13-19 AVRIL 2026
KANTIK 52 Nou Vwe Nou ar Bondie
Ki Ete Batem ek Kifer Li Inportan ki Nou Pran Batem?
“Ansegn zot pou vinn mo bann disip . . . , batiz zot.”—MAT. 28:19.
PWIN PRINSIPAL
Dan sa lartik-la, nou pou gete ki ete batem, kifer nou bizin pran batem, ek kouma enn batem bizin deroule.
1. Kouma nou kone ki batem li enn lansegnman inportan ki ena dan Labib?
NOU bien kontan kan bann nouvo pran batem, pa vre! Dan premie siek osi bann Kretien ti bien kontan kan boukou dimounn ti pran batem zour Lapantkot lane 33 Nou Lepok. Sa zour-la, lapot Pier ti fer enn diskour ek li ti explike kifer batem li bien inportan. (Zist. 2:38, 40, 41) Inpe apre, lapot Pol ti dir ki dan bann “lansegnman debaz lor Lekris,” ena “lansegnman lor bann batem.” (Ebre 6:1, 2) Wi, batem li enn parmi bann lansegnman inportan ki ena dan Labib ek nou bizin konpran li bien. Kifer?
2. Kifer li inportan ki nou konpran bien ki ete batem?
2 Parey kouma enn bon fondasion kapav ede pou ki enn lakaz li solid, kan nou konpran bien ki ete batem, sa kapav ed nou pou nou ena enn lafwa ki solid. Alor, mem si sa fer lontan ki to’nn pran batem ouswa mem si to pankor pran batem, li inportan ki to kone ki ete batem ek osi kifer batem li inportan. Dan sa lartik-la, nou pou reponn sa trwa kestion-la: Ki ete batem ek kifer li inportan? Kouma enn batem bizin deroule? Ek ki savedir pran batem ‘lor nom Papa-la, lor nom so Garson ek lor nom lespri sin’?
KI ETE BATEM EK KIFER LI INPORTAN?
3. Kan to pran batem, ki kitsoz to montre?
3 Kan to pran batem, to montre ki to’nn aksepte laverite lor Zeova ek Zezi, ki to’nn repanti pou to bann pese, ek ki to’nn fer bann sanzman dan to lavi pou to kapav servi Zeova. To montre osi ki to konpran ki sel fason ki to kapav gagn lavi sov, se atraver Zezi. Ek to montre ki to’nn promet Bondie dan enn lapriyer ki to pou fer so volonte ek swiv direksion so lorganizasion. Kan to fer sa promes-la Zeova, to donn Li to lavi, ek to pran batem, to koumans mars lor sime ki pou fer twa gagn lavi pou touletan.
4. Kan enn kikenn pran batem, li plonz net anba delo ek apre li resorti. Ki kitsoz sa montre? (Get zimaz osi.)
4 Kan to pran batem, to plonz net anba delo ek apre sa to resorti,a se koumadir inn anter twa ek apre to’nn resisite. (Konpar ar Kolosien 2:12.) Kan to pran batem, sa montre bann gran sanzman ki to’nn fer dan to lavi. Kifer nou dir sa? Kan to plonz anba delo, sa vedir ki to’nn abandonn to ansien lavi. Ek kan to sorti anba delo, sa montre ki to pe koumans enn nouvo lavi, ek ki apartir sa moman-la, fer volonte Bondie vinn kitsoz pli inportan pou twa.
Kan to pran batem, to abandonn to ansien lavi ek to koumans enn nouvo lavi, ek fer volonte Bondie vinn kitsoz pli inportan pou twa (Get paragraf 4)
5. Kifer nou kapav konpar bann zefor ki nou bizin fer pou pran batem ar travay ki Noe ti fer kan li ti konstrir lars? (1 Pier 3:18-21)
5 Lir 1 Pier 3:18-21. Nou kapav konpar bann zefor ki enn kikenn fer pou li ranpli bann kondision pou pran batem, ar travay ki Noe inn fer kan li ti konstrir lars. Kifer? Parski parey kouma Noe ki ti ena boukou travay pou fer pou li reisi konstrir lars, kitfwa twa osi to ena boukou zefor pou fer pou ki to reisi pran batem. Ek si to fek koumans etidie Labib, kitfwa to kapav trouv sa pli difisil ankor. Me eski li vremem vo lapenn fer tou sa bann zefor-la? Wi. Kifer nou dir sa? Anou reflesi lor lexanp Noe. Kan Zeova ti dir Noe tou seki li ti bizin fer pou konstrir lars, Noe ti fer exakteman seki Zeova ti dir li. Gras-a sa, li ti gagn lavi sov kan ti ena Deliz. Noe ti reisi konstrir lars parski li ti ena lafwa dan Zeova ek li ti obeir Li. Anplis, Zeova ti ed li. Parey kouma Noe, twa osi to kapav fer tou seki Zeova demann twa pou fer.—Zen. 6:22.
