ബൈബി​ളി​ന്റെ​വീ​ക്ഷണം

സുഹൃ​ത്തു​ക്കൾക്കി​ട​യി​ലെ കടം കൊടു​ക്ക​ലും വാങ്ങലും

“ദുഷ്ടൻ വായ്‌പ വാങ്ങുന്നു, തിരികെ കൊടു​ക്കു​ന്നില്ല; നീതി​മാ​നോ കൃപാ​ലു​വാ​യി ദാനം ചെയ്യുന്നു.”—സങ്കീർത്തനം 37:21.

“കടം വാങ്ങു​ന്ന​വ​നോ കൊടു​ക്കു​ന്ന​വ​നോ ആകരുത്‌; കാരണം മിക്ക​പ്പോ​ഴും പണവും നശിക്കും, സൗഹൃ​ദ​വും തകരും.” ഇങ്ങനെ എഴുതവേ, ഇംഗ്ലീഷ്‌ നാടക​കൃ​ത്തായ വില്യം​ഷേ​ക്‌സ്‌പി​യർ ഒരു നിത്യ​സ​ത്യം ആവർത്തി​ക്കു​ക​യാ​യി​രു​ന്നു. പണം കടം കൊടു​ക്കു​ന്ന​തും വാങ്ങു​ന്ന​തും പോലെ, മനുഷ്യ ബന്ധങ്ങൾക്ക്‌ ഇത്ര അപകട​ക​ര​മാ​യേ​ക്കാ​വുന്ന മറ്റു സംഗതി​കൾ ഇല്ലെന്നതു തീർച്ച​യാണ്‌. നല്ല ആസൂ​ത്ര​ണ​വും ആത്മാർഥ​ത​യും ഉണ്ടെങ്കി​ലും കാര്യങ്ങൾ എപ്പോ​ഴും നാം പ്രതീ​ക്ഷി​ക്കു​ന്ന​തു​പോ​ലെ നടക്കണ​മെ​ന്നില്ല.—സഭാ​പ്ര​സം​ഗി 9:11, 12.

കടം വാങ്ങിയ വ്യക്തിക്കു ബാധ്യ​തകൾ തീർക്കുക ദുഷ്‌ക​ര​മോ അസാധ്യ​മോ ആക്കുന്ന സാഹച​ര്യ​ങ്ങൾ ഉയർന്നു വന്നേക്കാം. അല്ലെങ്കിൽ വായ്‌പ കൊടുത്ത വ്യക്തിക്ക്‌ താൻ കൊടുത്ത പണം പെട്ടെ​ന്നു​തന്നെ തിരികെ വേണ്ടി​വ​ന്നേ​ക്കാം. അത്തരം സാഹച​ര്യ​ങ്ങൾ ഉടലെ​ടു​ക്കു​മ്പോൾ, ഷേക്‌സ്‌പി​യർ പറഞ്ഞതു​പോ​ലെ സൗഹൃ​ദ​ങ്ങ​ളും ബന്ധങ്ങളും അപകട​ത്തി​ലാ​യേ​ക്കാം.

തീർച്ച​യാ​യും പണം കടം വാങ്ങു​ന്ന​തിന്‌ ഒരുവനു ന്യായ​മായ കാരണങ്ങൾ ഉണ്ടായി​രു​ന്നേ​ക്കാം. ഗുരു​ത​ര​മായ അപകട​മോ ജോലി നഷ്ടമോ നിമിത്തം സാമ്പത്തിക പ്രതി​സന്ധി നേരി​ടു​മ്പോൾ അൽപ്പം പണം കടം വാങ്ങു​ക​യ​ല്ലാ​തെ വേറെ വഴിയി​ല്ലെന്ന്‌ അയാൾക്കു തോന്നി​യേ​ക്കാം. ബുദ്ധി​മു​ട്ടു നേരി​ടു​ന്ന​വരെ സഹായി​ക്കാൻ, അതിനു പ്രാപ്‌തി​യു​ള്ള​വരെ ബൈബിൾ പ്രോ​ത്സാ​ഹി​പ്പി​ക്കു​ന്നു. (സദൃശ​വാ​ക്യ​ങ്ങൾ 3:27) അതിൽ പണം കടം​കൊ​ടു​ക്കു​ന്ന​തും ഉൾപ്പെ​ട്ടേ​ക്കാം. എന്നാൽ ഇത്തരം ഇടപാ​ടു​കൾ നടത്തുന്ന ക്രിസ്‌ത്യാ​നി​കൾ തങ്ങളുടെ കടമകളെ എങ്ങനെ​യാ​ണു വീക്ഷി​ക്കേ​ണ്ടത്‌?

