സൂർ​സ്റ്റ്രോ​മിങ്‌—ദുർഗന്ധം വമിക്കുന്ന ഒരു വിശി​ഷ്ട​ഭോ​ജ്യം

സ്വീഡനിലെ ഉണരുക! ലേഖകൻ

പതിനാറാം നൂറ്റാണ്ട്‌. സ്വീഡ​നും ജർമനി​യി​ലെ ലൂബെക്ക്‌ നഗരവും തമ്മിൽ ഉഗ്രയു​ദ്ധം നടക്കുന്ന സമയം. കടലിന്റെ നിയ​ന്ത്രണം അപ്പാടെ ലൂബെ​ക്കു​കാ​രു​ടെ കയ്യിൽ ആയിരു​ന്ന​തി​നാൽ ഇറക്കു​മതി ചരക്കുകൾ ലഭിക്കു​ന്നതു ബുദ്ധി​മു​ട്ടാ​യി തീർന്നു. ഉപ്പിനും കടുത്ത ദൗർല​ഭ്യം അനുഭ​വ​പ്പെട്ടു. ഉത്തര സ്വീഡ​നി​ലെ ഒരു പ്രധാ​ന​ഭ​ക്ഷ​ണ​മാ​യി​രു​ന്നു മത്തി. എന്നാൽ അതു കേടു​കൂ​ടാ​തെ സൂക്ഷി​ക്കു​ന്ന​തി​നു വേണ്ട ഉപ്പ്‌ ഓരോ ദിവസം കഴിയു​ന്തോ​റും കിട്ടാൻ പ്രയാ​സ​മാ​യി തീർന്നു. അതു​കൊണ്ട്‌, മത്തി ഉപ്പിലി​ട്ട​പ്പോൾ ചെലവു ചുരു​ക്കാൻ വേണ്ടി ആരോ ഒരാൾ അതിൽ വളരെ കുറച്ച്‌ ഉപ്പേ ഇട്ടുള്ളൂ. അതു കാരണം, അതിന്‌ ഉദ്ദേശിച്ച ഫലം ലഭിച്ചില്ല, മത്സ്യത്തിൽ നിന്നു ദുർഗന്ധം വമിക്കാ​നും തുടങ്ങി. മീൻ “ചീഞ്ഞു” പോയി എന്നു തന്നെ അവർ കരുതി.

സാധാ​ര​ണ​ഗ​തി​യിൽ ആയിരു​ന്നെ​ങ്കിൽ അതു ദൂരെ കളഞ്ഞേനെ. പക്ഷേ, കടുത്ത ക്ഷാമം മൂലം അതു കഴിക്കു​ക​യ​ല്ലാ​തെ വേറെ നിവൃ​ത്തി​യി​ല്ലാ​യി​രു​ന്നു. എന്നാൽ, അതു കഴിച്ചു നോക്കി​യ​വ​രെ​ല്ലാം അതിശ​യി​ച്ചു പോയി. അതിനു ചീഞ്ഞതി​ന്റെ രുചി അൽപ്പം പോലും ഉണ്ടായി​രു​ന്നില്ല. ചിലർക്കാ​ണെ​ങ്കിൽ അതിന്റെ ചെറിയ പുളി​ക​ലർന്ന സ്വാദ്‌ നന്നേ ഇഷ്ടപ്പെ​ടു​ക​യും ചെയ്‌തു. മീൻ ചീഞ്ഞു​പോ​യി​രു​ന്നില്ല, എന്നാൽ അതു പുളിച്ചു പോയി​രു​ന്നു. ഈ പുതിയ വിഭവത്തെ കുറി​ച്ചുള്ള ശ്രുതി എങ്ങും പരന്നു. സമാധാ​ന​കാ​ല​ങ്ങ​ളിൽ പോലും ഉപ്പിന്‌ തീപി​ടിച്ച വില ആയതു​കൊണ്ട്‌ മത്തി കേടു​വ​രാ​തെ സൂക്ഷി​ക്കു​ന്ന​തിന്‌ അതു പുളി​പ്പി​ക്കുക എന്നത്‌ ഉത്തര സ്വീഡ​നി​ലെ ദരി​ദ്ര​രായ ആളുക​ളു​ടെ ഒരു പതിവാ​യി തീർന്നു. അവി​ടെ​യാ​ണെ​ങ്കിൽ മിക്ക​പ്പോ​ഴും പഴകിയ ആഹാര​മാണ്‌ ആളുകൾക്കു ലഭിച്ചി​രു​ന്നത്‌.

