ചൂതാട്ടം—ആരെങ്കി​ലും വിജയി​ക്കു​ന്നു​വോ?

ഇറ്റലിയിലെ ഉണരുക! ലേഖക​നിൽനിന്ന്‌

‘ഗുരു​ത​ര​മായ സാമ്പത്തിക മാന്ദ്യ​ത്തി​ന്റേ​തായ ഈ കാലങ്ങ​ളിൽ ഈ പ്രതി​സ​ന്ധി​യു​ടെ സ്‌പർശ​മേൽക്കാത്ത ഒരു വ്യവസാ​യം ഉണ്ട്‌’. കോറി​യർ ഡെല്ലാ സെറാ ഇലസ്‌​ട്രേ​റ്റോ എന്ന ഇറ്റാ​ലി​യൻ മാസിക ചൂതാട്ട വ്യവസാ​യത്തെ ഉദ്ദേശി​ച്ചാണ്‌ ഇങ്ങനെ അഭി​പ്രാ​യ​പ്പെ​ട്ടത്‌. ഉവ്വ്‌, മറ്റു നിരവധി രാജ്യ​ങ്ങ​ളി​ലെ​ന്ന​പോ​ലെ ഇറ്റലി​യി​ലും ചൂതാട്ടം വൻ ബിസി​നസ്സ്‌ ആണ്‌.

“നിയമ​വി​ധേ​യ​മാ​ക്ക​പ്പെട്ട ചൂതു​ക​ളി​യു​ടെ വിസ്‌ഫോ​ട​ന​ത്തിൻ മദ്ധ്യെ​യാണ്‌ ഐക്യ​നാ​ടു​കൾ” എന്ന്‌ ഫോർച്യൂൺ മാസിക പറയുന്നു. “വമ്പിച്ച ലാഭം കൊയ്യുന്ന ഈ ഭാഗ്യ​ക്കു​റി​കൾ കഴിഞ്ഞ വർഷം [1983] . . . എകദേശം 21,00,000 ഡോളർ വരുമാ​ന​മു​ണ്ടാ​ക്കി. കാനഡ​ക്കാ​രി​ലും ഒട്ടനവ​ധി​പ്പേരെ ചൂതു​കളി വശീക​രി​ക്കു​ന്നു. ലാ പ്രെസ്സെ എന്ന വർത്തമാ​ന​പ്പ​ത്രം പറയു​ന്ന​ത​നു​സ​രിച്ച്‌ ക്യൂ​ബെ​ക്കിൽ ജീവി​ക്കുന്ന കുടും​ബങ്ങൾ ഔഷധ​ങ്ങൾക്കും ദന്തരക്ഷ​ക്കും ചെലവ​ഴി​ക്കു​ന്ന​തി​നേ​ക്കാൾ അധികം പണം ചൂതാ​ട്ട​ത്തി​നാണ്‌ ചെലവി​ടു​ന്നത്‌!

ചൂതാ​ട്ട​ത്തിൽ ഭാഗ്യ​ക്കു​റി​കൾ, റൗലറ്റ്‌ ചക്രങ്ങൾ, പകിട, ചീട്ടു​കളി എന്നിവ​യെ​ല്ലാം ഉപയോ​ഗി​ക്കാ​റു​ണ്ടെ​ങ്കി​ലും ബോക്‌സിംഗ്‌ മത്സരങ്ങ​ളു​ടെ​യും ഫുട്‌ബോൾ മത്സരങ്ങ​ളു​ടെ​യും കുതി​ര​പ്പ​ന്ത​യ​ങ്ങ​ളു​ടെ​യും മത്സരഫ​ല​മാണ്‌ ചൂതു​ക​ളി​ക്കാർ വാതു വെക്കുന്ന എറെ പ്രചാ​ര​മുള്ള കാര്യ​ങ്ങ​ളിൽ ചിലത്‌. ദ കംപ്ലീ​റ്റ ഇലസ്‌​ട്രേ​റ്റഡ്‌ ഗൈഡ്‌ റ്റു ഗാംബ്ലിംഗ്‌ എന്ന പുസ്‌തകം വിവരി​ക്കു​ന്ന​തു​പോ​ലെ: “പന്തയത്തിന്‌ നിശ്ചയി​ച്ചി​റ​ങ്ങി​യി​രി​ക്കു​ന്നവർ മഴത്തു​ള്ളി​കൾ രണ്ടുള്ള​തിൽ ആദ്യം ജനാല​പ്പാ​ളിക്ക്‌ കീഴെ എത്തുന്നത്‌ ഏതായി​രി​ക്കും എന്നോ അല്ലെങ്കിൽ ഒരു മറുകിൻമേൽ വളരുന്ന രോമം എത്രയാ​യി​രി​ക്കു​മെ​ന്നോ ഉള്ള കാര്യ​ങ്ങ​ളിൽ വരെ വാതു വയ്‌ക്കും.” ഇവ്വിധം, ഇറ്റലി​യിൽ അവർ പ്രസി​ഡൻറ്‌ തെര​ഞ്ഞെ​ടുപ്പ്‌, സർക്കാർ വീഴു​മോ ഇല്ലയോ തുടങ്ങി​യ​വ​യെ​ക്കു​റി​ച്ചും പോപ്പി​ന്റെ തെര​ഞ്ഞെ​ടു​പ്പി​നെ​ക്കു​റി​ച്ചും പോലും വാതു വയ്‌ക്കു​ന്നു! അതു​പോ​ലെ, ഒരു ഫുട്‌ബോൾ മത്സരത്തി​ന്റെ തലേ രാത്രി പന്തയക്കാർക്ക്‌ വെറി​പി​ടിച്ച സമയമാണ്‌, അപ്പോൾ അവർ വൻ തുകകൾ ഫുട്‌ബോൾ പൂളു​ക​ളിൽ ചെലവ​ഴി​ക്കു​ന്നു. പത്രക്കാർ ഇതിനെ ‘ശനിയാ​ഴ്‌ച​യി​ലെ രാപ്പനി’ (Saturday Night Fever) എന്നു വിളി​ക്കു​ന്നു.