പരിചി​ന്തി​ക്കേണ്ട തത്ത്വങ്ങൾ

സാമ്പത്തിക രംഗത്തെ ഒരു വഴികാ​ട്ടി അല്ല ബൈബിൾ. കടം വാങ്ങു​ന്ന​തി​ലും കൊടു​ക്കു​ന്ന​തി​ലും ഉൾപ്പെ​ട്ടേ​ക്കാ​വുന്ന എല്ലാ വിശദാം​ശ​ങ്ങ​ളെ​യും കുറിച്ച്‌ അതു ചർച്ച ചെയ്യു​ന്ന​തു​മില്ല. പലിശ ഈടാ​ക്ക​ണ​മോ വേണ്ടയോ, വേണ​മെ​ങ്കിൽ എത്ര ശതമാനം എന്നീ കാര്യങ്ങൾ ഉൾപ്പെ​ട്ടി​രി​ക്കുന്ന വ്യക്തി​കൾക്കു വിട്ടു​കൊ​ടു​ത്തി​രി​ക്കു​ന്നു.a എന്നുവ​രി​കി​ലും, കടം വാങ്ങു​ക​യോ കൊടു​ക്കു​ക​യോ ചെയ്യുന്ന വ്യക്തി​ക​ളു​ടെ മനോ​ഭാ​വ​ത്തെ​യും പെരു​മാ​റ്റ​ത്തെ​യും ഭരിക്കേണ്ട വ്യക്തവും സ്‌നേ​ഹ​പു​ര​സ്സ​ര​വു​മായ തത്ത്വങ്ങൾ ബൈബിൾ പ്രദാനം ചെയ്യുന്നു.

കടം വാങ്ങുന്ന വ്യക്തിക്കു ബാധക​മാ​കുന്ന ചില തത്ത്വങ്ങൾ പരിചി​ന്തി​ക്കുക. “അന്യോ​ന്യം സ്‌നേ​ഹി​ക്കു​ന്നതു അല്ലാതെ ആരോ​ടും ഒന്നും കടമ്പെ​ട്ടി​രി​ക്ക​രുത്‌” എന്ന്‌ അപ്പൊ​സ്‌ത​ല​നായ പൗലൊസ്‌ ക്രിസ്‌ത്യാ​നി​കളെ ഉദ്‌ബോ​ധി​പ്പി​ച്ചു. (റോമർ 13:8) വളരെ വ്യാപ​ക​മായ അർഥമുള്ള ഒരു തത്ത്വത്തെ കുറി​ച്ചാണ്‌ പൗലൊസ്‌ ഇവിടെ സംസാ​രി​ക്കു​ന്ന​തെ​ങ്കി​ലും അവന്റെ ഉപദേശം കടബാ​ധ്യ​തകൾ വരുത്തി​വെ​ക്കു​ന്ന​തിന്‌ എതി​രെ​യുള്ള ഒരു മുന്നറി​യി​പ്പാ​യും എടുക്കാൻ കഴിയും എന്നതു തീർച്ച​യാണ്‌. ചില​പ്പോൾ പണം കടം വാങ്ങാ​തി​രി​ക്കു​ന്നത്‌ ആയിരി​ക്കും കൂടുതൽ നല്ലത്‌. എന്തു​കൊണ്ട്‌? “കടം മേടി​ക്കു​ന്നവൻ കടം കൊടു​ക്കു​ന്ന​വന്നു ദാസൻ” എന്ന്‌ സദൃശ​വാ​ക്യ​ങ്ങൾ 22:7 വിവരി​ക്കു​ന്നു. പണം തിരിച്ചു കൊടു​ക്കു​ന്ന​തു​വരെ താൻ കടപ്പാ​ടി​ലാ​ണെന്നു കടക്കാരൻ തിരി​ച്ച​റി​യണം. ഫലത്തിൽ, അയാളു​ടെ സ്വത്തുക്കൾ പൂർണ​മാ​യും അയാളു​ടെ സ്വന്തമല്ല. വ്യവസ്ഥ​പ്ര​കാ​രം കടം വീട്ടു​ന്ന​തിന്‌ അയാളു​ടെ ജീവി​ത​ത്തിൽ ഒരു സുപ്ര​ധാന സ്ഥാനം ഉണ്ടായി​രി​ക്കണം, അല്ലെങ്കിൽ പ്രശ്‌നങ്ങൾ തലപൊ​ക്കി​യേ​ക്കാം.

