അനൊ​റെ​ക്‌സി​യ​യും ബൂളി​മി​യ​യും—യാഥാർഥ്യ​ങ്ങ​ളും അപകട​ങ്ങ​ളും

“ആഹാര​ത്തിന്‌ ഒരു വൈകാ​രിക വശമുണ്ട്‌. കലോ​റി​ക​ളി​ലോ ഗ്രാമു​ക​ളി​ലോ അളക്കാൻ സാധി​ക്കാ​ത്ത​വി​ധം അത്‌ അത്രയ​ധി​കം കനമേ​റി​യ​താണ്‌.”—ഗ്രന്ഥകർത്രി​യായ ജാനറ്റ്‌ ഗ്രീസൻ.

ഏറ്റവും സാധാ​ര​ണ​മാ​യി കാണ​പ്പെ​ടുന്ന രണ്ട്‌ ആഹാര​ശീല വൈക​ല്യ​ങ്ങ​ളാണ്‌ അനൊ​റെ​ക്‌സി​യ​യും ബൂളി​മി​യ​യും. ഓരോ​ന്നി​നും അതി​ന്റേ​തായ പ്രത്യേ​ക​തകൾ ഉണ്ട്‌. നമ്മൾ കാണാൻ പോകു​ന്ന​തു​പോ​ലെ രണ്ടും അപകട​കാ​രി​ക​ളാ​യേ​ക്കാം, ഒരുപക്ഷേ അവ മരണത്തി​നു​പോ​ലും ഇടയാ​ക്കി​യേ​ക്കാം.

അനൊ​റെ​ക്‌സിയ—സ്വയം പട്ടിണി​ക്കി​ടൽ

അനൊ​റെ​ക്‌സിയ ഉള്ളവർ ഒന്നുകിൽ ആഹാരം കഴിക്കാൻ വിസമ്മ​തി​ക്കു​ന്നു അല്ലെങ്കിൽ വികല​പോ​ഷി​ത​രാ​യി തീരത്ത​ക്ക​വി​ധം തീരെ കുറച്ച്‌ ആഹാരം കഴിക്കു​ന്നു. 17 വയസ്സുള്ള അന്റോ​യ്‌നെ​റ്റി​ന്റെ കാര്യ​മെ​ടു​ക്കാം. ഒരു ഘട്ടത്തിൽ തന്റെ തൂക്കം 37 കിലോ ആയി കുറഞ്ഞി​രി​ക്കാൻ സാധ്യ​ത​യു​ണ്ടെന്ന്‌ അവൾ പറയുന്നു. അഞ്ച്‌ അടി ഏഴ്‌ ഇഞ്ച്‌ പൊക്ക​മുള്ള ഒരു കൗമാ​ര​പ്രാ​യ​ക്കാ​രി​യെ സംബന്ധി​ച്ചി​ട​ത്തോ​ളം ഈ തൂക്കം നന്നേ കുറവാണ്‌. അവൾ ഇങ്ങനെ പറയുന്നു: “ദിവസം 250 കലോ​റി​യി​ല​ധി​കം ഞാൻ കഴിക്കു​മാ​യി​രു​ന്നില്ല. എന്തൊക്കെ കഴി​ച്ചെന്ന്‌ ഞാൻ ഒരു നോട്ടു​ബു​ക്കിൽ കുറി​ച്ചി​ടു​ക​യും ചെയ്യു​മാ​യി​രു​ന്നു.”

