Fixe Lobzektif pou Pran Batem

1. (a) Kifer li inportan ki nou pran batem? (b) Ki nou pou examine dan sa lartik-la?

ESKI to’nn donn to lavi Zeova ek to’nn pran batem? Si wi, savedir ki to’nn demann Zeova pou pardonn to bann pese ek pou aksepte ki to servi Li kouma enn so bann serviter. (1 Pier 3:21) Avredir, samem pli bon desizion ki to’nn pran dan to lavi! Anplis, kan to’nn pran batem, to’nn donn enn zoli lexanp bann ki pankor fer li. Parkont, si to pankor pran batem, nou sir ki to kontan Zeova ek ki to anvi fer so volonte. To kone ki batem li bien inportan pou ki to gagn pardon to bann pese ek ki to gagn faver Zeova. (Zist. 2:38-40) Me kifer to pe ezite pou pran batem? Dan sa lartik-la, nou pou gete (1) kifer sertin ezite pou pran batem, (2) kifer li inportan ki nou rapel ki lafin bien pre, ek (3) kifer li inportan ki nou pa tarde pou fer bann sanzman pou nou reisi pran batem.

KIFER SERTIN EZITE?

2. Kifer sertin ezite pou pran batem?

² Sertin ezite pou pran batem parski zot per. Par exanp, mem si zot anvi servi Zeova, zot per tansion zame zot pa reisi fer Li plezir. Si to ena sa santiman-la, reflesi lor bann verse Labib ki pou montre twa ki Zeova pa atann ki to parfe ek ki Li bien kontan kan to fer to maximum pou servi Li. (Ps. 103:13, 14; Kol. 3:23) Si to per tansion lezot persekit twa apre to batem, demann Zeova pou ed twa pou ena mem determinasion ki sa ekrivin psom, ki ti dir: “Zeova avek mwa; mo pa pou per. Ki enn dimounn kapav fer mwa?”—Ps. 118:6.

3. Sit enn lot rezon kifer sertin ezite pou pran batem. (Get zimaz osi.)

³ Ena sertin ki kontan Zeova, selman zot ezite pou pran batem parski zot panse ki zot pena ase konesans. Me eski nou bizin konn tou seki ena dan Labib pou nou pran batem? Non. Par exanp, apre ki ti ena enn tranbleman-de-ter dan prizon kot Pol ek Silas ti ete, zot ti pres ar enn gard prizon ek so fami. Sa misie-la ek so fami ti konpran ki se Bondie ki ti fer enn mirak pou sap so bann serviter. Anplis, zot ti aprann sertin lansegnman inportan lor Zeova ek Zezi sa swar-la. Seki zot ti aprann ti ase pou ki zot “pran batem deswit.” (Zist. 16:25-33) Si to konn Zeova, to kontan Li ar tou to leker, to konn bann lansegnman inportan ki ena dan Labib, to’nn repanti pou to bann pese, ek to vremem anvi obeir Zeova, to pare pou pran batem.—Mark 12:30.

4. Sit bann lezot rezon kifer sertin ezite pou pran batem. (Get zimaz osi.)

⁴ Ena lezot ki anvi fer bann sanzman ek pran batem, selman zot mazinn seki sa pou kout zot. Li normal ki nou bizin reflesi bien avan ki nou pran enn desizion. (Lik 14:27-30) Selman, sertin reflesi tro boukou lor bann sakrifis ki zot pou bizin fer pou ki zot kapav servi Bondie. Se seki ti ariv Candace. Depi ki li tipti, li’nn aprann seki li bizin fer pou fer Zeova plezir. Selman, zame li pa’nn met an pratik seki li’nn aprann. Plitar, kan li’nn vinn enn adilt, li’nn rekoumans etidie Labib. Li dir: “Mo ti kone seki mo ti bizin fer pou fer Zeova plezir. Selman, mo ti kontan fason ki mo ti pe viv mo lavi, mem si sa pa ti fer Zeova plezir. Mo ti kone ki sa ti pou bien difisil pou mo abandonn sa bann kitsoz-la.” Ena lezot ki trakase tansion apre zot batem, zot pa reisi swiv bann prinsip moral ki ena dan Labib. Zot trakase tansion zot fer enn pese grav ek ki tir zot dan lasanble. Si twa osi to pans koumsa, ki to kapav fer?