ഉദാഹ​ര​ണ​ത്തിന്‌, കടക്കാരൻ കൃത്യ​മാ​യി പണം തിരി​ച്ച​ട​യ്‌ക്കാ​തെ വരു​മ്പോൾ പണം കടം കൊടുത്ത വ്യക്തി മുഷി​ഞ്ഞേ​ക്കാം. തുണി വാങ്ങൽ, റെസ്റ്ററ​ന്റിൽ കയറി ഭക്ഷണം കഴിക്കൽ, വിനോ​ദ​യാ​ത്ര​യ്‌ക്കു പോകൽ എന്നിങ്ങനെ കടം വാങ്ങിയ ആൾ ചെയ്യുന്ന കാര്യ​ങ്ങളെ കടം കൊടുത്ത ആൾ സംശയ​ത്തോ​ടെ വീക്ഷി​ച്ചേ​ക്കാം. അമർഷം നുരഞ്ഞു​പൊ​ന്തി​യേ​ക്കാം. അവർ തമ്മിലും എന്തിന്‌, അവരുടെ കുടും​ബാം​ഗങ്ങൾ തമ്മിലും ഉള്ള ബന്ധം തകരു​ക​യോ വഷളാ​കു​ക​യോ ചെയ്‌തേ​ക്കാം. അതായി​രി​ക്കും കടക്കാരൻ വാക്കു പാലി​ക്കു​ന്നി​ല്ലെ​ങ്കി​ലുള്ള ദുഃഖ​ക​ര​മായ പരിണ​ത​ഫലം.—മത്തായി 5:37.

എന്നാൽ, തന്റെ നിയ​ന്ത്ര​ണ​ത്തിന്‌ അതീത​മായ എന്തെങ്കി​ലും സാഹച​ര്യം നിമിത്തം കടം തീർക്കാൻ ഒരു വ്യക്തിക്കു സാധി​ക്കാ​തെ വരു​ന്നെ​ങ്കി​ലോ? അതു കടബാ​ധ്യ​തയെ ഇല്ലാതാ​ക്കു​ന്നു​വോ? ഇല്ല. നീതി​മാൻ ‘സത്യം​ചെ​യ്‌തി​ട്ടു ചേതം വന്നാലും മാറു​ന്നില്ല’ എന്നു സങ്കീർത്ത​ന​ക്കാ​രൻ പറയുന്നു. (സങ്കീർത്തനം 15:4) എത്രയും പെട്ടെ​ന്നു​തന്നെ കടക്കാരൻ താൻ കടം വാങ്ങിയ വ്യക്തി​യോ​ടു കാര്യാ​ദി​കൾ വിശദീ​ക​രി​ക്കു​ന്ന​താണ്‌ അത്തരം സാഹച​ര്യ​ങ്ങ​ളിൽ ചെയ്യാൻ കഴിയുന്ന സ്‌നേ​ഹ​സ​മ്പ​ന്ന​വും ജ്ഞാനപൂർവ​ക​വു​മായ ഗതി. അങ്ങനെ​യാ​കു​മ്പോൾ അവർക്കു മറ്റെ​ന്തെ​ങ്കി​ലും ക്രമീ​ക​ര​ണങ്ങൾ ചെയ്യാ​നാ​കും. അതു സമാധാ​നം കാത്തു​സൂ​ക്ഷി​ക്കു​ക​യും യഹോ​വ​യാം ദൈവത്തെ പ്രീതി​പ്പെ​ടു​ത്തു​ക​യും ചെയ്യും.—സങ്കീർത്തനം 133:1; 2 കൊരി​ന്ത്യർ 13:11.

