ആഹാരം നിങ്ങളു​ടെ ശത്രു ആകു​മ്പോൾ

കൗമാരപ്രായത്തിൽ കളിയാ​ക്ക​ലി​നും പരിഹാ​സ​ത്തി​നും പാത്ര​മാ​യി​രു​ന്ന​താ​യി ജീൻ അനുസ്‌മ​രി​ക്കു​ന്നു. കാരണം? ക്ലാസ്സിലെ ഏറ്റവും പൊക്ക​വും വണ്ണവും ഉള്ള കുട്ടി അവൾ ആയിരു​ന്നു. എന്നാൽ അതു മാത്ര​മാ​യി​രു​ന്നില്ല പ്രശ്‌നം. “ഇതി​നെ​ല്ലാം പുറമേ ഞാൻ ഒരു നാണം​കു​ണു​ങ്ങി ആയിരു​ന്നു. ഒതുങ്ങി​ക്ക​ഴി​യാ​നാ​യി​രു​ന്നു എനിക്ക്‌ ഇഷ്ടം,” ജീൻ പറയുന്നു. “മിക്ക​പ്പോ​ഴും ഞാൻ തനിച്ചാ​യി​രു​ന്നു. കൂട്ടു​കൂ​ടാ​നൊ​ക്കെ ഇഷ്ടമാ​യി​രു​ന്നെ​ങ്കി​ലും ആരും എന്നെ കൂട്ടത്തിൽ കൂട്ടു​ന്നി​ല്ലെന്ന തോന്ന​ലാ​യി​രു​ന്നു എപ്പോ​ഴും.”

എല്ലാ പ്രശ്‌ന​ങ്ങൾക്കും കാരണം തന്റെ വണ്ണം ആണെന്നും മെലിഞ്ഞ്‌ ഒതുങ്ങിയ ശരീരം എല്ലാറ്റി​നും പരിഹാ​രം ആകു​മെ​ന്നും അവൾ ഉറപ്പിച്ചു. ജീനിന്‌ പൊണ്ണ​ത്ത​ടി​യൊ​ന്നും ഇല്ലായി​രു​ന്നു. ആറ്‌ അടി പൊക്കം ഉണ്ടായി​രുന്ന അവളെ സംബന്ധി​ച്ചി​ട​ത്തോ​ളം 66 കിലോ പാകത്തി​നുള്ള തൂക്കമാ​യി​രു​ന്നു. എങ്കിലും തനിക്ക്‌ അമിത​വണ്ണം ഉള്ളതായി ജീൻ കരുതി. അങ്ങനെ 23-ാം വയസ്സിൽ അവൾ തൂക്കം കുറയ്‌ക്കാൻ തീരു​മാ​നി​ച്ചു. ‘ഒന്നു മെലിഞ്ഞു കിട്ടി​യാൽ ആളുകൾക്കൊ​ക്കെ എന്നെ ഇഷ്ടമാ​കും. മറ്റുള്ളവർ എന്നെ അംഗീ​ക​രി​ക്കു​ന്ന​താ​യും പ്രാധാ​ന്യ​മുള്ള വ്യക്തി​യാ​യി കണക്കാ​ക്കു​ന്ന​താ​യും എനിക്കു തോന്നും’ എന്ന്‌ അവൾ ന്യായ​വാ​ദം ചെയ്‌തു.

“ബുദ്ധി​ശൂ​ന്യ​മായ അത്തരം ചിന്താ​ഗതി എന്നെ കൊ​ണ്ടെ​ത്തി​ച്ചത്‌ 12 വർഷം നീണ്ടു​നിന്ന അനൊ​റെ​ക്‌സിയ നെർവോ​സ​യി​ലും ബൂളി​മി​യ​യി​ലും ആണ്‌,” ജീൻ വിവരി​ക്കു​ന്നു. “എന്റെ വണ്ണമൊ​ക്കെ കുറഞ്ഞു. കുറ​ഞ്ഞെന്നു പറഞ്ഞാൽ തീരെ കുറഞ്ഞു. എഴു​ന്നേറ്റു നിൽക്കാൻ പോലും എനിക്കു ശേഷി​യി​ല്ലാ​താ​യി. പക്ഷേ ഒരു സന്തുഷ്ട ജീവിതം കെട്ടി​പ്പ​ടു​ക്കു​ന്ന​തി​നു പകരം ഞാൻ എന്റെ ആരോ​ഗ്യം നശിപ്പി​ച്ചു. വിഷാ​ദ​വും ദുരി​ത​വും പത്തു വർഷത്തി​ല​ധി​കം എന്നെ വേട്ടയാ​ടി.”

