Hawihhâwmna Hi Engati Ta Nge?—Bible-in Eng Nge A Sawi?

Hawihhâwm taka in cheibâwlna a awm mang tawh lo. Dam lo sual takte chuan doctor-te chu an hrâwk a; zak thei lo tak chaw dâwra eitute chuan a viltute chu an vîn a; thunun theih loh passenger-te chuan attendant-te chungah buaina an siam; zirlai naupang luhlul takte chuan zirtîrtute chu an nuih sawh a, an vau a, kut an thlâk; politician ṭhenkhat chu nungchang ṭha lo thiltihtea an inhnamhnawih laiin, politician dang lehte chuan an hawihhâwmzia lantîr an tum thung.

Bible hi nungchang ṭha neih theih nâna kaihruaitu rinchhan tlâk a ni a. Chu bâkah, tûn laia hawihhâwmna a kiam chhan pawh a târ lang bawk.

Hawihhâwmna hi engati ta nge?

Hawihhâwmna—nungchang ṭha leh mawi leh pawm tlâk—chu khawvêl pumpuiah a kiam nasa hle tih a chiang a.

• Tûn hnaia mipui ngaih dân lâkna pakhat sawi dânin, America rama mite chuan an rama mite nungchang lam dinhmun chu kum kal ta 22 chhûng aia khân a hniam hle a ni a ti.

• Ram 28-a mi 32,000 aia tamte ngaih dân lâknain a târ lang dân chuan 100 zêla mi 65 chuan an hriat tawh achinah chuan tûn hi hawihâwmna a kiam lai ber a ni an ti.

Bible chuan tûn laia kan hmuh nungchangte hi a lo sawi lâwk a.

• “Ni hnuhnûngahte chuan hun khirh takte a lo awm ang. Mi, mahni inhmangaihtu te, tangka ngainatu te, intivei te, chapo te, Pathian sawichhetu te, nu leh pa thu âwih lo te, lâwm nachâng hre lo te, . . . mi kawlhsen te, ṭha duh hauh lo te.”—2 Timothea 3:1-3.

Chu hrilh lâwkna a thlen famkim dân hriat belh nân, he thuziak “Bible-in Tûn Laia Mite Ngaihtuah Dân leh Thiltih Dân A Sawi Lâwk Em?” tih hi chhiar ang che

Hawihhâwmna lantîr tûra kaihhruaina rin tlâk

Hawihhâwmna tlâkchhamna khawvêlah hian, mi maktaduai tam takte chuan nungchang ṭha lantîr tûra kaihhruaina ṭha tak chu Bible-ah an hmu a. Nungchang lama a thurâwn pêk chu “kumkhaw tlaitluan atân tihnghehin a awm.” (Sâm 111:8) Entîrna tlêm azâwng hi han ngaihtuah teh:

• Bible sawi: “Miin in chunga an tih atâna in duh apiang chu mi chungah pawh in ti tûr a ni.”—Matthaia 7:12.

  A awmzia: Mite hian ṭha tak leh zah takin min cheibâwl se tih kan duh ang bawkin, anni chu chutiangin kan cheibâwl tûr a ni.

• Bible sawi: “Chutichuan, dâwt sawi bânin, mahni ṭhenawm hnênah thu dik tak sawi ṭheuh rawh u.”—Ephesi 4:25.

  A awmzia: Kan thusawi leh thiltih engkimah dik takin kan sawiin kan ti tûr a ni.

Hemi chungchâng hriat belh nân, khawngaihin hei hi chhiar rawh:

• Vênnainsâng chhuak, a thupui “Thil Dik Leh Dik Lo—Kaihhruaitu Rin Tlâk.”

• Thuziak “Ngaihtheihna Nei Tûra Bible-in A Ṭanpui Theih Dân.”