വാസ്‌ത​വ​ത്തിൽ, ഒരു വ്യക്തി തനിക്കുള്ള കടം കൈകാ​ര്യം ചെയ്യുന്ന വിധം അയാളെ കുറിച്ചു വളരെ കാര്യങ്ങൾ വെളി​പ്പെ​ടു​ത്തു​ന്നു. പണം തിരി​ച്ച​ട​യ്‌ക്കു​ന്നതു സംബന്ധി​ച്ചു യാതൊ​രു വിചാ​ര​വും ഇല്ലാത്ത തണുപ്പൻ മനോ​ഭാ​വം മറ്റുള്ള​വ​രോ​ടുള്ള താത്‌പ​ര്യ​മി​ല്ലാ​യ്‌മ​യു​ടെ പ്രകട​ന​മാണ്‌. ഫലത്തിൽ അത്തരം മനോ​ഭാ​വ​മുള്ള ഒരു വ്യക്തി സ്വാർഥ​ത​യാണ്‌ കാണി​ക്കു​ന്നത്‌, കാരണം സ്വന്തം ആഗ്രഹാ​ഭീ​ഷ്ട​ങ്ങൾക്കാണ്‌ അയാൾ ഒന്നാം സ്ഥാനം നൽകു​ന്നത്‌. (ഫിലി​പ്പി​യർ 2:4) തന്റെ കടം വീട്ടാൻ ഒരു വ്യക്തി മനഃപൂർവം കൂട്ടാ​ക്കാ​ത്ത​പ്പോൾ അയാൾ ദൈവ​മു​മ്പാ​കെ​യുള്ള തന്റെ നില അപകട​ത്തി​ലാ​ക്കു​ന്നു. അയാളു​ടെ അത്തരം പ്രവൃ​ത്തി​കൾ അത്യാ​ഗ്ര​ഹ​വും ദുഷ്ടത​യും നിറഞ്ഞ ഒരു ഹൃദയ​ത്തെ​യാണ്‌ സൂചി​പ്പി​ക്കു​ന്നത്‌.—സങ്കീർത്തനം 37:21.

കടം കൊടു​ക്കു​ന്ന​വൻ

കടം വാങ്ങുന്ന വ്യക്തി​ക്കാണ്‌ കൂടുതൽ ഉത്തരവാ​ദി​ത്വം എങ്കിലും കടം കൊടു​ക്കുന്ന വ്യക്തി​ക്കും ബാധക​മാ​കുന്ന തത്ത്വങ്ങൾ ഉണ്ട്‌. സഹായം ആവശ്യ​മു​ള്ള​വരെ സഹായി​ക്കാൻ നമുക്കു പ്രാപ്‌തി​യു​ണ്ടെ​ങ്കിൽ അങ്ങനെ ചെയ്യണ​മെന്നു ബൈബിൾ സൂചി​പ്പി​ക്കു​ന്നു. (യാക്കോബ്‌ 2:14-16) എന്നാൽ പണം കടം കൊടു​ക്കാൻ ഒരുവൻ ബാധ്യ​സ്ഥ​നാ​ണെന്ന്‌ അതിനർഥ​മില്ല, കടം ചോദി​ക്കു​ന്ന​യാൾ ഒരു ആത്മീയ സഹോ​ദരൻ ആണെങ്കിൽപോ​ലും. “വിവേ​ക​മു​ള്ളവൻ അനർത്ഥം കണ്ടു ഒളിച്ചു​കൊ​ള്ളു​ന്നു” എന്നു ബൈബിൾ പ്രസ്‌താ​വി​ക്കു​ന്നു.—സദൃശ​വാ​ക്യ​ങ്ങൾ 22:3.