അനൊ​റെ​ക്‌സി​യ ബാധി​ച്ച​വരെ ആഹാരത്തെ കുറി​ച്ചുള്ള ചിന്ത നിരന്തരം വേട്ടയാ​ടി​ക്കൊ​ണ്ടി​രി​ക്കും. തൂക്കം വർധി​ക്കാ​തി​രി​ക്കാൻ അവർ അങ്ങേയ​റ്റത്തെ നടപടി​കൾ സ്വീക​രി​ക്കും. “ചുണ്ടുകൾ തുടയ്‌ക്കു​ക​യാ​ണെന്ന മട്ടിൽ വായി​ലുള്ള ആഹാരം ഞാൻ തൂവാ​ല​യി​ലേക്കു തുപ്പു​മാ​യി​രു​ന്നു,” ഹെതർ പറയുന്നു. സൂസൻ ആണെങ്കിൽ തൂക്കം വർധി​ക്കാ​തി​രി​ക്കാൻ അമിത​മാ​യി വ്യായാ​മം ചെയ്‌തി​രു​ന്നു. അവൾ പറയുന്നു: “മിക്കവാ​റും എല്ലാ ദിവസ​വും ഞാൻ 12 കിലോ​മീ​റ്റർ ഓടു​ക​യോ ഒരു മണിക്കൂർ നീന്തു​ക​യോ ചെയ്യു​മാ​യി​രു​ന്നു. ഇല്ലെങ്കിൽ എനിക്കു വല്ലാത്ത ഉത്‌ക​ണ്‌ഠ​യും കുറ്റ​ബോ​ധ​വും തോന്നു​മാ​യി​രു​ന്നു. ദിവസ​വും രാവിലെ ഞാൻ എന്റെ തൂക്കം നോക്കും, 45 കിലോ​യിൽ താഴെ​യാ​ണെന്ന്‌ ഉറപ്പു​വ​രു​ത്താൻ. എന്റെ ഏറ്റവും വലിയ വിനോ​ദം, സാധാ​ര​ണ​ഗ​തി​യിൽ ഏർപ്പെ​ടാ​റുള്ള ഒരേ​യൊ​രു വിനോ​ദം അതായി​രു​ന്നു.”

വൈരു​ധ്യ​മെ​ന്നു പറയട്ടെ, അനൊ​റെ​ക്‌സിയ ഉള്ള ചിലർ ഒന്നാന്തരം പാചക​ക്കാ​രാ​യി മാറും. സ്വാദി​ഷ്ട​മായ വിഭവങ്ങൾ തയ്യാറാ​ക്കു​മെ​ങ്കി​ലും അവർ അതു കൈ​കൊ​ണ്ടു തൊടു​ക​പോ​ലു​മില്ല. “എന്റെ നില അതീവ ഗുരു​ത​ര​മാ​യി​രുന്ന ഘട്ടത്തിൽ, വീട്ടിൽ എല്ലാ നേരവും ആഹാരം പാകം ചെയ്‌തി​രു​ന്ന​തും അനുജ​നും അനുജ​ത്തി​ക്കും പൊതി​കെട്ടി കൊടു​ത്തി​രു​ന്ന​തും ഞാനാ​യി​രു​ന്നു,” അന്റോ​യ്‌നെറ്റ്‌ പറയുന്നു. “ഫ്രിഡ്‌ജിന്‌ അടു​ത്തേ​ക്കു​പോ​ലും ഞാൻ അവരെ അടുപ്പി​ക്കു​മാ​യി​രു​ന്നില്ല. അടുക്കള എന്റെ സ്വന്തമാ​ണെന്ന്‌ എനിക്കു തോന്നി.”

എ പേരന്റ്‌സ്‌ ഗൈഡ്‌ ടു അനൊ​റെ​ക്‌സിയ ആന്റ്‌ ബൂളി​മിയ എന്ന പുസ്‌തകം പറയു​ന്നത്‌ അനുസ​രിച്ച്‌ അനൊ​റെ​ക്‌സിയ ഉള്ള ചിലർ “അങ്ങേയ​റ്റത്തെ വൃത്തി​യും വെടി​പ്പും ഉള്ളവരാ​യി മാറി​യേ​ക്കാം. വീട്ടി​ലു​ള്ളവർ മുഴുവൻ തങ്ങളുടെ നിലവാ​ര​ങ്ങ​ളിൽ എത്തി​ച്ചേ​ര​ണ​മെന്ന്‌ അവർ ശഠി​ച്ചേ​ക്കാം, അവ പ്രാവർത്തി​ക​മ​ല്ലെ​ങ്കിൽപ്പോ​ലും. മാസി​ക​യും ചെരി​പ്പും കാപ്പി​ക്ക​പ്പും എല്ലാം എപ്പോ​ഴും അതതിന്റെ സ്ഥാനത്തി​രി​ക്ക​ണ​മെന്ന്‌ അവർക്കു നിർബ​ന്ധ​മാണ്‌. വ്യക്തി​പ​ര​മായ ശുചി​ത്വ​ത്തി​ന്റെ​യും ചമയത്തി​ന്റെ​യും കാര്യ​ത്തി​ലും അവർ ഇതേ​പോ​ലെ, ഒരു പക്ഷേ ഇതില​ധി​ക​മാ​യി​പ്പോ​ലും ചിന്തയു​ള്ളവർ ആയിരി​ക്കും. മണിക്കൂ​റു​ക​ളോ​ളം അവർ കുളി​മു​റി​യി​ലോ ഡ്രസിങ്‌ റൂമി​ലോ ചെലവ​ഴി​ക്കും. മറ്റുള്ള​വർക്ക്‌ സ്‌കൂ​ളി​ലോ ജോലി​ക്കോ പോ​കേ​ണ്ട​തു​ണ്ടെ​ങ്കിൽപ്പോ​ലും അവർ ഇറങ്ങി​ക്കൊ​ടു​ക്കില്ല.”

