Mi Dangte Tân Ṭawngṭai Theihnghilh Suh

1. Kan ṭawngṭainate chu Jehova tân a pawimawh tih engtin nge kan hriat?

ṬAWNGṬAINA hi thilpêk ropui tak a ni a. Han ngaihtuah teh: Jehova chuan mawhphurhna ṭhenkhat chu vântirhkohte tih tûrah a ruat a. (Sâm 91:11) A Fapa ngei pawh mawhphurhna lian tak tak a pe a ni. (Mt. 28:18) A nih leh, kan ṭawngṭaina ngaithla tûrin tu emaw a ruat em? Ruat lo ve; chu chu Ama tih tûrah a dah a ni. “Ṭawngṭaina ngaithlatu” Jehova chuan kan ṭawngṭainate chu mi mal takin min ngaihthlâksak a ni.—Sâm 65:2.

2. Mi dangte tâna ṭawngṭai chungchângah tirhkoh Paula’n eng entawn tûr nge a siam?

² Kan mi mal thilte chungchângah zalên takin Jehova kan pan theih rualin, mi dangte tân pawh kan ṭawngṭaisak tûr a ni a. Tirhkoh Paula chuan chutiang chuan a ti a ni. Entîr nân, Ephesi kohhran hnêna a lehkhathawnah: “Ka ṭawngṭainaahte chuan in hming ka lam reng ṭhîn,” tiin a ziak a. (Eph. 1:16, NWT) A mi mal tak pawhin a ṭawngṭaisak tih kan hre thei a ni. Entîr nân, Timothea hnênah: “Pathian chungah ka lâwm a, a chhûn a zâna ka ṭawngṭainaahte chuan ka hre reng ṭhîn che a ni,” tiin a ziak bawk. (2 Tim. 1:3, NWT) Paula chuan a mi mal harsatnate chungchângah ṭawngṭai tûr nei mah se, mi dangte tân pawh a ṭawngṭai a ni. (2 Kor. 11:23; 12:7, 8)

3. Engvângin nge mi dangte tâna ṭawngṭai kan theihnghilh châng a awm mai theih?

³ Mi dangte tâna ṭawngṭai kan theihnghilh châng a awm thei a. Engvângin nge? Unaunu Sabrina-ia chuan heti hian a hrilhfiah a ni: “Kan nunah tih tûr kan nei tam ṭhîn êm êm a. Kan buainate chauh ngaihvenin, kan mamawhte atân chauh kan ṭawngṭai ṭhîn,” tiin. Chutiang chuan i awm ve ṭhîn em? I awm a nih chuan, he thuziak hian a ṭanpui ang che. He thuziakah hian (1) mi dangte tâna ṭawngṭai a pawimawh chhan leh, (2) chutianga kan tih theih dân chungchânga thurâwnte kan ngaihtuahho vang.

ENGVANGIN NGE MI DANGTE KAN ṬAWNGṬAISAK ANG?

4-5. Engtin nge mi dangte ṭawngṭaisakna chuan ‘thil nasa tak a tih theih’? (Jakoba 5:16, NWT)

⁴ Mi dangte ṭawngṭaisakna chuan “thil nasa tak a ti thei.” (Jakoba 5:16 chhiar rawh.) Mi dangte ṭawngṭaisakna chuan an dinhmun a thlâk thei tak tak em? Thei teh rêng mai! Tirhkoh Petera’n a phat dâwn tih a hriat avângin, Isua’n a hnênah: “I rinna a bo loh nân ka ṭawngṭaisak che a ni,” tiin a sawi a ni. (Lk. 22:32, NWT) Paula pawhin, ṭawngṭainain dinhmun a thlâk danglam thei tih a hria a. Rom khuaa dik lo taka tântîr a nih khân, ani chuan Philemona hnênah: “In ṭawngṭainate avânga chhuah zalena awmin, rawn tlawh theih che u ka inbeisei si a,” tiin a ziak bawk. (Philm. 22, NWT) A hnu lawkah, Paula chu chhuah zalen niin, a thu hrilh rawngbâwlna a chhunzawm leh thei a ni.