കടം കൊടു​ക്കു​ന്ന​തി​ലും വാങ്ങു​ന്ന​തി​ലും ഉൾപ്പെ​ട്ടി​രി​ക്കുന്ന യഥാർഥ പ്രശ്‌നങ്ങൾ തിരി​ച്ച​റി​യുന്ന വിവേ​ക​മുള്ള ഒരു വ്യക്തി, തന്നോട്‌ ആരെങ്കി​ലും പണം വായ്‌പ ചോദി​ക്കുന്ന പക്ഷം അതിനെ കുറിച്ചു ശ്രദ്ധാ​പൂർവം പരിചി​ന്തി​ക്കും. അയാൾക്കു കടം വാങ്ങേണ്ട ആവശ്യം ഉണ്ടോ? വായ്‌പ ചോദി​ക്കുന്ന ആൾ കാര്യാ​ദി​കൾ ശരിക്കും വിലയി​രു​ത്തി​യി​ട്ടു​ണ്ടോ? കാര്യങ്ങൾ ചിട്ട​യോ​ടെ ചെയ്യുന്ന സ്വഭാവം അയാൾക്കു​ണ്ടോ? അയാൾ സത്‌പേ​രുള്ള വ്യക്തി​യാ​ണോ? വ്യവസ്ഥകൾ വിവരി​ക്കുന്ന ഒരു പ്രമാ​ണ​ത്തിൽ ഒപ്പു​വെ​ക്കാൻ അയാൾ തയ്യാറാ​ണോ? (യിരെ​മ്യാ​വു 32:8-14 താരത​മ്യം ചെയ്യുക.) വായ്‌പ തിരി​ച്ച​ട​യ്‌ക്കാൻ അയാൾക്കു യഥാർഥ​ത്തിൽ പ്രാപ്‌തി​യു​ണ്ടോ?

വായ്‌പ തിരി​ച്ച​ട​യ്‌ക്കാൻ നിവൃ​ത്തി​യി​ല്ലാത്ത, യഥാർഥ​ത്തിൽ പണത്തിന്റെ ആവശ്യം ഉള്ള, ഒരു വ്യക്തിയെ ക്രിസ്‌ത്യാ​നി കൈ​യൊ​ഴി​യണം എന്നു നിർദേ​ശി​ക്കു​കയല്ല ചെയ്യു​ന്നത്‌. ഒരു ക്രിസ്‌ത്യാ​നി​ക്കു മറ്റുള്ള​വ​രോ​ടുള്ള വ്യക്തി​പ​ര​മായ കടപ്പാ​ടു​ക​ളിൽ കേവലം കരാർ അനുസ​രിച്ച്‌ പ്രവർത്തി​ക്കു​ന്ന​തി​ലും അധികം ഉൾപ്പെ​ടു​ന്നു. “എന്നാൽ ഈ ലോക​ത്തി​ലെ വസ്‌തു​വ​ക​യു​ള്ളവൻ ആരെങ്കി​ലും തന്റെ സഹോ​ദ​രന്നു മുട്ടു​ള്ളതു കണ്ടിട്ടു അവനോ​ടു മനസ്സലി​വു കാണി​ക്കാ​ഞ്ഞാൽ ദൈവ​ത്തി​ന്റെ സ്‌നേഹം അവനിൽ എങ്ങനെ വസിക്കും?,” അപ്പൊ​സ്‌ത​ല​നായ യോഹ​ന്നാൻ ചോദി​ക്കു​ന്നു. അതേ, ക്രിസ്‌ത്യാ​നി​കൾ “വാക്കി​നാ​ലും നാവി​നാ​ലും അല്ല, പ്രവൃ​ത്തി​യി​ലും സത്യത്തി​ലും തന്നേ സ്‌നേഹി”ക്കേണ്ടതുണ്ട്‌.—1 യോഹ​ന്നാൻ 3:17, 18.

