ധൈര്യ​ത്തോ​ടെ തന്റെ കുടും​ബത്തെ സംരക്ഷി​ച്ചു

യാക്കോബ്‌ തന്റെ ജീവി​ത​കാ​ല​ത്തെ​ക്കു​റിച്ച്‌ അവസാ​ന​നാ​ളു​ക​ളിൽ പറഞ്ഞത്‌ അതു “ഹ്രസ്വ​വും കഷ്ടത നിറഞ്ഞ​തും ആയിരു​ന്നു” എന്നാണ്‌. (ഉൽപ. 47:9) അദ്ദേഹം പറഞ്ഞതു സത്യമാ​യി​രു​ന്നോ? തന്നെ കൊല്ലാൻ ആഗ്രഹിച്ച സഹോ​ദ​ര​നിൽനിന്ന്‌ രക്ഷപ്പെ​ടാ​നാ​യി അദ്ദേഹ​ത്തി​നു കുറെ​ക്കാ​ലം മുമ്പ്‌ ദൂരെ​യുള്ള ഹാരാ​നി​ലേക്ക്‌ ഓടി​പ്പോ​കേ​ണ്ടി​വന്നു. ഹാരാ​നിൽവെച്ച്‌ യാക്കോബ്‌ റാഹേ​ലു​മാ​യി പ്രണയ​ത്തി​ലാ​യി. എന്നാൽ റാഹേ​ലി​ന്റെ അപ്പനായ ലാബാൻ യാക്കോ​ബി​നെ പറ്റിച്ച്‌ റാഹേ​ലി​ന്റെ ചേച്ചിയെ ആദ്യം വിവാഹം ചെയ്‌തു​കൊ​ടു​ത്തു. അങ്ങനെ യാക്കോ​ബി​നു രണ്ടു ഭാര്യ​മാ​രു​ണ്ടാ​യി. എന്നാൽ അവർ തമ്മിൽ അത്ര രസത്തി​ലാ​യി​രു​ന്നില്ല. ഇനി, വർഷങ്ങ​ളോ​ളം യാക്കോബ്‌ ലാബാ​നു​വേണ്ടി പണി​യെ​ടു​ത്തെ​ങ്കി​ലും പറഞ്ഞൊത്ത കൂലി കൊടു​ക്കാ​തെ അദ്ദേഹം യാക്കോ​ബി​നെ പറ്റിച്ചു​കൊ​ണ്ടി​രു​ന്നു. ഇത്തരം ബുദ്ധി​മു​ട്ടു​ക​ളൊ​ക്കെ ഉണ്ടായി​രു​ന്നി​ട്ടും യാക്കോബ്‌ നല്ല ധൈര്യ​വും വിശ്വാ​സ​വും സഹനശ​ക്തി​യും കാണിച്ചു.