ഒരു ദേശീയ വിഭവം നിലവിൽ വന്നത്‌ ഇങ്ങനെ​യാ​ണെ​ന്നാണ്‌ ഐതി​ഹ്യം. അന്നുമു​തൽ, പാരമ്പ​ര്യ​മാ​യി തങ്ങൾക്കു കൈമാ​റി​ക്കി​ട്ടിയ ഈ പ്രത്യേക പാചക​വി​ദ്യ സ്വീഡൻകാർ ഒരു നിധി പോലെ കാത്തു​സൂ​ക്ഷി​ച്ചി​രി​ക്കു​ന്നു. എന്നാൽ എല്ലാവ​രും ഈ ഐതി​ഹ്യ​ത്തിൽ വിശ്വ​സി​ക്കു​ന്നില്ല. 16-ാം നൂറ്റാ​ണ്ടി​നും വളരെ മുമ്പു തന്നെ സ്വീഡ​നി​ലും ഉത്തരാർധ​ഗോ​ള​ത്തി​ലെ മറ്റു സ്ഥലങ്ങളി​ലും മത്സ്യം കേടു​കൂ​ടാ​തെ സൂക്ഷി​ക്കു​ന്ന​തിന്‌ അവ പുളി​പ്പി​ച്ചു വെക്കു​മാ​യി​രു​ന്നു എന്നു ചില പണ്ഡിത​ന്മാർ അവകാ​ശ​പ്പെ​ടു​ന്നു.

അതിനെ തിരി​ച്ച​റി​യി​ക്കുന്ന ഗന്ധം

സൂർ​സ്റ്റ്രോ​മി​ങ്ങി​ന്റെ ഉത്ഭവം എങ്ങനെ ആയിരു​ന്നാ​ലും ശരി, മൂക്കു​തെ​റി​പ്പി​ക്കുന്ന മണമാണ്‌ എല്ലായ്‌പോ​ഴും അതിന്റെ തിരി​ച്ച​റി​യി​ക്കൽ അടയാളം. 19-ാം നൂറ്റാ​ണ്ടി​ന്റെ അവസാനം എഴുത​പ്പെട്ട ഒരു പാചക​പു​സ്‌ത​ക​ത്തി​ന്റെ രചയി​താ​വു പരിഹാ​സ​രൂ​പേണ ഇപ്രകാ​രം പറയു​ക​യു​ണ്ടാ​യി: “അവർ [സൂർ​സ്റ്റ്രോ​മിങ്‌ പ്രേമി​കൾ] അതിനെ അതിവി​ശി​ഷ്ട​മായ ഒരു ഭക്ഷണസാ​ധ​ന​മാ​യി​ട്ടാ​ണു കണക്കാ​ക്കു​ന്നത്‌. എന്നാൽ ഒന്നുകിൽ ആതി​ഥേയൻ ഒറ്റയ്‌ക്കി​രു​ന്നു കഴിക്കു​ക​യോ അല്ലെങ്കിൽ അദ്ദേഹം ഒരുപക്ഷേ മൂക്കി​ല്ലാത്ത അതിഥി​കളെ ക്ഷണിക്കു​ക​യോ ചെയ്യുന്ന വിരു​ന്നു​ക​ളിൽ മാത്രമേ ഇത്‌ വിളമ്പാൻ പോകു​ന്നു​ള്ളൂ.” എന്നാൽ അദ്ദേഹ​ത്തി​നു തെറ്റു​പറ്റി എന്നു കാലം തെളി​യി​ച്ചി​രി​ക്കു​ന്നു. മനംമ​ടു​പ്പി​ക്കുന്ന മണം ഉണ്ടായി​രു​ന്നി​ട്ടു കൂടി അത്‌ ഇന്ന്‌ വിരു​ന്നു​ക​ളിൽ സ്ഥാനം പിടി​ച്ചി​രി​ക്കു​ന്നു, മാത്ര​മോ ഒരു വിശി​ഷ്ട​ഭോ​ജ്യ​മാ​യാണ്‌ ആളുകൾ അതിനെ കരുതു​ന്ന​തും. വളരെ അപൂർവ​മാ​യേ ഇപ്പോൾ അത്‌ അത്താഴ​ത്തി​നോ ഉച്ചഭക്ഷ​ണ​ത്തി​നോ ആളുകൾ പതിവാ​യി കഴിക്കാ​റു​ള്ളൂ. സൂർ​സ്റ്റ്രോ​മിങ്‌ നൽകി സുഹൃ​ത്തു​ക്ക​ളെ​യും മറ്റും സത്‌ക​രി​ക്കാ​റുണ്ട്‌. സ്വീഡന്റെ വടക്കു​കി​ഴക്കു തീരത്ത്‌ ഉള്ള ഹൈ​കോസ്റ്റ്‌ തന്നെയാണ്‌ ഇപ്പോ​ഴും സൂർ​സ്റ്റ്രോ​മി​ങ്ങി​ന്റെ കേന്ദ്രം എങ്കിലും ആ രാജ്യത്ത്‌ ഉടനീളം അതു ജനങ്ങൾക്കു പ്രിയ​പ്പെ​ട്ട​താ​യി തീർന്നി​രി​ക്കു​ന്നു.