ചില​പ്പോൾ, ബുദ്ധി​മുട്ട്‌ നേരി​ടുന്ന ഒരു സഹോ​ദ​രനു വായ്‌പ കൊടു​ക്കാ​തി​രി​ക്കാൻ ഒരുവൻ തീരു​മാ​നി​ച്ചേ​ക്കാം. ഒരു സമ്മാനം കൊടു​ക്കാ​നോ മറ്റേ​തെ​ങ്കി​ലും വിധത്തിൽ സഹായി​ക്കാ​നോ ആയിരി​ക്കാം അദ്ദേഹം ആഗ്രഹി​ക്കു​ന്നത്‌. അതു​പോ​ലെ, കടം വാങ്ങിയ വ്യക്തിക്കു ബുദ്ധി​മു​ട്ടു​കൾ വരു​മ്പോൾ ദയാപു​ര​സ്സരം പെരു​മാ​റാ​നും കടം കൊടുത്ത വ്യക്തി തീരു​മാ​നി​ച്ചേ​ക്കാം. തന്റെ കടക്കാ​രന്റെ മാറിയ സാഹച​ര്യം കണക്കി​ലെ​ടുത്ത്‌ വായ്‌പ തിരി​ച്ച​ട​യ്‌ക്കാ​നുള്ള കാലാ​വധി അദ്ദേഹം നീട്ടി​ക്കൊ​ടു​ക്കു​ക​യോ തുകയിൽ ഇളവു വരുത്തു​ക​യോ ചെയ്‌തേ​ക്കാം. ചില​പ്പോൾ, കിട്ടാ​നുള്ള പണം വേണ്ടെന്നു വെച്ചെ​ന്നും വരാം. ഇവയൊ​ക്കെ​യും വ്യക്തി​പ​ര​മാ​യി എടുക്കേണ്ട തീരു​മാ​ന​ങ്ങ​ളാണ്‌.

ദൈവം എല്ലാം കാണു​ന്നു​വെ​ന്നും നമ്മുടെ നടത്ത സംബന്ധി​ച്ചും സ്വത്തുക്കൾ ഉപയോ​ഗി​ക്കുന്ന വിധം സംബന്ധി​ച്ചും നാം അവനോ​ടു കണക്കു ബോധി​പ്പി​ക്കേ​ണ്ടി​വ​രും എന്നും എല്ലാ ക്രിസ്‌ത്യാ​നി​ക​ളും മനസ്സിൽ പിടി​ക്കണം. (എബ്രായർ 4:13) “ചെയ്യു​ന്ന​തെ​ല്ലാം സ്‌നേ​ഹ​ത്തിൽ ചെയ്‌വിൻ” എന്ന ബൈബി​ളി​ന്റെ ഉപദേശം സുഹൃ​ത്തു​ക്കൾക്കി​ട​യി​ലെ കടം വാങ്ങലി​നും കൊടു​ക്ക​ലി​നും നിശ്ചയ​മാ​യും ബാധക​മാ​കു​ന്നു.—1 കൊരി​ന്ത്യർ 16:14.

[അടിക്കു​റി​പ്പു​കൾ]

[18-ാം പേജിലെ ചിത്രം]

ക്വെന്റിൻ മാസ്സി​സി​ന്റെ “പണമി​ട​പാ​ടു​കാ​ര​നും ഭാര്യ​യും” (1514)

[കടപ്പാട്‌]

Scala/Art Resource, NY