ജീനി​ന്റേത്‌ ഒറ്റപ്പെട്ട ഒരു സംഭവമല്ല. അമേരി​ക്ക​യി​ലെ പെൺകു​ട്ടി​ക​ളിൽ 100-ൽ ഒരാൾ വീതം കൗമാ​ര​ത്തി​ലോ യൗവനാ​രം​ഭ​ത്തി​ലോ അനൊ​റെ​ക്‌സിയ നെർവോസ വളർത്തി​യെ​ടു​ക്കു​ന്ന​താ​യി ഒരു കണക്കു സൂചി​പ്പി​ക്കു​ന്നു. ബൂളി​മിയ ഉള്ളവരു​ടെ എണ്ണമാ​കട്ടെ അതിന്റെ മൂന്നി​ര​ട്ടി​യെ​ങ്കി​ലും വന്നേക്കാം. “സ്‌കൂ​ളു​ക​ളി​ലെ​യും കോ​ളെ​ജു​ക​ളി​ലെ​യും കുട്ടി​ക​ളു​മാ​യി ഞാൻ ഇടപഴ​കാൻ തുടങ്ങി​യി​ട്ടു വർഷങ്ങ​ളാ​യി. ആഹാര​ശീല വൈക​ല്യ​ങ്ങൾ മുമ്പെ​ന്ന​ത്തെ​യും പോ​ലെ​തന്നെ വ്യാപ​ക​മാ​യി​രി​ക്കു​ന്ന​താ​യി ഞാൻ കാണുന്നു” എന്ന്‌ ഡോ. മേരി പൈഫർ പറയുന്നു.

ആഹാര​ശീ​ല വൈക​ല്യ​ങ്ങൾ പലവി​ധ​ത്തി​ലുണ്ട്‌. ഒരിക്കൽ സമ്പന്നരു​ടെ പ്രശ്‌ന​മാ​യി വീക്ഷി​ക്ക​പ്പെ​ട്ടി​രുന്ന അത്‌ ഇപ്പോൾ എല്ലാ വർഗീയ, സാമൂ​ഹിക, സാമ്പത്തിക തലങ്ങളിൽ പെട്ടവ​രു​ടെ​യും ഇടയിൽ കണ്ടുവ​രു​ന്ന​താ​യി കരുത​പ്പെ​ടു​ന്നു. ഈ വൈക​ല്യ​മു​ള്ള​താ​യി കണ്ടെത്ത​പ്പെ​ടുന്ന പുരു​ഷ​ന്മാ​രു​ടെ എണ്ണവും വർധി​ക്കു​ക​യാണ്‌. അതു​കൊണ്ട്‌, ആഹാര​ശീല വൈക​ല്യ​ങ്ങൾ “സ്‌ത്രീ​പു​രുഷ വിവേ​ചനം കാട്ടു​ന്നില്ല” എന്നു ന്യൂസ്‌വീക്ക്‌ മാഗസിൻ പറയു​ക​യു​ണ്ടാ​യി.

