Prepar Twa pou Bann Difikilte ki To Kapav Gagne Apre To Batem

1-2. Kouma nou kapav prepar nou pou fer fas ar bann difikilte ki nou kapav gagne apre nou batem? Servi enn lexanp pou explike.

NOU kone ki nou pou gagn bann difikilte dan sa lemond-la. Zezi ti dir so bann disip: “Pou touletan ena bann kitsoz ki pou fer bann dimounn fer pese.” (Mat. 18:7) Alor, li kler ki nou pou gagn bann difikilte, ek sa bann difikilte-la kapav afebli nou lafwa. Par exanp, nou kapav gagn bann problem ar nou bann frer ek ser. Selman, si nou prepar nou pou fer fas ar sa bann difikilte-la, nou pou kapav res pros ar Zeova.

² Anou pran enn lexanp. Bann serviter Zeova souvan gagn bann rapel konsernan bann katastrof natirel, kouma par exanp bann siklonn, bann inondasion, ouswa bann tranbleman-de-ter. Kouma nou kapav prepar nou pou fer fas ar sa bann katastrof-la? Premierman, nou bizin kone ki kalite katastrof nou kapav gagne dan nou landrwa. Nou bizin konn sa sirtou si nou fek vinn res dan sa landrwa-la. Apre sa, nou bizin fini pran bann dispozision pou ki si enn katastrof arive, nou fini pare pou fer fas ar li. (Prov. 21:5) Dan mem fason, li bon ki nou konn bann difikilte ki nou kapav gagne apre nou batem. Koumsa, nou pou pare pou fer fas ar zot, nou pou kapav andir zot, ek nou pou kapav res pros ar Zeova. (Ps. 17:5) Aster-la, anou get trwa difikilte ki nou kapav gagne, ek anou gete kouma nou kapav prepar nou pou fer fas ar zot.a

KAN ENN FRER OUSWA ENN SER OFANS TWA

3. Ki difikilte nou kapav gagne dan lasanble?

³ Eski to rapel premie fwa ki to ti al renion? Kitfwa seki ti plis tous twa sa zour-la, se lamour ki to ti trouve ant bann frer ek ser. Ek se kitfwa akoz sa lamour-la ki to’nn anvi servi Zeova twa osi. (Zan 13:35; Kol. 3:12) Se seki Blancab ti resanti. Selman, inpe letan apre so batem, ti ariv li enn kitsoz ki li pa ti atann. Li dir: “Enn ser ti inpe brit ar mwa. Mo ti remarke osi ki li ti kritik lezot. Kan sa ti arive, mo ti gagn sok parski dan mo letid ek dan bann renion, mo ti aprann ki bann Temwin Zeova fer zefor pou montre lamour ek res anpe ar lezot.” Li vre ki bann serviter Zeova fer tou seki zot kapav pou imit bann kalite Zeova. Selman, nou pa parfe. (Efe. 4:23, 24; 1 Zan 1:8) Savedir ki li kapav arive ki enn kikenn dan lasanble dir nou ouswa fer nou enn kitsoz ki bles nou. (Zak 3:8) Ek malerezman, sertin inn aret servi Zeova akoz sa.

4. Ki to kapav fer depi aster-la mem pou ki, kan enn frer ouswa enn ser ofans twa, to pa abandonn Zeova? (Efezien 4:32)

⁴ Ki to kapav fer depi aster-la mem pou ki, kan enn frer ouswa enn ser ofans twa, to pa abandonn Zeova? Reflesi lor konsey ki ena dan Efezien 4:32 (Lir.) ek fer zefor pou devlop bann kalite ki mansione dan sa verse-la. Si to fer to maximum pou montre lamour ek konpasion anver lezot, sa pou ed twa pou evit bann problem. Ek si enn kikenn bles twa, fixe lobzektif pou pardonn li, ek pa tarde pou pardonn li. Ki kitsoz kapav ed twa pou fer sa? Reflesi komie fwa tomem to’nn demann Zeova pou pardonn twa pou bann erer ki to’nn fer, ek kouma Li pa’nn ezite pou pardonn twa. (Mat. 6:12) Kan to rekonesan anver Zeova, ki’nn pardonn twa plizir fwa, li pou pli fasil pou to pardonn lezot.

