സമാധാ​ന​ത്തി​നു വേണ്ടി​യുള്ള പ്രാർത്ഥ​നകൾ—ആർ അവ കേൾക്കു​ന്നു?

സമ്പൂർണ്ണ​മാ​യി തൂവൽ പതിച്ച ശിരോ​വ​സ്‌ത്ര​മ​ണിഞ്ഞ ഒരു അമേരി​ക്കൻ ഇൻഡ്യൻ ഒരു ഗ്രീക്ക്‌ ഓർത്ത​ഡോ​ക്‌സ്‌ പുരോ​ഹി​തൻ നിന്ന അതേ പ്രസം​ഗ​പീ​ഠ​ത്തിൽ എന്താണു ചെയ്‌തു​കൊ​ണ്ടി​രു​ന്നത്‌? ബുദ്ധമ​ത​ക്കാ​ര​നായ ദലായ്‌ ലാമാ കാൻറർബറി ആർച്ച്‌ ബിഷപ്പി​നോ​ടൊ​പ്പം ആസനസ്ഥ​നാ​യി​രു​ന്ന​തെ​ന്തു​കൊണ്ട്‌? ഒരു യഹൂദ റബ്ബിക്കും റഷ്യൻ ഓർത്ത​ഡോ​ക്‌സ്‌ സഭയുടെ ഒരു മെത്രാ​പ്പോ​ലീ​ത്താ​യി​ക്കും പൊതു​വിൽ എന്തുണ്ടാ​യി​രി​ക്കാൻ കഴിയും? അങ്ങനെ​യുള്ള ഒരു സമ്മേള​ന​ത്തിൽ കത്തോ​ലി​ക്കാ​സ​ഭ​യു​ടെ ജോൺപോൾ II-ാമൻ പാപ്പാ ആദ്ധ്യക്ഷ്യം വഹിക്കു​ന്ന​തെ​ന്തു​കൊണ്ട്‌?

കുറച്ചു​നാൾ മുമ്പ്‌ പാപ്പാ, മറ്റ്‌ മുഖ്യ മതങ്ങളു​ടെ നേതാ​ക്കൻമാ​രോ​ടു​കൂ​ടെ ഒരു പ്രാർത്ഥ​നാ​പീ​ഠ​ത്തിൽ കൂട്ടു​ചേ​രു​ന്നത്‌ അചിന്ത്യ​മാ​യി​രി​ക്കു​മാ​യി​രു​ന്നു. എന്നിരു​ന്നാ​ലും, 1986-ന്റെ ഒടുവിൽ ഇറ്റാ​ലി​യൻ നഗരമായ അസ്സീസ്സി​യിൽ അദ്ദേഹം “സമാധാ​ന​ത്തി​നു​വേണ്ടി ലോക​പ്രാർത്ഥ​നാ​ദിന”ത്തിൽ ഈ മറ്റു മതങ്ങ​ളോ​ടെ​ല്ലാം കൂട്ടു​ചേർന്നു. ഐക്യ​രാ​ഷ്‌ട്രങ്ങൾ 1986-നെ അന്തരാ​ഷ്‌ട്ര​സ​മാ​ധാ​ന​വർഷ​മാ​യി നിർദ്ദേ​ശി​ച്ച​തിന്‌ ചേർച്ച​യാ​യി പാപ്പാ​യാണ്‌ ഈ സമ്മേള​ന​ത്തി​നു പ്രോ​ത്സാ​ഹി​പ്പി​ച്ചത്‌.

അസ്സീസ്സി​യിൽ സമാധാ​ന​ത്തി​നു​വേണ്ടി വ്യത്യസ്‌ത പ്രാർത്ഥ​നകൾ ഉണ്ടായി​രു​ന്നു. എന്നാൽ ആരാണ്‌ അവ കേട്ടത്‌? ക്രൈ​സ്‌ത​വ​ലോ​ക​ത്തി​ലെ ത്രിത്വ ദൈവ​മാ​ണോ? അതോ യഹൂദൻമാ​രു​ടെ ദൈവ​മാ​ണോ? മുസ്ലീ​ങ്ങ​ളു​ടെ അള്ളായാ​ണോ? ജീവവാ​ദി​ക​ളു​ടെ വലിയ തള്ളവി​ര​ലും ഇരമ്പുന്ന ഇടിമു​ഴ​ക്ക​വു​മോ? ഈ ദൈവ​ങ്ങ​ളി​ലാ​രെ​ങ്കി​ലും ഈ പ്രാർത്ഥ​നകൾ കേട്ടോ? അസ്സീസ്സി​ക്കു​ശേഷം കുറെ കാലം കഴിഞ്ഞ സ്ഥിതിക്ക്‌ ഉത്തരങ്ങൾ സ്‌പഷ്ട​മാണ്‌.