ഈ പ്രത്യേക വിഭവം ഇപ്പോ​ഴും നിങ്ങൾക്കു സ്വീഡ​നിൽ മാത്രമേ ലഭിക്കൂ. സ്വീഡനു വെളി​യിൽ ഇതിനെ കുറിച്ച്‌ കേൾക്കു​ക​യോ ഇതു രുചിച്ചു നോക്കു​ക​യോ ചെയ്‌തി​ട്ടു​ള്ളവർ അപൂർവം മാത്ര​മാണ്‌. അതു​കൊണ്ട്‌ ഈ “വിശി​ഷ്ട​ഭോ​ജ്യ​ത്തി​നാ​യി” ക്ഷണിക്ക​പ്പെ​ടുന്ന, ഇതിനെ കുറിച്ചു മുന്നറി​യി​പ്പു ലഭിക്കാത്ത വിദേ​ശി​കൾ ഏറ്റവും കുറഞ്ഞത്‌ രണ്ടു തവണ എങ്കിലും ഞെട്ടും. സൂർ​സ്റ്റ്രോ​മിങ്‌ ഇട്ടു​വെ​ച്ചി​രി​ക്കുന്ന ടിൻ തുറക്കു​മ്പോ​ഴാണ്‌ അവർ ആദ്യം ഞെട്ടു​ന്നത്‌, അത്രയ്‌ക്കു ദുർഗ​ന്ധ​മാ​യി​രി​ക്കും അവി​ടെ​യെ​ങ്ങും പരക്കുക. ആഹാരം ചീത്തയാ​യി​പ്പോ​യി എന്നും അതു​കൊണ്ട്‌ അതു കളഞ്ഞിട്ടു തീർച്ച​യാ​യും മറ്റെ​ന്തെ​ങ്കി​ലും വിളമ്പും എന്നും അവർ ന്യായ​മാ​യും പ്രതീ​ക്ഷി​ക്കും. എന്നാൽ ഇപ്പോ​ഴാണ്‌ അവർ രണ്ടാമതു ഞെട്ടു​ന്നത്‌. ആതി​ഥേ​യ​നും മറ്റ്‌ അതിഥി​ക​ളും ദുർഗന്ധം വമിക്കുന്ന മീൻ കഴിക്കാൻ തുടങ്ങു​ന്നു, അതും അത്യന്തം ആഹ്ലാദ​ത്തോ​ടെ! ധീരരായ ചില വിദേ​ശി​കൾ സൂർ​സ്റ്റ്രോ​മിങ്‌ ആസ്വദി​ക്കാൻ പഠിച്ചി​രി​ക്കു​ന്നു, പക്ഷേ, മറ്റുള്ള​വർക്ക്‌ ഇനിയും അതിനു കഴിഞ്ഞി​ട്ടില്ല. പ്രസിദ്ധ പാചക​വി​ദ​ഗ്‌ധ​നായ കിത്ത്‌ ഫ്‌ളോ​യിഡ്‌, സൂർ​സ്റ്റ്രോ​മി​ങ്ങി​നോ​ടുള്ള