Mi Dangte Ṭanpuina Hmanga Mal Nia Inhriatna Hneh Dân—Bible Sawi Chu

Khawvêl puma mite chuan mal nia inhriatna leh mi dangte nêna inzawmna nei lo nia inhriatna an nei a. Hrisêlna lama mithiam ṭhenkhat chuan chutiang harsatna hneh theih dân kawng khat chu mi dangte ṭanpui hi a ni tih an ring tlat a ni.

• “Ṭanpui ngaite ṭanpuina chuan nun awmze nei tak min neihtîr a, mal nia inhriatna leh mi dangte nêna inzawmna nei lo nia inhriatna hneh tûrin min ṭanpui a ni.”—U.S. National Institutes of Health.

Bible chuan mi dangte kan ṭanpui theih dân chungchângah thurâwn ṭha tak tak min pe a. Chûng thurâwnte nunpuina chuan mal nia inhriatna hneh tûrin min ṭanpui thei a ni.

I tih theih chu

Thilphal rawh. Mi dangte nêna hun hman dun theihna remchâng chu zawng la, a bîk takin, hmaichhan ngeia hmuh theih tum la. I thil neihte chu phal takin pe ve ang che. Chutianga i tih chuan, lâwm taka an chhân lêt ngei che a rinawm, chu chuan in inṭhian ṭhatna chu a tinghet lehzual ang.

• Bible thu bul: “Pe zawm zêl rawh u; chutichuan, pêkin in awm ang.”—Luka 6:38.

Mi dangte tân inhmang rawh. Dinhmun khirh tak tâwk mêk mite ṭanpui theih dân kawngte chu zawng ang che. Chutah chuan hmangaihna nei taka an thusawi ngaihthlâk te leh an phurrit chhâwk zângkhaitu thil tihsakte a tel thei a ni.

• Bible thu bul: “Ṭhian chuan englai pawhin a hmangaih reng a.”—Thufingte 17:17.

Mi dangte nêna inṭhian ṭhatna neih reng theih dân chungchâng hriat belh nân, he thuziak “Chhûngkaw Nun leh Inṭhianna,” tih chu chhiar ang che.