ഒരു ദിവസം യഹോവ യാക്കോ​ബി​നോ​ടു ഹാരാ​നിൽനിന്ന്‌ കനാനി​ലുള്ള വീട്ടി​ലേക്കു മടങ്ങി​പ്പോ​കാൻ പറഞ്ഞു. പക്ഷേ അങ്ങനെ​യൊ​രു തീരു​മാ​ന​മെ​ടു​ക്കു​ന്ന​തിൽ ഒരു അപകട​മു​ണ്ടാ​യി​രു​ന്നു. കാരണം ലാബാൻ ഒരു അത്യാ​ഗ്ര​ഹി​യും യാക്കോ​ബി​നു​ള്ള​തെ​ല്ലാം തന്റേതാ​ണെന്നു ചിന്തി​ക്കു​ന്ന​യാ​ളും ആയിരു​ന്നു. അതു​കൊണ്ട്‌ യാക്കോബ്‌ തന്റെ കുടും​ബ​വു​മാ​യി ആലോ​ചി​ച്ചി​ട്ടു ലാബാ​നോ​ടു പറയാതെ അവരെ​യും കൂട്ടി അവി​ടെ​നിന്ന്‌ ഓടി​പ്പോ​ന്നു. ഇത്‌ അറിഞ്ഞ ലാബാൻ തന്റെ ആളുക​ളോ​ടൊ​പ്പം യാക്കോ​ബി​നെ പിന്തു​ടർന്നു. അവസാനം അവരെ കണ്ടെത്തി​യ​പ്പോൾ തന്നോടു പറയാതെ പോയ​തി​നു ലാബാൻ യാക്കോ​ബി​നെ കുറ്റ​പ്പെ​ടു​ത്തി. യാക്കോ​ബി​നെ ‘ദ്രോ​ഹി​ക്കാൻ തനിക്കു കഴിയും’ എന്നു പറഞ്ഞ്‌ അദ്ദേഹം യാക്കോ​ബി​നെ ഭീഷണി​പ്പെ​ടു​ത്തു​ക​പോ​ലും ചെയ്‌തു. എന്നാൽ തന്റെ ഭാഗം ശരിയാ​ണെന്നു യാക്കോബ്‌ ധൈര്യ​ത്തോ​ടെ വാദിച്ചു. ലാബാൻ തന്നോടു അന്യായം ചെയ്‌തെ​ന്നും വർഷങ്ങ​ളോ​ളം തന്നെ വഞ്ചി​ച്ചെ​ന്നും യാക്കോബ്‌ തുറന്നു​പ​റഞ്ഞു. പക്ഷേ അപ്പോ​ഴും ലാബാ​നു​മാ​യി സമാധാ​ന​ത്തി​ലാ​കാൻ യാക്കോബ്‌ തയ്യാറാ​യി​രു​ന്നു. അവസാനം അവർ തമ്മിൽ ഒരു സമാധാന ഉടമ്പടി ഉണ്ടാക്കി, സന്തോ​ഷ​ത്തോ​ടെ പിരിഞ്ഞു.

എന്നാൽ യാക്കോ​ബി​ന്റെ പ്രശ്‌നങ്ങൾ അവിടം​കൊണ്ട്‌ തീർന്നില്ല. തന്റെ ഇരട്ട സഹോ​ദ​ര​നായ ഏശാവ്‌ തന്നെ കൊല്ലാൻ പദ്ധതി​യി​ട്ട​തി​നെ​ക്കു​റിച്ച്‌ വർഷങ്ങൾക്കു മുമ്പ്‌ അമ്മയായ റിബെക്ക യാക്കോ​ബി​നോ​ടു പറഞ്ഞി​ട്ടു​ണ്ടാ​യി​രു​ന്നു. യാക്കോബ്‌ തന്ത്രപൂർവം അപ്പന്റെ അനു​ഗ്രഹം തട്ടി​യെ​ടു​ത്തെ​ന്നാണ്‌ ഏശാവ്‌ വിചാ​രി​ച്ചത്‌. എന്നാൽ ഇപ്പോൾ ഏശാവു​മാ​യി സമാധാ​ന​ത്തി​ലാ​കാൻ യാക്കോബ്‌ ആഗ്രഹി​ച്ചു. ഏശാവ്‌ 400 പുരു​ഷ​ന്മാ​രെ​യും കൂട്ടി തന്റെ നേരെ വരുന്ന​താ​യി യാക്കോബ്‌ അറിഞ്ഞു. അപ്പോൾ “യാക്കോബ്‌ ആകെ ഭയന്നു​പോ​യി, വല്ലാതെ പേടി​ച്ചു​വി​റച്ചു” എന്നാണു ബൈബിൾ പറയു​ന്നത്‌. അതു​കൊണ്ട്‌ യാക്കോബ്‌ വില​യേ​റിയ കുറെ സമ്മാന​ങ്ങ​ളു​മാ​യി തന്റെ ദാസന്മാ​രെ തനിക്കു മുമ്പായി ഏശാവി​ന്റെ അടു​ത്തേക്ക്‌ അയച്ചു. എന്നാൽ ഏശാവി​ന്റെ ദേഷ്യം അടക്കാൻ അതു മതിയാ​കു​മാ​യി​രു​ന്നോ എന്നൊ​ന്നും ആ സമയത്ത്‌ യാക്കോ​ബിന്‌ അറിയി​ല്ലാ​യി​രു​ന്നു.