ഈ പന്തയക്ക​ളി​യിൽ പക്ഷെ, നേട്ടമു​ണ്ടാ​ക്കു​ന്ന​താ​രാണ്‌? കൈയ്യ​ട​ക്കാൻ ദശലക്ഷങ്ങൾ—അതെ, ശതകോ​ടി​കൾ—ആണുള്ളത്‌ എന്ന വസ്‌തുത ചൂതാട്ടം എങ്ങനെ​യും മെച്ചമുള്ള ഏർപ്പാ​ടാ​ണെന്ന്‌ സൂചി​പ്പി​ക്കു​ന്നു​ണ്ടോ?

അവർ ചൂതാ​ടു​ന്നത്‌ എന്തു​കൊണ്ട്‌?

ഷരോ​ന്റെ​യും സ്‌റ്റീ​വി​ന്റെ​യും വിവാ​ഹ​ജീ​വി​തം സന്തോ​ഷ​ഭ​രി​ത​മാ​യി​രു​ന്നു. പക്ഷേ തങ്ങൾ കടബാ​ധ്യ​ത​യിൽ ആണ്ടു​പോ​യി​രി​ക്കു​ന്നു എന്ന്‌ ഷരോൻ കണ്ടെത്തി​യ​പ്പോൾ അവൾ സ്‌റ്റീ​വി​നോട്‌ ചൂതാട്ടം ഉപേക്ഷി​ക്കണേ എന്ന്‌ കെഞ്ചി​പ്പ​റഞ്ഞു. അത്‌ നിർത്താം എന്ന എണ്ണമറ്റ വാഗ്‌ദാ​നങ്ങൾ അയാൾ ലംഘിച്ചു. ഷരോന്റെ ആരോ​ഗ്യം ക്ഷയിച്ചു, അവൾക്ക്‌ നെഞ്ചു​വേദന തുടങ്ങി. സ്‌റ്റീവ്‌ അത്‌ തെല്ലും പ്രശ്‌ന​മാ​ക്കി​യില്ല. അവൾ അഥവാ മരിക്കു​ന്നെ​ങ്കിൽ അപ്പോൾ ലഭിക്കുന്ന ഇൻഷു​റൻസ്‌ തുക​കൊണ്ട്‌ ചൂതാട്ടം കൊണ്ടു​ണ്ടായ തന്റെ കടബാ​ധ്യ​തകൾ അടച്ചു​തീർക്കാ​മ​ല്ലൊ എന്നതാ​യി​രു​ന്നു അയാളു​ടെ ഏകചിന്ത.

മനുഷ്യ​ലൈം​ഗി​ക​ത​യു​ടെ വൈദ്യ​ശാ​സ്‌ത്ര വശങ്ങൾ എന്ന പുസ്‌ത​ക​ത്തിൽ വിവരി​ക്ക​പ്പെട്ട ഈ യഥാർത്ഥ ജീവി​ത​സം​ഭവം, ചൂതാ​ട്ട​ത്തിന്‌ ആളുക​ളു​ടെ മേൽ എത്ര മുറു​കിയ പിടി​യു​ണ്ടാ​യി​രി​ക്കാൻ കഴിയും എന്ന്‌ നന്നായി ദൃഷ്ടാ​ന്തീ​ക​രി​ക്കു​ന്നു. ചിലർക്ക്‌ ചൂതാട്ടം അത്യന്തം വശ്യമാ​ക്കി​ത്തീർക്കു​ന്നത്‌ അവരുടെ ശുദ്ധ അത്യാ​ഗ്ര​ഹ​മാണ്‌. എങ്കിലും നിർബ്ബദ്ധ ചുതാട്ടം എന്ന ചെറു​പു​സ്‌തകം പറയു​ന്ന​തി​ങ്ങ​നെ​യാണ്‌: “ചൂതാട്ടം നടത്തുന്ന ആളുകൾ . . . ചില പ്രത്യേക സംതൃ​പ്‌തി​കൾക്ക്‌ വേണ്ടി​യാണ്‌ അങ്ങനെ ചെയ്യു​ന്നത്‌: സംഘർഷ​സ​മ്മർദ്ദ​ങ്ങ​ളിൽ നിന്നുള്ള ആശ്വാസം, ഒരു ഭാഗ്യ​പ​രീ​ക്ഷണം നടത്തു​ന്ന​തി​ന്റെ ആനന്ദം, ഒരു വിജയ​പ്ര​തീക്ഷ പകരുന്ന പുളകാ​തി​രേകം, മദ്യം ജനിപ്പി​ക്കുന്ന തരം ‘ജ്വലനാ​നു​ഭൂ​തി’ അഥവാ ‘ഉൻമാ​ദ​ല​ഹരി’, സാമൂ​ഹ്യ​സ​മ്മ​തി​യും ചങ്ങാത്ത​വും. വിജയ​മാണ്‌ ഫലം എങ്കിൽ മറ്റു അനുഭൂ​തി​ക​ളോ​ടൊ​പ്പം അധികാ​ര​ത്തി​ന്റെ അല്ലെങ്കിൽ സർവ്വശ​ക്തി​യു​ടെ പോലും തോന്നൽ ഉണ്ടാവു​ന്നു.”

