Bible-in Nuclear Indona Chungchâng Eng Nge A Sawi?

Khawvêl thuneitute’n nuclear chakna an neih mai bâkah, neih belh zêl an tum chhûng chuan kan khawvêl hian nuclear indona hlauhna a nei zawm zêl ang. Mite chuan nuclear râlthuam a tam poh leh nuclear indona a chhuah ang tih an hlau ting mai a. Ram pakhatin nuclear râlthuam chhe tê a hman mai pawhin kan khawvêl hi a puma a chhiat vek a hlauhthâwnawm a ni. The Bulletin of the Atomic Scientists sawi dân chuan, “nuclear indona chhuak thei reng” dinhmunah kan awm a ni.

Nuclear indona hi a chhuak thei ang em? A chhuak a nih chuan, kan leilung hi a dam khawchhuak ang em? Nuclear indona chhuak mai theih avânga kan lungkhamnate chu engtin nge kan hneh theih ang? Bible-in eng nge a sawi?

He thuziakah hian

Bible-in nuclear indona chungchâng a sawi lâwk em?

Bible chuan nuclear indona chungchâng a bîk taka târ lan a nei lo. Dik tak chuan, nuclear indona hlauhna chu Bible sawi lâwk rilru put hmang leh thilthlengte avânga lo awm a ni.

Tûn lai khawvêla thilthlengte leh hêng Bible chângte hi han ngaihtuah teh:

Bible châng: Isua zirtîrte’n: “Khawvêl tâwp chhinchhiahna chu eng nge ni ang?” tia an zawh chuan, Isua’n heti hian a chhâng a: “Hnam hrang leh hnam hrang an indo vang a, ram hrang leh ram hrang an indo vang,” tiin.—Matthaia 24:3, 7.

Khawvêl thilthlengte: Nuclear chakna nei ramte leh neih mêk tum ramte chu râlthuam hmangin an inbei fo ṭhîn.

“Tûn hnai kumahte khân, khawvêlah hian tharum thawhna a nasa lehzual a: in beihna a pung chho mêk bawk.”—The Armed Conflict Location & Event Data Project.

Bible châng: “Tâwpna hunah chuan chhim lam lalin amah a rawn nawr ang.”—Daniela 11:40.

Khawvêl thilthlengte: Bible sawi lâwk angin, inel reng ṭhîn ramte leh an ṭanrualpuite chu chak zâwk nih tumin an innawr emaw, indo reng emaw ṭhîn a. Tûn laia nuclear chakna nei ṭha ramte chuan direct taka inbeih chu an pumpelh mai thei a; mahse, an nuclear râlthuam chakna chu an ti pung zêl a ni.

“Kum sâwm kalta chhûng khân, ram thiltithei tak takte pawh tiamin, ram tam takte chu an inbei nasa hle.”—The Uppsala Conflict Data Program.

Bible châng: “Ni hnuhnûngahte chuan hun khirh takte a lo awm ang. Mi . . . huaikawmbâwl te, hêktu te, insûm thei lo te, mi kawlhsen te” an ni ang.—2 Timothea 3:1-3.

Khawvêl thilthlengte: Tûn laia mi tam takte ang bawkin, khawvêl hruaitute pawh an inlungrual tawh lo va. An inlungrual lohnate chu inrem taka chinfel aiin, invau emaw, innawr emaw hmanga chinfel an tum a. Chutiang hmalâkna chuan nuclear indona a chhuak mai ang tih hlauhthâwnna min neihtîr a ni.

“Thawhhona ṭha tak neih dân ngaihtuah ahnêkin, buainate chu a punlun zêl zâwk a ni.”—S. Saran and J. Harman, World Economic Forum.

Pathianin nuclear indona a thlen a phal ang em?

Bible chuan eng mah a sawi lo. Mahse, kan hunah hian “thil hlauhawm tak takte” a thleng ang tih a sawi a. (Luka 21:11) Chûng thilthlengte zîngah chuan Khawvêl Indopui Pahnihna chhûnga thlâk atomic bomb-te pawh a tel a ni. Bible chuan Pathianin indonate awm a phal chhan min hrilhfiah a. Hriat belh nân, Engvângin Nge Pathianin Hrehawm Tawrhna Awm A Phal? tih video hi ang che.