5. Si to pe ezite pou pran batem, lor ki kitsoz to bizin reflesi? (Matie 13:44-46)

⁵ Kan nou anvi aste enn kitsoz, nou pa zis get seki sa pou kout nou, me nou get osi valer ki sa kitsoz-la ena. Si valer sa kitsoz-la li plis ki seki li koute, nou pa pou ezite pou aste li, pa vre! Dan mem fason, kan nou pe reflesi si nou pou pran batem, fode pa nou mazinn zis seki sa pou kout nou, me nou bizin osi reflesi lor seki nou pou gagne. Kan nou pran batem, nou gagn enn kitsoz ki ena boukou valer: Nou vinn kamarad Zeova! Zezi ti servi de lexanp pou fer nou konpran sa. (Lir Matie 13:44-46.) Dan sak lexanp, enn zom trouv enn kitsoz ki ena boukou valer ek li pa ezite pou vann tou seki li ena pou aste sa kitsoz-la. Twa osi, to’nn trouv enn kitsoz ki ena boukou valer kan to’nn aprann bon nouvel lor Rwayom Bondie. Alor, si to pe ezite pou fer bann sanzman ki bizin pou to pran batem, reflesi lor sa de lexanp-la, ek demann tomem: ‘Eski mo sir ki bon nouvel lor Rwayom Bondie ena boukou valer? Eski mo lamitie ar Zeova, lesperans ki Li’nn donn mwa, ek mo lamitie ar mo bann frer ek ser, ena boukou valer pou mwa?’ Fason ki to reponn sa bann kestion-la pou ed twa konpran seki to bizin fer pou ki to reisi pran batem.

6. Ki kitsoz kapav ed twa pou met an pratik seki to pe aprann?

⁶ Zezi ti explike ki, kan bann dimounn ti pou tann bon nouvel, sertin pa ti pou met an pratik seki zot ti pe aprann. Parkont, li ti dir ki bann “ki ena enn leker bon ek sinser” ti pou kontan seki zot ti pe aprann ek ki zot ti pou fer bann progre. (Lik 8:5-15) Alor, si to trakase parski to pa vremem sir ki to anvi met an pratik seki to pe aprann, fode pa to dekouraze. Zeova kapav donn twa “enn nouvo leker,” setadir Li kapav motiv twa pou ki to anvi obeir Li. Alor, priye Li ek demann Li pou ed twa pou kontan bann kitsoz ki to pe aprann ek pou met zot an pratik dan to lavi.—Eze. 18:31; 36:26.

7-8. Sit sertin kitsoz ki kapav blok bann zenn pou pran batem. (Get zimaz osi.)

⁷ Sertin zenn ki kontan Zeova pa reisi fer bann sanzman ek pran batem akoz linflians lezot. Par exanp, sertin profeser lekol kitfwa ankouraz zot bann zelev “pou ena enn lespri ouver,” setadir pou aksepte sertin konportman ki pa an-akor avek bann prinsip Bondie. Selman, si to ekout sa kalite konsey-la, sa kapav fer twa gagn bann gro problem dan to lavi. (Ps. 1:1, 2; Prov. 7:1-5) To kapav evit sa bann problem-la kan to swiv lexanp sa ekrivin psom ki ti dir Zeova: “Mo konpran pli bien ki tou mo bann profeser, parski mo touletan medit lor to bann rapel.”—Ps. 119:99.

⁸ Parfwa, li kapav arive ki sertin paran Temwin blok zot zanfan pou pran batem. Par exanp, kitfwa zot tro trakase konsernan so ledikasion ouswa travay ki li pou fer kan li pou vinn gran. Ouswa, kitfwa zot pena labitid pou ankouraz li pou fixe bann lobzektif spiritiel. Eski to panse ki to bann paran bizin ed twa plis pou to reisi pran batem? Si wi, pa ezite pou koz sa ar zot. Ninport ki laz to ena, to kapav vinn pros ar Zeova ek ena enn bon lamitie avek Li.—Prov. 20:11.

