Remna Siam Tumna Chuan Remna Khawvêl A Awmtîr Thei Ang Em?

Khawvêl pumah hian indona leh râlthuam hmanga inbeihna a awm reng a. Chumi avâng chuan, United Nations leh pâwl hrang hrangte chuan ram buaina hmunah an palaite dahin remna awm renga thei tûrin theih tâwp an chhuah a. An beisei chu chûng buaina hmuna remna awmtîr hi a ni a. UN Secretary-General António Guterres-a chuan, “United Nations-a remna siamtute hi khawvêla remna nasa zâwk awmtîr tûra kan hma lâknaa chanvo pawimawh tak chelhtute an ni,” tiin a sawi.

Kum kal ta tawhahte khân, remna siam tumna hma lâknate chu eng emaw chen a hlawhtling tawh a. Entîr nân, civil mite chu an humhim a, râl tlânte chu an ramah an thawn kîr leh thei a, chhawmdâwlna hnate pawh an kalpui thei a, in tih chhiatte pawh sak ṭhat leh a ni bawk. Mahse, remna siam tumna hna chuan dâltu lian tak takte an hmachhawn avângin hlawhtlinna tak tak a nei thei lo a ni. Khawvêl remna dik tak thlentu tûr a chinfel dân ṭha hi a awm thei ngai a em? Bible-ah hian a chhânna a awm em?

Remna siamtute harsatnate leh Bible chinfelna

Râlthuam keng mi pahnih chu hnung lamah an ding.

Harsatna: thawhhona awm lo. Ram hrang hrang aṭanga sipai leh mipui aiawh pâwlte thawhho chu thil awlsam a ni reng lo. A châng chuan, chûng pâwlte inkârah inhriatsualnate a awm bâkah, duh zâwngte a inan ṭhin loh avângin lungrual taka thawhho chu a harsa hle a ni.

Bible chinfelna: “Vân Pathianin ram a rawn din ang a . . . hêng ram zawng zawngte [mihring sawrkârnate] hi, a tikeh sawmin a tiral zâwk ang a, kumkhuain a ding reng ang.”—Daniela 2:44.

Nakin lawkah chuan, Pathianin indona zawng zawng a ti tâwp ang a, khawvêl pumah remna a awmtîr tawh ang. (Sâm 46:8, 9) He leia sawrkâr zawng zawng aiah sawrkâr pakhat chauh a din ang: Pathian Lalram chu. Vân sawrkâr ṭha famkim rorêlna hnuaiah he khawvêl hi buaina awm lohna a ni ang a, remna siam tumtu mihring pâwlte an awm a ngai tawh lo vang.

Harsatna: ṭanpuinate leh theihnate tlêm lutuk. Remna siam tumtute chuan mite, sum leh pai lama ṭanpuina te, a nih loh leh thil dang ṭanpuinate an neih tam tâwk loh avângin, hmasawn tûr angin hma an sâwn thei lo a ni. Chu bâkah, chûng remna siam tumtute chu dinhmun khirh tak leh hlauhawm takahte an thawh a ngai ṭhîn bawk.

Bible chinfelna: ‘Kan Lalpa Isua Krista Pathian chuan vân hmuntea a ding lama [Isua] a ṭhuttîr lai khân, sawrkâr zawng zawng te, thuneihna te, thiltihtheihna te, lalna zawng zawng aia ropui zâwk daih pein a chawimawi ta a.’—Ephesi 1:17, 20, 21.

Engkimtithei Pathian Jehovab chuan Pathian Ram Lal atâna ruat Isua chu rorêlna hlawhtling din tûra a mamawh zawng zawng a pe a. (Daniela 7:13, 14c) Pathian chuan Isua chu mihring sawrkâr zawng zawngte neih theih aia nasa zâwk thiltihtheihna te, hriatna te, finna te leh, hriatthiamnate chu nasa takin a pe a ni. (Isaia 11:2) Chu bâkah, Isua chuan a hman theih tûr vântirhkoh chak tak tak a nei bawk. (Thu Puan 19:14) Chuvângin, Isua tâna chinfel theih loh khawpa dinhmun harsa a awm lo.

Isua’n Pathian pêk chûng ṭanpuinate leh theihnate chu buainate nuai bo nân chauh ni lo vin, chu aia nasain a hmang ang. Ani chuan Pathian Lalram hnuaia cheng zawng zawngte tân thlamuanna dik tak himna leh remna a thlen ang.—Isaia 32:17, 18.

Harsatna: dân hmanga khuahkhirhna. Remna atâna hma latu pâwlte chu khuahkhirhna chiang lo tak chuan an hnathawh leh an hmalâknate a tih khaihlak châng a awm ang. Chutiang khuahkhirhna chuan remna atâna hma latu pâwlte chu mi dangte ṭha taka vênghim thei lo tûrin emaw, an thiltum ber ṭha taka hlen chhuak lo tûrin emaw a dang thei.