6. Kan Pier ti dir ki batem “sov” nou, ki li ti pe rod dir?
6 Dan verse 21, lapot Pier dir ki batem “sov” nou. Biensir, sa pa vedir ki nou bizin zis plonz anba delo pou ki nou gagn lavi sov ek ki nou gagn pardon nou bann pese. Se zis sakrifis Zezi ki kapav fer nou gagn pardon nou bann pese. (1 Zan 1:7) Me kanmem sa, li inportan ki nou pran batem parski se enn lord ki Zeova inn donn nou. Ek kan nou pran batem, nou demann Zeova pou donn nou enn “bon konsians,” savedir ki nou pe demann Li pou pardonn nou bann pese ek pou aksepte ki nou servi Li kouma enn so bann serviter. Zeova bien kontan kan nou demann Li sa! Se dan sa fason-la ki batem “sov” nou.
KOUMA ENN BATEM BIZIN DEROULE?
7. Kouma enn batem bizin deroule?
7 Pou ki enn kikenn pran batem, Labib montre ki li bizin plonz net anba delo. Ek mem si Labib pa donn boukou detay lor batem, li ed nou pou konpran kouma enn batem bizin deroule. Par exanp, bann prinsip Labib ed nou pou konpran kouma enn kikenn ki pran batem bizin abiye, ek osi kouma bann ki pe get li, bizin konport zot. (1 Kor. 14:40; 1 Tim. 2:9) Kan enn kikenn pran batem, bien souvan se enn ansien ki gagn privilez pou batiz li. Selman, fode zame ki nou donn sa ansien-la laglwar akoz privilez ki li’nn gagne. (1 Kor. 1:14, 15) Ek mem si ena enn kantite dimounn ouswa enn tigit dimounn ki asiste enn batem, se pa sa ki inportan.—Zist. 8:36.
8. Ki kestion bann kandida batem bizin reponn, ek kifer? (Zistwar Bann Zapot 2:38-42) (Get zimaz osi.)
8 Labib dir ki nou bizin montre nou lafwa “an piblik” par nou bann parol. (Rom. 10:9, 10) Me se pa zis kan nou prese ki nou fer sa. Nou fer sa zour ki nou pran batem osi. Se pou sa rezon-la ki bann kandida batem bizin reponn de kestion zour zot batem. Premie kestion-la se-la, “Eski ou finn repanti pou bann pese ki ou’nn fer, donn ou lavi Zeova, ek aksepte dispozision ki Zeova inn pran pou sov bann dimounn atraver Zezi Kris?” Sa kestion-la montre seki bann kandida batem inn fini fer pou ki zot kapav pran batem. Lapot Pier ti dir bann mem lide zour Lapantkot lane 33 Nou Lepok, kan li ti dir bann dimounn ki zot bizin repanti ek pran batem. Ek deziem kestion-la se, “Eski ou konpran ki par ou batem, ou pe montre ki ou enn Temwin Zeova ek ki ou form parti dan lorganizasion Bondie?” Sa kestion-la montre seki bann kandida batem inn promet pou fer. Zot inn promet pou swiv direksion lorganizasion Zeova ek pou servi Li ansam ar zot bann frer ek ser. Se seki bann Kretien ki ti pran batem zour Lapantkot ti fer apre zot batem. (Lir Zistwar Bann Zapot 2:38-42.) Bann ki reponn wi pou sa de kestion-la, ranpli bann kondision pou ki zot pran batem.