അനൊ​റെ​ക്‌സി​യ എന്ന ഈ അസാധാ​രണ വൈക​ല്യം വികാസം പ്രാപി​ക്കു​ന്നത്‌ എങ്ങനെ​യാണ്‌? സാധാ​ര​ണ​ഗ​തി​യിൽ, കൗമാ​ര​ത്തിൽ അല്ലെങ്കിൽ യുവ​പ്രാ​യ​ത്തിൽ ഉള്ള ഒരു വ്യക്തി—മിക്ക​പ്പോ​ഴും ഒരു പെൺകു​ട്ടി—ഏതാനും കിലോ തൂക്കം കുറയ്‌ക്കാൻ തീരു​മാ​നി​ക്കു​ന്നു. എന്നാൽ ആ ലക്ഷ്യത്തിൽ എത്തി​ച്ചേർന്നി​ട്ടും അവൾ തൃപ്‌ത​യാ​കു​ന്നില്ല. കണ്ണാടി​യിൽ നോക്കു​മ്പോൾ തനിക്ക്‌ ഇപ്പോ​ഴും വണ്ണമു​ള്ള​താ​യി അവൾക്കു തോന്നും. തൂക്കം അൽപ്പം കൂടെ കുറയ്‌ക്കു​ന്നതു നല്ലതാ​യി​രി​ക്കും എന്ന്‌ അവൾ വിചാ​രി​ക്കു​ന്നു. പൊക്ക​ത്തിന്‌ അനുസ​രിച്ച തൂക്കത്തി​ന്റെ 15 ശതമാ​ന​മോ അതില​ധി​ക​മോ കുറയു​ന്ന​തു​വരെ ഈ തൂക്കം കുറയ്‌ക്കൽ പ്രക്രിയ തുടർന്നു​കൊ​ണ്ടി​രി​ക്കും.

ഈ ഘട്ടത്തിൽ, മേൽപ്പറഞ്ഞ വ്യക്തി മെലിഞ്ഞ്‌ എല്ലും തോലു​മാ​യെന്നു ബന്ധുമി​ത്രാ​ദി​കൾ പരാതി പറയാൻ തുടങ്ങു​ന്നു. എന്നാൽ അനൊ​റെ​ക്‌സിയ ഉള്ള ഒരു വ്യക്തി കാര്യങ്ങൾ മറ്റൊരു വിധത്തി​ലാ​ണു കാണു​ന്നത്‌. “ഞാൻ വല്ലാതെ മെലി​ഞ്ഞു​പോ​യെ​ന്നൊ​ന്നും എനിക്കു തോന്നി​യില്ല,” അനൊ​റെ​ക്‌സിയ ബാധി​ത​നായ അഞ്ച്‌ അടി ഒമ്പത്‌ ഇഞ്ച്‌ പൊക്ക​മുള്ള അലൻ പറയുന്നു. ഒരു ഘട്ടത്തിൽ അദ്ദേഹ​ത്തി​ന്റെ തൂക്കം 33 കിലോ ആയി കുറഞ്ഞി​രു​ന്നു. “തൂക്കം കുറയു​ന്തോ​റും നിങ്ങളു​ടെ മനസ്സ്‌ കൂടുതൽ വികല​മാ​കും, അങ്ങനെ നിങ്ങളെ വ്യക്തമാ​യി കാണാൻ നിങ്ങൾക്കു സാധി​ക്കാ​താ​കും” എന്ന്‌ അദ്ദേഹം പറയുന്നു.a

