Hruaitu Atân Tu Nge I Thlan Ang?—Bible-in Eng Nge A Sawi?

Mi tam tak chuan hruaitu atân tu nge an thlan dâwn tih chungchângah thu tlûkna pawimawh tak an siam ṭhîn a ni.

Bible-in eng nge a sawi?

Mihring hruaitute chuan theih chin tâwk an nei

Bible chuan mihring hruaitu zawng zawngte hian theih chin tâwk an neih thu a sawi.

• “Mi liante chu ring suh ula, mihring fapa, ṭanpuina rêng rêng awm lohna chu ring hek suh u. A thawin a chhuahsan a, ani chu a leilungah a kîr leh a; chumi ni ngei chuan a ngaihtuahnate chu a bo nghâl a ni.”—Sâm 146:3, 4.

Hruaitu tling ber berte pawhin thihna hi an pumpelh thei lo vang. Chu mai bâkah, anmahni thlâktu hruaitute chuan ram tâna an thil ṭha tihte chu an rawn chhunzawm ang tih lah an tiam thei hek lo.—Thuhriltu 2:18, 19.

Thu dik chu, Bible chuan mihringte hi eng lai mahin mahnia ro inrêl tûra siam an ni lo tih a sawi.

• “Tungchhova kal mihringah hian, a pheikhai hruai tûr a awm lo.”—Jeremia 10:23.

Tûn laiah ṭha taka ro min rêlsak theitu tûr hruaitu ṭha an awm em?

Pathian ngeiin a ruat hruaitu

Bible chuan Pathianin hruaitu tling ber leh rinchhan tlâk ber chu kan hruaitu atâna a ruat thu min hrilh a, ani chu Isua Krista a ni. (Sâm 2:6) Isua chu vân lam sawrkâr, Pathian Rama Lal a ni.—Matthaia 6:10.

Isua chu hruaitu atân i thlang ang em? Bible chuan kan thlan a pawimawhzia heti hian a sawi:

• “Fapa chu fâwp rawh u; chutilochuan, a thinur ang a, kawng lakah in boral dah ang e, a thin chu a thawk thuai dâwn si a. Amaha an rinna nghat zawng zawngte chu an eng a thâwl e.”—Sâm 2:12.

Tûn hi thu tlûkna siam hun a ni. Bible hrilh lâwkna chuan kum 1914-ah Isua’n ro a rêl ṭan tih leh Pathian Ramin mihring sawrkâr zawng zawngte hi a rawn thlâk thuai dâwn tih a târ lang.—Daniela 2:44.

Isua rorêlna kan thlâwp theih dân hriat belh nân, “Pathian Ram Chu Tûnah Thlâwp Rawh!” tih thuziak chu chhiar ang che.