Zour to batem, kan to reponn “an piblik” sa de kestion ki poz twa la, sa montre ki to ena lafwa (Get paragraf 8)d
9. Pou ki enn kikenn gagn faver Zeova, ki li bizin fer?
9 Avan ki to vinn dan laverite, kitfwa to ti deza ena bann bon prinsip moral ek zame to pa’nn fer okenn pese grav. Ouswa, kitfwa to bann paran ti bann Temwin ek to’nn grandi dan laverite. Alor, zot inn ed twa pou aprann konn Zeova ek pou kontan Li. Dan sa bann sitiasion-la, eski kanmem sa to bizin repanti ek pran batem pou ki to kapav gagn faver Zeova? Wi. Kifer? Parski nou tou nou fer pese ek nou inparfe, ek pese anpes nou pou ena enn bon lamitie ar Zeova. (Ps. 51:5) Selman, amezir ki enn kikenn aprann konn Zeova, li desid pou fer volonte Zeova vinn so priorite. Ek pou li kapav fer sa, li bizin repanti, aret fer bann kitsoz ki Zeova pa kontan, ek koumans viv dan enn fason ki fer Zeova plezir. Se apre ki li’nn fer tousala, ki li kapav pran batem.—Zist. 3:19.
10. Si to ti fini pran batem dan enn lot relizion, ki to bizin fer?
10 Fer koumadir to ti dan enn lot relizion avan ek ki to ti fini pran batem laba, me aster-la to desid pou vinn enn Temwin Zeova. Eski to bizin repran batem? Wi. Kifer? Parski avan to pa ti vremem konn laverite lor Zeova ek Zezi. Alor, mem si sa lepok-la to ti priye Bondie ek to ti promet Li pou donn Li to lavi, to pa ti vremem konpran volonte Zeova. Dan lavil Efez, kan lapot Pol ti zwenn ar sertin disip ki ti fini batize me ki pa ti konn laverite lor Zezi, li ti pran bann dispozision pou ki zot repran batem.b (Zist. 19:1-5) Azordi osi, pou ki enn kikenn so batem li valid, sa dimounn-la bizin ena enn konesans exakt lor volonte Bondie, setadir li bizin konpran bann lansegnman ki ena dan Labib ek li bizin fer seki Zeova demann li pou fer.
‘LOR NOM PAPA-LA, LOR NOM SO GARSON EK LOR NOM LESPRI SIN’
11. Ki savedir pran batem ‘lor nom Papa-la, lor nom so Garson ek lor nom lespri sin’? (Matie 28:18-20)
11 Zezi ti donn so bann disip lord pou batiz bann dimounn ‘lor nom Papa-la, lor nom so Garson ek lor nom lespri sin.’ (Lir Matie 28:18-20.) Ki li ti pe rod dir? Kan Labib koz lor enn kikenn so “nom,” souvan sa vedir repitasion, pozision, ek lotorite ki sa dimounn-la ena. Alor, kan nou fer enn kitsoz “lor nom” enn kikenn ouswa “lor nom” enn kitsoz, savedir ki nou rekonet ek ki nou aksepte lotorite ki sa dimounn-la ouswa sa kitsoz-la ena. Kan nou pran batem lor nom Zeova ek Zezi, savedir ki nou rekonet ki zot ena lotorite ek drwa pou dir nou seki nou bizin fer. Ek kan nou pran batem lor nom lespri sin, savedir ki nou aksepte swiv so direksion. Anou koz inpe plis lor la.
12. Ki savedir pran batem lor nom Papa-la? (Revelasion 4:11) (Get zimaz osi.)
12 Pran batem lor nom Papa-la. Sa vedir ki nou rekonet ek aksepte Zeova kouma nou Papa ki dan lesiel. Nou sir ki Li’nn donn nou lavi, ki Li Bondie Tou-Pwisan, ek ki Li Kreater tou kitsoz. (Lir Revelasion 4:11.) Nou kone ki Li tann nou bann lapriyer, ek nou servi so nom kan nou priye Li ek kan nou koz lor Li ar lezot. (Ps. 65:2) Selman, ena enn lot kitsoz ankor ki nou bizin konpran ek aksepte. Kan Pier ti fer so diskour zour Lapantkot, bann dimounn ki ti pe ekout li ti deza konn Zeova. Selman, aster-la zot ti bizin konpran ek aksepte ki se zis gras-a Zezi ki Zeova donn lavi pou touletan.—Rom. 5:8.