അന്നുതന്നെ അതിശ​യി​പ്പി​ക്കുന്ന ഒരു സംഭവം നടന്നു. പാതിരാ കഴിഞ്ഞ നേരത്ത്‌, യാക്കോബ്‌ ഒറ്റയ്‌ക്കാ​യി​രു​ന്ന​പ്പോൾ ഒരു അപരി​ചി​തനെ കണ്ടു. അത്‌ യഹോ​വ​യു​ടെ ഒരു ദൂതനാ​യി​രു​ന്നു. ആ ദൂതൻ യാക്കോ​ബു​മാ​യി മല്ലുപി​ടി​ക്കാൻതു​ടങ്ങി. തന്നെ അനു​ഗ്ര​ഹി​ക്കാൻ ആ ദൂതനു കഴിയു​മെന്നു മനസ്സി​ലാ​ക്കിയ യാക്കോബ്‌ ദൂതനു​മാ​യി മണിക്കൂ​റു​ക​ളോ​ളം മല്‌പി​ടി​ത്തം നടത്തി. യാക്കോ​ബിന്‌ അപ്പോൾ 97 വയസ്സു​ണ്ടാ​യി​രു​ന്നു; ദൂതനാ​ണെ​ങ്കിൽ യാക്കോ​ബി​നെ​ക്കാൾ വളരെ​വ​ളരെ ശക്തനും. എന്നിട്ടും വിട്ടു​കൊ​ടു​ക്കാൻ യാക്കോബ്‌ തയ്യാറാ​യില്ല. അദ്ദേഹം കഠിന​മാ​യി പോരാ​ടി, അനു​ഗ്ര​ഹ​ത്തി​നാ​യി കരഞ്ഞ​പേ​ക്ഷി​ച്ചു. (ഹോശേ. 12:4) യഹോ​വ​യിൽനി​ന്നുള്ള അനു​ഗ്രഹം എത്ര അമൂല്യ​മാ​ണെന്നു യാക്കോ​ബിന്‌ അറിയാ​മാ​യി​രു​ന്നു. അതു നേടാ​നാ​യി തന്നെ​ക്കൊ​ണ്ടാ​കു​ന്ന​തെ​ല്ലാം ചെയ്യാൻ യാക്കോബ്‌ ഉറച്ച തീരു​മാ​ന​മെ​ടു​ത്തി​രു​ന്നു. നേരം പുലരാ​റാ​യ​പ്പോൾ ആ ദൂതൻ യാക്കോ​ബി​ന്റെ ഇടു​പ്പെ​ല്ലിൽ തൊട്ടു. അത്‌ ഉളുക്കി​പ്പോ​യി. പിന്നെ ദൂതൻ യാക്കോ​ബി​നോട്‌ അതിശ​യി​പ്പി​ക്കുന്ന ഒരു കാര്യം പറഞ്ഞു, അതായത്‌ അദ്ദേഹ​ത്തി​ന്റെ പേര്‌ ഇനിമു​തൽ ഇസ്രാ​യേൽ എന്നായി​രി​ക്കു​മെന്ന്‌. ആ പേരിന്‌ ഒരു അർഥമു​ണ്ടാ​യി​രു​ന്നു: ദൈവ​ത്തോ​ടു പോരാ​ടു​ന്നവൻ. അതു വളരെ യോജി​ക്കുന്ന ഒരു പേരാ​യി​രു​ന്നു. കാരണം യഹോ​വ​യിൽനി​ന്നുള്ള അനു​ഗ്രഹം നേടാ​നാ​യി യാക്കോബ്‌ മടുത്തു​പോ​കാ​തെ സർവശ​ക്തി​യു​മെ​ടുത്ത്‌ പോരാ​ടി.

