ദാരി​ദ്ര്യ​ത്തി​ന്റെ തടവു​കാർ

യേശു​ക്രി​സ്‌തു തന്റെ ശിഷ്യ​ന്മാ​രോട്‌ പൊ.യു. 33-ൽ ഇങ്ങനെ പറയു​ക​യു​ണ്ടാ​യി: ‘ദരിദ്രർ നിങ്ങൾക്കു എല്ലായ്‌പ്പോ​ഴും അടുക്കെ ഉണ്ട്‌.’ (മത്തായി 26:11) അവൻ എന്താണ്‌ അർഥമാ​ക്കി​യത്‌? ദാരി​ദ്ര്യം ഒരിക്ക​ലും ഇല്ലായ്‌മ ചെയ്യാ​നാ​കില്ല എന്നാണോ?

ഐക്യ​രാ​ഷ്‌ട്ര വികസന പദ്ധതി​യു​ടെ കാര്യ​നിർവാ​ഹ​ക​നായ ജെയിംസ്‌ സ്‌പെത്ത്‌ ഇങ്ങനെ പറഞ്ഞു: “[ദാരി​ദ്ര്യം] നമ്മുടെ സന്തതസ​ഹ​ചാ​രി ആയിരി​ക്കു​മെന്നു സമ്മതിച്ചു കൊടു​ക്കാ​നാ​കില്ല. ദാരി​ദ്ര്യ​ത്തെ ചരി​ത്ര​ത്തി​ന്റെ താളു​ക​ളിൽ മാത്ര​മാ​യി ഒതുക്കി നിർത്താൻവേണ്ട വിഭവ​ങ്ങ​ളും അറിവും വൈദ​ഗ്‌ധ്യ​വു​മെ​ല്ലാം ആധുനിക ലോക​ത്തി​നുണ്ട്‌.” എന്നാൽ ആധുനിക ലോക​ത്തിന്‌ ദാരി​ദ്ര്യ​ത്തെ നിർമാർജനം ചെയ്യാൻ സാധി​ക്കു​മോ?

മാനു​ഷി​ക ശ്രമങ്ങൾകൊ​ണ്ടു ദാരി​ദ്ര്യ​ത്തെ തുടച്ചു നീക്കാൻ ആകു​മെന്ന്‌ ഐക്യ​രാ​ഷ്‌ട്ര​ങ്ങ​ളു​ടെ പൊതു​സഭ പ്രതീ​ക്ഷി​ക്കു​ന്നു​വെന്നു വ്യക്തം. കാരണം, 1997 മുതൽ 2006 വരെയുള്ള വർഷങ്ങളെ അത്‌ ആദ്യത്തെ “ദാരി​ദ്ര്യ നിർമാർജന ഐക്യ​രാ​ഷ്‌ട്ര ദശക”മായി പ്രഖ്യാ​പി​ക്കു​ക​യു​ണ്ടാ​യി. സാമ്പത്തിക വികസനം ത്വരി​ത​പ്പെ​ടു​ത്തു​ന്ന​തി​നും അടിസ്ഥാന സേവന​ങ്ങ​ളു​ടെ പ്രാപ്യത മെച്ച​പ്പെ​ടു​ത്തു​ന്ന​തി​നും സ്‌ത്രീ​ക​ളു​ടെ നില മെച്ച​പ്പെ​ടു​ത്തു​ന്ന​തി​നും വരുമാ​ന​വും തൊഴിൽ അവസര​ങ്ങ​ളും സൃഷ്ടി​ക്കു​ന്ന​തി​നും ഗവൺമെ​ന്റു​ക​ളോ​ടും ആളുക​ളോ​ടും സ്ഥാപന​ങ്ങ​ളോ​ടു​മൊ​പ്പം തോ​ളോ​ടു തോൾ ചേർന്നു പ്രവർത്തി​ക്ക​ണ​മെന്ന നിർദേശം യുഎൻ മുമ്പോ​ട്ടു​വെച്ചു.

ലക്ഷ്യങ്ങ​ളെ​ല്ലാം കെങ്കേ​മം​തന്നെ! എന്നാൽ ലോക സമുദാ​യം അവ എന്നെങ്കി​ലും എത്തിപ്പി​ടി​ക്കു​മോ? ദാരി​ദ്ര്യം നിർമാർജനം ചെയ്യാ​നുള്ള മാനു​ഷിക ശ്രമങ്ങൾക്ക്‌ തടസ്സം സൃഷ്ടി​ക്കുന്ന ഏതാനും ഘടകങ്ങ​ളെ​ക്കു​റി​ച്ചു പരിചി​ന്തി​ക്കുക.