5. Ki verse Labib kapav ed nou kan enn kikenn bles nou? (Proverb 19:11) (Get zimaz osi.)

⁵ Lir Proverb 19:11. Labib dir ki si nou ena bon zizmanc ek nou fer zefor pou konpran lezot, sa kapav ed nou pou ena pasians ek pou pa ankoler vit. Se seki ti ed Rima, enn ser ki batize depi de-trwa lane. Li dir: “Kan mo trouv enn frer ouswa enn ser azir dan enn fason ki mo panse kapav bles lezot, mo mazinn seki Proverb 19:11 dir. Mo reflesi lor so sitiasion, lor seki’nn ariv li dan lepase, ek osi lor seki kitfwa inn pous li pou azir koumsa. Mo osi invit li pou pres ansam ar mwa. Kan mo fer sa, sa ed mwa pou konn sa dimounn-la pli bien.” Se enn zoli konsey, pa vre! Depi aster-la mem, twa osi to kapav aprann konn to bann frer ek ser pli bien. Plis to fer zefor pou aprann konn zot, plis to pou konpran zot, ek lerla li pou pli fasil pou to pardonn zot si zot bles twa.

6. Ki kitsoz kapav ed nou pou vinn pli pros ar nou bann frer ek ser?

⁶ Ki kitsoz kapav ed twa pou ena enn bon lamitie ar to bann frer ek ser? Amezir ki to aprann konn zot pli bien, fer zefor pou konsantre twa lor zot bann zoli kalite. (Konpar ar Proverb 10:12; Rom. 12:10; Fil. 2:2, 3) Se seki Mark, enn frer ki fek pran batem, ti fer. Plis li ti pas letan ar bann frer ek ser so lasanble, plis li ti trouv zot bann defo. Ki kitsoz inn ed Mark pou res pros ar Zeova ek ar bann frer ek ser? Li dir: “Mo rann mwa kont ki bann erer ki bann frer ek ser fer, zot tipti konpare ar bann gro pese ki boukou dimounn dan sa lemond-la fer. Akoz sa, mo bien deside pou pa konsantre mwa lor defo mo bann frer ek ser. Olie sa, mo fer zefor pou trouv zot bann zoli kalite.” Si to fer parey kouma Mark ek ki to rod bann zoli kalite ki to bann frer ek ser ena, sa pou ed twa pou vinn plis pros avek zot.

KAN TO KOUMANS PANS BANN KITSOZ KI TO’NN KITE POU TO KAPAV SERVI ZEOVA

7. Ki kitsoz kapav fer nou koumans pans bann kitsoz ki nou ti ena ouswa ki nou ti pe fer avan?

⁷ Kan to ti vinn enn Temwin Zeova, sirman to ti bien kontan ki to’nn kit lemond Satan. Ek kitfwa to pa ti konpran kouma enn kikenn kapav anvi retourn dan sa move lemond-la. Selman, kan to gagn bann difikilte, li kapav arive ki to koumans pans bann kitsoz ki to’nn kite pou to vinn enn Temwin Zeova. Li kapav mem arive ki to koumans rod sa bann kitsoz-la. (Konpar ar Nonb 11:4-6.) Par exanp, sertin frer ek ser inn kit enn bon post travay parski sa travay-la ti pe pran tro boukou zot letan. Ena lezot ki, kan zot inn koumans etidie Labib, zot bann bon kamarad inn abandonn zot. Ek ena lezot ki’nn aret fer bann kitsoz ki zot ti bien kontan fer, parski sa bann kitsoz-la pa ti fer Zeova plezir. Boukou parmi nou inn aret fer sertin kitsoz pou ki nou kapav servi Zeova. Li pou bien tris ki nou rekoumans fer sa bann kitsoz-la ek ki sa fer nou al lwin ar Zeova, pa vre! Alor, ki to kapav fer depi aster-la mem pou ki, kan to gagn bann difikilte, to pa rekoumans fer bann kitsoz ki to ti pe fer avan?

