Pa Tarde pou Pran Batem

1. Sit sertin rezon kifer li bon ki to pran batem.

ESKI to kontan Zeova, sa Kikenn ki’nn donn twa tou bann zoli kado ki to ena la, ek ki’nn mem donn twa lavi? Eski to anvi montre ki to kontan Li? Meyer fason to kapav fer sa, se kan to donn Li to lavi ek ki to pran batem. Kan to fer sa, to pou form parti dan so fami. Lerla, to Papa ek to Kamarad Zeova pou gid twa ek Li pou pran twa swin parski to pou Li. (Ps. 73:24; Iza. 43:1, 2) Kan to donn to lavi Zeova ek to pran batem, to gagn osi posibilite pou viv pou touletan.—1 Pier 3:21.

2. Ki nou pou examine dan sa lartik-la?

² Eski ena kitsoz ki pe anpes twa pran batem? Si wi, to pa tousel. Avan twa, bann milyon dimounn inn sanz zot lavi ek zot fason panse pou ki zot kapav pran batem. Ek aster-la, zot pe servi Zeova ar lazwa ek zot bien devwe dan zot servis. Ki to kapav aprann ar bann ki ti pran batem dan premie siek? Anou get bann difikilte ki zot ti gagne, ek anou gete ki nou kapav aprann ar zot lexanp.

BANN SAMARITEN TI PRAN BATEM

3. Pou ki zot kapav pran batem, ki sanzman bann Samariten ti bizin fer?

³ Dan lepok Zezi, bann Samariten ti enn sekt. Boukou Samariten ti res dan lenor Zide. Avan ki bann Samariten pran batem, zot ti bizin aprann ek aksepte tou seki ti ena dan Parol Bondie. Bann Samariten ti krwar ki zis sink liv Labib, setadir Zenez ziska Deteronom, ti sorti kot Bondie, ek kitfwa zot ti krwar osi dan liv Zozwe. Selman, zot ti krwar dan promes Bondie ki trouv dan Deteronom 18:18, 19, ek zot ti pe atann ki Lemesi vini. (Zan 4:25) Alor, pou ki zot kapav pran batem, zot ti bizin aksepte Zezi kouma Lemesi. Ek se samem ki “boukou Samariten” ti fer. (Zan 4:39) Selman, parmi bann Kretien ti ena boukou Zwif, ek bann Zwif ek bann Samariten pa ti pe gagn zafer ar zot kamarad. Akoz sa, sertin Samariten ti bizin sanz zot fason panse konsernan bann Zwif.—Lik 9:52-54.

4. Dapre Zistwar Bann Zapot 8:5, 6, 14, kouma sertin Samariten ti reazir kan Filip ti pres ar zot?

⁴ Seki ti ed bann Samariten pou pran batem. Kan Filip, ki ti enn predikater, ti “pres avek zot konsernan Lekris,” sertin Samariten ti “aksepte parol Bondie.” (Lir Zistwar Bann Zapot 8:5, 6, 14.) Filip ti enn Zwif, me kanmem sa zot ti ekout li. Kitfwa zot ti rapel bann verse bann Lekritir, ki dir ki Bondie “li pa fer preferans.” (Det. 10:17-19) Bann Samariten ti “donn boukou latansion ar seki Filip ti pe dir” lor Lekris, ek zot ti aksepte ki se Bondie ki ti avoy Filip. Filip ti osi fer boukou mirak, ek li ti mem geri bann malad ek expilse bann demon.—Zist. 8:7.

5. Ki leson nou kapav aprann ar lexanp bann Samariten?

⁵ Sa bann Samariten-la ti kapav refiz ekout Filip parski li ti enn Zwif, ouswa parski li ti pe ansegn zot bann nouvo kitsoz. Me zot pa ti fer sa! Apre ki zot ti sir ki Filip ti pe ansegn zot laverite, zot pa ti tarde pou pran batem. Labib dir: “Kan Filip ti anons bon nouvel lor Rwayom Bondie ek lor nom Zezi Kris, zot ti krwar li ek bann misie ek bann madam toule-de ti pe pran batem.” (Zist. 8:12) Eski to sir ki Labib, Parol Bondie, li laverite? Eski to sir ki bann Temwin Zeova montre vre lamour anver lezot, setadir lamour ki idantifie zot kouma bann vre disip Zezi? (Zan 13:35) Si wi, alor fode pa to ezite pou pran batem. To kapav sir ki Zeova pou beni twa.