കാല​ക്ര​മേണ അസ്ഥി​ദ്ര​വീ​ക​രണം, വൃക്ക തകരാറ്‌ തുടങ്ങി ഗുരു​ത​ര​മായ ആരോഗ്യ പ്രശ്‌ന​ങ്ങൾക്ക്‌—ചില​പ്പോൾ മരണത്തി​നു​തന്നെ—അനൊ​റെ​ക്‌സിയ ഇടയാ​ക്കി​യേ​ക്കാം. “ശരീര​ത്തിന്‌ ആവശ്യ​മായ പല പോഷ​ക​ങ്ങ​ളും ഞാൻ കഴിച്ചി​രു​ന്നി​ല്ലെ​ന്നും എന്റെ ആഹാര​ശീ​ലം രണ്ടു മാസം കൂടെ തുടർന്നു​കൊ​ണ്ടു പോയി​രു​ന്നെ​ങ്കിൽ ഞാൻ വികല​പോ​ഷ​ണ​ത്താൽ മരിച്ചു പോകു​മാ​യി​രു​ന്നെ​ന്നും എന്റെ ഡോക്ടർ പറഞ്ഞു,” ഹെതർ പറയുന്നു. പത്തു വർഷ കാലയ​ള​വിൽ അനൊ​റെ​ക്‌സിയ ഉള്ളതായി കണ്ടെത്ത​പ്പെട്ട സ്‌ത്രീ​ക​ളു​ടെ ഏതാണ്ട്‌ 5 ശതമാനം മരിക്കു​ന്ന​താ​യി ദ ഹാർവാർഡ്‌ മെന്റൽ ഹെൽത്ത്‌ ലെറ്റർ റിപ്പോർട്ടു ചെയ്യുന്നു.

ബൂളി​മിയ—വാരി​വ​ലി​ച്ചു തിന്നുക എന്നിട്ട്‌ പുറത്തു കളയുക

ബൂളി​മിയ നെർവോസ എന്ന്‌ അറിയ​പ്പെ​ടുന്ന ആഹാര​ശീല വൈക​ല്യ​ത്തിൽ ആഹാരം വാരി​വ​ലി​ച്ചു തിന്നു​ന്ന​തും (ഒരുപക്ഷേ 5,000 കലോ​റി​യോ അതിൽ കൂടു​ത​ലോ ആഹാരം ഒറ്റയടിക്ക്‌ അകത്താക്കൽ) പിന്നെ അതു പുറത്തു കളയു​ന്ന​തും (പലപ്പോ​ഴും, ഛർദി​ച്ചോ വിരേ​ച​നൗ​ഷ​ധങ്ങൾ ഉപയോ​ഗി​ച്ചോ കഴിച്ച ആഹാരം പുറന്തള്ളൽ) ഉൾപ്പെ​ടു​ന്നു.b

അനൊ​റെ​ക്‌സി​യ​യിൽനി​ന്നു വ്യത്യ​സ്‌ത​മാ​യി ബൂളി​മിയ എളുപ്പ​ത്തിൽ തിരി​ച്ച​റി​യാ​നാ​വില്ല. ഈ വൈക​ല്യം ഉള്ള വ്യക്തി​യു​ടെ ശരീരം അസാധാ​ര​ണ​മാം വിധം ശോഷി​ച്ച​ത​ല്ലാ​യി​രി​ക്കാം. മാത്രമല്ല, അവളുടെ ആഹാര​ശീ​ലങ്ങൾ സാധാരണ നിലയി​ലാ​ണെന്നു മറ്റുള്ള​വർക്കു തോന്നി​യേ​ക്കാം. എന്നാൽ ബൂളി​മിയ ഉള്ള വ്യക്തി​യു​ടെ ജീവിതം തീർച്ച​യാ​യും സാധാരണ നിലയി​ലല്ല. ആഹാര​ത്തി​ന​ല്ലാ​തെ മറ്റൊ​ന്നി​നും അവളുടെ ചിന്തയിൽ സ്ഥാനമില്ല. “ആഹാരം അകത്താ​ക്കു​ന്ന​തി​ലും അതു ഛർദിച്ചു കളയു​ന്ന​തി​ലും മുഴു​കു​ന്തോ​റും മറ്റു കാര്യ​ങ്ങ​ളെ​യോ ആളുക​ളെ​യോ കുറി​ച്ചുള്ള എന്റെ ചിന്ത കുറഞ്ഞു​വന്നു,” 16 വയസ്സു​കാ​രി​യായ മെലിൻഡ പറയുന്നു. “കൂട്ടു​കാ​രോ​ടൊ​പ്പം കളിച്ചു രസിച്ചു നടക്കാൻ ഞാൻ മറന്നു​വെ​ന്നു​തന്നെ പറയാം.”

