു. ശത്രുക്കൾ നഗരം വളഞ്ഞാലും ആവശ്യമായ വെള്ളം ലഭിക്കുന്നതിന് ഒരു കനാലും ഉണ്ടാക്കി. അതുപോലെ, ശത്രുസൈന്യം എത്ര വലുതാണെങ്കിലും അവരെക്കാളെല്ലാം ശക്തനാണ് യഹോവയെന്ന് ഓർമിപ്പിച്ചുകൊണ്ട് അദ്ദേഹം ജനത്തെ ധൈര്യപ്പെടുത്തുകയും ചെയ്തു.
ശക്തരായ ശത്രുക്കൾ യരുശലേമിലുള്ളവരെ ഭയപ്പെടുത്താൻ ശ്രമിച്ചപ്പോൾ ഹിസ്കിയ അവരെ ബലപ്പെടുത്തി
ഇതൊക്കെ കണ്ടപ്പോൾ സൻഹെരീബിന്റെ കോപം ആളിക്കത്തി. ജനത്തിന്റെ ധൈര്യം കെടുത്തിക്കളയാനായി അയാൾ തന്റെ ഒരു ഉയർന്ന ഉദ്യോഗസ്ഥനെ, അതായത് റബ്ശാക്കെയെ, അവരുടെ അടുത്തേക്ക് അയച്ചു. അയാൾ രാജാവിനെയും അവരുടെ ദൈവമായ യഹോവയെയും നിന്ദിച്ചുകൊണ്ട് പലതും പറഞ്ഞു. എന്നാൽ ഹിസ്കിയ ധൈര്യത്തോടെ നിന്നു. അങ്ങനെതന്നെ തുടരാൻ ജനത്തെ പ്രോത്സാഹിപ്പിക്കുകയും ചെയ്തു. അടുത്തതായി ഹിസ്കിയയുടെ ധൈര്യം ചോർത്തിക്കളയാൻ, ഭീഷണിപ്പെടുത്തിക്കൊണ്ടുള്ള ചില കത്തുകൾ സൻഹെരീബ് അദ്ദേഹത്തിന് അയച്ചു. ഹിസ്കിയ യഹോവയുടെ ആലയത്തിലേക്കു ചെന്ന് ആ കത്തുകൾ അവിടെ നിവർത്തിവെച്ചു. അങ്ങനെ ചെയ്തതിലൂടെ അദ്ദേഹം തന്റെ പ്രശ്നങ്ങളെല്ലാം യഹോവയുടെ മേൽ ഇടുകയായിരുന്നു. അതിനു മറുപടിയായി യഹോവ, യശയ്യ പ്രവാചകനിലൂടെ ഹിസ്കിയയെ ധൈര്യപ്പെടുത്തുന്ന ഒരു സന്ദേശം നൽകി. അതിൽ ഇങ്ങനെയൊരു ഉറപ്പുമുണ്ടായിരുന്നു: സൻഹെരീബ് യരുശലേമിലേക്കു വരില്ല. അയാളുടെ സൈന്യം ഒരു അമ്പുപോലും അവിടേക്ക് എയ്യില്ല.
ആ രാത്രിതന്നെ യഹോവ ഒരു ദൂതനെ അസീറിയക്കാരുടെ പാളയത്തിലേക്ക് അയച്ചു. ചുരുങ്ങിയ സമയംകൊണ്ട് ആ ഒരൊറ്റ ദൂതൻ സൻഹെരീബിന്റെ 1,85,000 വരുന്ന പടയാളികളെ കൊന്നുകളഞ്ഞു. പിറ്റേന്ന് ഉറക്കമുണർന്ന സൻഹെരീബ് കണ്ടത്, ചുറ്റും തന്റെ പടയാളികൾ മരിച്ചുകിടക്കുന്നതാണ്. അപ്പോൾ അയാൾക്കുണ്ടായ ഞെട്ടൽ ഒന്നു ഭാവനയിൽ കാണുക. അയാൾ നാണംകെട്ട് സ്വന്തം ദേശത്തേക്കു മടങ്ങിപ്പോയി. കുറച്ചുനാൾ കഴിഞ്ഞ് സൻഹെരീബ് അയാളുടെ ദൈവമായ നിസ്രോക്കിന്റെ ക്ഷേത്രത്തിൽ കുമ്പിടുമ്പോൾ സ്വന്തം മക്കൾതന്നെ അയാളെ കൊന്നുകളഞ്ഞു.
യഹോവ ഹിസ്കിയയ്ക്ക് എത്ര വലിയ വിജയമാണു കൊടുത്തത്! അസീറിയക്കാരുടെ ഭീഷണി അവസാനിച്ചു. ഹിസ്കിയയുടെ രോഗം മാറി. ഒരു മകനെങ്കിലും അദ്ദേഹത്തിനു ജനിക്കുകയും ചെയ്തു. പക്ഷേ കുറച്ച് കഴിഞ്ഞ് ഹിസ്കിയ അഹങ്കരിച്ചു. എന്നാൽ യഹോവ തിരുത്തിയപ്പോൾ അദ്ദേഹം താഴ്മയോടെ ആ തിരുത്തൽ സ്വീകരിച്ചു. അതുകൊണ്ട് ദൈവജനത്തെ ഭരിച്ച ഏറ്റവും നല്ല രാജാക്കന്മാരിൽ ഒരാളായിരുന്നു ഹിസ്കിയ എന്നു പറയാം. വലിയ പ്രശ്നങ്ങളിലൂടെ കടന്നുപോയപ്പോഴും അദ്ദേഹം അസാമാന്യധൈര്യം കാണിക്കുകയും മരണത്തോളം വിശ്വസ്തനായി തുടരുകയും ചെയ്തു.