⁵ Ni e, ṭawngṭaina hmangin Jehova kan nawrlui thei tihna erawh a ni hauh lo. A chhiahhlawhte ngaih pawimawh zâwng chu a ngaihvenin, an dîl anga tihsak châng a nei a. Chumi hriatna chuan kan dinhmun tawn chungchângah tih tak zeta ṭawngṭai tûr leh, thilte chu a ṭha thei ang berin min chinfelsak dâwn a ni tih ring nghet tûrin min ṭanpui a ni.—Sâm 37:5; 2 Korinth 1:11.

6. Engtin nge tu emaw ṭawngṭaisakna chuan amah kan thlîr dânah nghawng a neih theih? (1 Petera 3:8)

⁶ Mi dangte ṭawngṭaisakna chuan an chunga ‘khawngaihna’ nei tûrin min ṭanpui. (1 Petera 3:8 chhiar rawh.) Khawngaihna chu ṭanpui duhna neia mi dangte harsatna tawh hriatthiampuina a ni a. (Mk. 1:40, 41) Kohhran upa Michael-a chuan: “Mi dangte tâna ka ṭawngṭai hian, an harsatna tawhte ka hriatthiampui lehzualin, anmahni ka hmangaihna a thûk lehzual a ni. An hre kher lo a nih pawhin, anmahni hnaih lehzual niin ka inhria,” tiin a sawi. Kohhran upa Richard-a pawhin, a hlâwkna dang chu heti hian a sawi a: “Tu emaw tâna kan ṭawngṭai hian, amah ṭanpui duhna kan nei lehzual a,” tia a sawi hnuah, “Kan ṭawngṭaisak tu emaw kan ṭanpui hian, a tâna kan ṭawngṭaina chhânna ang kan ni,” tiin a sawi belh a ni.

7. Engtin nge mi dangte ṭawngṭaisakna chuan kan mi mal buaina tawhte chu inbûk tâwk taka thlîr thiam tûra min ṭanpui? (Philippi 2:3, 4) (Milem en bawk rawh.)

⁷ Mi dangte ṭawngṭaisakna chuan kan mi mal buaina tawhte chunga thlîr dân dik nei tûrin min ṭanpui. (Philippi 2:3, 4 chhiar rawh.) Diabola thununna hnuaia awm khawvêla kan chên avângin, kan zavai hian harsatnate kan tâwk ṭheuh va. (1 Joh. 5:19; Thup. 12:12) Mi dangte ṭawngṭaisak chu tih ṭhana kan neih hian, “khawvêl puma [kan] unau zawng zawngte pawhin, [kan] hrehawm tawrh ang an tuar ve,” tih chu hriat nawntîrin kan awm ṭhîn a ni. (1 Pet. 5:9, NWT) Pioneer unaunu Katherine-i chuan: “Mi dangte ṭawngṭaisakna chuan mi dangte pawhin harsatna an nei ve tih min hriat nawntîr ṭhîn a. Chu chuan ka mi mal buainate chauh ngaihven lo tûrin min ṭanpui a ni,” tiin a sawi.

KAN ṬAWNGṬAISAK AN MAMAWH

8. Tute nge kan ṭawngṭaisak theih?

⁸ Tute nge kan ṭawngṭaisak theih? Hrisêlna lama harsatna neite, school-a deusawh leh nêksâwrna tuar ṭhalai te, a nih loh leh, kum upatna avânga harsatna hmachhawnte ang chi a huho tân kan ṭawngṭaisak thei a ni. Kan unau tam takte chuan an chhûngte hnên aṭangin emaw, sawrkâr hruaitute hnên aṭangin emaw dodâlnate an hmachhawn a. (Mt. 10:18, 36; Tirh. 12:5) Mi ṭhenkhat chuan ram chhûng buaina avângin an in leh lo an kalsan a ngai a. Mi dang lehte chuan leilung chhiatna an tuar bawk a ni. Kan unaute chu mi mal takin kan hre lo pawh a ni thei a. Mahse, an tâna kan ṭawngṭai hian “inhmangaih tawn” tûra Isua thupêk chu kan zâwm tih kan lantîr a ni.—Joh. 13:34, NWT.