പട്ടിണി​യും വികല​പോ​ഷ​ണ​വും

സയറി​ലാണ്‌ ആയെമ്പ​യു​ടെ താമസം. കുടും​ബ​ത്തിൽ അവളെ ആശ്രയി​ച്ചു കഴിയു​ന്നതു 15 പേരാണ്‌. ചില​പ്പോ​ഴൊ​ക്കെ ആ കുടും​ബ​ത്തിന്‌ ഒരു നേരത്തെ ആഹാര​ത്തി​നു വകയു​ണ്ടാ​യെന്നു വരാം—അതാകട്ടെ, ഉപ്പും പഞ്ചസാ​ര​യും കസാവ ഇലകളും ചേർത്ത്‌ ചോള​പ്പൊ​ടി​കൊണ്ട്‌ തയ്യാറാ​ക്കുന്ന കുറു​ക്കും. ചില​പ്പോൾ രണ്ടോ മൂന്നോ ദിവസ​ത്തേക്ക്‌ അവർക്ക്‌ ആഹാര​മു​ണ്ടാ​യി​രി​ക്കില്ല. “കുട്ടികൾ വിശന്നു കരയു​ന്ന​തു​വരെ ഞാൻ കാത്തി​രി​ക്കും, എന്തെങ്കി​ലും ഉണ്ടാക്കാൻ,” ആയെമ്പ പറയുന്നു.

അവരു​ടേത്‌ ഒറ്റപ്പെട്ട സ്ഥിതി​വി​ശേ​ഷമല്ല. വികസ്വര രാഷ്‌ട്ര​ങ്ങ​ളിൽ 5-ൽ ഒരാൾ വീതം വിശ​ന്നൊ​ട്ടിയ വയറോ​ടെ​യാണ്‌ അന്തിയു​റ​ങ്ങു​ന്നത്‌. ലോക​വ്യാ​പ​ക​മാ​യി ഏതാണ്ട്‌ 80 കോടി ആളുകൾ—അതിൽ 20 കോടി​യോ​ളം കുട്ടി​ക​ളാണ്‌—സ്ഥിരം വികല പോഷി​ത​രാണ്‌. ഈ കുട്ടി​കൾക്കു സാധാരണ വളർച്ച​യില്ല; കൂടെ​ക്കൂ​ടെ അവർക്കു രോഗ​വും പിടി​പെ​ടു​ന്നു. സ്‌കൂൾ പഠനത്തിൽ അവർ മോശ​മാ​യി​രി​ക്കും. വലുതാ​യി കഴിയു​മ്പോൾ ഇതി​ന്റെ​യെ​ല്ലാം ഭവിഷ്യ​ത്തു​ക​ളും അവർ അനുഭ​വി​ക്കു​ന്നു. അങ്ങനെ ദാരി​ദ്ര്യം മിക്ക​പ്പോ​ഴും വികല പോഷ​ണ​ത്തി​ലേക്കു നയിക്കു​ന്നു, വികല പോഷണം തിരിച്ച്‌ ദാരി​ദ്ര്യ​ത്തി​ലേ​ക്കും.

ദാരി​ദ്ര്യം, പട്ടിണി, വികല പോഷണം എന്നിവ വിപു​ല​വ്യാ​പ​ക​മാ​യ​തി​നാൽ അവ ഇല്ലായ്‌മ ചെയ്യാൻ നടത്തുന്ന രാഷ്‌ട്രീയ, സാമ്പത്തിക, സാമൂ​ഹിക ശ്രമങ്ങൾ വിഫല​മാ​കു​ന്നു. തീർച്ച​യാ​യും, സ്ഥിതി​വി​ശേഷം മെച്ച​പ്പെ​ടു​ന്ന​തി​നു പകരം കൂടുതൽ വഷളാ​യി​ക്കൊ​ണ്ടി​രി​ക്കു​ക​യാണ്‌.

മോശ​മായ ആരോ​ഗ്യം

ലോകാ​രോ​ഗ്യ സംഘടന പറയുന്ന പ്രകാരം ദാരി​ദ്ര്യം “ലോക​ത്തി​ലെ ഏറ്റവും മാരക​മായ രോഗ”വും “മരണം, രോഗം, കഷ്ടപ്പാട്‌ എന്നിവ​യു​ടെ ഏറ്റവും വലിയ അടിസ്ഥാന കാരണ”വുമാണ്‌.