ജീവി​ത​ത്തിൽ ആദ്യഘ​ട്ട​ങ്ങ​ളിൽ വിജയം ലഭിക്കു​ന്നത്‌ മിക്ക​പ്പോ​ഴും ഒരു മറഞ്ഞ കെണി ഒരുക്കു​ന്നു. മിക്കയാ​ളു​ക​ളും അത്തരം വിജയത്തെ കേവലം ഒരു “കന്നിഭാ​ഗ്യം” എന്ന മട്ടിൽ അവഗണി​ക്കു​മ്പോൾ ചില മടയൻമാർ അതിനെ ഒരു ശുഭശ​കു​ന​മാ​യി വ്യാഖ്യാ​നി​ച്ചേ​ക്കാം. സൈ​ക്കോ​ളജി റ്റു​ഡേ​യി​ലെ ഒരു ലേഖനം ഇങ്ങനെ പറഞ്ഞു: “കനിവറ്റ കഠിന സാദ്ധ്യ​തകൾ— ചൂതാ​ട്ട​ത്തിൽ ഏർപ്പെ​ടു​ന്ന​വ​രിൽ 90 ശതമാനം ആളുകൾക്കും നഷ്ടം ഭവിക്കു​ന്നു എന്ന യാഥാർത്ഥ്യം—അവരുടെ ബോധത്തെ സ്‌പർശി​ക്കു​ന്നില്ല. ഈ പ്രതി​കൂല സാദ്ധ്യ​തകൾ അവർക്ക്‌ ഏശുക​യില്ല, അവർ വാസ്‌ത​വ​ത്തിൽ വിശേ​ഷ​പ്പെ​ട്ടവർ ആണ്‌ എന്ന്‌ അവർക്ക്‌ തോന്നു​ന്നു.” യാഥാർത്ഥ്യ​ങ്ങളെ നേരി​ടു​ന്ന​തിൽ മിക്കവാ​റും രോഗ​ഭാ​വ​ത്തി​ലുള്ള ഈ വിസമ്മതം ആണ്‌ ഒരു നിർബ്ബദ്ധ ചൂതു​ക​ളി​ക്കാ​രൻ ആയിത്തീ​രാ​നുള്ള ആദ്യ പടിക​ളി​ലൊന്ന്‌.

അത്തരം ആളുകൾക്ക്‌ ചൂതാട്ടം “ഒഴിവാ​ക്കാ​നാ​കാത്ത ഒരു മയക്കു​മ​രു​ന്നു”പോ​ലെ​യാണ്‌ എന്ന്‌ ഇറ്റാ​ലി​യൻ വാർത്താ​പ​ത്ര​മായ സ്‌റ്റാം​പാ സീറാ പ്രസ്‌താ​വി​ച്ചു. അല്ലെങ്കിൽ ഇൽ ഗിയോർണാ​ലേ ന്യോ​വോ​യിൽ ഗിയോ​വാ​നി ആർപ്പി​നോ എഴുതി​യ​തു​പോ​ലെ: “ഈ ദുശ്ശീലം പരിഹ​രി​ക്കാ​നാ​കാ​ത്ത​വി​ധം ഒരുവന്റെ ശരീര​ത്തിൽ ഇഴുകി​ച്ചേ​രു​ന്നു.” അല്ലാത്ത​പക്ഷം വിരസ​മാ​യി​ത്തീർന്നേ​ക്കു​മാ​യി​രുന്ന ഒരു ജീവി​ത​ഗ​തി​യിൽ നിന്ന്‌ ചൂതാട്ടം ഒരു വിടുതൽ ഏകുന്നു.

ഒരു ലഘുവി​നോ​ദ​മെന്ന നിലയിൽ ചൂതാ​ട്ട​ത്തി​ലേർപ്പെ​ടു​മ്പോൾ പോലും പങ്കുപ​റ്റു​ന്ന​യാൾ ദുരഭി​മാ​ന​ത്തി​നും നിഗള​ത്തി​നും ഇരയാ​യ്‌ത്തീർന്നു​കൊണ്ട്‌ താൻ പരാജ​യ​പ്പെ​ട്ടാൽ കളി നിർത്താൻ കൂട്ടാ​ക്കാ​തി​രി​ക്കു​ക​യോ താൻ ജയിച്ചു​ക​ഴി​ഞ്ഞും—ഒടുവിൽ വീണ്ടും തോൽക്കാൻ മാത്രം—കളി തുടരു​ക​യോ ചെയ്യുന്നു.

പരാജ​യ​സാ​ദ്ധ്യ​ത​കളെ കീഴടക്കൽ

താൻ ‘ജയിക്കാൻ വിധി​ക്ക​പ്പെ​ട്ട​വ​നാണ്‌’ എന്ന്‌ ചൂതാ​ട്ട​ക്കാ​രന്‌ തോന്നി​യേ​ക്കാ​മെ​ങ്കി​ലും അയാൾ പരാജ​യ​മ​ട​യു​മെന്നു മിക്കവാ​റും തീർച്ച​യാ​ണെ​ന്നു​ള്ള​താണ പരമാർത്ഥം! കാരണ​മോ? ലളിത​മായ കണക്കു​കൂ​ട്ടൽ മാത്രം. ഒരു നാണയം പത്തു പ്രാവ​ശ്യം തെറ്റി​ച്ചു​വി​ടുക; അത്‌ തലയോ വാലോ [നാണയ​ത്തി​ന്റെ രണ്ടു വശങ്ങൾ] മേലെ​യാ​യി എത്ര പ്രാവ​ശ്യം വീതം വീഴും? സാമാ​ന്യ​ബോ​ധ​ത്തിൽ നിന്ന്‌ അഞ്ചു പ്രാവ​ശ്യം വീതം എന്നു പറഞ്ഞേ​ക്കാം. ശ്രമി​ച്ചു​നോ​ക്കുക. അപൂർവ്വ​മാ​യേ അങ്ങനെ സംഭവി​ക്കു​ന്നു​ള്ളൂ. ശരാശ​രി​ക​ളു​ടെ നിയമം എന്നു വിളി​ക്ക​പ്പെ​ടുന്ന തത്വം വലിയ സംഖ്യ​ക​ളു​ടെ കാര്യ​ത്തിൽ മാത്രമെ ബാധക​മാ​കു​ക​യു​ള്ളൂ. മറ്റു വാക്കു​ക​ളിൽ, അസംഖ്യം പ്രാവ​ശ്യം ഒരു നാണയം തെറ്റി​ച്ചെ​റി​ഞ്ഞാൽ, ശരിയാണ്‌, തല മേലാ​യും വാൽ മേലാ​യും തുല്യ​ത​വ​ണ​ക​ളിൽ വീഴും. പക്ഷേ ഒരു ഹ്രസ്വ​ഘ​ട്ട​ത്തിൽ എതു വിധത്തി​ലും പ്രത്യ​ക്ഷ​പ്പെ​ടാം. അതു​കൊണ്ട്‌ ഒരു ടോസ്‌ കൃത്യ​മാ​യി എങ്ങനെ​യാ​യി​ത്തീ​രും എന്ന്‌ പറയുക വാസ്‌ത​വ​ത്തിൽ അസാദ്ധ്യ​മാണ്‌.