യാക്കോബ്‌ മുടന്തി​മു​ടന്തി തന്റെ വീട്ടു​കാ​രു​ടെ അടു​ത്തേക്കു ചെന്നു. കുറച്ച്‌ കഴിഞ്ഞ​പ്പോൾ, ഏശാവ്‌ 400 പുരു​ഷ​ന്മാ​രോ​ടൊ​പ്പം അങ്ങു ദൂരെ​നിന്ന്‌ വരുന്നതു യാക്കോബ്‌ കണ്ടു. അപ്പോൾ യാക്കോബ്‌ ഒറ്റയ്‌ക്കു തന്റെ വീട്ടു​കാർക്കു മുമ്പേ ഏശാവി​നെ​യും കൂടെ​യു​ള്ള​വ​രെ​യും കാണാൻ അവരുടെ അടു​ത്തേക്കു ചെന്നു. ഏശാവി​ന്റെ അടുത്ത്‌ എത്തും​വരെ യാക്കോബ്‌ ഏഴു പ്രാവ​ശ്യം നിലം​വരെ കുനിഞ്ഞ്‌ നമസ്‌ക​രി​ച്ചു. അപ്പോൾ ഏശാവ്‌ ഓടി​വന്ന്‌ യാക്കോ​ബി​നെ കെട്ടി​പ്പി​ടി​ച്ചു. അദ്ദേഹ​ത്തി​ന്റെ കൈയിൽ ആയുധ​ങ്ങ​ളൊ​ന്നും ഉണ്ടായി​രു​ന്നില്ല. രണ്ടു പേരും പൊട്ടി​ക്ക​രഞ്ഞു. യാക്കോ​ബി​ന്റെ താഴ്‌മ​യോ​ടെ​യുള്ള പെരു​മാ​റ്റ​വും അദ്ദേഹം ഏശാവി​നു കൊടു​ത്തു​വിട്ട സമ്മാന​ങ്ങ​ളും യാക്കോ​ബി​നോ​ടു​ളള ഏശാവി​ന്റെ മനോ​ഭാ​വം പാടേ മാറ്റി. ഒരുപക്ഷേ യാക്കോ​ബി​ന്റെ ധൈര്യ​വും ഏശാവി​നെ അതിശ​യി​പ്പി​ച്ചു​കാ​ണും. അങ്ങനെ യാക്കോബ്‌ തന്റെ സഹോ​ദ​ര​നു​മാ​യി സമാധാ​ന​ത്തി​ലാ​യി.

