Armageddon Indona Chu Eng Nge?

Bible chhânna

Armageddon indona chu mihring sâwrkârte leh Pathian inkâra indona hnuhnûng ber a ni a. Hêng sawrkârte leh anmahni thlâwptute hian Pathian rorêlna hnâwlin tûnah ngei pawh an dodâl a ni. (Sâm 2:2) Armageddon indona chuan mihring rorêlna a titâwp ang.—Daniela 2:44.

“Armageddon” tih thu mal hi Bible-ah Thu Puan 16:16-ah chauh a lang a. Hrilh lâwknaah, Thu Puan bu chuan “Hebrai ṭawnga Armageddon an tihah chuan, [Mizo King James Bible]” “khawvêl zawng zawnga lalte” chu “Pathian Engkimtitheia ni ropuia indonaa hruai khâwm” an ni tih a târ lang a ni.—Thu Puan 16:14.

Armageddon-ah tute nge indo vang? Isua Krista chuan vân lam sipaite chu kaihruaiin Pathian hmêlmate chu a do hneh ang. (Thu Puan 19:11-16, 19-21) Chûng hmêlmate zîngah chuan Pathian thuneihna dodâltute leh Pathian zah lotute an tel a ni.—Ezekiela 39:7.

Armageddon indona chu Middle East-a thleng tûr a ni em? Ni lo. Armageddon indona chu hmun thlan bîk pakhata thleng tûr ni lovin, lei pumpuia thleng tûr zâwk a ni.—Jeremia 25:32-34; Ezekiela 39:17-20.

Armageddon chu a châng chuan “Har–Magedon” (Hebrai ṭawnga Har Meghiddohnʹ) tia sawi a ni a, a awmzia chu “Megiddo Tlâng” tihna a ni. Megiddo chu hmânlai Israel rama khawpui pakhat a ni ṭhîn a. Thilthleng chanchin chuan Bible-a chhinchhiah pawh telin he hmunah hian hnehna chiang tak channa indona a thleng tawh ṭhîn tih a târ lang a ni. (Rorêltute 5:19, 20; 2 Lalte 9:27; 23:29) Mahse, Armageddon chuan hmânlai Megiddo bula hmun awm tak tak a kâwk thei lo. Chutah chuan tlâng lian tak a awm lo va; chu bâkah, Jezreel Ruam chu Pathian dotu zawng zawngte kalkhâwmna tûrin a zau tâwk lo bawk. Chu aiin, Armageddon chu Pathian rorêlna an dodâlna hnuhnûng ber atâna hnamte ṭanrualna khawvêl pum huap dinhmun a ni zâwk.

Armageddon indonaah eng thil nge thleng ang? Pathianin a thiltihtheihna a hman dân tûr chu hre lo mah ila, hmânlai indonaa a lo hman tawh ṭhin—rial te, lîrnghîng te, ruahpui vânâwn te, mei leh kât te, êng te, leh hripui te—hman tûr a nei ang. (Joba 38:22, 23; Ezekiela 38:19, 22; Habakuka 3:10, 11; Zakaria 14:12) Pathian hmêlma ṭhenkhatte chu intibuaiin an inthat tawn ang a, a tâwpah anmahni dotu chu Pathian a ni tih an hria ang.—Ezekiela 38:21, 23; Zakaria 14:13.

Armageddon chu khawvêl tâwpna tûr a ni em? Leilung hi mihringte chatuan in a nih avângin leilung tâwpna tûr a ni lo. (Sâm 37:29; 96:10; Thuhriltu 1:4) Armageddon chu mihring zawng zawng tihboralna ni lovin, Pathian chhiahhlawh “mipui tam tak” chhandama an awmna tûr zâwk a ni.—Thu Puan 7:9, 14; Sâm 37:34.

Bible-in “khawvêl” tih thu mal hi lei sawina atâna a hman bâkah, Pathian dodâltu mi suaksualte sawi nân hman châng a nei bawk. (1 Johana 2:15-17) Chutiang zâwng chuan, Armageddon chuan “khawvêl tawpna” a thlen ang.—Matthaia 24:3.

Armageddon chu engtikah nge a thlen ang? Armageddon-a a vâwrtâwp thleng tûr “hrehawm nasa” chungchâng a sawinaah Isua chuan: “Chu mi nî leh a hun thu chu Pa chauh lo chuan tu man, vâna vântirhkohte pawhin, Fapa pawhin an hre lo,” a ti a. (Matthaia 24:21, 36) Chutih rualin, Bible chuan Armageddon chu kum 1914-a inṭan hmuh theih lohva Isua lo awm lehna hun chhûngin a thleng ang tih a târ lang a ni.—Matthaia 24:37-39.