ബൈബിൾവിവരണം വായിക്കുക:
ചർച്ച ചെയ്യാൻ:
ഹിസ്കിയ എങ്ങനെയെല്ലാമാണു ധൈര്യം കാണിച്ചത്?
ആഴത്തിൽ പഠിക്കാൻ
1. ഹിസ്കിയയെക്കുറിച്ച് ബൈബിളിൽ പറയുന്നതു സത്യമാണെന്നു തെളിയിക്കുന്ന എന്താണു പുരാവസ്തു ഗവേഷകർ കണ്ടെത്തിയിരിക്കുന്നത്? (w11 5/1 പേ. 15 ഖ. 1-3-wcgr) A
Zev Radovan/Alamy Stock Photo
ചിത്രം A: ബി.സി. എട്ടാം നൂറ്റാണ്ടിൽനിന്നുള്ള ഒരു കളിമൺമുദ്രയിൽ ഇങ്ങനെ എഴുതിയിരിക്കുന്നു: “ആഹാസിന്റെ മകനായ, യഹൂദാരാജാവായ ഹിസ്കിയയുടേത്”
2. ‘പറക്കുന്ന ഒരു തീനാഗ’ത്തെക്കുറിച്ചുള്ള യശയ്യയുടെ പ്രവചനം ഹിസ്കിയയിലൂടെ നിറവേറിയത് എങ്ങനെ? (യശ. 14:28, 29; ip-1 പേ. 190-191 ഖ. 4-6)
3. നിനെവെയിൽവെച്ച് ഗവേഷകർ കണ്ടെത്തിയ ഒരു വസ്തുവിൽ സൻഹെരീബ് തന്റെ നേട്ടങ്ങളെക്കുറിച്ച് രേഖപ്പെടുത്തിരിക്കുന്നതു കാണാം. അതിൽ അദ്ദേഹം എന്തെല്ലാം എഴുതിയിട്ടുണ്ട്? എന്തെല്ലാം ഒഴിവാക്കിയിട്ടുണ്ട്? അതു ശ്രദ്ധേയമായിരിക്കുന്നത് എന്തുകൊണ്ട്? (g 12/10 പേ. 27 ഖ. 3-5-wcgr) B
© The Trustees of the British Museum. Licensed under CC BY-NC-SA 4.0. Source
ചിത്രം B: സൻഹെരീബിന്റെ വിജയങ്ങൾ രേഖപ്പെടുത്തിയിട്ടുള്ള ടെയ്ലർ പ്രിസം
4. ഹിസ്കിയയുടെ തുരങ്കം ശരിക്കും ഹിസ്കിയയുടെ ഭരണകാലത്ത് പണിതതാണോ എന്നു കണ്ടെത്താൻ ഒരു കൂട്ടം ഗവേഷകർ 2003-ൽ ഒരു ശ്രമം നടത്തി. അവർ എന്തു നിഗമനത്തിലാണ് എത്തിയത്? (w09 5/1 പേ. 27 ഖ. 3-5-wcgr)
നമുക്കുള്ള പാഠങ്ങൾ
യഹോവയെ ആരാധിക്കാത്ത അച്ഛനോ അമ്മയോ ഉള്ള ഒരു ക്രിസ്ത്യാനിക്കു ഹിസ്കിയയുടെ മാതൃക ഒരു പ്രോത്സാഹനമായിരിക്കുന്നത് എങ്ങനെ? C
ചിത്രം C
യരുശലേമിനു നേരെ ഭീഷണി ഉയർന്നപ്പോൾ ഹിസ്കിയയുടെ ചിന്ത പ്രധാനമായും എന്തിനെക്കുറിച്ചായിരുന്നു? (2 രാജാ. 19:15-19) നമുക്ക് ഇന്ന് അദ്ദേഹത്തെ എങ്ങനെ അനുകരിക്കാം?
ഹിസ്കിയയുടെ ധൈര്യം നിങ്ങൾക്ക് എങ്ങനെ അനുകരിക്കാം?
വിശാലമായി ചിന്തിക്കാൻ
ഈ വിവരണം യഹോവയെക്കുറിച്ച് എന്നെ എന്താണു പഠിപ്പിക്കുന്നത്?
ഈ വിവരണം ഭൂമിയെയും മനുഷ്യരെയും കുറിച്ചുള്ള യഹോവയുടെ ഉദ്ദേശ്യങ്ങളുമായി എങ്ങനെ ബന്ധപ്പെട്ടിരിക്കുന്നു?
പുനരുത്ഥാനപ്പെട്ടുവരുന്ന ഹിസ്കിയയോട് എന്തു ചോദിക്കാനാണു ഞാൻ ആഗ്രഹിക്കുന്നത്?
കൂടുതൽ അറിയാൻ
2 രാജാക്കന്മാർ 19:14-36 വാക്യങ്ങളിൽ കാണുന്ന ആവേശംകൊള്ളിക്കുന്ന സംഭവങ്ങൾ ഈ വീഡിയോയിൽ കാണുക.
മീഖ 5:5-ൽ കാണുന്ന പ്രവചനം ഹിസ്കിയയുടെ നാളിൽ എങ്ങനെ നിറവേറി, ഇന്ന് അത് എങ്ങനെ നിറവേറുന്നു?
“ഏഴ് ഇടയന്മാരും എട്ട് പ്രഭുക്കന്മാരും, ഇന്ന് അവർ ആരാണ്?” (w13 11/15 പേ. 18-20 ഖ. 9-18)