ലാറ്റിൻ അമേരിക്ക, ഏഷ്യ, ആഫ്രിക്ക എന്നിവി​ട​ങ്ങ​ളിൽ കുറഞ്ഞത്‌ 60 കോടി ആളുക​ളെ​ങ്കി​ലും നല്ല പാർപ്പി​ട​വും ആവശ്യ​ത്തിന്‌ വെള്ളവും ശുചിത്വ സൗകര്യ​ങ്ങ​ളും മലിനജല നിർഗമന സംവി​ധാ​ന​ങ്ങ​ളും ഇല്ലാത്ത വീടു​ക​ളി​ലാണ്‌ താമസി​ക്കു​ന്ന​തെ​ന്നും അവരുടെ ജീവനും ആരോ​ഗ്യ​വും നിരന്തര ഭീഷണി​യിൻ കീഴി​ലാ​ണെ​ന്നും നഗരവ​ത്‌ക​രി​ക്ക​പ്പെ​ടുന്ന ഒരു ലോകം: മാനുഷ പാർപ്പി​ടങ്ങൾ സംബന്ധിച്ച ആഗോള റിപ്പോർട്ട്‌ 1996 എന്ന ഇംഗ്ലീഷ്‌ പുസ്‌തകം പറയുന്നു. ലോക​വ്യാ​പ​ക​മാ​യി 100 കോടി​യി​ല​ധി​കം ആളുകൾക്ക്‌ ശുദ്ധജലം ലഭ്യമല്ല. കോടി​ക്ക​ണ​ക്കിന്‌ ആളുകൾക്ക്‌ സമീകൃത ആഹാര​ത്തി​നു വകയില്ല. ഈ ഘടകങ്ങ​ളെ​ല്ലാം ദരി​ദ്രരെ സംബന്ധി​ച്ചി​ട​ത്തോ​ളം രോഗ​പ്ര​തി​രോ​ധം ദുഷ്‌കരം ആക്കിത്തീർക്കു​ന്നു.

മാത്രമല്ല, തങ്ങളുടെ രോഗം ചികി​ത്സി​ച്ചു ഭേദമാ​ക്കാ​നും ദരി​ദ്രർക്ക്‌ മിക്ക​പ്പോ​ഴും കഴിയാ​റില്ല. രോഗം പിടി​പെ​ട്ടാൽ മരുന്നി​നോ ചികി​ത്സ​യ്‌ക്കോ വേണ്ട ചെലവ്‌ അവർക്കു താങ്ങാൻ കഴി​ഞ്ഞെന്നു വരില്ല. ദരി​ദ്ര​രു​ടെ ജീവൻ അകാല​ത്തിൽ പൊലി​ഞ്ഞു പോകു​ന്നു; അതിജീ​വി​ക്കു​ന്ന​വ​രാ​കട്ടെ മാറാ​രോ​ഗ​ങ്ങ​ളോ​ടു മല്ലിട്ടു​കൊ​ണ്ടാ​യി​രി​ക്കും ജീവി​ക്കു​ന്നത്‌.

മാലദ്വീ​പി​ലെ ഒരു ചന്തയിൽ കച്ചവടം നടത്തുന്ന സാഹീദാ പറയുന്നു: “ദാരി​ദ്ര്യം കാരണം ആരോ​ഗ്യം നശിക്കു​ന്നു. പിന്നെ പണി​യെ​ടു​ക്കാൻ പറ്റില്ല.” പണി ഇല്ലാതാ​കു​മ്പോൾ ദാരി​ദ്ര്യം വർധി​ക്കു​ന്നു. തത്‌ഫ​ല​മാ​യി ദാരി​ദ്ര്യ​വും രോഗ​വും മാറി മാറി ദുരി​ത​പൂർണ​മായ അവസ്ഥയ്‌ക്കു തിരി​കൊ​ളു​ത്തു​ന്നു.