Kan Leilung hi a dam khawchhuak ang em?

Aw. Mihringin nuclear râlthuam an hmang nawn leh a nih pawhin, Pathianin he leia chêng zawng zawngte tiboral vek thei dinhmun a thlen chu a phal lo vang. Bible chuan kan leilung hi a dam khawchhuak mai ni lovin, mihringte chatuan nun atân a awm reng ang tih a sawi a ni.

“Lei hi erawh chu a awm reng mai.”—Thuhriltu 1:4.

“Pathian, leilung hi dina siamtu . . . chuan leilung hi a tinghet a, eng mah lovah a siam lo.”—Isaia 45:18.

Mi ṭhenkhat chuan kan leilung hi nakinah chuan nuclear tihchhiat avângin ram rovah changin, chutah chuan mi tlêm tê chauh an awm ṭâwk tâwk ang tih ngaih dân an nei a. Mahse, Bible chuan indona hmanga leilung tihchhiat tumna rêng rêng a hlawhchham ang tih a sawi.

“Thlalêr leh ram pilril chu a lâwm ang a; ram ro chu a hlimin phûl pangpâr angin a pâr ang.”—Isaia 35:1.

Mite chu lei paradis-ah hna an thawkhovin an hlim hle. — Pathianin lei paradis-a hlim taka awm tûrin min duh

Siamtu chuan kan leilung hi amaha intidam thei tûrin a duang a. Eng pawh ni se, a tâwpah chuan Pathianin a thiltihtheihna hmangin leilung hi a siam ṭha leh ang a; chatuanin mihringte chênna in a ni kumkhua ang.—Sâm 37:11, 29; Thu Puan 21:5.

Engtin nge “nuclear lungkhamna” chu i hneh theih?

Mi ṭhenkhat chuan “nuclear lungkhamna” an nei mai thei a, chumi awmzia chu “nuclear indona leh a sawhkhâwkte hlauhna” an nei tihna a ni. Bible thutiamte leh thurâwn pêkte chuan chutiang hlauhna neite chu an hlauhna tiziaawm tûr leh hmachhawn thei tûrin a ṭanpui thei a ni. Engtin nge?

Bible chuan kan leilung leh a chhûnga chêngte tân hma lam hun êng tak a târ lang a. Chu beiseina chungchâng zirna chuan ‘nunna thîrchakai’ anga hna thawkin lungkhamna a tikiam thei a ni. (Hebrai 6:19) Chu bâkah, hma lam huna thil lo thleng mai theite ngaihtuah buai lo va, ni khat tân chauhva ngaihtuahna hmangin kan lungkhamnate chu kan titlêm thei a. Isua sawi angin, “ni khat atân ni khat hrehawm chu a tâwk a ni.”—Matthaia 6:34.

Dik tak chuan, kan rilru leh ngaihtuahna hrisêl ṭha tûra theih tâwp kan chhuah a ngai a. Chutianga kan tih theih dân chu nuclear râlthuam tihhmasâwnna kawnga an hmalâkna chungchâng sawihona te, sawi lâwkna te leh, ngaih dân siamte ang chi, lungkhamna min neihtîr thei chanchin en tlêm hi a ni. Thil nih dân dik takte chu kan ngaihthah tûr tihna a ni lo. Chu aiin, kan thunun theih loh thilte a nih loh leh, a taka thleng ngai lo tûrte chu kan lo ngaihtuah buai chiam tûr a ni lo.

“Lungkham neih hian mi a tihrehawm a, thu ṭha erawh chuan mi a tilâwm ṭhîn.”—Thufingte 12:25.

I nuna thil ṭha i neihte ngaihtuahna hmangin chanchin ṭha lote chu ngaihthah daih rawh.

“Beiseina petu Pathian chuan amah in rin avângin lâwmna leh remna zawng zawngin tikhat che u rawh se.”—Rom 15:13.