ബന്ധത്തിലെ തന്റെ ആദ്യ അനുഭ​വത്തെ—സാധ്യ​ത​യ​നു​സ​രിച്ച്‌ അവസാ​ന​ത്തെ​യും—കുറിച്ച്‌ അഭി​പ്രാ​യ​പ്പെ​ട്ടത്‌ “പറഞ്ഞറി​യി​ക്കാൻ പറ്റാത്ത​യത്ര അറപ്പു​ള​വാ​ക്കുന്ന ഒന്ന്‌” എന്നാണ്‌. ഫ്‌ളോ​യിഡ്‌ ആണെങ്കിൽ, ആഫ്രി​ക്ക​യിൽ വെച്ച്‌ പുഴു​ക്കളെ, ചൈന​യിൽ വെച്ച്‌ കടൽവെ​ള്ള​രി​കൾ എന്ന ഒരുതരം കടൽജീ​വി​കളെ, അതു​പോ​ലെ വിയറ്റ്‌നാ​മിൽ വെച്ച്‌ മൂർഖൻ പാമ്പു​കളെ ഒക്കെ തിന്നി​ട്ടു​ള്ള​താണ്‌. പക്ഷേ, സൂർ​സ്റ്റ്രോ​മി​ങ്ങി​ന്റെ മുമ്പിൽ അദ്ദേഹ​ത്തി​നും അടിപ​തറി. അദ്ദേഹം ഇങ്ങനെ പറഞ്ഞു: “ഇതുവരെ കഴിച്ചി​ട്ടു​ള്ള​തി​ലേ​ക്കും ഏറ്റവും അറപ്പു​ള​വാ​ക്കിയ ആഹാരം ഏതാണ്‌ എന്നു മിക്ക​പ്പോ​ഴും ആളുകൾ എന്നോടു ചോദി​ക്കാ​റുണ്ട്‌. അതിന്‌ എന്തു മറുപ​ടി​യാ​ണു കൊടു​ക്കേ​ണ്ടത്‌ എന്ന്‌ ഇപ്പോൾ എനിക്ക​റി​യാം.” ഈ ആഹാരം അമേരി​ക്ക​ക്കാർക്കു പരിച​യ​പ്പെ​ടു​ത്താ​നുള്ള ഒരു ശ്രമം 1930-കളിൽ നടത്തി​യെ​ങ്കി​ലും അതു പാളി​പ്പോ​യി. ന്യൂ​യോർക്കി​ലെ കസ്റ്റംസ്‌ അധികൃ​തർ സൂർ​സ്റ്റ്രോ​മി​ങ്ങി​ന്റെ ഒരൊറ്റ ടിൻ തുറന്ന​തേ​യു​ള്ളു, തങ്ങൾ വിഷവാ​തകം കൊണ്ടുള്ള ആക്രമ​ണ​ത്തി​നു വിധേ​യ​രാ​യി എന്നു തന്നെ അവർ കരുതി. ആ സാധനം “ഭക്ഷ്യ​യോ​ഗ്യ​മ​ല്ലെന്നു” അവർ വിധിച്ചു.