ഒരു ചൂതു​ക​ളി​ക്കാ​രൻ ഇതംഗീ​ക​രി​ക്കാൻ വിസമ്മ​തി​ക്കു​ന്നു. ഒരു നാണയം ക്രമാ​യി എട്ടു പ്രാവ​ശ്യം തല മേലായി വീണു​വെ​ങ്കിൽ മിക്കവാ​റും മതാന്ധ​മായ തീക്ഷ്‌ണ​ത​യോ​ടെ, ഏതായാ​ലും അടുത്ത ടോസ്സിൽ വാൽ മേലാ​യി​ത്തന്നെ വീഴും എന്നയാൾ വിശ്വ​സി​ച്ചേ​ക്കാം. ഈ ബോധ്യ​ത്തി​ലൂ​ന്നി​ക്കൊണ്ട്‌ അയാൾ ഒരു ജീവി​ത​സ​മ്പാ​ദ്യം മുഴുവൻ വാതു വച്ചേക്കാം. വാസ്‌ത​വ​ത്തിൽ, ആ നാണയ​ത്തിന്‌ അതിന്റെ മുൻചെ​യ്‌തി​യെ​പ്പ​റ്റി യാതൊ​രു ഓർമ്മ​യും ഇല്ല. ഓരോ തവണയും ടോസ്‌ ചെയ്യു​മ്പോൾ സാദ്ധ്യ​തകൾ പിന്നെ​യും പപ്പാതി​യാണ്‌!

ആ സ്ഥിതിക്ക്‌, ഇതി​ലേറെ സങ്കീർണ്ണ​മായ ബ്ലാക്‌ജാക്‌ അല്ലെങ്കിൽ റൗലറ്റ്‌ കളിക​ളിൽ എന്തു സംഭവി​ക്കും എന്ന്‌ പ്രവചി​ക്കാൻ ഒരു​മ്പെ​ടു​ന്നത്‌ ഫലശൂ​ന്യ​മാണ്‌! ക്രമാ​യി പരാജ​യ​പ്പെ​ടാ​നുള്ള സാദ്ധ്യ​തകൾ എണ്ണമറ്റ​താണ്‌. കുതി​ര​പ്പ​ന്ത​യ​മോ ഫുട്‌ബോൾ മത്സരമോ പോലെ പങ്കെടു​ക്കു​ന്ന​വ​രു​ടെ ചാതു​ര്യ​ത്തെ അടിസ്‌ഥാ​ന​മാ​ക്കി വാതു വയ്‌ക്കുന്ന മത്സരയി​ന​ങ്ങ​ളിൽപോ​ലും ഇത്‌ സത്യമാണ്‌. “കാലവും മുൻകൂ​ട്ടി കാണാത്ത സംഭവ​വും” പ്രവച​ന​ങ്ങളെ അമ്പേ തകിടം മറിക്കു​ന്നു. (സഭാ​പ്ര​സം​ഗി 9:11) “വ്യവസ്ഥാ​നു​സ​ര​ണ​മുള്ള” തന്ത്രങ്ങ​ളി​ലൂ​ടെ പരാജ​യ​സാ​ധ്യ​ത​കളെ കീഴട​ക്കാ​നും സാധാ​ര​ണ​ഗ​തി​യിൽ സാധ്യമല്ല. ഇറ്റലി​യിൽ ഫുട്‌ബോൾ പൂളു​ക​ളിൽ പങ്കുപ​റ്റു​ന്ന​വ​രിൽ പകുതി​യി​ല​ധി​കം പേർ ഒരേ സമയം നിരവധി കൂപ്പണു​കൾ വിലക്കു​വാ​ങ്ങി​ക്കൊണ്ട്‌ ഇങ്ങനെ​യൊ​രു ശ്രമം നടത്തുന്നു. എന്നാൽ ഇത്തരത്തി​ലുള്ള ഒരു മത്സരത്തിൽ ഏക സുനി​ശ്ചി​ത​മാർഗ്ഗം സർവ്വത്ര സാധ്യ​ത​ക​ളും നോക്കി ഓരോ​ന്നി​നും കുറി​യെ​ടു​ക്കുക എന്നതാണ്‌. നിങ്ങൾ വിജയി​ക്കും എന്നുള്ള​തിന്‌ സംശയ​മില്ല. പക്ഷേ നിങ്ങൾ ചെലവ​ഴിച്ച തുക സമ്മാന​ത്തു​ക​യി​ലൂ​ടെ നിങ്ങൾക്ക്‌ വീണ്ടു​കി​ട്ടു​ക​യില്ല

ചൂതാ​ട്ട​ത്തിൽ വിജയം കൊയ്യു​ന്നവർ ചൂതു​ക​ളി​യു​ടെ സംഘാ​ടകർ മാത്ര​മാണ്‌. മിക്കവാ​റും എല്ലായ്‌പ്പോ​ഴും തന്നെ കാസി​നോ (ചൂതു​ക​ളി​ശാല) ഒന്നാമത്‌ വരത്തക്ക​വണ്ണം കാസി​നോ ഉടമകൾ വിജയ​സാ​ധ്യ​തകൾ ഓരോ കളിയി​ലും ക്രമീ​ക​രി​ച്ചു വയ്‌ക്കു​ന്നു. റിപ്പോർട്ട​നു​സ​രിച്ച്‌ ഇറ്റലി​യി​ലെ ഫുട്‌ബോൾ പൂളു​ക​ളിൽ നിക്ഷേ​പി​ക്ക​പ്പെ​ടുന്ന തുകയു​ടെ വെറും 35 ശതമാനം മാത്രമെ സമ്മാന​ത്തു​ക​യാ​യി നൽക​പ്പെ​ടു​ന്നു​ള്ളൂ. പൂളുകൾ നടത്തു​ന്നവർ ബാക്കി ഭാഗം കൈയ്യ​ട​ക്കും.