Milem: Pa pakhat chuan inrintâwkna neiin hma lam a thlîr. 1. A hnung lamah chuan sipai thlawhna te, nuclear râlthuam te leh, meialh puakte pawh tiamin, indona a awm. 2. A hmaah chuan tlâng te, ruam hring dup te, lui lung te leh, savate awmna leilung thianghlim leh mawi tak a awm. — Bible chuan hma lam hun atân beiseina chiang tak min pe

Pathian thutiamte zirna chuan beiseina, hlimna leh chhûngrila thlamuanna min pe thei a ni.

Bible-in nuclear Armageddon chungchâng a hrilh lâwk em?

Mi ṭhenkhat chuan Armageddon chu nuclear indona nên an thlunzawm a. Chutiang a nih avângin, chumi sawhkhâwk tûrte chu an mitthla ngei ang.

Mahse, Bible chuan “Armageddon” tih thu mal chu “khawvêl zawng zawnga lalte,” a nih loh leh mihring sawrkâr leh Pathian inkâra indona nên a thlunzawm a ni.a (Thu Puan 16:14, 16) Armageddon chuan mihringte siam chhuah nuclear tihchhiat angin mihringte leh leilung hi a tichhe lo vang. Chu aiin, Armageddon indonaah chuan, Pathianin remna leh muanna dik tak awmtîr thei lotu mi suaksualte chauh a tiboral ang.—Sâm 37:9, 10; Isaia 32:17, 18; Matthaia 6:10.

Indo tihtâwp chungchângah Bible-in eng nge a sawi?

“Ani chuan indonate chu kâwlkil thlengin a tireh ṭhîn a; thal ngul chu a titliak a, fei chu a sât bung ṭhîn a; tawlailîrte chu meiah a rawh ral ṭhîn.”—Sâm 46:9.

Pathian Jehovab chuan mihringte buaina titâwpin leh an râlthuamte tiboralin, hnamte chungah a thiltihtheihna a hmang tawh ang. Chu chu leilung pum pui thununtu tûr a Lalram, vân sawrkâr hmangin a ti ang.—Daniela 2:44.

Pathian Lalram chuan mite chu inrem tak leh inlungrual taka awm dân a zirtîr ang. Leilung pum puiah sawrkâr pakhat chauh a awm dâwn avângin, inlungrual lohna chu a awm tawh lo vang a; mite chuan indo dân pawh an zir tawh hek lo vang! (Mika 4:1-3) Chumi rahchhuah chu eng nge ni ang? “Mi tinte chu an grêp hrui hnuaiah leh an theipui kûng hnuaiah an ṭhu zâwk ang a; tu man an tihlau lo vang.”—Mika 4:4.

a “Armageddon Indona Chu Eng Nge?” tih thuziak chu en rawh.

b Jehova chu Pathian hming bil a ni. (Sâm 83:18) “Jehova Chu Tu Nge Ni?” tih thuziak chu en rawh.

Bible-a Thu Puan bu hian nuclear indona chungchâng a sawi em?

Mi ṭhenkhat chuan Bible-a Thu Puan bu hian nuclear indona avânga chhiat vekna chungchâng a sawi niin an ngai a. (Thu Puan 6:14; 8:7-12; 16:1-21) Entîr nân, Thu Puan bu chuan “vân aṭang leia mei tlâktîr” chungchâng a sawi a. (Thu Puan 13:11-13) Jehova Thuhretute chuan hei hi khawvêl pum huapa nuclear indona chungchâng sawina ni lovin, Khawvêl Indopui Pahnihna chhûnga atomic bomb hmana chungchâng sawina niin an hre thiam a ni.

Thu Puan bu chuan chûng nuclear inbeihna chungchângte chu sawi lang mah se, chûng thilthleng hlauhawm tak takte chipchiar taka târ lan a tum lo. Thu Puan bu i chhiar hunah hei hi hre rawh:

Thu Puan buah chuan a ngial a ngana hriatthiam tûr ni lo chhinchhiahna emaw, entîrna emaw tam tak hman a ni.—Thu Puan 1:1.
Thu Puan bu chuan a chhiartute chu hlauthawng taka awmtîr a tum lo. Chu aiin, a thuchah ken chuan hre thiam a, zâwmtute chu hlimna a thlen zâwk a ni.—Thu Puan 1:3.

Hriat belh nân, “Thu Puan Bu—A Awmzia Chu Eng Nge Ni?” tih thuziak chu en rawh.