6. Kouma lexanp Ruben kapav ed twa?

⁶ Ruben, ki res Lalmagn, inn grandi dan enn fami Temwin Zeova. Selman, kan li ti zenn, li pa ti sir ki Bondie existe. Kouma li ti reisi sirmont so bann dout? Ruben ti rann li kont ki li pa ti konn boukou kitsoz lor Zeova, alor li ti desid pou fer bann resers. Li dir: “Dan mo letid personel, mo ti fer bann resers pou mo kone ki kitsoz ki vre ek ki kitsoz ki fos, ek mo ti etidie lor levolision plizir fwa.” Ruben ti osi lir liv Y a-t-il un Créateur qui se soucie de vous ? Sa liv-la ti ed li pou ogmant so lafwa dan Bondie. Ruben ti dir: ‘Wow! Zeova Li vremem existe.’ Apre ki li ti vizit biro mondial, Ruben ti vremem apresie linite ki ena ant bann frer ek ser, ek so lamour pou bann frer ek ser ti ogmante. Kan li ti retourn Lalmagn, Ruben ti pran batem. Li ti batize laz 17 an. Si to ena bann dout lor Bondie, lor Labib, ouswa lor bann lezot kitsoz, fer bann resers dan nou bann piblikasion. Pou ki to reisi sirmont to bann dout, to bizin fer zefor pou gagn enn “konesans exakt.” (Efe. 4:13, 14) Anplis, kan to tann bann temwaniaz lor lamour ek linite ki ena parmi bann serviter Zeova dan lemond antie, ek ki to trouv sa dan to prop lasanble, to lamour pou to bann frer ek ser pou grandi.

SOL KI SORTI TARS TI PRAN BATEM

7. Kifer Sol ti bizin sanz so fason panse?

⁷ Anou get lexanp Sol, ki ti sorti Tars. Li “ti pe fer bann gran progre dan relizion Zwif” ek li ti pe koumans vinn enn kikenn inportan parmi bann Zwif. (Gal. 1:13, 14; Fil. 3:5) Sa lepok-la, boukou Zwif ti konsider bann Kretien kouma bann aposta, ek akoz sa Sol ti persekit zot. Anplis, li ti panse ki li ti pe fer volonte Bondie. (Zist. 8:3; 9:1, 2; 26:9-11) Pou ki Sol aksepte Zezi, pran batem, ek vinn enn Kretien, li ti bizin aksepte ki lezot persekit li.

8. (a) Ki kitsoz ti ed Sol pou pran batem? (b) Dapre Zistwar Bann Zapot 22:12-16, kouma Ananias ti ed Sol? (Get zimaz osi.)

⁸ Seki ti ed Sol pou pran batem. Kan depi lesiel Zezi ti koz ar Sol, enn lalimier bien for ti fer Sol vinn aveg. (Zist. 9:3-9) Pandan trwa zour, Sol ti gard karem ek li ti reflesi lor seki ti arive. Lerla, Sol ti sir ki Zezi ti Lemesi ek ki bann disip Zezi ti dan vre relizion. Sirman Sol ti bien sagrin ki li ti partisip dan lamor Etienn! (Zist. 22:20) Apre sa trwa zour-la, enn disip ki ti apel Ananias ti vinn get Sol. Li ti geri li ek li ti ankouraz li pou pa tarde pou pran batem. (Lir Zistwar Bann Zapot 22:12-16.) Avek limilite, Sol ti aksepte led Ananias ek li ti pran batem.—Zist. 9:17, 18.

9. Ki leson nou kapav aprann ar lexanp Sol?

⁹ Ki leson nou kapav aprann ar lexanp Sol? Sol ti kapav les so fierte ouswa laper bann zom, anpes li pran batem. Me li pa ti fer sa! Avek limilite, li ti fer bann sanzman ki bizin ek li ti aksepte laverite lor Zezi. (Zist. 26:14, 19) Sol ti dispoze pou vinn enn Kretien, mem si li ti kone ki li ti pou gagn persekision. (Zist. 9:15, 16; 20:22, 23) Apre so batem, li ti kontign kont lor Zeova pou andir bann difikilte ki li ti gagne. (2 Kor. 4:7-10) Twa osi, kan to pou pran batem pou to vinn enn Temwin Zeova, kitfwa to pou gagn bann leprev ek bann persekision. Me to pa tousel! To kapav sir ki Zeova ek Zezi pou touletan ed twa ek soutenir twa.—Fil. 4:13.

