Governing Body Member Thar Pahnih
KUM 2024, October 5 khân thu pawimawh tak puan a ni a: Unau Jody Jedele-a leh Jacob Rumph-a te chu Jehova Thuhretute Governing Body member ni tûra ruat an ni a. Anni chu kum tam tak chhûng rinawm taka Jehova rawng lo bâwl tawh an ni.
Jody Jedele-a leh a nupui, Damaris-i
Unau Jedele-a chu U.S.A, Missouri-a piang niin, thutakah a seilian a. An chhûngkuain Thuhretu mi tlêmte chauh awmna hmunah an chêng a. Chuvângin, rawngbâwlna biala ṭanpui tûra lo kal ṭobul hrang hrang nei unau tam tak hmêlhriat theihna hun remchâng a nei a ni. An hmangaihna leh inpumkhatna chuan nasa takin a chungah nghawng ṭha a nei a. Kum 1983, October 15-ah, tleirâwl tê niin baptisma a chang a. Rawngbâwlna chu nuam a ti hle a; high school a zawh kum 1989, September thlaah regular pioneer a thawk ṭan a ni.
Unau Jedele-a chu a naupan laiin a nu leh pate’n a farnu nên Bethel an tlawhpui ṭhîn a. Chu chuan anni chu Bethel-a rawngbâwl tûra thiltum insiam tûrin a chêttîr a—chu an thiltum chu an hlen ve ve a ni. Unau Jedele-a chu kum 1990, September thlaah Wallkill Bethel-ah rawng a bâwl ṭan a. Cleaning Department-ah bul ṭanin, a hnuah Medical Service-ah a pui a ni.
Chutih lai chuan, Spain ṭawng hmang kohhran ṭhang duang takahte chuan unaupate mamawh a ni a. Chuvângin, unau Jedele-a chu chûng kohhran zînga pakhatah insawnin, Spain ṭawng a zir ṭan a. A hnu lawkah, a rawngbâwlna biala pioneer thawk mêk unaunu Damaris-i a tawng a. An inneih hnu chuan, Bethel-ah rawng an bâwl dûn a ni.
Unau Jedele-a te nupa chuan, kum 2005-ah an nu leh pate enkawl tûrin Bethel an chhuahsan a ngai a. Chutih hun chhûng chuan regular pioneer an thawk a. Unau Jedele-a chu Pioneer Rawngbâwlna School-a zirtîrtu niin, HLC (Hospital Liaison Committee) leh Regional Building Committee-ahte a ṭanpui bawk a ni.
Kum 2013-ah, Unau Jedele-a te nupa chu Warwick construction project-a tel tûrin Bethel-a sâwm leh an ni a. Chuta chin chu, Patterson leh Wallkill-ahte rawng an bâwl a ni. Unau Jedele-a chu Local Design/Construction Department leh Hospital Information Services-ah te a thawk a. Kum 2023, March thlaah chuan Service Committee ṭanpuitu atâna ruat a ni. A chanvo dawnte a thlîr lêtin, ani chuan: “Chanvo thar i dawn hian huphurh châng i nei mai thei a. Mahse, Jehova chu hlawhtling tûra min ṭanpui theitu a nih avângin, chutiang hunah chuan amah kan rinchhan reng a ngai a ni,” tiin a sawi.
Jacob Rumph-a leh a nupui, Inga-i
Unau Rumph-a chu U.S.A, California-a piang a ni a. A naupan laiin, a nu chu rawngbâwlnaah a tel tawh lo va; mahse, Unau Rumph-a chu Bible thutak zirtir tumin ṭan a la a ni. Chu bâkah, thutak ngeihven tûra ṭanpuitu Thuhretu rinawm tak a pi chu kum tin a tlawh ṭhîn bawk a. Kum 13 mi a nihin, Bible a zir ṭan a ni. Kum 1992, September 27-ah tleirâwl tê niin baptisma a chang a. Lâwmawm takin, a nu pawh rawngbâwlnaah a rawn tel leh a; a chhûngte dang zawng zawng pawh thlarau lamah hmasâwnin baptisma an chang a ni.
Unau Rumph-a chuan pioneer thawka rawngbâwl unaute hlimzia chu a hmu a. Chuvângin, high school a zawh hnu, kum 1995, September thlaah pioneer a thawk ṭan a. Mamawh zualna hmuna rawngbâwl tûrin 2000 kumah, Ecuador-ah a insawn a ni. Chutah chuan, Canada ram aṭanga lo kal pioneer unaunu Inga-i a tawng a; a hnuah an innei ta a. Thuchhuahtu tlêmte awmna Ecuador-a khaw pakhatah an nun bul chu an ṭan a. Tûnah chuan, chu khuaa kohhran chu kohhran phuisui tak a ni tawh a ni.
Unau Rumph-a te nupa chu special pioneer nia rawngbâwl tûra ruat an nih hnuah, bial kan hna an thawk leh a. Kum 2011-ah, Gilead class vawi 132-na kal tûra sâwm an ni. Gilead school an kal zawh chuan Bethel rawngbâwlna, missionary hna leh bial kan hna ang chi rawngbâwlna pêng hrang hrangahte telin khawvêl hmun hrang hrangah rawng an bâwl a. Unau Rumph-a chuan Lalram Chanchin Ṭha Puangtute School-ah zirtîr theihna chanvo hlu a nei bawk a ni.
COVID-19 hripui avângin, Unau Rumph-a te nupa chu United States-ah an lêt leh a. Tichuan, Unau Rumph-a chu Service Department hnuaia zirtîrna dawng tûrin an nupain Wallkill Bethel-a sâwm an ni a. A hnuah, Branch Committee member nia rawng a bâwlna hmun Ecuador branch-ah sawn leh an ni. Tichuan, kum 2023-ah Warwick-ah rawng an bâwl leh a. Kum 2024, January-ah chuan Unau Rumph-a chu Service Committee ṭanpuitu atân ruat a ni leh bawk. Ani chuan rawng a bâwl tawhna hmunte chu ngaihtuah lêtin, “Kan chanvo dawnte hlutna neihtîrtu ber chu kan rawngbâwlna hmun ni lovin, kan rawngbâwlpui unaute an ni,” tiin a sawi.
Kan unaute pahnih thawhrimna hi kan hlut hle a, anni chu kan “ngaihlu” takzet a ni.—Phil. 2:29, NWT.