9. Kifer sertin tarde pou pran batem?

⁹ Sertin tarde pou pran batem mem si zot deza ranpli bann kondision pou fer li. Kifer? Parski kitfwa zot pe atann ki enn manb zot fami ouswa zot bon kamarad pran batem ansam ar zot. Biensir, to kapav pran batem mem zour ki enn fami ouswa enn kamarad. Selman, eski se enn bon rezon pou to tarde pou pran batem? Pa bliye ki kan to donn to lavi Zeova, se enn promes ki to’nn fer ant twa ek Li. Alor, to batem bizin pa depann lor seki lezot fer.—Rom. 14:12.

KIFER TO BIZIN RAPEL KI LAFIN BIEN PRE?

10. Kifer sertin tarde pou fer bann sanzman ek pran batem?

¹⁰ Sertin kapav tarde pou fer bann sanzman ek pran batem, parski zot panse ki ena boukou letan avan ki lafin vini. Me eski sa fason panse-la li bon? Zezi ti donn so bann disip sa lavertisman-la: “Zot bizin pare, parski Garson limanite pe vini dan enn ler ki zot pa pe atann.”—Lik 12:40.

11. Kan nou aprann plis lor Zeova, ki sa motiv nou pou fer, ek kifer? (Psom 119:60)

¹¹ Se lamour ki bizin motiv nou pou donn nou lavi Zeova ek pou pran batem. Plis nou aprann konn Zeova, plis nou pou trouve ki kantite Li kontan nou ek ki kantite so bann komannman bon pou nou. (Lir Psom 119:60.) Disip Zak ti koz lor enn lot rezon inportan pou kifer nou bizin pa tarde pou obeir bann komannman Zeova. Li ti dir ki personn pa kone seki pou arive dime. Alor, sak zour ki pase, nou bizin “fer seki bon,” setadir nou bizin fer seki Zeova anvi nou fer.—Zak 4:13-17.

12. Ki leson nou aprann ar lexanp karo rezin ki Zezi ti servi?

¹² Dan lexanp karo rezin ki Zezi ti servi, li ti explike ki sertin ti pou travay zis enn-er-tan. Me kanmem sa, zot ti pou gagn mem lapey ki bann ki ti travay enn zourne. Kifer bann ki ti travay zis enn-er-tan pa ti koumans pli boner? Zot ti dir: “Parski personn pa’nn apel nou pou travay.” Sa bann travayer-la pa ti pares. Zot ti pare pou travay enn zourne, me personn pa ti pran zot pou travay. Selman, deswit kouma enn kikenn ti apel zot, zot pa ti tarde pou koumans travay. (Mat. 20:1-16) Li parey azordi osi. Zezi inn demann nou pou vinn so bann disip ek pou pres bon nouvel. Alor, kan nou tann bon nouvel, nou bizin pa tarde pou fer seki Zezi demann nou.

13. Ki leson nou aprann ar zistwar fam Lot?

¹³ Sertin pa prese pou fer bann sanzman pou zot servi Zeova, parski zot panse ki zot pou kapav fer sa bann sanzman-la zis avan ki lafin vini. Selman, plis zot atann, plis li pou difisil pou zot fer sa bann sanzman-la. Zezi ti konn sa bien. Se akoz sa ki li ti dir so bann disip: “Rapel seki ti ariv fam Lot.” (Lik 17:31-35) Fam Lot ti kone ki Zeova ti pre pou detrir Sodom ek Gomor. Selman, li pa ti anvi abandonn bann kitsoz ki li ti ena. (Zen. 19:23-26) Sa zistwar-la rapel nou ki laport ki amenn ver lavi eternel, pa pou res ouver pou touletan. Kan pou ariv ler ki Zeova inn fixe, sa laport-la pou ferme. Lerla, li pou tro tar.—Lik 13:24, 25.