ഇടുപ്പ്‌ ഉളുക്കി​യ​തു​കൊണ്ട്‌ ശേഷിച്ച ജീവി​ത​കാ​ല​മെ​ല്ലാം യാക്കോബ്‌ മുടന്തി​യാ​ണു നടന്നത്‌. അദ്ദേഹ​ത്തി​നു വേറെ​യും ഒരുപാ​ടു കഷ്ടങ്ങൾ സഹി​ക്കേ​ണ്ടി​വന്നു. എന്നാൽ യഹോ​വയെ അനുസ​രി​ക്കാ​നും ദൈവ​ദൂ​ത​നു​മാ​യി മല്ലിടാ​നും എടുത്ത തീരു​മാ​നത്തെ ഓർത്ത്‌ യാക്കോബ്‌ ഒരിക്ക​ലും ദുഃഖി​ച്ചില്ല. യഹോവ നൽകിയ വാഗ്‌ദാ​നം വർഷങ്ങൾക്കു ശേഷം അങ്ങനെ​തന്നെ നിറ​വേറി. ഇസ്രാ​യേൽ ഒരു മഹാജ​ന​ത​യാ​യി​ത്തീർന്നു. (ഉൽപ. 28:14) മാത്രമല്ല, ബൈബിൾ യഹോ​വയെ ‘യാക്കോ​ബി​ന്റെ ദൈവം’ എന്നു പലപ്പോ​ഴും വിളി​ച്ചി​ട്ടുണ്ട്‌. (പുറ. 3:6) യേശു​ക്രി​സ്‌തു​വും അങ്ങനെ​തന്നെ പറഞ്ഞി​ട്ടുണ്ട്‌. യേശു ഇങ്ങനെ​യും കൂട്ടി​ച്ചേർത്തു: യഹോവ “മരിച്ച​വ​രു​ടെ ദൈവമല്ല, ജീവനു​ള്ള​വ​രു​ടെ ദൈവ​മാണ്‌. കാരണം ദൈവ​മു​മ്പാ​കെ അവരെ​ല്ലാം ജീവി​ച്ചി​രി​ക്കു​ന്ന​വ​രാണ്‌.” (ലൂക്കോ. 20:37, 38) അതു​കൊണ്ട്‌ യാക്കോ​ബിന്‌ എന്തായാ​ലും പുനരു​ത്ഥാ​നം ഉണ്ടായി​രി​ക്കു​മെന്ന്‌ ഉറപ്പാണ്‌. പുതിയ ലോക​ത്തിൽ യാക്കോ​ബി​ന്റെ ജീവിതം ഹ്രസ്വ​വും കഷ്ടത നിറഞ്ഞ​തും ആയിരി​ക്കില്ല. പകരം യാക്കോബ്‌ സന്തോ​ഷ​ത്തോ​ടെ എന്നെന്നും ജീവി​ക്കും.

ബൈബിൾവി​വ​രണം വായി​ക്കുക:

• ഉൽപത്തി 27:41-45; 31:1-29, 36-55; 32:1–33:16

ചർച്ച ചെയ്യാൻ:

യാക്കോബ്‌ എങ്ങനെ​യെ​ല്ലാ​മാ​ണു ധൈര്യം കാണി​ച്ചത്‌?

ആഴത്തിൽ പഠിക്കാൻ

1. 1. യഹോവ ജന്മാവ​കാ​ശം ഏശാവി​നു നൽകാതെ യാക്കോ​ബി​നു നൽകി​യത്‌ എന്തു​കൊണ്ട്‌? (w03 10/15 പേ. 29 ഖ. 2)

   നിങ്ങളുടെ ഉത്തരം

2. 2. യഹോവ യാക്കോ​ബി​നു സ്വപ്‌ന​ത്തിൽ എന്തു കാണി​ച്ചു​കൊ​ടു​ത്തു, അതിലൂ​ടെ നൽകിയ ഉറപ്പ്‌ എന്താണ്‌? (w03 10/15 പേ. 28 ഖ. 3–പേ. 29 ഖ. 1) A

   നിങ്ങളുടെ ഉത്തരം

   

3. 3. ദൈവ​ദൂ​ത​നിൽനിന്ന്‌ തനിക്ക്‌ അനു​ഗ്രഹം നേടാ​നാ​കു​മെന്നു യാക്കോ​ബിന്‌ ഉറപ്പു​ണ്ടാ​യി​രു​ന്നത്‌ എന്തു​കൊണ്ട്‌? (w03 10/15 പേ. 31 ഖ. 1) B

   നിങ്ങളുടെ ഉത്തരം

   

4. 4. കനാന്യ​രു​ടെ സ്വാധീ​ന​ത്തിൽനിന്ന്‌ തന്റെ കുടും​ബത്തെ സംരക്ഷി​ക്കാൻ യാക്കോബ്‌ എന്തൊക്കെ ചെയ്‌തു? (w95 9/15 പേ. 21 ഖ. 5, അടിക്കു​റിപ്പ്‌)