എന്തു നടന്നു?

ആ മതനേ​താ​ക്ക​ളു​ടെ പ്രാർത്ഥ​നകൾ ഒക്‌ടോ​ബർ 27-ാം തീയതി മദ്ധ്യ ഇറ്റലി​യി​ലെ അസ്സീസ്സി​യിൽ നടത്തപ്പെട്ട അന്താരാ​ഷ്‌ട്ര പ്രാർത്ഥ​നാ​ദി​ന​ത്തി​ന്റെ സമാപ്‌തി​യാ​യി​രു​ന്നു. ഒരു വലിയ പ്ലാറ്റ്‌ഫോം കെട്ടി​പ്പൊ​ക്കി​യി​രു​ന്നു, അതിന്റെ പശ്ചാത്ത​ല​ത്തിൽ 14 ഭാഷക​ളിൽ “സമാധാ​നം” എന്ന പദം എഴുതി​യി​രു​ന്നു. മദ്ധ്യഭാ​ഗത്ത്‌ പാപ്പാ​സ​ഹി​തം ഒരു വിസ്‌തൃ​ത​മായ അർദ്ധവൃ​ത്താ​കൃ​തി​യിൽ മുഖ്യ​മ​ത​ങ്ങ​ളി​ലെ 60-ൽപരം നേതാ​ക്കൻമാർ തവണവച്ച്‌ ഒരു പ്രസം​ഗ​പീ​ഠ​ത്തിൽനിന്ന്‌ പ്രാർത്ഥി​ക്കു​ക​യു​ണ്ടാ​യി. റ്റെലി​വി​ഷൻ ക്യാമ​റാ​കൾ ചടങ്ങ്‌ ഒപ്പി​യെ​ടു​ത്തു. ലോക​ത്തെ​മ്പാ​ടും 50 കോടി ആളുകൾ അതു നിരീ​ക്ഷി​ച്ച​താ​യി പറയ​പ്പെ​ടു​ന്നു.

ആദ്യം പ്രാർത്ഥി​ച്ചവർ ബുദ്ധമ​ത​ക്കാർ ആയിരു​ന്നു. അവർ “സൗഭാ​ഗ്യ​ത്തി​ന്റെ​യും സന്തോ​ഷ​ത്തി​ന്റെ​യും ഒരു സാഗര”ത്തിനു​വേണ്ടി അപേക്ഷി​ച്ചു. പിന്നീ​ട്‌ഹി​ന്ദു​ക്കൾ “സകല ജീവി​കൾക്കും സമാധാ​നം” അപേക്ഷി​ച്ചു. മുസ്ലീങ്ങൾ “പ്രപഞ്ച കർത്താ​വായ ദൈവ​ത്തി​നു സ്‌തുതി” പ്രാർത്ഥി​ച്ചു.

ആഫ്രിക്കൻ ജീവവാ​ദി​കൾ തങ്ങളുടെ ദൈവ​ങ്ങ​ളോട്‌ സഹായം അഭ്യർത്ഥി​ച്ച​പ്പോൾ “ഞങ്ങൾക്കു സമാധാ​നം നൽകേ​ണമേ” എന്നായി​രു​ന്നു അപേക്ഷ. അമേരി​ക്കൻ ഇൻഡ്യൻമാർ തങ്ങളുടെ സമാധാന പൈപ്പ്‌ പുകച്ച​പ്പോൾ “ഞങ്ങൾ വലിയ ആത്മാവിന്‌, ഭൂമാ​താ​വിന്‌ പൈപ്പ്‌ അർപ്പി​ക്കു​ന്നു” എന്നു പറയു​ക​യു​ണ്ടാ​യി. “ഭൂമിക്കു സമാധാ​നം കൊടു​ക്കേ​ണമേ” എന്ന്‌ യഹൂദൻമാർ യാചിച്ചു.