9. Engvângin nge Jehova inawpna pâwla hmahruaitu unaute leh an nupuite tân kan ṭawngṭai ang?

⁹ Jehova inawmpna pâwla hmahruaitu unaute tân pawh kan ṭawngṭai thei a. Governing Body leh anmahni ṭanpuitute, Branch Committee-te, branch office-a mawhphurhna nei overseer-te, bial kantute, kohhran upate leh, kohhranho rawngbâwltute tân kan ṭawngṭai thei a ni. Chûng kan unau tam takte chuan kan tâna an thawhrim rualin, mi mal harsatna hrang hrang an nei a. (2 Kor. 12:15) Entîr nân, bial kantu unaupa Mark-a chuan: “Ka harsatna lian ber pakhat chu kum upa ka nu leh pate hlata awm hi a ni a. An hrisêlna a ṭha tawh lo va. Ka ûte nupain enkawl mah se, mi mal taka an tâna tihsak theih kan neih tlêm êm avângin ka rilru a hrehawm ṭhîn,” tiin a sawi a ni. Chûng kan unaute harsatna tawh chu kan hriatthiampui thei lo a nih pawhin, ṭawngṭaisak kan duh a. (1 Thes. 5:12, 13) An chanvo ṭha taka an thawh chhunzawm theih nâna rinawm taka thlâwptu an nupuite tân pawh kan ṭawngṭai thei bawk a ni.

10-11. A huho atâna ṭawngṭaina chu Jehova’n a pawm em? Hrilhfiah rawh.

¹⁰ Kan sawiho tawh angin, a huho tân kan ṭawngṭai thei a. Entîr nân, tu emaw bîk ngaihtuah lovin, tân ina tângte tân emaw, an hmangaih tak sûn unaute thlamuan tûrin emaw Jehova hnênah kan dîlsak thei a ni. Kohhran upa Donald-a chuan, “Harsatna tâwk unaute an tam êm avângin, a châng chuan, mi mal tinte tân ni lovin, a huho tân kan ṭawngṭaisak mai ṭhîn,” tiin a sawi.

¹¹ Chûng ṭawngṭainate chu Jehova’n a pawm em? Pawm teh rêng mai! Dik takin, kan unau zawng zawngte mamawh chu kan hriatthiampui theih loh avângin, chutianga a huho atâna ṭawngṭai chu thil inâwm tak a ni a. (Joh. 17:20; Eph. 6:18) Chu chuan kan “unau zawng zawngte [kan] hmangaih” tih a ti chiang a ni. —1 Pet. 2:17, NWT.

MI MAL TAKA KAN ṬAWNGṬAISAK HUNAH

12. Engtin nge unaute dinhmun tûr ngaihvenna chuan mi mal taka an tân ṭawngṭai thei tûra min ṭanpui theih?

¹² An dinhmun tûr ngaihven rawh. A huho atâna kan ṭawngṭai bâkah, unaute chu an hming lamin, mi mal takin kan ṭawngṭaisak thei bawk a ni. In kohhranah natna khirh tak tuar an awm em? School-a nêksâwrna an tawh avânga lunghnual ṭhalai an awm em? An fate ‘Jehova thununna leh zilhna ang zêla’ enkawl tuma thawkrim tak nu leh pa mal ṭan an awm em? (Eph. 6:4, NWT) Chutianga unaute dinhmun hriat tuma harhvâng taka i awm chuan, an chunga i hmangaihna chu a nghet lehzualin an tâna ṭawngṭai duhna i nei lehzual dâwn a ni.b—Rom 12:15.

13. Engtin nge mi mal taka kan mi hriat lohte tân kan ṭawngṭai theih?

¹³ An hming lamin ṭawngṭai rawh. Mi mal taka kan hriat loh unaute tân pawh chutiang chuan kan ṭawngṭaisak thei a. Entîr nân, Crimea, Eritrea, Russia, leh Singapore ang chi ramtea tân ina tâng unaute hi han ngaihtuah teh. Kan website jw.org-ah an hming hmuh theih a ni a.c Bial kantu unau Brian-a chuan: “Tân ina tâng unaute hming ziah chhuaha, a ri chhuaka sawina chuan anni chu ka ṭawngṭainaa hre reng tûrin min ṭanpui a ni,” tiin a sawi.

14-15. Engtin nge dîl bîk neia kan ṭawngṭai theih?

¹⁴ Dîl bîk nei rawh. Kan târ lan tâk unau Michael-a chuan: “Kan website jw.org-a tân ina tâng kan unaute chanchin ka chhiar hian, an dinhmuna inchan ka tum a. Ka lo tâng a nih chuan, ka nupui ka ngaihtuahin, ṭha taka ngaihsak a ni tih chian ka duh ngei dâwn tih ka hria. Chutianga tihna chuan, tân ina tâng nupui nei unaute tâna ka ṭawngṭai hunah dîl bîk nei tûrin min ṭanpui a ni,” tiin a sawi.—Heb. 13:3.