ആഹാര​ശീ​ല വൈക​ല്യ​ങ്ങളെ കുറിച്ച്‌ എഴുതുന്ന ഒരുവ​ളും ആ മേഖല​യി​ലെ അധ്യാ​പി​ക​യു​മായ ഗെനിൻ റോത്ത്‌ ആഹാരം വാരി​വ​ലി​ച്ചു ഭക്ഷിക്കു​ന്ന​തി​നെ “മുപ്പതു മിനിറ്റ്‌ നീണ്ടു​നിൽക്കുന്ന ഭ്രാന്ത​മായ ഒരു പ്രവൃത്തി, നരകത്തി​ലേ​ക്കുള്ള വീഴ്‌ച” എന്നാണ്‌ വർണി​ക്കു​ന്നത്‌. അപ്രകാ​രം ആഹാരം അകത്താ​ക്കു​മ്പോൾ “മറ്റൊ​ന്നി​നും സ്ഥാനമില്ല, സുഹൃ​ത്തു​ക്ക​ളോ കുടും​ബ​മോ ഒന്നും പ്രശ്‌നമല്ല . . . ആഹാരം എന്ന ഒറ്റ ചിന്ത മാത്രമേ ഉണ്ടായി​രി​ക്കൂ” എന്ന്‌ അവർ പറയുന്നു. ഈ വൈക​ല്യ​മുള്ള 17 വയസ്സു​കാ​രി ലിഡിയ തന്റെ അവസ്ഥയെ വർണി​ക്കാൻ പറ്റിയ ഒരു ഉദാഹ​രണം നൽകുന്നു. “ഉപയോ​ഗ​ശൂ​ന്യ​മായ വസ്‌തു​ക്കൾ ഞെരിച്ചു പൊടി​ക്കുന്ന ഒരു യന്ത്രമാണ്‌ ഞാൻ എന്ന്‌ എനിക്കു തോന്നി,” അവൾ പറയുന്നു. “സാധനങ്ങൾ കുത്തി​നി​റ​യ്‌ക്കുക, ഞെരിച്ചു പൊടി​ക്കുക, എന്നിട്ട്‌ പുറന്ത​ള്ളുക. ഒരേ പ്രക്രിയ തന്നെ വീണ്ടും വീണ്ടും ആവർത്തി​ക്കു​ന്നു.”

ബൂളി​മിയ ഉള്ള വ്യക്തി അനിയ​ന്ത്രി​ത​മാ​യി ആഹാരം അകത്താ​ക്കു​മെ​ങ്കി​ലും തൂക്കം വർധി​ക്കാ​തി​രി​ക്കാൻ കിണഞ്ഞു പരി​ശ്ര​മി​ക്കും. അതു​കൊണ്ട്‌, ആഹാരം അകത്താ​ക്കി​യ​ശേഷം അതു ശരീര​ത്തിൽ കൊഴു​പ്പാ​യി മാറു​ന്ന​തി​നു മുമ്പ്‌ ഉടനടി അവൾ അത്‌ ഛർദിച്ചു കളയു​ക​യോ വിരേ​ച​നൗ​ഷ​ധങ്ങൾ കഴിച്ച്‌ പുറന്ത​ള്ളു​ക​യോ ചെയ്യും.c നമുക്ക്‌ ഇതു കേൾക്കു​ന്ന​തു​തന്നെ അരോ​ച​ക​മാ​യി തോന്നു​മെ​ങ്കി​ലും ഇതു ചെയ്‌തു ശീലിച്ച ബൂളി​മിയ രോഗിക്ക്‌ അങ്ങനെ തോന്നു​ക​യില്ല. “എത്രയ​ധി​കം നിങ്ങൾ ആഹാരം അകത്താ​ക്കു​ക​യും പിന്നീട്‌ അതു പുറത്തു കളയു​ക​യും ചെയ്യു​ന്നു​വോ അത്രയ​ധി​കം അതു നിങ്ങൾക്ക്‌ എളുപ്പ​മാ​യി​ത്തീ​രും,” സാമൂ​ഹിക പ്രവർത്ത​ക​യായ നാൻസി കൊ​ളൊ​ഡ്‌നി വിശദ​മാ​ക്കു​ന്നു. “ആദ്യ​മൊ​ക്കെ അറപ്പും പേടി​യും തോന്നു​മെ​ങ്കി​ലും താമസി​യാ​തെ, ബൂളി​മി​യ​യു​ടെ പ്രത്യേ​ക​ത​ക​ളായ ഈ പ്രക്രി​യകൾ വീണ്ടും വീണ്ടും ആവർത്തി​ക്കാ​നുള്ള അനിയ​ന്ത്രിത പ്രേര​ണ​യു​ണ്ടാ​കും.”