“നമുക്ക്‌ നമ്മുടെ കർത്താ​വായ ദൈവ​ത്തോട്‌ സമാധാ​ന​ത്തി​ലും ഐക്യ​ത്തി​ലും അഭ്യർത്ഥി​ക്കാം” എന്നായി​രു​ന്നു കത്തോ​ലി​ക്ക​രു​ടെ​യും ലൂഥറൻമാ​രു​ടെ​യും ഗ്രീക്ക്‌ ഓർത്ത​ഡോ​ക്‌സ്‌ പ്രതി​നി​ധി​ക​ളു​ടെ​യും പ്രാർത്ഥന. സിക്കു​കാ​രും സൊ​രോ​സ്‌ട്രി​യൻമാ​രും ഷിന്റോ​ക​ളും ജൈന​മ​ത​ക്കാ​രും സാർവ്വ​ത്രിക സമാധാ​ന​ത്തി​നാ​യി പ്രാർത്ഥി​ച്ചു.

ചടങ്ങിന്‌ പ്രാമു​ഖ്യത കൊടു​ക്ക​പ്പെ​ടു​ന്നു

ലോക​മ​ത​ങ്ങ​ളി​ലെ ഉന്നത സ്ഥാനീ​യ​രായ വൈദി​കർ ഒരേ സ്ഥലത്തു പ്രാർത്ഥി​ക്കാൻ സമ്മേളി​ച്ചത്‌ ഇദം​പ്ര​ഥ​മ​മാ​യി​ട്ടാ​ണെന്ന്‌ പ്രസ്സ്‌ പ്രസ്‌താ​വി​ച്ചു. ഈ കാരണ​ത്താൽ ഈ മീറ്റിംഗ്‌ ഒരു “ചരി​ത്ര​പ്ര​ധാ​ന​മായ അവസരം” എന്ന്‌ വിളി​ക്ക​പ്പെ​ട്ടി​രി​ക്കു​ന്നു. അവിടെ ബൈബിൾ പ്രവചനം നിവർത്തി​ച്ചു​വെന്ന്‌ ചിലർ വിശ്വ​സി​ച്ചു.

അസ്സീസ്സി ഒരു കുന്നിൻ പുറത്താ​യി​രു​ന്ന​തി​നാൽ മീഖാ 4-ാം അദ്ധ്യായം 2-ാം വാക്യ​ത്തി​ലെ പ്രതീ​കാ​ത്മക മല അതാ​ണെന്ന്‌ അവർ ചിന്തിച്ചു. അസ്സീസ്സി സമ്മേളനം “മീഖാ പ്രവാ​ചകൻ 2,700 വർഷം മുമ്പ്‌ മുൻകൂ​ട്ടി​പ്പ​റ​ഞ്ഞി​രുന്ന ഒരു യോഗ​മാ​യി​രു​ന്നു: ‘അന്ത്യ [കാലത്ത്‌] കർത്താ​വി​ന്റെ ആലയം നിൽക്കുന്ന മലയാ​യി​രി​ക്കും ഏറ്റവും ഉയർന്നത്‌ . . . സകല ജനങ്ങളും അതിന്റെ അടിവാ​ര​ത്തിൽ കൂടി​വ​രി​ക​യും നമുക്കു കർത്താ​വി​ന്റെ പർവ്വത​ത്തി​ലേക്കു കയറി​പ്പോ​കാം. നാം ചെയ്യേ​ണ്ടത്‌ അവൻ നമ്മെ പഠിപ്പി​ക്കും’ എന്നു പറയു​ക​യും ചെയ്യും” എന്ന്‌ ഒരു റിപ്പോർട്ടു പ്രസ്‌താ​വി​ച്ചു.—വോസി ഡല്ലേ കോ​ണ്ട്രാഡ്‌.