Apre to batem, kontign obeir Papa-la (Get paragraf 12)
13. Ki savedir pran batem lor nom Garson-la? (Get zimaz osi.)
13 Pran batem lor nom Garson-la. Sa vedir ki nou rekonet ek aksepte Zezi kouma Garson Bondie. Nou sir ki Zezi, li “semin” ki kapav fer nou ena enn bon lamitie ar Zeova. (Zan 14:6) Nou sir osi ki Zezi inn mor pou nou, pou ki nou kapav gagn lavi pou touletan. Se pou sa rezon-la ki nou anvi swiv so lexanp dan nou lavi toulezour, ek pa zis zour ki nou pran batem. (1 Zan 2:6) Alor, parey kouma Zezi, nou bizin pa les nanye anpes nou pres bon nouvel. (Lik 4:43) Ek nou bizin pre pou andir bann persekision pou ki nou kapav res fidel ar Zeova. (2 Tim. 3:12) Nou bizin osi rekonet ek aksepte Zezi kouma “sef lasanble.” Nou fer sa kan nou obeir ek soumet ar bann ki diriz lasanble Kretien.—Efe. 4:8, 11, 12; 5:23.
Apre to batem, kontign obeir Garson-la (Get paragraf 13)
14. (a) Ki savedir pran batem lor nom lespri sin? (Get zimaz osi.) (b) Ki lezot batem bann Kretien ki ena lesperans pou al dan lesiel pran? (Get lankadre “Bann Kretien Ki pou Al dan Lesiel Gagn Bann Lezot Batem.”)
14 Pran batem lor nom lespri sin. Sa vedir ki nou aksepte seki Parol Bondie dir lor lespri sin. Nou sir ki lespri sin, li lafors ki Bondie servi pou fer so volonte; li pa enn kikenn ek li pa form parti enn Trinite. Nou kone ki Bondie inn servi so lespri sin pou gid bann profet ek pou fer bann dimounn ekrir Labib. Se akoz sa ki nou lir Labib souvan ek ki nou swiv so bann lansegnman. (2 Pier 1:20, 21) Nou fer boukou zefor osi pou pa fer bann pese grav, parski nou kone ki sa kapav anpes nou ek lasanble pou gagn lespri sin.—Efe. 4:30.
Apre to batem, kontign swiv direksion lespri sin (Get paragraf 14)
15. Ki to bizin kontign fer?
15 Si to’nn fini pran batem, to bizin kontign fer zefor pou konpran kifer batemc li inportan, ek to bizin kontign tini promes ki to’nn fer Zeova kan to’nn donn Li to lavi ek to’nn pran batem. Me ki to bizin fer si to pankor pran batem? Eski ena kitsoz ki pe anpes twa pran batem? Dan prosin lartik, nou pou koz lor bann kitsoz ki to bizin kontign fer pou to reisi pran batem.
KANTIK 161 Mo Anvi Fer To Volonte
a Dan Labib, mo “batem” vedir “kouver net ar delo” ouswa “plonz dan delo.” Alor, kan enn kikenn pran batem, savedir ki bizin plonz li net dan delo ek pa zis fann inpe delo lor li, parey kouma fer dan sertin relizion.
b Bann disip dan lavil Efez ti dir ki zot ti gagn “batem Zan.” (Zist. 19:3) Zan Batis ti ankouraz bann Zwif pou repanti pou bann pese ki zot ti fer kont Lalwa Moiz, ek li ti batiz bann ki ti repanti. (Mark 1:4, 5) Selman, kan Lalwa Moiz ti aboli, batem Zan ti nepli valid. Ek apartir sa moman-la, ti ena zis enn “sel batem” ki Bondie ti aksepte ek ki ti kapav fer bann dimounn gagn lavi sov.—Efe. 4:5.
c Lor jw.org ek JW Library® al dan seri lartik “Repons pou Bann Kestion Biblik” ek get lartik “Ki Ete Batem?”
d DESKRIPSION ZIMAZ: Dan enn lasanble, bann kandida batem inn debout ek zot pe fer “deklarasion piblik ki montre ki zot inn donn zot lavi Zeova.”