ആ സ്ഥിതിക്ക്‌, ‘ഞാൻ ഭാഗ്യ​വാൻ’ അല്ലെങ്കിൽ ‘ഇതുവരെ ഞാൻ നിർഭാ​ഗ്യ​വാ​നാ​യി​രു​ന്നു, പക്ഷേ ഇനിമു​തൽ ഞാൻ നേടി​ത്തു​ട​ങ്ങും’ എന്നെല്ലാം പറയു​ന്നവർ സ്വയം വിഡ്‌ഢി​ക​ളാ​ക്കു​ക​യാണ്‌. ചൂതാട്ടം ഒരു ഫലശൂ​ന്യ​വ്യാ​യാ​മം ആണ്‌. വാർത്താ​മാ​ധ്യ​മങ്ങൾ വിജയി​ക​ളായ അപൂർവ്വം ചിലയാ​ളു​കൾക്ക്‌ വലിയ പ്രചാരം കൊടു​ക്കു​മ്പോൾ പരാജ​യ​മ​ട​യുന്ന ദശലക്ഷ​ങ്ങ​ളെ​ക്കു​റിച്ച്‌ നാം കേൾക്കു​ന്ന​തു​തന്നെ അപൂർവ്വ​മാ​യി​ട്ടാണ്‌.

ചൂതാ​ട്ട​വും ബൈബി​ളും

“വിഡ്‌ഢി​ത്തം, വഷളത്വം, അതിരാ​ഗം, വിഭ്രാ​ന്തി, യാഥാർത്ഥ്യ​ത്തിൽ നിന്നുള്ള ഒളി​ച്ചോ​ട്ടം, സാഹസം, വ്യാ​മോ​ഹ​സ്വ​പ്‌നങ്ങൾ, ലംഘനം, ശമിപ്പി​ക്കു​ന്തോ​റും ഏറുന്ന അപകട​സാ​ധ്യ​ത​കൾകൊണ്ട്‌ പന്താടാ​നുള്ള അതി​മോ​ഹം—ഇവയും ഇവയോ​ടൊ​പ്പം സമ്പത്തി​നു​വേ​ണ്ടി​യുള്ള ദുരയും ദിവാ​സ്വ​പ്‌ന​ങ്ങ​ളും അധികാ​ര​ഭാ​വ​വും എല്ലാം അടങ്ങു​ന്ന​താണ്‌ ചൂതാട്ടം.” ലാ റിപ്പബ്ലി​ക്കാ എന്ന മാസിക പറഞ്ഞതാ​ണിത്‌. ഗവൺമെൻറു​കൾ പലപ്പോ​ഴും ചൂതാട്ടം നിയമ​വി​രു​ദ്ധം ആക്കാറു​ണ്ടെ​ങ്കി​ലും അവർ കാസി​നോ​കൾക്ക്‌ ലൈസൻസ്‌ നൽകി​ക്കൊണ്ട്‌ കപടമാ​യി ഈ ഏർപ്പാട്‌ അനുവ​ദി​ക്കു​ക​യും സ്വയം ലോട്ട​റി​യും മറ്റും നടത്തു​ക​യും ചെയ്യുന്നു!

മനുഷ്യർ ഇക്കാര്യ​ത്തെ എങ്ങനെ വീക്ഷി​ച്ചാ​ലും ചൂതാട്ടം ക്രിസ്‌ത്യാ​നി​ത്വ​വു​മാ​യി പൊരു​ത്ത​പ്പെ​ടു​ക​യില്ല എന്ന്‌ ബൈബിൾ സൂചി​പ്പി​ക്കു​ന്നു. ദൃഷ്ടാ​ന്ത​ത്തിന്‌, ചൂതാട്ടം കേവലം ഒരു സാമ്പത്തിക ആവശ്യം നിറ​വേ​റ്റു​ന്ന​താ​യി ചിലർ കരുതി​യേ​ക്കാം. പക്ഷേ, “ഞങ്ങൾക്ക്‌ ഇന്നേ ദിവസ​ത്തേ​ക്കുള്ള ഞങ്ങളുടെ അപ്പം ഇന്ന്‌ നൽകേ​ണമേ” എന്ന്‌ പ്രാർത്ഥി​ക്കാ​നാണ്‌ യേശു നമ്മെ പഠിപ്പി​ച്ചത്‌. അത്യാ​ഗ്ര​ഹ​ത്തോ​ടെ ചൂതാ​ട്ട​ത്തി​ലേർപ്പെ​ടാ​നും അതിനു​ശേഷം ഇങ്ങനെ പ്രാർത്ഥി​ക്കാ​നും ഒരു വ്യക്തിക്ക്‌ എങ്ങനെ​യാണ്‌ സാധി​ക്കുക? അല്ലെങ്കിൽ, “മുമ്പേ അവന്റെ രാജ്യ​വും നീതി​യും അന്വേ​ഷി​ച്ചു​കൊ​ണ്ടി​രി​ക്കുക, ഈ മറ്റു കാര്യ​ങ്ങ​ളെ​ല്ലാം [ഭൗതിക ആവശ്യങ്ങൾ] നിന്നോട്‌ കൂട്ട​പ്പെ​ടും” എന്ന ബുദ്ധി​യു​പ​ദേശം അയാൾക്ക്‌ പിൻപ​റ്റാൻ എങ്ങനെ കഴിയും?—മത്തായി 6:11, 33.