10. Kouma lexanp Anna kapav ed twa?

¹⁰ Anna inn grandi dan enn fami Kird dan les Lerop. Apre ki so mama ti pran batem, Anna ti gagn permision avek so papa pou etidie Labib. Li ti ena 9 an. Selman, kan so bann fami ti aprann ki li ti pe etidie Labib ar bann Temwin Zeova, zot ti koumans persekit li. So bann fami ti konsider sa kouma enn laont ki enn manb zot fami abandonn relizion zot bann anset. Kan Anna ti ena 12 an, li ti demann so papa permision pou li pran batem. Selman, so papa ti anvi kone si sa ti so prop desizion ouswa si lezot ti pe met presion lor li. Alor, Anna ti dir so papa: “Mo kontan Zeova.” Lerla, so papa ti aksepte ki li pran batem. Selman, apre so batem, Anna so bann fami ti kontign boufonn li ek maltret li. Enn parmi so bann fami ti dir li: “Vomie ki to viv enn move lavi ek ki to fime, olie ki to vinn enn Temwin Zeova.” Kouma Anna ti reisi fer fas ar sa sitiasion-la? Li dir: “Zeova inn ed mwa pou mo res for, ek mo papa ek mo mama inn bien soutenir mwa.” Anna ti fer enn lalis tou bann lokazion ki li ti trouv lame Zeova dan so lavi, ek detanzantan li reget so lalis pou li pa bliye kouma Zeova inn ed li. Si twa osi to gagn per tansion to gagn persekision, pa bliye ki Zeova pou ed twa parey kouma Li’nn ed Anna.—Ebre 13:6.

KORNEY TI PRAN BATEM

11. Ki kitsoz ti kapav fer Korney ezite pou pran batem?

¹¹ Nou kapav aprann bann zoli leson osi ar lexanp Korney. Korney ti “enn ofisie larme,” ek li ti sef lor 100 solda. (Zist. 10:1) Savedir ki li ti ena enn gran pozision dan larme ek dan so kominote. Li ti osi “fer boukou bon kitsoz pou bann dimounn pov.” (Zist. 10:2) Zeova ti avoy lapot Pier pou anons bon nouvel ar Korney. Eski Korney ti ezite pou pran batem akoz pozision ki li ti ena?

12. Ki kitsoz ti ed Korney pou pran batem?

¹² Seki ti ed Korney pou pran batem. Labib dir ki Korney “ansam avek so fami ti ena enn gran respe pou Bondie.” Anplis, Korney ‘ti touletan pe sipliy Bondie.’ (Zist. 10:2) Kan Pier ti anons bon nouvel ar Korney, li ek so fami ti aksepte Zezi, ek zot pa ti tarde pou pran batem. (Zist. 10:47, 48) Sirman Korney ti pre pou fer bann sanzman ki bizin, pou ki li kapav ador Zeova ansam ar so fami.—Zozwe 24:15; Zist. 10:24, 33.

13. Ki leson nou kapav aprann ar lexanp Korney?

¹³ Parey kouma Sol, Korney ti ena enn gran pozision, ek li ti kapav servi sa kouma enn pretext pou ki li pa vinn enn Kretien. Selman, li pa ti fer sa. Eski to bizin fer bann gran sanzman dan to lavi pou ki to kapav pran batem? Si wi, Zeova pou ed twa. To kapav sir ki Zeova pou beni twa si to bien deside pou swiv bann prinsip Labib ek pou servi Li.

14. Kouma lexanp Tsuyoshi kapav ed twa?

¹⁴ Tsuyoshi, ki res Zapon, ti bizin aret fer sertin kitsoz dan so travay pou ki li kapav pran batem. Li ti asistan direkter enn gran lekol ki montre bann dimounn kouma pou fer bann bouke fler. Kan ti ena bann lanterman, direkter-la ti bizin amenn bann bouke fler ek partisip osi dan bann servis relizie ki ti fer pandan sa bann lanterman-la. Me kan li pa ti kapav asiste bann lanterman, Tsuyoshi ti bizin al dan so plas ek partisip dan sa bann servis-la. Kan Tsuyoshi ti aprann laverite lor lamor, li ti konpran ki li pa ti pou kapav pran batem si li kontign partisip dan sa bann servis relizie la. (2 Kor. 6:15, 16) Alor, li ti deside pou aret fer sa ek li ti koz sa ar so direkter. Ki ti arive lerla? Tsuyoshi ti reisi gard so travay ek li ti nepli bizin partisip dan sa bann servis relizie la. Tsuyoshi ti pran batem apepre enn an apre ki li ti koumans etidie Labib.a Si to bizin fer bann sanzman dan to travay pou ki to fer Zeova plezir, to kapav sir ki Li pou donn twa ek to fami seki zot bizin.—Ps. 127:2; Mat. 6:33.