സൂർ​സ്റ്റ്രോ​മി​ങ്ങി​നെ കുറിച്ച്‌ സ്വീഡൻകാർക്കു തന്നെ വ്യത്യസ്‌ത അഭി​പ്രാ​യ​ങ്ങ​ളാണ്‌ ഉള്ളത്‌. ഈ ആഹാരം കഴിച്ചു നോക്കിയ ഒരാൾക്കു പോലും നിഷ്‌പ​ക്ഷ​മായ ഒരു നില സ്വീക​രി​ക്കാൻ കഴിയില്ല. ഒന്നുകിൽ നിങ്ങൾക്ക്‌ അത്‌ പ്രിയ​മാ​കും അല്ലെങ്കിൽ നിങ്ങൾ അതിനെ അങ്ങേയറ്റം വെറു​ക്കും. 17-ാം നൂറ്റാ​ണ്ടി​ന്റെ മധ്യത്തിൽ, ക്രിസ്റ്റീന രാജ്ഞി​യു​ടെ കൊട്ടാ​ര​ത്തി​ലെ ഡോക്ട​റായ ആൻഡേ​ഴ്‌സ്‌ സ്‌പാർമാൻ സൂർ​സ്റ്റ്രോ​മി​ങ്ങി​നെ കുറിച്ച്‌, അതിന്‌ പച്ച വിസർജ്യ​ത്തി​ന്റെ മണമാണ്‌ എന്ന്‌ എഴുതു​ക​യു​ണ്ടാ​യി. എന്നാൽ ഇതിനു നേരെ വിപരീ​ത​മാ​യി, 18-ാം നൂറ്റാ​ണ്ടിൽ ജീവി​ച്ചി​രുന്ന പ്രസിദ്ധ സ്വീഡിഷ്‌ സസ്യശാ​സ്‌ത്ര​ജ്ഞ​നായ കാരോ​ലുസ്‌ ലിനേ​യുസ്‌ അതിനെ വാനോ​ളം പുകഴ്‌ത്തു​ക​യാ​ണു ചെയ്‌തത്‌. അതു തയ്യാറാ​ക്കു​ന്ന​തി​നു സഹായ​ക​മായ ചില പാചക​വി​ധി​കൾ അദ്ദേഹം എഴുതി വെക്കുക പോലും ചെയ്‌തു. വിദേ​ശത്തു താമസി​ക്കുന്ന സ്വീഡൻകാർ തങ്ങൾക്ക്‌ ഏറ്റവും കൊതി​യുള്ള ആഹാര​ങ്ങ​ളിൽ ഒന്ന്‌ സൂർ​സ്റ്റ്രോ​മിങ്‌ ആണ്‌ എന്നു മിക്ക​പ്പോ​ഴും പറയാ​റുണ്ട്‌.