ബൈബിൾ കൂടു​ത​ലാ​യി ഇങ്ങനെ ബുദ്ധി​യു​പ​ദേശം നൽകുന്നു: “നിങ്ങൾ ഇപ്പോൾ ഉള്ളതു​കൊണ്ട്‌ തൃപ്‌ത​രാ​യി​രി​ക്കെ, നിങ്ങളു​ടെ ജീവി​ത​രീ​തി പണസ്‌നേ​ഹ​ത്തിൽ നിന്ന്‌ വിമു​ക്ത​മാ​യി​രി​ക്കട്ടെ.” (എബ്രായർ 13:5) ചൂതാ​ട്ട​ക്കാ​രൻ ഒരിക്ക​ലും തൃപ്‌ത​നാ​കില്ല. വാസ്‌ത​വ​ത്തിൽ അയാൾ അത്യാ​ഗ്രഹി ആയിരി​ക്കും, അത്യാ​ഗ്ര​ഹി​ക​ളെ​പ്പ​റ്റി ബൈബിൾ പറയു​ന്നത്‌ അവർ “ദൈവ​രാ​ജ്യം അവകാ​ശ​മാ​ക്കു​ക​യില്ല” എന്നാണ്‌.—1 കൊരി​ന്ത്യർ 6:9, 10.

ഉവ്വ്‌, തങ്ങൾ ചൂതാട്ടം നടത്തു​ന്നത്‌ പണത്തിനു വേണ്ടിയല്ല ഒരു ആവേശ​ത്തി​നു​വേ​ണ്ടി​യാണ്‌ എന്ന്‌ ചിലർ വാദി​ച്ചേ​ക്കാം. ബൈബിൾ പക്ഷേ, ദിവ്യ തത്വങ്ങ​ളിൽ നിന്ന്‌ വ്യതി​ച​ലിച്ച്‌ “ദൈവ​പ്രി​യ​രാ​യി​രി​ക്കു​ന്ന​തി​നു പകരം ഉല്ലാസ​പ്രി​യ​രാ​യി​ത്തീ​രുന്ന”വരെ കുറ്റം വിധി​ക്കുക തന്നെ ചെയ്യുന്നു. (2 തിമൊ​ഥെ​യോസ്‌ 3:4, 5) കൂടു​ത​ലാ​യി യേശു ഇങ്ങനെ പറഞ്ഞു: “നീ നിന്റെ അയൽക്കാ​രനെ നിന്നെ​പ്പോ​ലെ തന്നെ സ്‌നേ​ഹി​ക്കുക.” (മത്തായി 22:39) തന്റെ അയൽക്കാ​രന്റെ പണം അപഹരി​ക്കാൻ ശ്രമി​ക്കവെ ഒരു വ്യക്തിക്ക്‌ അയാളെ എങ്ങനെ സ്‌നേ​ഹി​ക്കാൻ കഴിയും? “വാങ്ങു​ന്ന​തി​നേ​ക്കാൾ അധികം സന്തുഷ്ടി കൊടു​ക്കു​ന്ന​തി​ലുണ്ട്‌” എന്ന അടിസ്ഥാന തത്വ​ത്തോട്‌ ചൂതാ​ട്ടത്തെ നമു​ക്കെ​ങ്ങനെ പൊരു​ത്ത​പ്പെ​ടു​ത്താൻ കഴിയും?—പ്രവൃ​ത്തി​കൾ 20:35.

ചൂതാ​ട്ട​ക്കാർ “ഭാഗ്യ​ദേ​വന്റെ” അനു​ഗ്രഹം ആണ്‌ അഭ്യർത്ഥി​ക്കു​ന്നത്‌ എന്ന പരമാർത്ഥ​വും വിസ്‌മ​രി​ക്ക​പ്പെ​ടാ​വു​ന്നതല്ല, ഇത്‌ ബൈബിൾ വ്യക്തമാ​യി കുറ്റം വിധി​ക്കുന്ന ഒന്നാണ്‌.—യെശയ്യാവ്‌ 65:11.

ഒടുവിൽ, ഒരു ക്രിസ്‌ത്യാ​നി​യു​ടെ “പ്രയോ​ജ​ന​പ്ര​ദ​ങ്ങ​ളായ ശീലങ്ങളി”ൻമേൽ ചൂതാട്ടം ചെലു​ത്തുന്ന സ്വാധീ​ന​ത്തെ​ക്കു​റിച്ച്‌ പരിചി​ന്തി​ക്കുക. (1 കൊരി​ന്ത്യർ 15:33) ക്രിസ്‌ത്യാ​നി​യു​ടെ ജീവി​ത​ഗ​തി​യിൽ കഠിനാ​ദ്ധ്വാ​ന​വും മിതവ്യ​യ​വും ഉൾപ്പെ​ട്ടി​രി​ക്കു​ന്നു. (എഫേസ്യർ 4:28) അതിശ​യ​ക​ര​മാ​യി അപ്പവും മീനും പെരു​പ്പി​ച്ച​തി​നു​ശേഷം ശേഷിപ്പ്‌ വന്നവ പാഴാ​ക്ക​രുത്‌ എന്ന്‌ യേശു ആജ്ഞാപി​ച്ച​പ്പോൾ താൻ പാഴ്‌ചെ​ലവ്‌ ഇഷ്ടപ്പെ​ടു​ന്ന​വനല്ല എന്ന്‌ അവൻ കാണിച്ചു. (യോഹ​ന്നാൻ 6:12, 13) പക്ഷേ, യേശു​വി​ന്റെ കാൽച്ചു​വ​ടു​കളെ പിൻതു​ട​രു​ന്ന​തി​നു പകരം, ഒരു ചൂതാ​ട്ട​ക്കാ​രൻ, “ഒരു ദുർമ്മാർഗ്ഗ​ജീ​വി​തം നയിച്ചു​കൊണ്ട്‌ തന്റെ സ്വത്തുക്കൾ നാനാ​വി​ധ​മാ​ക്കി​ക്കളഞ്ഞ” യേശു​വി​ന്റെ ഉപമയി​ലെ മുടി​യ​നായ പുത്ര​നോട്‌ ഏറെ സാദൃശം വഹിക്കു​ന്നു.—ലൂക്കോസ്‌ 15:13.