¹⁵ Tân ina tâng kan unaute nî tin nun awm dân tûr ngaihtuahna chuan, an tâna dîl bîk neia ṭawngṭai dân kawng dang hre tûrin min ṭanpui thei bawk a. Entîr nân, tân in vêngtute’n an chunga ngilneihna lantîr tûr te leh sawrkâr hruaitute’n kan unaute chu zalên taka Pathian an biak phalsak tûrtein kan ṭawngṭai thei a ni. (1 Tim. 2:1, 2) Tân ina tâng kan unaute rinawmnain kohhrana unaute ti chak tûr te emaw, ring lo mite’n kan unaute nungchang ṭha an hmuh avânga kan thuchah ken ngaihthlâk duhna nei tûrtein emaw kan ṭawngṭai thei bawk. (1 Pet. 2:12) Harsatna dang hmachhawn kan unaute tân pawh chutiang chuan kan ti ve thei a ni. Unaute dinhmun tûr kan ngaihvena, an hming lam leh dîl bîk neia kan ṭawngṭaisak chuan, ‘nasa takin kan inhmangaih tawn’ tih kan lantîr a ni ang.—1 Thes. 3:12, NWT.

KAN ṬAWNGṬAINATE CHUNGCHANGA THLIR DAN INBUKTAWK TAK NEIH

16. Engtin nge kan ṭawngṭaina chungchângah thlîr dân inbûk tâwk tak kan neih theih? (Matthaia 6:8)

¹⁶ Kan hriat tawh angin, ṭawngṭaina chuan dinhmun a thlâk danglam thei a. Chutih rualin, thlîr dân inbûk tâwk tak kan neih a ngai a ni. Kan ṭawngṭai hian, Jehova chu a thil hriat lohte kan hrilh emaw, dinhmun chu a ṭha thei ang bera chinfel dân tûr thurâwn kan pe emaw a ni lo va. Jehova’n a chhiahhlawhte mamawh chu an dîl hma pawhin a hria a ni. (Matthaia 6:8 chhiar rawh.) A nih leh, engvângin nge mi dangte tâna kan ṭawngṭai a ngaih? Chutianga tih chu, he thuziaka kan târ lan tâkte bâkah, mi dangte kan ngaihsakzia lantîrna a ni. Hmangaihna chuan mi dangte tâna ṭawngṭai tûrin min chêttîr a. Chu bâkah, a chhiahhlawhte’n amah entawna hmangaihna an inlantîr tawn a hmuh hian, Jehova a hlim hle a ni.

17-18. Unaute tâna kan ṭawngṭaina chu eng nên nge kan tehkhin theih?

¹⁷ Kan ṭawngṭainate chuan dinhmunte chu a thlâk danglam lo a nih pawhin, kan unaute kan hmangaihzia an târ lang a; chu chu Jehova’n a ngaihlu a ni. Heti hian kan mitthla thei a: Chhûngkaw khat chuan fapa leh fanu naupang an nei a. An fapa a dam loh chuan, an fanu chuan a pa hnênah: “Ka û tân hian eng emaw tihsak rawh!” tiin a ngên a. Dik tak chuan, Pa ber chuan a fapa chu a hmangaihin, theih tâwpin a ngaihsak reng tawh a. Mahse, a fanuin a u a ngaihtuah êm avânga, ṭanpuina a dîlsak tih a hmuhna chuan nasa takin ani chu a ti hlim dâwn a ni.

¹⁸ Chutiang bawkin, Jehova’n inngaihsak tawna inṭawngṭaisak tawn tûrin min fuih a. Chutianga kan tih chuan, mahni hmasial lova mi dangte kan ngaihsakzia kan lantîr tihna a ni ang a; chu chu Jehova’n a hmuh hmaih dâwn lo a ni. (2 Thes. 1:3; Heb. 6:10) Chu bâkah, kan sawiho tâk angin, kan ṭawngṭainate chuan dinhmun a thlâk danglam châng a awm thei a ni. Eng pawh ni se, theih tâwp chhuahin inṭawngṭaisak tawn ṭheuh vang u.