സൂർ​സ്റ്റ്രോ​മി​ങ്ങി​ന്റെ ദുർഗന്ധം ഇല്ലാതാ​ക്കു​ന്ന​തി​നുള്ള ശ്രമങ്ങൾ വിജയി​ച്ചു​വെ​ങ്കി​ലും വാണി​ജ്യ​പ​ര​മാ​യി അത്‌ അമ്പേ പരാജ​യ​മാ​യി​രു​ന്നു എന്നു ലാങ്ങ്‌സ്‌ ഹോഗാ കൂസ്റ്റെൻ (ഹൈ കോസ്റ്റി​ലൂ​ടെ) എന്ന പുസ്‌തകം പറയുന്നു. മണം ഇല്ലാത്ത സൂർ​സ്റ്റ്രോ​മിങ്‌ യഥാർഥ സൂർ​സ്റ്റ്രോ​മി​ങ്ങി​ന്റെ വെറും നിഴൽ മാത്ര​മാണ്‌ എന്നു വിദഗ്‌ധർ വിധി​യെ​ഴു​തി.

അത്‌ എങ്ങനെ​യാ​ണു തയ്യാറാ​ക്കു​ന്നത്‌?

സൂർ​സ്റ്റ്രോ​മിങ്‌ പലവി​ധ​ത്തിൽ കഴിക്കാൻ കഴിയും. അതു വളരെ​യേറെ ഇഷ്ടപ്പെ​ടു​ന്നവർ, മറ്റൊ​ന്നും ചേർക്കാ​തെ അത്‌ ഇട്ടു വെച്ചി​രി​ക്കുന്ന ടിന്നിൽ നിന്ന്‌ എടുത്ത പടി തന്നെ കഴിക്കും. അതു ലിം​ഗൊൺബെ​റി​ക​ളു​ടെ​യും പാലി​ന്റെ​യും കൂടെ പോലും ആളുകൾ കഴിക്കാ​റുണ്ട്‌! എന്നാൽ സാധാ​ര​ണ​ഗ​തി​യിൽ വെണ്ണ, നന്നായി അരി​ഞ്ഞെ​ടുത്ത ഉള്ളി, ഉരുള​ക്കി​ഴങ്ങ്‌, തക്കാളി എന്നിവ​യോ​ടൊ​പ്പം ബ്രെഡിൽ വെച്ചാണ്‌ അതു കഴിക്കുക, തണുപ്പിച്ച ബിയറും ഷ്‌നാ​പ്പ്‌സും കൂടി​യു​ണ്ടെ​ങ്കിൽ കുശാ​ലാ​യി. ഈ രീതി പരീക്ഷി​ച്ചു നോക്കി​യ​തി​ന്റെ ഫലമായി, അതു കൈ​കൊ​ണ്ടു തൊട്ടു​നോ​ക്കാൻ കൂടി കൂട്ടാ​ക്കാ​തി​രു​ന്ന​വ​രിൽ ചിലർ ഇപ്പോൾ അത്‌ ആസ്വദി​ക്കാൻ തുടങ്ങി​യി​രി​ക്കു​ന്നു.

ഏപ്രി​ലിൽ, പെൺമ​ത്സ്യ​ങ്ങൾ മുട്ടയി​ട്ടു തുടങ്ങു​ന്ന​തി​നു മുമ്പാണ്‌ അവയെ പിടി​കൂ​ടു​ന്നത്‌. തലയും കുടൽമാ​ല​യും നീക്കം ചെയ്യു​മെ​ങ്കി​ലും സ്വാദി​നു വേണ്ടി മുട്ട അങ്ങനെ തന്നെ നിലനിർത്തു​ന്നു. അവയുടെ ഉണ്ഡുക​പു​ച്ഛ​ത്തിൽ (appendix) മൃദു​വാ​ക്കൽ പ്രക്രി​യ​യ്‌ക്ക്‌ അനിവാ​ര്യ​മായ എൻ​സൈ​മു​കൾ ഉണ്ട്‌. അതിനാൽ ഈ ഭാഗവും നിലനിർത്തു​ന്നു. മത്സ്യങ്ങളെ ഏതാനും ദിവസ​ത്തേക്ക്‌ വീര്യം കൂടിയ ഉപ്പ്‌ ലായനി നിറച്ച വീപ്പക​ളിൽ ഇട്ടു​വെ​ക്കു​ന്നു. അവയുടെ ശരീര​ത്തി​ലെ രക്തവും കൊഴു​പ്പും നീക്കം ചെയ്യാൻ ആണിത്‌. അതിനു ശേഷം, അവയെ മൃദു​വാ​ക്കു​ന്ന​തി​നും പുളി​പ്പി​ക്കു​ന്ന​തി​നും വേണ്ടി ഏതാണ്ട്‌ രണ്ടു മാസം വീര്യം കുറഞ്ഞ ഉപ്പു ലായനി​യിൽ ഇടുന്നു. ജൂലൈ ആകു​മ്പോൾ അവയെ ടിന്നി​ല​ടച്ചു തണുപ്പി​ക്കാൻ വെക്കുന്നു. ഉത്‌പ​ന്ന​ത്തി​ന്റെ ഗുണമേന്മ ഉപ്പു ലായനി​യു​ടെ ഗാഢത​യെ​യും മത്സ്യങ്ങൾ ഇട്ടു​വെ​ച്ചി​രുന്ന വീപ്പക​ളി​ലെ ഊഷ്‌മാ​വി​നെ​യും ആശ്രയി​ച്ചാണ്‌ ഇരിക്കു​ന്നത്‌. സൂർ​സ്റ്റ്രോ​മിങ്‌ ഉണ്ടാക്കു​ന്ന​തിന്‌ ഓരോ​രു​ത്തർക്കും തങ്ങളു​ടേ​തായ രീതി​യുണ്ട്‌, അതു മറ്റാർക്കും പറഞ്ഞു​കൊ​ടു​ക്കില്ല.