തൊഴി​ലി​ല്ലാ​യ്‌മ​യും കുറഞ്ഞ വേതന​വും

ദാരി​ദ്ര്യ​ത്തി​ന്റെ മറ്റൊരു വശമാണ്‌ തൊഴി​ലി​ല്ലായ്‌മ. ഭൂവൊ​ട്ടുക്ക്‌ ജോലി ചെയ്യാൻ ശേഷി​യുള്ള ഏതാണ്ട്‌ 12 കോടി ആളുകൾക്ക്‌ തൊഴിൽ കണ്ടെത്താൻ സാധി​ക്കു​ന്നില്ല. 70 കോടി​യോ​ളം വരുന്ന മറ്റ്‌ ആളുകൾക്കാ​കട്ടെ ദീർഘ​നേരം പണി​യെ​ടു​ത്തു കിട്ടുന്ന തുച്ഛമായ വരുമാ​നം​കൊണ്ട്‌ അടിസ്ഥാന ആവശ്യ​ങ്ങൾപോ​ലും നിറ​വേ​റ്റാൻ സാധി​ക്കാ​റില്ല.

കംബോ​ഡി​യ​യി​ലെ ഒരു ടാക്‌സി ഡ്രൈ​വ​റാണ്‌ റൂഡീൻ. അദ്ദേഹം പറയുന്നു: “ദരി​ദ്ര​നാ​യ​തു​കൊണ്ട്‌ എനിക്ക്‌ ദിവസ​വും 18 മണിക്കൂ​റി​ല​ധി​കം ജോലി ചെയ്യേ​ണ്ടി​വ​രു​ന്നു. എന്നിട്ടും എനിക്കും ഭാര്യ​ക്കും മക്കൾക്കും കഴിയാ​നുള്ള വകപോ​ലും കിട്ടു​ന്നില്ല.”

പരിസ്ഥി​തി നശീക​ര​ണം

പരിസ്ഥി​തി​യു​ടെ അപക്ഷയ​വും ദാരി​ദ്ര്യ​വും ഇഴപി​രി​ഞ്ഞു കിടക്കു​ന്നു. തെക്കേ അമേരി​ക്ക​യി​ലെ ഗയാന​യി​ലുള്ള ഗവേഷ​ക​യായ എൽസ അഭി​പ്രാ​യ​പ്പെ​ടു​ന്നു: “ദാരി​ദ്ര്യം പ്രകൃ​തി​യെ വിഴു​ങ്ങു​ന്നു: വനം, ഭൂപ്ര​ദേശം, മൃഗങ്ങൾ, നദികൾ, തടാകങ്ങൾ എന്നിവയെ.” ഇതാ മറ്റൊരു ദുരന്ത പര്യയനം—ദാരി​ദ്ര്യം പരിസ്ഥി​തി നശീക​ര​ണ​ത്തി​ലേക്കു നയിക്കു​ന്നു. ഈ നശീക​രണം ദാരി​ദ്ര്യം വർധി​പ്പി​ക്കു​ന്നു.

വിളഭൂ​മി​യു​ടെ വളക്കൂറു നഷ്ടപ്പെ​ടു​ന്ന​തു​വരെ അതിൽ കൃഷി ചെയ്യു​ന്ന​തോ അതു മറ്റ്‌ ആവശ്യ​ങ്ങൾക്കു​വേണ്ടി ഉപയോ​ഗി​ക്കു​ന്ന​തോ യുഗപ്പ​ഴ​ക്ക​മുള്ള രീതി​ക​ളാണ്‌. അതു​പോ​ലെ​ത​ന്നെ​യാണ്‌ വനനശീ​ക​ര​ണ​വും—അതായത്‌, വിറകി​നോ ഇന്ധനത്തി​നോ കൃഷി ചെയ്യു​ന്ന​തി​നോ വേണ്ടി വനം വെട്ടി​ത്തെ​ളി​ക്കു​ന്നത്‌.