8. Ki leson nou aprann ar lexanp Abraam ek Sara?

⁸ Dan Labib, ena lexanp boukou fidel serviter Zeova ki ti abandonn bann kitsoz pou ki zot kapav servi Zeova. Par exanp, Abraam ek Sara ti pe res dan lavil Our, enn zoli lavil ki ti antoure ar bann miray ek kot zot ti an sekirite. Me kan Zeova ti donn zot lord pou kit lavil-la, zot ti obeir Zeova ek zot ti al res anba bann latant. (Ebre 11:8, 9) Sirman Abraam ek Sara ti pans bann zoli kitsoz ki zot ti ena dan Our. Me si zot “ti kontign pans” sa bann kitsoz-la ek si zot ti anvi regagn sa, kitfwa sa ti pou pous zot pou retourn laba. Selman, zot pa ti fer sa! Zot ti res konsantre lor bann bon kitsoz ki Zeova ti promet zot.—Ebre 11:15, 16.

9. Kouma Pol ti konsider bann kitsoz ki li ti abandone? (Filipien 3:7, 8, 13)

⁹ Lapot Pol osi ti fer bann sanzman dan so lavi pou ki li kapav servi Zeova. Par exanp, avan ki li vinn enn Kretien, Pol ti etidie Lalwa bann Zwif ar Gamaliel, enn ansegnan ki bann Zwif ti bien respekte. (Zist. 22:3) Pol ti kapav vinn enn gran sef relizie pou bann Zwif. (Gal. 1:13, 14) Selman, kan li’nn konn bon nouvel, li’nn abandonn tousala. Me eski Pol so lavi ti touletan fasil apre ki li ti vinn enn Kretien? Non. Bann dimounn so prop kominote, setadir bann Zwif, ti ena laenn pou li, zot ti bat li, ek zot ti met li dan prizon. (2 Kor. 11:23-26) Si Pol ti res konsantre lor so bann difikilte ek si li ti konpar lavi ki li ti ena aster-la, ar lavi ki li ti ena avan, kitfwa li ti kapav panse ki li’nn fer enn gro erer kan li’nn vinn enn disip Zezi. Selman, Pol pa ti fer sa. Li ti res konsantre lor gran privilez ki li ti ena pou servi Zeova. Li ti osi res konsantre lor zoli rekonpans ki li ti pou gagne dan lavenir. Pol ti sir ki vinn enn disip Zezi ti ena plis valer ki tou bann kitsoz ki li ti abandone.—Lir Filipien 3:7, 8, 13.

10. Lor ki kitsoz nou bizin pran letan pou reflesi? (Mark 10:29, 30) (Get zimaz osi.)

¹⁰ Ki leson nou aprann? Si to koumans pans bann kitsoz ki to’nn abandone pou ki to vinn enn Kretien, li bon ki to rapel osi kifer to’nn abandonn sa bann kitsoz-la. (Ekle. 7:10) To kapav osi konpar bann kitsoz ki to’nn abandone, ar bann benediksion ki to’nn gagn depi ki to’nn koumans servi Zeova. Par exanp, to ena enn bon lamitie ar Bondie Zeova. (Prov. 3:32) To ena boukou frer ek ser dan lasanble ek dan lemond antie, ek zot bien kontan twa. (Lir Mark 10:29, 30.) Ek to ena osi enn zoli lavenir devan twa. (Iza. 65:21-23) Si souvan to pran letan pou reflesi lor bann benediksion ki to’nn gagne depi ki to servi Zeova, to pa pou pans bann kitsoz ki to’nn abandone ek to pa pou rod sa bann kitsoz-la.