എന്നാൽ ഏറ്റവും പരി​ഭ്രാ​ന്തി ഉളവാ​ക്കുന്ന സംഗതി, ആഹാര​ശീല വൈക​ല്യ​ങ്ങൾക്കാ​യി ചികി​ത്സി​ക്ക​പ്പെ​ടു​ന്ന​വ​രു​ടെ ശരാശരി പ്രായം കുറഞ്ഞു​വ​രു​ന്ന​താ​യി കാണ​പ്പെ​ടു​ന്നു എന്നതാണ്‌. “പത്തു വയസ്സിൽ താഴെ​യുള്ള, എന്തിന്‌ 6 വയസ്സു​പോ​ലും ഉള്ള പെൺകു​ട്ടി​കളെ ആശുപ​ത്രി​ക​ളിൽ പ്രവേ​ശി​പ്പി​ക്കേണ്ടി വരുന്നുണ്ട്‌,” ടൊ​റൊ​ന്റോ​യി​ലെ ഒരു ആഹാര​ശീല വൈകല്യ കേന്ദ്ര​ത്തി​ന്റെ താത്‌കാ​ലിക ഡയറക്‌ട​റാ​യി സേവി​ക്കുന്ന മാർഗ​രറ്റ്‌ ബെക്ക്‌ പറയുന്നു. “അവരുടെ എണ്ണം കുറവാണ്‌. എന്നാൽ അതു വർധി​ച്ചു​വ​രു​ക​യാണ്‌,” അവർ കൂട്ടി​ച്ചേർക്കു​ന്നു.

ആഹാര​ശീ​ല വൈക​ല്യ​ങ്ങൾ ദശലക്ഷ​ക്ക​ണ​ക്കിന്‌ ആളുകളെ—പ്രധാ​ന​മാ​യും പെൺകു​ട്ടി​ക​ളെ​യും യുവതി​ക​ളെ​യും—ബാധി​ക്കു​ന്നു.a “ആഹാരം കഴിക്കു​ന്ന​തി​നെ കുറിച്ച്‌ മറ്റുള്ള​വർക്ക്‌ ഉള്ള അതേ വീക്ഷണ​മോ ഉദ്ദേശ്യ​മോ അല്ല അവർക്ക്‌ ഉള്ളത്‌,” സാമൂ​ഹിക പ്രവർത്ത​ക​യായ നാൻസി കൊ​ളൊ​ഡ്‌നി പറയുന്നു. “വിശപ്പ​ട​ക്കു​ന്ന​തി​നോ പോഷ​ണ​വും നല്ല ആരോ​ഗ്യ​വും ലഭിക്കു​ന്ന​തി​നോ സന്തോ​ഷ​ത്തി​നു വേണ്ടി​യോ അതുമ​ല്ലെ​ങ്കിൽ മറ്റുള്ള​വ​രു​ടെ സഹവാസം ആസ്വദിച്ച്‌ കഴിക്കു​ന്ന​തി​നോ പകരം അവർ ആഹാര​ത്തോ​ടു വിചി​ത്ര​മായ ഒരു സമീപനം വളർത്തി​യെ​ടു​ക്കു​ന്നു. കൂടാതെ, ആഹാരം കഴിക്കു​ന്ന​തി​നു മുമ്പ്‌ അസാധാ​ര​ണ​മായ അനുഷ്‌ഠാന മുറക​ളിൽ ഏർപ്പെ​ടുക അല്ലെങ്കിൽ കഴിച്ച ആഹാരം ഉടനെ തന്നെ പുറത്തു കളയാൻ ശ്രമി​ക്കുക തുടങ്ങിയ ‘സ്വാഭാ​വി​കം’ അല്ലാത്തത്‌ എന്നു കരുത​പ്പെ​ടുന്ന കാര്യ​ങ്ങ​ളും അവർ ചെയ്യുന്നു.”

സാധാ​ര​ണ​മാ​യി കണ്ടുവ​രുന്ന രണ്ടുതരം ആഹാര​ശീല വൈക​ല്യ​ങ്ങൾ നമുക്ക്‌ അടുത്തു പരി​ശോ​ധി​ക്കാം: അനൊ​റെ​ക്‌സിയ നെർവോ​സ​യും ബൂളി​മിയ നെർവോ​സ​യും.

[അടിക്കു​റി​പ്പു​കൾ]