ഇൽ സബാട്ട എന്ന മാസിക ഉത്‌സാ​ഹ​പൂർവ്വം ഇങ്ങനെ പറഞ്ഞു: “ബാബേൽഗോ​പു​ര​ത്തി​നു​ശേഷം ഇത്തര​മൊ​ന്നു സംഭവി​ച്ചി​രി​ക്കു​ന്നത്‌ ആദ്യമാ​യി​ട്ടാണ്‌. അന്ന്‌ ആകാശ​ങ്ങ​ളോ​ളം എത്താനുള്ള അവരുടെ ആഗ്രഹം നിമിത്തം അവർ ഭിന്നി​പ്പി​ലാ​യി. ഇന്ന്‌, ദൈവ​ദാ​ന​മായ സമാധാ​ന​ത്തിന്‌ അവരെ തുറന്നി​ടുന്ന മതവി​കാ​ര​ങ്ങ​ളു​ടെ പേരിൽ മനുഷ്യർ ഐക്യ​പ്പെ​ട്ടി​രി​ക്കു​ന്നു.”

ഗൗരവ​മുള്ള ചോദ്യ​ങ്ങൾ ഉന്നയി​ക്ക​പ്പെ​ടു​ന്നു

ആ സംഭവം പകിട്ടാർന്ന​താ​യി​രു​ന്നു​വെ​ന്ന​തി​നു സംശയ​മില്ല. ലാ നാസി​യോൺ എന്ന ദിനപ്പ​ത്രം ചോദി​ച്ചു: ആ സന്ദേശം അതിന്റെ ഉദ്ദേശ്യം സാധി​ച്ചോ? അത്‌ അമ്പതു​കോ​ടി കാഴ്‌ച​ക്കാ​രു​ടെ ഹൃദയ​ങ്ങ​ളി​ലേക്ക്‌ ആണ്ടിറ​ങ്ങി​യി​രി​ക്കു​മോ? അത്‌ നേരി​ട്ടോ പരോ​ക്ത​മാ​യോ, ലോക​ത്തി​ലെ നേരി​ട്ടുള്ള സംഭവ​ങ്ങ​ളെ​യും ഭാവി​യെ​യും നിർണ്ണ​യി​ക്കു​ന്ന​വ​രു​ടെ ഉറച്ച നിലപാ​ടു​ക​ളിൽ ഒരു വിള്ളൽ ഉണ്ടാക്കി​യി​രി​ക്കു​മോ?

ചിന്തക​രാ​യ ആളുകൾ തുളച്ചു​ക​യ​റുന്ന മറ്റു ചോദ്യ​ങ്ങൾ ചോദി​ക്കു​ന്നു: നടത്ത​പ്പെ​ടുന്ന ആരാധ​ന​യു​ടെ രീതി പരിഗ​ണി​ക്കാ​തെ ദൈവം എല്ലാ പ്രാർത്ഥ​ന​ക​ളും സ്വീക​രി​ക്കു​ന്നു​വോ? ഏതെങ്കി​ലും കാര്യം സംബന്ധിച്ച ദൈവ​ത്തി​ന്റെ വീക്ഷണം തിട്ട​പ്പെ​ടു​ത്താ​തെ അതിനു​വേണ്ടി പ്രാർത്ഥി​ക്കു​ന്നത്‌ മതിയാ​കു​മോ? ആളുകൾ ഈ മീറ്റിം​ഗി​നാൽ സമാധാ​ന​ത്തി​നു​വേണ്ടി പ്രവർത്തി​ക്കാൻ പ്രേരി​ത​രാ​യോ? ഗതകാലം നമ്മെ എന്തു പഠിപ്പി​ക്കു​ന്നു? എല്ലാറ്റി​നു​മു​പരി, ലോക​സ​മാ​ധാ​നം എങ്ങനെ നേടു​മെ​ന്നു​ള്ളതു സംബന്ധിച്ച്‌ തിരു​വെ​ഴു​ത്തു​കൾ എന്തു പറയുന്നു?

ഈ ലോക മതങ്ങളു​ടെ അസ്സീസ്സി​യി​ലെ സമ്മേളനം യഥാർത്ഥ​ത്തിൽ ഒരു ആധുനിക ബാബേൽ ഗോപു​രം ആയിരു​ന്നോ? എന്നും നാം ചോദി​ക്കേ​ണ്ടി​യി​രി​ക്കു​ന്നു. (g87 6/8)