14. Kan to trouve kouma bann profesi Labib pe realize, ki lefe sa bizin ena lor twa?

¹⁴ Sak zour ki pase, seki pe arive dan lemond montre ki bann profesi Labib pe realize. Mem si sertin kitsoz ki Labib inn predir pa pe ariv dan landrwa kot to reste, kan to trouv sa pe arive dan bann lezot landrwa, sa bizin motiv twa pou to pa tarde pou fer bann sanzman ki bizin pou to pran batem. Anou gete seki lapot Pier ti dir sertin Kretien dan premie siek. Li ti ankouraz zot pou “res lor zot gard,” ouswa pou “res eveye,” parski “lafin tou kitsoz [ti pe] koste.” (1 Pier 4:7; not) Dan sa verse-la, kan Pier koz lor “lafin,” li ti pe koz lor lepok kot Zerizalem ek so tanp ti pou detrir. Pier ti ekrir sa let-la pou bann Kretien ki ti res lwin ar Zerizalem. Alor, zot pa ti dan Zerizalem kan lavil-la ti detrir. (1 Pier 1:1) Selman, kan zot ti trouve kouma sa profesi-la ti realize, sa ti ogmant zot konfians ki Zeova ti pou realiz tou so bann lezot promes osi. Dan mem fason, kan to trouve kouma bann profesi konsernan lafin pe realize, sa bizin motiv twa pou fer bann sanzman ki bizin pou to pran batem.

15. Kouma nou kapav prepar nou pou zour Zeova? (2 Pier 3:10-13)

¹⁵ Dan so deziem let, lapot Pier ti explike kouma nou kapav prepar nou pou “zour Zeova,” setadir lafin sa lemond-la. Pou bann Kretien ki ti viv dan premie siek, zour Zeova ti ankor bien-bien lwin. Kanmem sa, Pier ti dir zot ki zot ti bizin “kontign gard dan zot lespri” sa zour-la. (Lir 2 Pier 3:10-13) Nou kontign gard zour Zeova dan nou lespri, kan nou touletan rapel ki lafin bien pre. Ek nou fer nou maximum pou prepar nou pou sa zour-la, kan nou fer ‘bann aksion ki montre ki nou kondwit sin ek ki nou atase ar Bondie.’ Sey mazine ki kantite Zeova kontan kan Li trouv twa fer sa bann kitsoz-la! To kapav sir ki Li pou plis kontan ankor si Li trouv twa donn Li to lavi ek pran batem!

KIFER FODE PA TO TARDE POU PRAN BATEM?

16. Ki meyer moman pou to pran batem? (2 Korintien 6:1, 2) (Get zimaz osi.)

¹⁶ Aster-la, se meyer moman pou to pran batem! (Lir 2 Korintien 6:1, 2.) Sa ofisie Etiopien ki Filip ti zwenn la, ti konpran ki li ti bizin pa tarde pou pran batem. Kan li ti aprann lor bon nouvel ek ki li ti trouv enn plas kot li ti kapav pran batem, li pa ti dir: ‘Mo ti pou kontan aprann plis lor bon nouvel avan. Lor mo sime, pou bizin ena enn lot plas kot ena delo pou ki mo kapav pran batem.’ Olie sa, li ti dir Filip: “Ki anpes mwa pran batem?” (Zist. 8:26, 27, 35-39) Se enn zoli lexanp, pa vre! Apre so batem, li ti “kontign so semin dan lazwa.”

17. Ki kitsoz to kapav sir?

¹⁷ Si to pe ezite pou pran batem, to kapav sir ki Zeova anvi ed twa pou ki to ena enn bon lamitie avek Li. (Rom. 2:4) Li kapav ed twa si to per, si to trakase, ouswa si lezot pa ankouraz twa pou pran batem. Kan to pou pran batem, to pou ere parski to pou fer Zeova plezir. Anplis, to pou trouve ki bann kitsoz ki to’nn kit “par deryer” pou nepli ena valer pou twa. (Fil. 3:8, 13) Lerla, to pou kapav trouv “bann kitsoz ki devan,” setadir to pou trouv realizasion bann promes ki Zeova inn fer pou bann ki pran batem.—Zist. 3:19.