11. Ki leson nou aprann ar lexanp Rosemary?

¹¹ Enn ser ki apel Rosemary ti pran batem kan li ti ena apepre 50 an. Anou gete seki ti ed li pou li aret pans bann kitsoz ki li ti abandone kan li ti vinn enn Kretien. Li dir: “Kan mo ti fek vinn enn Temwin Zeova, sak lane kan ti ena fet Nwel mo ti bien tris, parski mo ti bien kontan pas letan ar mo fami sa zour-la. Mo ti kontan donn zot bann kado, ek mo ti bien kontan trouv lazwa mo bann zanfan ek mo bann ti-zanfan kan zot ti ouver zot bann kado.” Ki kitsoz inn ed Rosemary? Li dir: “Mo’nn trouv enn fason pou ranplas Nwel. Mo swazir bann lezot moman dan lane pou mo zwenn ar mo fami, pou mo donn zot bann kado, ek pou mo dir zot kifer mo kontan zot.” Rosemary ti gagn enn lot difikilte osi. Li dir: “Kan mo ti vinn dan laverite, bann bon kamarad ki mo ti ena depi lontan, ti aret frekant mwa. Parfwa, zot ti mank mwa boukou ek mo ti santi mwa tousel.”d Ki kitsoz inn ed Rosemary? Li ti organiz li pou sorti predikasion ar diferan ser. Li dir: “Gras-a sa, mo’nn gagn bann nouvo kamarad ki mo bien kontan.” Ki leson to kapav aprann ar lexanp Rosemary? Si ena bann kitsoz ki to ti kontan fer avan ki to vinn dan laverite ek ki sa bann kitsoz-la pe koumans mank twa, to kapav ranplas zot par bann lezot kitsoz ki pli bon ek ki pou vremem rann twa ere. (Fil. 4:8, 9) Ek pa bliye ki si to’nn abandonn sertin kitsoz pou to servi Zeova, Li pou touletan donn twa boukou plis ki seki to’nn abandone.

KAN ENN KIKENN ARET SERVI ZEOVA

12. Ki kitsoz nou kapav trouv difisil pou aksepte?

¹² Kan to ti vinn enn Temwin Zeova, sirman to ti bien kontan ki to nepli form parti dan lemond Satan ek ki to form parti sel group dimounn ki ansegn laverite ek ki fer zefor pou fer lebien. (Iza. 65:14) Me parfwa, enn kikenn dan to lasanble kapav fer enn pese, ek si li pa repanti, pou bizin tir li dan lasanble. (1 Kor. 5:13) Se seki ti arive dan lasanble enn ser ki apel Samar. Li dir: “Inpe letan apre mo batem, enn ansien ti fer enn pese grav ek ti tir li dan lasanble. Mo ti gagn sok, parski mo pa ti atann ki enn ansien kapav fer enn pese kont Zeova ek fer ditor bann frer ek ser dan lasanble.” Nou sir ki nou bann frer ek ser kontan Zeova ek ki zot anvi res fidel anver Li. (1 Kor. 13:4, 7) Selman, nou bizin realist. Sak lane, plizir frer ek ser swazir pou kit Zeova ek bizin tir zot dan lasanble. Anplis, nou kapav trouv sa difisil pou aksepte, sirtou si se enn kikenn ki nou kontan ek ki pros ar nou ki swazir pou kit Zeova.

13. Ki nou kapav fer depi aster-la mem pou ki, si arive enn kikenn ki nou kontan kit Zeova, sa pa afebli nou lafwa?

¹³ Ki to kapav fer depi aster-la mem pou ki, si arive enn kikenn ki to kontan kit Zeova, sa pa afebli to lafwa? Kontign ranforsi to lamitie ar Zeova. (Zak 4:8) Fode pa ki to lamitie ar Zeova depann lor lezot. Se akoz sa ki to bizin ena bann bon labitid spiritiel, kouma priye Zeova ek lir Labib regilierman, mem si souvan to fer sa dan renion ouswa ansam ar to fami.—Ps. 1:2; 62:8.