സത്യ​ക്രി​സ്‌ത്യാ​നി​കൾ ചൂതാ​ട്ട​ത്തി​ന്റെ സകലരൂ​പ​ങ്ങ​ളിൽ നിന്നും ഒഴിഞ്ഞു നിൽക്കു​ന്നു. യേശു പറഞ്ഞതു​പോ​ലെ: “അത്യൽപ്പ​ത്തിൽ വിശ്വ​സ്‌ത​നായ വ്യക്തി അധിക​ത്തി​ലും വിശ്വ​സ്‌തൻ, അത്യൽപ്പ​ത്തിൽ നീതി​കെ​ട്ടവൻ അധിക​ത്തി​ലും നീതി​കെ​ട്ടവൻ.”—ലൂക്കോസ്‌ 16:10.

രസകര​മാം​വി​ധം, യഹോ​വ​യു​ടെ സാക്ഷികൾ, നിർബ്ബദ്ധ ചൂതാ​ട്ട​ത്തി​ന്റെ കെണി​യ​ല​ക​പ്പെട്ട അനേകരെ അതിൽ നിന്ന്‌ വിടുതൽ നേടാൻ സഹായി​ച്ചി​ട്ടുണ്ട്‌. (മുൻ പേജ്‌ കാണുക) ചൂതാട്ടം ഉളവാ​ക്കുന്ന ആഡ്രി​നാ​ലിൻ ദ്രാവ​ക​ത്തി​ന്റെ ഇരച്ചു​ക​യ​റ്റം അത്തരം ആളുകൾ മേലാൽ അനുഭ​വി​ക്കു​ന്നില്ല, മറിച്ച്‌, ഇന്ന്‌ അവർക്ക്‌ ജീവി​ത​ത്തിൽ ഒരു യഥാർത്ഥ ഉദ്ദേശ്യ​മുണ്ട്‌. ആരോ​ഗ്യ​ത്തെ​യും കുടും​ബ​ത്തെ​യും തകർക്കുന്ന ഒരു നടപടി​യിൽ ഏർപ്പെ​ടു​ന്ന​തി​നു പകരം അവർ “സൽപ്ര​വൃ​ത്തി​ക​ളിൽ” സമ്പന്നരാ​യി​രി​ക്കു​ന്നു. മറ്റൊ​രു​ത്തൻ കഠിനാ​ദ്ധ്വാ​നം ചെയ്‌തു​ണ്ടാ​ക്കിയ പണം തട്ടി​യെ​ടു​ക്കു​ന്ന​തി​നുള്ള പദ്ധതിക്ക്‌ ഒരുങ്ങു​ന്ന​തി​നു പകരം അവർ “പങ്കിടാൻ ഒരുക്ക​മു​ള്ളവർ” ആണ്‌. അവർക്ക്‌ ചൂതാ​ട്ട​ത്തി​ന്റെ മായാ​ലോ​ക​ത്തിൻമേലല്ല “യഥാർത്ഥ ജീവി​ത​ത്തിൻമേ​ലാണ്‌ ദൃഢമായ പിടി”യുള്ളത്‌. (1 തിമൊ​ഥെ​യോസ്‌ 6:18, 19) ഇപ്രകാ​രം അവർ യഥാർത്ഥ വിജയി​ക​ളാ​യി​ത്തീർന്നി​രി​ക്കു​ന്നു! (g87 9/8)

[25-ാം പേജിലെ ആകർഷ​ക​വാ​ക്യം]

“കനിവറ്റ കഠിന സാദ്ധ്യ​തകൾ—ചൂതാ​ട്ട​ത്തിൽ ഏർപ്പെ​ടു​ന്ന​വ​രിൽ 90 ശതമാനം ആളുകൾക്കും നഷ്ടം ഭവിക്കു​ന്നു എന്ന യാഥാർത്ഥ്യം—അവരുടെ ബോധത്തെ സ്‌പർശി​ക്കു​ന്നില്ല. ഈ പ്രതി​കൂല സാദ്ധ്യ​തകൾ അവർക്ക്‌ ഏശുക​യില്ല, അവർ വാസ്‌ത​വ​ത്തിൽ വിശേ​ഷ​പ്പെ​ട്ടവർ ആണ്‌ എന്ന്‌ അവർക്ക്‌ തോന്നു​ന്നു.”—സൈ​ക്കോ​ളജി റ്റുഡേ.

[26-ാം പേജിലെ ചതുരം]

ഞാൻ ഒരു ചൂതു​ക​ളി​ക്കാ​ര​നാ​യി​രു​ന്നു

ഞാൻ എന്റെ പന്ത്രണ്ടാം വയസ്സിൽ പോക്കർ കളിയിൽ (ഒരു തരം ചീട്ടു​കളി) ആസക്തനാ​യി​ത്തീർന്നു. ഞാൻ വിവാ​ഹി​ത​നാ​യ​തി​നു​ശേഷം ഈ ശീലം തുടർന്നു​പോ​ന്നു. വൈകിട്ട്‌ ഒമ്പത്‌ മണിക്ക്‌ കളി തുടങ്ങി​യാൽ രാവിലെ അഞ്ചു മണിക്കോ ആറുമ​ണി​ക്കോ മാത്രമെ അവസാ​നി​പ്പി​ക്കു​മാ​യി​രു​ന്നു​ള്ളു. അതിനു ശേഷം ക്ഷീണിച്ചു കോച്ചി ഞാൻ ജോലി​ക്കു പോകാൻ ശ്രമി​ച്ചി​രു​ന്നു. മിക്ക​പ്പോ​ഴും ഞാൻ ജയിക്കാ​റി​ല്ലാ​യി​രു​ന്നു.