   നിങ്ങളുടെ ഉത്തരം

നമുക്കുള്ള പാഠങ്ങൾ

• തന്നെ ഏൽപ്പിച്ച ഓരോ ആടി​ന്റെ​യും കാര്യ​ത്തിൽ തനിക്ക്‌ ഒരു ഉത്തരവാ​ദി​ത്വ​മു​ണ്ടെന്നു യാക്കോബ്‌ ചിന്തിച്ചു. (ഉൽപ. 31:38-40) ഇന്നു ക്രിസ്‌തീയ ഇടയന്മാർക്ക്‌ എങ്ങനെ യഹോ​വ​യു​ടെ ആടുക​ളു​ടെ കാര്യ​ത്തിൽ, അതായത്‌ തങ്ങളുടെ സഹോ​ദ​ര​ങ്ങ​ളു​ടെ കാര്യ​ത്തിൽ, നല്ല ശ്രദ്ധയു​ള്ള​വ​രാ​യി​രി​ക്കാം? C

  നിങ്ങളുടെ ഉത്തരം

  

• പേടി തോന്നി​യ​പ്പോൾ യാക്കോബ്‌ യഹോ​വ​യോ​ടു പ്രാർഥി​ച്ചു. (ഉൽപ. 32:6-12) പ്രാർഥ​ന​യിൽ എന്തൊക്കെ ഉൾപ്പെ​ടു​ത്താം എന്നതി​നെ​ക്കു​റിച്ച്‌ യാക്കോ​ബിൽനിന്ന്‌ നിങ്ങൾ എന്താണു പഠിച്ചത്‌?

  നിങ്ങളുടെ ഉത്തരം

• നിങ്ങൾക്ക്‌ എങ്ങനെ യാക്കോ​ബി​ന്റെ ധൈര്യം അനുക​രി​ക്കാം?

  നിങ്ങളുടെ ഉത്തരം

വിശാ​ല​മാ​യി ചിന്തി​ക്കാൻ

• ഈ വിവരണം യഹോ​വ​യെ​ക്കു​റിച്ച്‌ എന്നെ എന്താണു പഠിപ്പി​ക്കു​ന്നത്‌?

  നിങ്ങളുടെ ഉത്തരം

• ഈ വിവരണം ഭൂമി​യെ​യും മനുഷ്യ​രെ​യും കുറി​ച്ചുള്ള യഹോ​വ​യു​ടെ ഉദ്ദേശ്യ​ങ്ങ​ളു​മാ​യി എങ്ങനെ ബന്ധപ്പെ​ട്ടി​രി​ക്കു​ന്നു?

  നിങ്ങളുടെ ഉത്തരം

• പുനരു​ത്ഥാ​ന​പ്പെ​ട്ടു​വ​രുന്ന യാക്കോ​ബി​നോട്‌ എന്തു ചോദി​ക്കാ​നാ​ണു ഞാൻ ആഗ്രഹി​ക്കു​ന്നത്‌?

  നിങ്ങളുടെ ഉത്തരം

കൂടുതൽ അറിയാൻ

നമ്മൾ ഒരു സഹവി​ശ്വാ​സി​യെ വിഷമി​പ്പി​ച്ച​താ​യി തിരി​ച്ച​റി​ഞ്ഞാൽ യാക്കോ​ബി​നെ അനുക​രി​ച്ചു​കൊണ്ട്‌ നമുക്ക്‌ എന്തു ചെയ്യാം?

“യേശു പറയു​ന്നതു തുടർന്നും ശ്രദ്ധി​ക്കുക” (w21.12 പേ. 25-27 ഖ. 10-18)

യാക്കോബിനെക്കുറിച്ച്‌ നിങ്ങളു​ടെ കുടും​ബത്തെ പഠിപ്പി​ക്കാൻ ഈ ബൈബിൾ ചിത്രകഥ ഉപയോ​ഗി​ക്കുക.

“യാക്കോ​ബും ഏശാവും” (ijwis ലേഖനം 3)