BANN KORINTIEN TI PRAN BATEM

15. Ki kitsoz ti kapav anpes bann Korintien pou pran batem?

¹⁵ Dan lepase, bann dimounn ki ti res dan lavil Korint ti bien kontan kas ek zot ti imoral. Boukou abitan Korint ti fer bann kitsoz ki Zeova deteste. Akoz sa, li ti bien difisil pou bann dimounn ki res laba pou aksepte bon nouvel. Selman, kan lapot Pol ti al laba ek ki li ti pres bon nouvel lor Zezi, “boukou parmi bann Korintien ki ti tann bon nouvel ti koumans krwar ek ti batize.” (Zist. 18:7-11) Lerla, Zezi ti aparet ar Pol dan enn vizion, ek li ti dir li: “Mo ena boukou dimounn dan sa lavil-la.” Akoz sa, Pol ti kontign pres laba pandan enn an edmi.

16. Ki kitsoz ti ed bann Korintien pou pran batem? (2 Korintien 10:4, 5)

¹⁶ Seki ti ed bann Korintien pou pran batem. (Lir 2 Korintien 10:4, 5.) Bondie so Parol ek so lespri sin ti ed bann Korintien pou fer bann gran sanzman dan zot lavi. (Ebre 4:12) Bann Korintien ki ti aksepte bon nouvel lor Zezi, ti reisi aret fer bann kitsoz kouma bwar boukou, kokin, ek ena enn lavi omosexiel.—1 Kor. 6:9-11.b

17. Ki leson nou kapav aprann ar lexanp bann Korintien?

¹⁷ Mem si sertin Korintien ti bizin fer bann gran sanzman dan zot lavi, zot pa ti panse ki sa ti tro difisil. Zot ti fer bann gran zefor pou ki zot kapav vinn bann Kretien ek pou mars lor sime ki ti pou fer zot gagn lavi pou touletan. (Mat. 7:13, 14) Eski to pe fer bann gro zefor pou rezet bann move labitid ouswa pou aret fer enn move kitsoz pou ki to kapav pran batem? Si wi, alor pa bes lebra! Sipliy Zeova pou ki Li donn twa so lespri sin, pou ki to kapav kontign lit kont dezir pou fer bann move kitsoz.

18. Kouma lexanp Monika kapav ed twa?

¹⁸ Monika, ki res Zeorzi, ti fer boukou zefor pou aret zoure ek pou rezet bann move divertisman, pou ki li kapav kontign progrese pou pran batem. Li dir: “Avan ki mo pran batem, gras-a lapriyer, mo ti gagn lafors pou mo fer bann sanzman ki mo ti bizin fer. Zeova ti kone ki mo ti anvi fer bann bon kitsoz, ek Li ti touletan ed mwa ek gid mwa.” Monika ti pran batem laz 16 an. Eski twa osi to bizin aret fer sertin kitsoz pou ki to kapav servi Zeova? Si wi, kontign demann Li lafors pou ki to kapav fer bann sanzman ki bizin. Zeova Li bien zenere ek Li pou donn twa so lespri sin.—Zan 3:34.

TO LAFWA KAPAV BOUZ BANN MONTAGN

19. Ki kitsoz kapav ed twa pou sirmont bann difikilte ki koumadir bann montagn? (Get zimaz osi.)

¹⁹ To kapav sir ki Zeova kontan twa ek Li anvi ki to form parti dan so fami. Li kontan twa mem si pou linstan to pe bizin fer fas ar bann sitiasion difisil ki pe anpes twa pran batem. Dan premie siek, Zezi ti dir so bann disip: “Si zot ena lafwa groser enn lagrin moutard, zot pou dir sa montagn-la, ‘Sorti la al laba,’ ek li pou ale, ek nanye pa pou inposib pou zot.” (Mat. 17:20) Sa ti fer zis de-trwa lane ki sa bann disip-la ti pe swiv Zezi, alor zot lafwa ti bizin kontign grandi. Me kanmem sa, Zezi ti dir zot ki si zot ti ena ase lafwa, Zeova ti pou ed zot pou sirmont bann difikilte ki ti koumadir bann montagn. To kapav sir ki Zeova pou fer parey pou twa!

20. Kouma lexanp bann Kretien dan lepase ek dan nou lepok, ki nou’nn mansione dan sa lartik-la, kapav motiv twa?

²⁰ Si ena enn kitsoz dan to lavi ki pe anpes twa pran batem, azir deswit ek fer bann sanzman ki bizin. Lexanp bann Kretien dan premie siek ek dan nou lepok, kapav donn twa lafors ki to bizin ek ankouraz twa. Zot zoli lexanp kapav motiv twa pou donn to lavi Zeova ek pou pran batem. Samem meyer desizion ki to kapav pran!