ചൂതാട്ടം എന്റെ കുടുംബ ജീവി​ത​ത്തെ​യും വ്യക്തി​ത്വ​ത്തെ​യും തകർക്കാൻ തുടങ്ങി. പോക്കർ കളിയിൽ ധാരാളം വീമ്പി​ള​ക്കുക ആവശ്യ​മാ​യി​രു​ന്നു. പക്ഷേ ഞാൻ വീമ്പ്‌ മുഴക്കാ​റു​ണ്ടാ​യി​രു​ന്നതു കൂടാതെ യഥാർത്ഥ ജീവി​ത​ത്തി​ലു​ട​നീ​ളം വ്യാജം പറഞ്ഞും നടന്നു. അങ്ങനെ​യി​രി​ക്കെ പണത്തിന്‌ വലിയ ആവശ്യം നേരിട്ടു. ഞാൻ ജയിക്കു​മാ​യി​രു​ന്ന​പ്പോ​ഴെ​ല്ലാം കിട്ടിയ പണം ഉടനെ ചെലവ​ഴി​ക്കാ​നുള്ള പ്രേര​ണ​യു​ണ്ടാ​യി​രു​ന്ന​തു​കൊണ്ട്‌ പണം അധിക​നാൾ എന്റെ കീശയിൽ നീണ്ടു​നി​ന്നില്ല. താമസി​യാ​തെ എന്റെ വിവാഹ ജീവിതം തകർന്നു.

അനന്തരം 1972-ൽ യഹോ​വ​യു​ടെ സാക്ഷി​ക​ളിൽപെട്ട രണ്ടുപേർ എന്റെ വാതിൽക്കൽ മുട്ടി. അവർ സംസാ​രി​ച്ച​പ്പോൾ ഞാൻ ഇങ്ങനെ ചിന്തിച്ചു, ‘ഒന്നും കാണാതെ ആരും യാതൊ​ന്നും ചെയ്യു​ക​യില്ല. ഇവർക്ക്‌ എന്തെങ്കി​ലും ഗൂഢല​ക്ഷ്യ​ങ്ങൾ ഉണ്ടായി​രി​ക്കണം.’ (ഒരു പോക്കർ കളിക്കാ​രൻ സകല കാര്യ​ങ്ങ​ളി​ലും സംശയാ​ലു ആയിരി​ക്കാൻ സ്വയം പരിശീ​ലി​പ്പി​ക്കു​ന്നു!) കാലം കടന്നു​പോ​യ​തോ​ടെ ഇത്‌ സത്യമാ​യി​രു​ന്നില്ല എന്ന്‌ ഞാൻ തിരി​ച്ച​റി​ഞ്ഞു. ഞാൻ അവരുടെ ഒരു സഭാ​യോ​ഗ​ത്തിന്‌ പോയി, എനിക്ക്‌ എല്ലാം മനസ്സി​ലാ​യി​രു​ന്നില്ല എങ്കിലും അവരുടെ ചിട്ട, ഐക്യം, ദയ എന്നിവ എന്നിൽ മതിപ്പു​ള​വാ​ക്കി.

ഞാൻ ബൈബിൾ പഠിക്കാൻ തുടങ്ങി. ചൂതാ​ട്ട​ത്തി​ന്റെ കാര്യ​മോ? എനിക്ക്‌ ഒരു പരിപൂർണ്ണ ബന്ധവി​ച്‌ഛേദം നടത്തേ​ണ്ട​തു​ണ്ടാ​യി​രു​ന്നു. പക്ഷേ, ബൈബിൾ സത്യം നിങ്ങളു​ടെ ജീവി​ത​ത്തി​ലേക്ക്‌ പ്രവേ​ശി​ക്കു​മ്പോൾ ചൂതാട്ടം നടത്തു​ന്ന​തി​നുള്ള ഉൾ​പ്രേരണ നിങ്ങൾക്ക്‌ നഷ്‌ട​പ്പെ​ടു​ന്നു. അങ്ങനെ ഒരു വലിയ യത്‌ന​ത്തി​ന്റെ ഫലമായി ഞാൻ അത്‌ നിർത്തി. ഞാൻ 1975-ൽ സ്‌നാനം എൽക്കു​ക​യും ചെയ്‌തു. എനിക്ക്‌ കൈവന്ന അനു​ഗ്ര​ഹങ്ങൾ നിസ്സീ​മ​മാണ്‌. എന്റെ ആരോ​ഗ്യം അഭിവൃ​ദ്ധി​പ്പെട്ടു—എന്റെ വ്യക്തി​ത്വ​വും അങ്ങനെ തന്നെ. മേലിൽ എന്റെ ജീവി​തത്തെ ഭരിക്കു​ന്നത്‌ ചൂതാ​ട്ടമല്ല പിന്നെ​യോ ആത്മീയ താത്‌പ​ര്യ​ങ്ങ​ളാണ്‌. മുൻപ്‌ എന്റെ ചൂതു​ക​ളി​ക്കൂ​ട്ടു​കാർ മാത്രമെ എന്നെ മാനി​ച്ചി​രു​ന്നു​ള്ളൂ. പക്ഷേ ഇന്ന്‌ ഞാൻ ഒരു മൂപ്പനാ​യി സേവി​ക്കുന്ന സഭയിലെ അംഗങ്ങ​ളാൽ ഞാൻ സ്‌നേ​ഹി​ക്ക​പ്പെ​ടു​ന്നു. ചൂതാ​ട്ട​ക്കാ​രൻ സദാ നഷ്ടപ്പെ​ടു​ന്ന​വ​നാണ്‌ എന്ന്‌ ഞാൻ ഇന്ന്‌ തിരി​ച്ച​റി​യു​ന്നു. ഇത്‌ കാണാൻ ബൈബിൾ സത്യമാണ്‌ എന്നെ സഹായി​ച്ചത്‌.—സംഭാവന ചെയ്യ​പ്പെ​ട്ടത്‌.

[27-ാം പേജിലെ ചിത്രം]

ചൂതാട്ടം നടത്തു​ക​യും അതേ സമയം തന്നെ “ഇന്നേ ദിവസ​ത്തേ​ക്കുള്ള ഞങ്ങളുടെ അപ്പം ഞങ്ങൾക്ക്‌ ഇന്നു നൽകേ​ണമേ” എന്ന്‌ പ്രാർത്ഥി​ക്കു​ക​യും ചെയ്യു​ന്നത്‌ ഒരു ക്രിസ്‌ത്യാ​നിക്ക്‌ യോജി​ച്ച​താ​ണോ?