മുഖ്യ​മാ​യും, പരിരക്ഷണ നടപടി​കൾ സ്വീക​രി​ക്കാൻ ആവശ്യ​മായ പണത്തി​ന്റെ​യും സാങ്കേ​തി​ക​വി​ദ്യ​യു​ടെ​യും അഭാവം നിമിത്തം കഴിഞ്ഞ 30 വർഷത്തി​നു​ള്ളിൽ ലോക​ത്തി​ലെ വിളഭൂ​മി​ക​ളു​ടെ മേൽമ​ണ്ണി​ന്റെ 20 ശതമാനം അപ്രത്യ​ക്ഷ​മാ​യി​രി​ക്കു​ന്ന​താ​യി അന്താരാ​ഷ്‌ട്ര കാർഷിക വികസന നിധി പറയുന്നു. അതേ കാലയ​ള​വിൽത്തന്നെ, മോശ​മാ​യി നിർമി​ക്ക​പ്പെ​ട്ട​തോ വേണ്ടവി​ധം പരിപാ​ലി​ക്ക​പ്പെ​ടാ​ത്ത​തോ ആയ ജലസേചന പദ്ധതികൾ മൂലം കോടി​ക്ക​ണ​ക്കിന്‌ ഏക്കർ ഭൂമി തരിശു​നി​ല​മാ​യി തീർന്നി​രി​ക്കു​ന്നു. കൂടാതെ, കൃഷി ചെയ്യാ​നോ വിറകി​നോ ഇന്ധനത്തി​നോ ഒക്കെയാ​യി ലക്ഷക്കണ​ക്കിന്‌ ഏക്കർ വനങ്ങളാ​ണു വർഷം​തോ​റും വെട്ടി​ത്തെ​ളി​ക്കു​ന്നത്‌.

ഈ നശീക​ര​ണ​ത്തി​നു ദാരി​ദ്ര്യ​വു​മാ​യി രണ്ടു രീതി​യിൽ ബന്ധമുണ്ട്‌. ഒന്നാമ​താ​യി, ആഹാര​ത്തി​നും ഇന്ധനത്തി​നും വേണ്ടി പരിസ്ഥി​തി​യെ ചൂഷണം ചെയ്യാൻ ദരിദ്രർ മിക്ക​പ്പോ​ഴും നിർബ​ന്ധി​ത​രാ​കു​ന്നു. അന്നന്ന്‌ കഴിഞ്ഞു​കൂ​ടേ​ണ്ട​തി​നു പ്രകൃതി വിഭവ​ങ്ങളെ പിഴി​ഞ്ഞെ​ടു​ക്കുന്ന പട്ടിണി​പ്പാ​വ​ങ്ങ​ളോട്‌ പരിസ്ഥി​തി​ക്കു കോട്ടം​ത​ട്ടാ​തെ​യുള്ള വികസ​ന​ത്തെ​ക്കു​റി​ച്ചോ വരും​ത​ല​മു​റ​ക​ളു​ടെ ക്ഷേമ​ത്തെ​ക്കു​റി​ച്ചോ എങ്ങനെ സംസാ​രി​ക്കാ​നാ​കും? രണ്ടാമ​താ​യി, സമ്പന്നർ മിക്ക​പ്പോ​ഴും ലാഭത്തി​നു​വേണ്ടി ദരി​ദ്ര​രു​ടെ പാരി​സ്ഥി​തിക വിഭവങ്ങൾ ചൂഷണം ചെയ്യുന്നു. സമ്പന്നരോ ദരി​ദ്ര​രോ ആരായി​രു​ന്നാ​ലും പ്രകൃതി വിഭവങ്ങൾ നശിപ്പി​ക്കു​ന്നത്‌ ദാരി​ദ്ര്യം വർധി​പ്പി​ക്കും.

വിദ്യാ​ഭ്യാ​സം

ഫിലി​പ്പീൻസി​ലെ ഒരു നഗരത്തിൽ വസിക്കുന്ന ആലീസ്യ എന്നു പേരുള്ള സാമൂ​ഹിക പ്രവർത്തക ഇങ്ങനെ പറഞ്ഞു: “ദരി​ദ്ര​യായ ഒരു സ്‌ത്രീ തന്റെ കുഞ്ഞു​ങ്ങളെ സ്‌കൂ​ളിൽ അയയ്‌ക്കു​ന്ന​തി​നു പകരം തെരു​വി​ലേക്ക്‌ അയയ്‌ക്കു​ന്നു, ഭിക്ഷ യാചി​ക്കാൻ. അല്ലെങ്കിൽ ഒന്നും ഭക്ഷിക്കാ​നു​ണ്ടാ​കില്ല. തനിക്കു വന്ന ഗതി ആവർത്തി​ക്ക​പ്പെ​ടു​ക​യാ​ണെന്ന്‌ ആ അമ്മയ്‌ക്ക്‌ അറിയാം, പക്ഷേ അവൾക്കു വേറെ പോം​വ​ഴി​യില്ല.”