ബൂളി​മി​യ അങ്ങേയറ്റം അപകട​കാ​രി​യാണ്‌. ഉദാഹ​ര​ണ​ത്തിന്‌, കൂടെ​ക്കൂ​ടെ ആഹാരം ഛർദിച്ചു കളയു​ന്ന​തു​മൂ​ലം ആമാശ​യ​ത്തി​ലെ ദ്രവീ​കരണ സ്വഭാ​വ​മുള്ള അമ്ലങ്ങൾ വായിൽ പറ്റുക​യും അതു പല്ലിന്റെ ഇനാമൽ ദ്രവി​ച്ചു​പോ​കു​ന്ന​തിന്‌ ഇടയാ​ക്കു​ക​യും ചെയ്യും. മേൽപ്പറഞ്ഞ നടപടി ബൂളി​മിയ ഉള്ള വ്യക്തി​യു​ടെ അന്നനാളം, കരൾ, ശ്വാസ​കോ​ശങ്ങൾ, ഹൃദയം എന്നിവ​യ്‌ക്കും തകരാറു വരുത്തി​യേ​ക്കാം. അങ്ങേയറ്റം ഗുരു​ത​ര​മായ സാഹച​ര്യ​ങ്ങ​ളിൽ ഛർദി മൂലം ആമാശയം പൊട്ടി​യേ​ക്കാം, ചില​പ്പോൾ മരണം​തന്നെ സംഭവി​ച്ചെ​ന്നും വരാം. വിരേ​ച​നൗ​ഷ​ധ​ങ്ങ​ളു​ടെ അമിത​മായ ഉപയോ​ഗ​വും അപകടം വരുത്തി​വെ​ച്ചേ​ക്കാം. അത്‌ കുടലി​ന്റെ പ്രവർത്ത​നങ്ങൾ തകരാ​റി​ലാ​ക്കു​ക​യും അങ്ങനെ തുടർച്ച​യായ അതിസാ​ര​ത്തി​നും മലാശ​യ​ത്തിൽനി​ന്നുള്ള രക്തസ്രാ​വ​ത്തി​നും ഇടയാ​ക്കു​ക​യും ചെയ്യും. കൂടെ​ക്കൂ​ടെ​യുള്ള ഛർദി​യു​ടെ കാര്യ​ത്തി​ലെ​ന്ന​പോ​ലെ​തന്നെ അങ്ങേയറ്റം ഗുരു​ത​ര​മായ സാഹച​ര്യ​ങ്ങ​ളിൽ വിരേ​ച​നൗ​ഷ​ധ​ങ്ങ​ളു​ടെ ദുരു​പ​യോ​ഗം ഹൃദയ​സ്‌തം​ഭ​ന​ത്തിന്‌ ഇടയാ​ക്കി​യേ​ക്കാം.

നാഷണൽ ഇൻസ്റ്റി​റ്റ്യൂട്ട്‌ ഓഫ്‌ മെന്റൽ ഹെൽത്ത്‌ പറയുന്ന പ്രകാരം, ആഹാര​ശീല വൈക​ല്യ​ങ്ങൾ ഉള്ളവരു​ടെ എണ്ണം നിരന്തരം വർധി​ച്ചു​കൊ​ണ്ടി​രി​ക്കു​ന്നു. സ്വയം പട്ടിണി​ക്കി​ട്ടു​കൊണ്ട്‌ ജീവിതം പന്താടാൻ ഒരു യുവതി​യെ പ്രേരി​പ്പി​ക്കു​ന്നത്‌ എന്താണ്‌? ഭക്ഷണ​ത്തോട്‌ അമിത​മായ പ്രിയം തോന്നി അതു വാരി​വ​ലി​ച്ചു ഭക്ഷിക്കാ​നും പിന്നീട്‌ തൂക്കം വർധി​ക്കു​മോ എന്ന അമിത ഭയത്താൽ കഴിച്ച ആഹാരം പുറത്തു കളയാ​നും ഒരു പെൺകു​ട്ടി​യെ പ്രേരി​പ്പി​ക്കു​ന്നത്‌ എന്താണ്‌? അടുത്ത ലേഖന​ത്തിൽ ഈ ചോദ്യ​ങ്ങൾ പരിചി​ന്തി​ക്കു​ന്ന​താ​യി​രി​ക്കും.

[അടിക്കു​റി​പ്പു​കൾ]