ടിന്നി​നു​ള്ളി​ലും പുളിക്കൽ പ്രക്രിയ തുടർന്നു​കൊ​ണ്ടേ​യി​രി​ക്കും. അതു​കൊണ്ട്‌, മുൻക​രു​ത​ലു​കൾ സ്വീക​രി​ക്കാ​തെ ഒരു ടിൻ തുറക്കാൻ ശ്രമി​ച്ചാൽ മിക്കവാ​റും അസുഖ​ക​ര​മായ പരിണ​ത​ഫ​ല​ങ്ങ​ളാ​വും ഉണ്ടാകു​ന്നത്‌. ടിന്നി​ന​കത്തു രൂപം കൊണ്ട സമ്മർദം, അതിനു​ള്ളി​ലെ ചാറ്‌ ശക്തി​യോ​ടെ എല്ലായി​ട​ത്തേ​ക്കും തെറി​ക്കാൻ ഇടയാ​ക്കി​യേ​ക്കാം. ഇങ്ങനെ സംഭവി​ക്കാ​തി​രി​ക്കേ​ണ്ട​തിന്‌, ഒന്നുകിൽ അതു വെളി​യിൽ വെച്ചോ അല്ലെങ്കിൽ വെള്ളത്തിന്‌ അടിയിൽ വെച്ചോ തുറ​ക്കേ​ണ്ട​തുണ്ട്‌!

സൂർ​സ്റ്റ്രോ​മിങ്‌ ആദ്യമാ​യി വിൽപ്പ​ന​യ്‌ക്ക്‌ എത്തി​ക്കേ​ണ്ടത്‌ ആഗസ്റ്റ്‌ മാസത്തി​ലെ മൂന്നാ​മത്തെ വ്യാഴാ​ഴ്‌ച​യാണ്‌ എന്നതു സംബന്ധി​ച്ചു ദീർഘ​കാ​ല​മാ​യി ഒരു രാജകീയ വിജ്ഞാ​പനം നിലവി​ലു​ണ്ടാ​യി​രു​ന്നു. എന്നിരു​ന്നാ​ലും, 1998 ശരത്‌കാ​ലത്ത്‌ ആ വിജ്ഞാ​പനം റദ്ദാക്കി. ഇപ്പോൾ സൂർ​സ്റ്റ്രോ​മിങ്‌ വർഷത്തി​ലെ ഏതു സമയത്തും വിൽപ്പ​ന​യ്‌ക്ക്‌ എത്തിക്കാം. എന്നാൽ, ഹൈ​കോസ്റ്റ്‌ നിവാ​സി​കൾക്കും മറ്റു സൂർ​സ്റ്റ്രോ​മിങ്‌ പ്രേമി​കൾക്കും ആഗ്‌സ്റ്റ്‌ മാസത്തി​ലെ മൂന്നാ​മത്തെ വ്യാഴാഴ്‌ച ഒരു വലിയ ഉത്സവദി​ന​മാ​യി തന്നെ തുടരും.

[26-ാം പേജിലെ ചിത്രം]

സ്വീഡനിലെ പരന്ന അപ്പം, ഉരുള​ക്കി​ഴങ്ങ്‌, ഉള്ളി, പാൽക്കട്ടി എന്നിവ​യോ​ടൊ​പ്പം “സൂർ​സ്റ്റ്രോ​മിങ്‌” വിളമ്പി​യാൽ, അതി​നോട്‌ ഒട്ടും ഇഷ്ടമി​ല്ലാ​ത്തവർ പോലും അതൊന്നു രുചി​ച്ചു​നോ​ക്കാൻ തയ്യാറാ​യേ​ക്കാം

[26-ാം പേജിലെ ചിത്ര​ത്തിന്‌ കടപ്പാട്‌]

Fish on pages 25-6: Animals/Jim Harter/Dover Publications, Inc.