50 കോടി​യോ​ളം കുട്ടി​കൾക്ക്‌ പോകാൻ സ്‌കൂ​ളു​ക​ളില്ല. മുതിർന്ന​വ​രിൽ 100 കോടി​യോ​ളം പേർ പ്രാ​യോ​ഗി​ക​മാ​യി നിരക്ഷ​ര​രാണ്‌. വിദ്യാ​ഭ്യാ​സം ഇല്ലാത്ത​തു​കൊണ്ട്‌ ഒരുവി​ധം നല്ല ജോലി കിട്ടാൻ ബുദ്ധി​മു​ട്ടാണ്‌. അങ്ങനെ ദാരി​ദ്ര്യം വിദ്യാ​ഭ്യാ​സ​മി​ല്ലാ​യ്‌മ​യി​ലേക്കു നയിക്കു​ന്നു, വിദ്യാ​ഭ്യാ​സ​മി​ല്ലായ്‌മ തിരിച്ച്‌ ദാരി​ദ്ര്യ​ത്തി​ലേ​ക്കും.

പാർപ്പി​ടം

പാർപ്പി​ട​മി​ല്ലായ്‌മ ദരിദ്ര രാഷ്‌ട്ര​ങ്ങ​ളിൽ മാത്രമല്ല ചില സമ്പന്ന രാഷ്‌ട്ര​ങ്ങ​ളി​ലും നിലവി​ലുണ്ട്‌. കഴിഞ്ഞ അഞ്ചു വർഷത്തി​നു​ള്ളിൽ ന്യൂ​യോർക്ക്‌ നഗരവാ​സി​ക​ളിൽ 2.5 ലക്ഷത്തോ​ളം പേർ ഏതെങ്കി​ലു​മൊ​ക്കെ സമയത്ത്‌ ഭവന രഹിതർക്കുള്ള അഭയ​കേ​ന്ദ്ര​ങ്ങ​ളിൽ താമസി​ച്ച​താ​യി ഒരു റിപ്പോർട്ടു പറയുന്നു. യൂറോ​പ്പി​ലും ദരിദ്രർ ഉണ്ട്‌. ലണ്ടനിൽ ഏതാണ്ട്‌ 4,00,000 പേർ ഭവനര​ഹി​ത​രാ​യി കണക്കാ​ക്ക​പ്പെ​ട്ടി​രി​ക്കു​ന്നു. ഫ്രാൻസി​ലാ​കട്ടെ 5 ലക്ഷം പേർക്ക്‌ വീടില്ല.

വികസ്വര രാഷ്‌ട്ര​ങ്ങ​ളി​ലു​ട​നീ​ളം അവസ്ഥ മോശ​മാണ്‌. ആഹാര​വും തൊഴി​ലും മെച്ചപ്പെട്ട ജീവി​ത​വു​മൊ​ക്കെ സ്വപ്‌നം കണ്ട്‌ ആളുകൾ പട്ടണങ്ങ​ളി​ലേ​ക്കും നഗരങ്ങ​ളി​ലേ​ക്കും പ്രവഹി​ക്കു​ന്നു. ചില നഗരങ്ങ​ളിൽ ജനസം​ഖ്യ​യു​ടെ 60 ശതമാ​ന​ത്തിൽ അധികം ചേരി​പ്ര​ദേ​ശ​ങ്ങ​ളി​ലും ചെറ്റക്കു​ടി​ലു​ക​ളി​ലു​മാണ്‌ താമസി​ക്കു​ന്നത്‌. അങ്ങനെ ഗ്രാമ​ത്തി​ലെ ദാരി​ദ്ര്യം നഗരത്തി​ലെ ദാരി​ദ്ര്യ​ത്തിന്‌ വഴി​തെ​ളി​ക്കു​ന്നു.