14. Ki leson nou aprann ar lexanp lapot Pier? (Zan 6:66-68)

¹⁴ Lexanp lapot Pier kapav ed twa. Kan boukou disip Zezi ti kit li parski zot pa ti konpran seki li ti dir, Pier ti res fidel mem si kitfwa li osi li pa ti konpran seki Zezi ti dir. (Lir Zan 6:66-68.) Olie ki li ti fer parey kouma lezot, Pier ti reflesi lor bann verite ki Zezi ti ansegn li, ek gras-a sa, so lafwa pa ti afebli. Dan mem fason, mem si lezot aret servi Zeova, fode pa to bliye ki se lorganizasion Zeova ki’nn ansegn twa laverite lor Li. Alor, kontign trap bien for laverite ek pa larg li! Samar, ki nou’nn mansione avan, dir: “Mo touletan fer zefor pou rapel ki se pa parski enn kikenn dan lasanble inn fer enn move kitsoz, ki savedir ki tou bann frer ek ser ouswa ki lorganizasion Zeova pa bon. Mem si lezot azir dan enn move fason, Zeova Li touletan enn Bondie ki extraordiner!”

15. Ki leson nou aprann ar lexanp Emily?

¹⁵ Anou get lexanp Emily. Enn semenn apre so batem, so mama ti abandonn zot ek li ti nepli form parti dan lasanble. Emily dir: “Zame mo pa ti panse ki mo mama ti pou fer enn kitsoz koumsa! Sa ti pli gran leprev ki mo’nn gagne dan mo lavi, ek mo mama mank mwa boukou.” Ki kitsoz inn ed Emily? Li dir: “Mo pa tousel. Mo papa inn bien soutenir mwa. Bann frer ek ser dan lasanble osi inn bien soutenir mwa. Zot ti koumadir mo fami. Tou dimounn ena bann difikilte. Akoz sa, li bien inportan ki nou res pros ek nou ankouraz sakenn nou kamarad.” (1 Pier 5:9) Depi aster-la mem, fer zefor pou vinn pli pros ar to bann frer ek ser. Fode pa to atann ki to gagn enn problem dan to lavi pou ki to fer kamarad ar zot. Si depi aster-la mem to fer kamarad ar zot, kan to pou gagn enn leprev, to pa pou santi twa tousel; to bann frer ek ser pou la pou ed twa ek pou rekonfort twa.

16. Ki kitsoz fode pa nou bliye? (Get zimaz osi.)

¹⁶ Pa bliye osi ki Zeova disiplinn so bann serviter parski Li kontan zot. (Ebre 12:6) Li anvi ki tou bann ki nepli form parti dan lasanble, repanti ek retourn ar Li. (2 Pier 3:9) Alor, si enn kikenn ki pros ar twa nepli form parti dan lasanble, to kapav sir ki bann ansien pou fer tou seki zot kapav pou ed li retourn ar Zeova.—2 Tim. 2:24, 25.

17. Ki kitsoz to kapav sir?

¹⁷ Dan sa lartik-la, nou’nn get zis de-trwa difikilte ki to kapav gagne apre to batem. Selman, to kapav servi Zeova avek fidelite mem si to gagn bann difikilte. Ena boukou kitsoz ki to kapav fer depi aster-lamem pou prepar twa pou fer fas ar sa bann difikilte-la. Ek fode zame to bliye ki Zeova pou ed twa pou res fidel anver Li. Li finn deza ed twa, ek to kapav sir ki Li pou touletan ed twa! (1 Pier 5:10) Li pou touletan donn twa lafors ek kouraz pou andir ninport ki difikilte. Alor, si to les Zeova ed twa, pena okenn difikilte ki pou kapav fer twa al lwin ar Li!—Ps. 119:165; Rom. 8:38, 39.