Bible chinfelna: “Lei leh vâna thuneihna zawng zawng ka [Isua] hnênah pêk a ni tawh.”—Matthaia 28:18.

Pathian chuan Isua hnênah khawvêla remna awmtîr leh ti nghet tûrin thuneihna leh kaihhruaina chiang tak a pe tawh a. (Johana 5:22) Isua chuan dik lo takin thil a ti lo vang, a nih loh leh, hlemhlêtna a nei lo vang. (Isaia 11:3-5) Chhan ṭha tak neiin, Bible chuan Isua chu “Remna Lal,” tiin a ko va, a Lalram chu ‘dikna leh felnaa’ a tih ngheh a ni.—Isaia 9:6, 7.

Pathian Ram—remna dik tak thlentu tûr

Mihringte remna atâna hma latu pâwlte chuan remna eng emaw chen awmtîrin hmun ṭhenkhatah ralthuam hmanga inbeihna an ti tawp thei pawh a ni thei a. Mahse, tharum thawhna thlentu bul ber—mi dangte huatna an neih chu an paih bo thei lo.

“Harsatna ber chu remna an vawn nung reng thei lo hi ni.”—Dennis Jett, former U.S. ambassador.

Kawng leh lamah chuan, Pathian Ram chuan mi tinte thinlung ata inhuatna a nuai reh tawh dâwn avângin, chu Lalram chu remna thlentu dik tak a ni. Entir nân, Isua leia a awm lai khân, a zirtirte hnêna a thusawi leh entawn tûr siamna hmanga remna siam dân leh mi dangte chuanga hmangaihna lantir dân a zirtîr hi lo chhinchiah ang che:

“Remna siamtute chu an hlim e.”—Matthaia 5:9.

“Nangmah i inhmangaih angin, i vêngte pawh i hmangaih tûr a ni.“—Marka 12:29-31.

“I ngûnhnâm kha a paiah thun rawh, ngûnhnâm hmangtu zawng zawngte chu ngûnhnâma tih boral an ni ang.”—Matthaia 26:52.

“Mi hauva a [Isua] awm laiin a hau ve thung lo va, a tuar laiin a vau lo va,—1 Petera 2:23.

Isua pawhin Pathian Ram khua leh tuite chu mi dangte an hmangaihna aṭanga hriat an nih tûr thu a sawi a. Bible chuan a mihringpui hawtute chu Pathian Ram chuan a ngaizam lo vang tih a sawi a:

“In inhmangaih tawn chuan, mi zawng zawngin ka zirtîrte in ni tih an hria ang.”—Johana 13:34, 35.

“Tu pawh a unau hua chu tual that a ni.”—1 Johana 3:15.

“Tu pawhin Pathian a hmangaih chuan a unau pawh a hmangaih bawk tûr a ni.”—1 Johana 4:20, 21.

Mihringte siamtu Pathian Jehova chuan khawvêla remna awmtîr dân kawng ṭha ber leh awm chhun chu a hria a. A Lalram chu mihringte ṭan lâkna leh remna atâna hma latu pâwlte hlawhchhamnaah pawh a hlawhtling ang.

a United Nations leh pâwl hrang hrangte pawh “remna siamtu,” “remna thlâwptu,” “remna atân thawktu,” tih ang chi sawina atân pawha hman a ni.

b Jehova tih chu Pathian hming bîl a ni. (Sam 83:18) “Jehova Chu Tu Nge Ni?” tih thuziak chu en rawh.

c Daniela 7:13, 14, a târ lan “mihring fapa” chu Isua Krista sawina a ni.—Matthaia 25:31; 26:63, 64.

Tûnah ngei pawh, Pathian Ram chuan remna leh inpumkhatna atân hma a la

Kan hma lam huna, Pathian Ramin lei chung zawng zawnga ro a rêl hun chuan, Pathian zirtîr remna avângin, leia mi zawng zawngte an inpumkhat tawh ang. (Isaia 2:4; 11:9) Mahse, tûnah ngei pawh Pathian Ram chu vânah a ding tawh a, leia mi maktaduai tam takte hnênah a zirtîrna pein leiah remna leh inpumkhatna a awmtîr mêk a ni.

Engtikah Nge Hmangaihna Rinawm Chuan Inhuatna A Hneh Ang? tih video chu en la; tichuan, Juda mite leh Arab mite inkârah inhuatna lo awm reng tawh mah se, an thinlung aṭanga inpâwng huatna paih bo tûra Bible-in mi pahnih a ṭanpui dân lo chhinchhiah ang che.

Hmêlma Ni Ṭhin Tûna Ṭhian Ni Ta tih video chu en la; tichuan, Bible zirtîrnain mi sual rual hruaitu nun râwng tak ni ṭhîn leh police officer khirh tak chu an inhuatna hneha ṭhian ṭha ber ni tûra a ṭanpui dân chu lo chhinchhiah che.