ജനസംഖ്യ

ജനസം​ഖ്യാ വർധനവ്‌ ഈ പ്രശ്‌ന​ങ്ങ​ളു​ടെ​യെ​ല്ലാം തീവ്രത വർധി​പ്പി​ക്കു​ന്നു. കഴിഞ്ഞ 45 വർഷം​കൊണ്ട്‌ ലോക ജനസംഖ്യ ഇരട്ടി​യിൽ അധിക​മാ​യി വർധി​ച്ചി​രി​ക്കു​ന്നു. 2000-ാമാ​ണ്ടോ​ടെ ജനസംഖ്യ 620 കോടി ആകു​മെ​ന്നും 2050-ഓടെ അത്‌ 980 കോടി ആകു​മെ​ന്നും ഐക്യ​രാ​ഷ്‌ട്രങ്ങൾ കണക്കു​കൂ​ട്ടു​ന്നു. ലോക​ത്തി​ലെ ഏറ്റവും ദരിദ്ര മേഖല​ക​ളി​ലാണ്‌ ഏറ്റവും ഉയർന്ന ജനസം​ഖ്യാ വർധന​നി​ര​ക്കു​ള്ളത്‌. 1995-ൽ ജനിച്ച ഏതാണ്ട്‌ 9 കോടി ശിശു​ക്ക​ളിൽ 8.5 കോടി ജനിച്ചത്‌ തങ്ങളെ പോറ്റാൻ തീരെ വകയി​ല്ലാത്ത രാജ്യ​ങ്ങ​ളി​ലാ​യി​രു​ന്നു.

പട്ടിണി, രോഗം, തൊഴി​ലി​ല്ലായ്‌മ, പരിസ്ഥി​തി നശീക​രണം, വിദ്യാ​ഭ്യാ​സ​മി​ല്ലായ്‌മ, മോശ​മായ പാർപ്പി​ടം, യുദ്ധം എന്നിവ തുടച്ചു​നീ​ക്കാൻ മനുഷ്യ​രാ​ശി ഉടനടി സഹകരി​ക്കു​മെന്നു നിങ്ങൾ വിശ്വ​സി​ക്കു​ന്നു​ണ്ടോ? ഇല്ലായി​രി​ക്കാം.

പ്രതീ​ക്ഷ​യ്‌ക്കു വകയി​ല്ലെ​ന്നാ​ണോ അത്‌ അർഥമാ​ക്കു​ന്നത്‌? അല്ല, കാരണം പരിഹാ​രം സമീപ​സ്ഥ​മാണ്‌. അത്‌ തീർച്ച​യാ​യും വരും. എന്നാൽ മാനു​ഷിക ശ്രമങ്ങ​ളാ​ലല്ല എന്നുമാ​ത്രം. എങ്കിൽപ്പി​ന്നെ എങ്ങനെ​യാ​യി​രി​ക്കും? ഇനി, ‘ദരിദ്രർ നിങ്ങൾക്കു എല്ലായ്‌പ്പോ​ഴും അടുക്കെ ഉണ്ട്‌’ എന്ന്‌ യേശു പറഞ്ഞതോ?

[7-ാം പേജിലെ ചതുരം]

ദരിദ്രരിൽ ദരിദ്രർ

“ഏറ്റവും ദരി​ദ്ര​വും സാമ്പത്തി​ക​മാ​യി അങ്ങേയറ്റം ദുർബ​ല​വു​മായ വികസ്വര രാജ്യ​ങ്ങളെ” വിശേ​ഷി​പ്പി​ക്കു​ന്ന​തിന്‌ 1971-ൽ ഐക്യ​രാ​ഷ്‌ട്രങ്ങൾ രൂപം കൊടുത്ത ഒരു പ്രയോ​ഗ​മാണ്‌ “അൽപ്പ വികസിത രാജ്യങ്ങൾ” എന്നുള്ളത്‌. ആ സമയത്ത്‌ അത്തരത്തി​ലുള്ള 21 രാജ്യ​ങ്ങ​ളു​ണ്ടാ​യി​രു​ന്നു. എന്നാൽ ഇന്ന്‌ അത്തരം 48 രാജ്യ​ങ്ങ​ളുണ്ട്‌, അതിൽത്തന്നെ 33 എണ്ണം ആഫ്രി​ക്ക​യി​ലാണ്‌.

[5-ാം പേജിലെ ചിത്രം]

ദശലക്ഷക്കണക്കിന്‌ ആളുകൾ കുറഞ്ഞ വേതന​ത്തിന്‌ ദീർഘ​നേരം പണി​യെ​ടു​ക്കു​ന്നു

[കടപ്പാട്‌]

Godo-Foto

[6-ാം പേജിലെ ചിത്രം]

സമ്പന്നതയും ദാരി​ദ്ര്യ​വും തോ​ളോ​ടു​തോൾ ചേർന്ന്‌

[7-ാം പേജിലെ ചിത്രം]

കോടിക്കണക്കിനാളുകൾ ശോച​നീയ അവസ്ഥയി​ലാണ്‌ ജീവി​ക്കു​ന്നത്‌