Thuâwihna—Naupan Laia Zir Tûr Pawimawh A Ni Em?
“NU LEH PATE’N Naupang Thuâwih Satliah Ringawt Ni Lovin, Mize Danglam Bîk Nei Mihring An Duh.” Chutiang chuan chanchinbu pakhata thupui ber chu a inziak a ni. He thu tawi tê hi New Zealand-a survey an neih tlawh chhana ziak a ni a, chu chuan “a chhângtute zînga zaa 22-te chauhvin naupangte chu in lamah thuâwihna zirtîr tûr niin an ngai” tih a târ lang. Survey aṭang chuan tûn laia nu leh pate hian an fate chu thil pawimawh tak tak, nungchang mawi te, mahni intodelhna te, leh mawhphurhna ang chi te zirtîr chu a pawimawh zâwk daihin an ngai tih a lang bawk.
Mahni inngaihhlutna leh mahni hmasialna hunah hian, mi tam zâwkin thuâwihna leh naupangte thuâwih tûra zirtîrna an ngainêp pawh hi a mak lo ve. A nih leh, naupan laia thuâwihna chu hmân lai tak anga ngaih mai tûr em ni ang? Nge thuâwihna chu naupangte zir theih leh hlâwkpui theih zir tûr pawimawh takte zînga mi em ni zâwk? Chu ai maha pawimawh zâwk chu, chhûngkaw Dintu, Pathian Jehova’n nu leh pate thuâwihna chu eng angin nge a thlîr a, chutiang thuâwihna avânga hlâwkna ṭhenkhat chu engte nge ni?—Tirhkohte 17:28; Ephesi 3:14, 15.
“Chu Chu Thil Dik A Ni”
Kum zabi pakhatnaa Ephesi khuaa Kristian kohhran hnênah tirhkoh Paula’n heti hian lehkha a thawn a: “Naupangte u, Lalpaah chuan in nu leh in pate thu zâwm rawh u; chu chu thil dik a ni si a,” tiin. (Ephesi 6:1) Chuvângin, thuâwihna tûr chhan bul ber chu Pathianin thil dik a tehna nêna inmil a nih vâng a ni. Paula sawi ang hian, “chu chu thil dik a ni si a.”
He mi nêna inrem hian, Pathian Thu chuan nu leh pate’n an fate nungchang siam ṭha tûra hmangaihnaa an zirtîrna chu incheina mawi tak angin, “i lû atân pârṭhi mawi tak a ni ang a, i nghâwng atân ṭhi ang a ni dâwn si a,” tiin a sawi a, “Lalpaah chuan a lâwmawm si a,” tiin a sawi bawk. (Thufingte 1:8, 9; Kolossa 3:20) Nu leh pa thuâwih lohna chu Pathian lâwm loh zâwng tak a ni thung.—Rom 1:30, 32.
“Chutichuan, I Tân A Ṭha Ang”
Paula chuan thuâwih ṭhatna dang heti hian a ziak leh a: “‘I nu leh i pa chawimawi rawh,’ (chu chu thupêk tiam nei hmasa ber a ni.) ‘Chutichuan, i tân a ṭha ang a, leiah hian i dam rei bawk ang,’” tiin. (Ephesi 6:2, 3; Exodus 20:12) Nu leh pa thuâwihna chuan eng kawngtein nge ṭhatna a thlen theih ang?
A hmasa berin, nu leh pate hian kum leh thil tawn an nei tam zâwk tih hi a dik a ni lâwm ni? An hriatna a tûn lai lovin emaw, sikula zir angte hre ve vak lovin emaw an lang mai thei a, mahse nun phung leh nuna harsatnate nunpui dân erawh chu an hre hnem hle a ni. Ṭhalaite erawh chuan puitlinna avânga lo awm ṭhîn ngaihtuahna inbûk tâwk chu an tla chham thung a. Chuvângin thu tlûkna pawh an siam rang hle a, anmahni chhiat phah hialna khawpin an ṭhiante thu thu-in an awm fo a ni. Bible chuan dik takin heti hian a sawi: “Naupang thinlungah chuan âtna a bet tlat a,” tiin. Chu mi tihbo-na chu eng nge ni? “Thununna tiangin hla takah a hnawt kiang ang.”—Thufingte 22:15.
Thuâwih hlâwkna chu nu leh pa leh fate inlaichînna siam ṭhatu a nih bâkah tam tak a la awm a. Mihring nun phung hi tluang tak leh hmasâwn zâwnga kal tûr chuan thawhhona a awm tûr a ni a, chutah chuan thuâwihna engemaw chen a ngai tel bawk. Entîr nân, inneihnaah hian muanna, inremna, leh hlimna thlentu chu tlâwm zâwk nih duhna hi a ni a, mi dangte dikna leh rilru put hmang ngaih pawimawh lohna ni lovin. Hna thawhna hmunah, sumdâwnna emaw hna dang rêng rêng pawh a hlawhtlin theih nân, mi rawihte chu anmahni ruaitu hnuaia an intukluh a ngai a ni. Sawrkâr dân leh thupêk chungchângah pawh, thuâwihna chuan hremna min pumpelhtîr mai bâkah, engemaw chen chu min vênghim tel bawk a ni.—Rom 13:1-7; Ephesi 5:21-25; 6:5-8.
Thuâwih lo ṭhalaite chu khawtlângah mi hnawksak an lo ni mai ṭhîn a. Mahse, naupan laia thuâwih zirna lâwmman chuan damchhûng a daih thei a ni. Naupan laia thuâwih zir chu a va hlâwk êm!
Thuâwihna Lâwmman Ropui Chu
Thuâwihna chuan chhûngkaw inlaichînna hlimawm tak leh damchhûnga hlâwkna dang tam tak a thlen bâkah, inlaichînna zawng zawnga pawimawh ber, min Siamtu nêna inlaichînna, siam thei tûrin nghahchhan min pe bawk a ni. ‘Siamtu Ropui,’ “nunna tuikhur” neitu a nih avângin, Pathian Jehova chuan kan thuâwihna pumhlûm hi a phû hliah hliah a ni.—Thuhriltu 12:1; Sâm 36:9.
“Thuâwih” tih thu mal hi kawng hrang hrangin Bible-ah vawi 160 aia tam a lang a. Chubâkah, Pathian dânte, thupêkte, leh rorêlnate za tam tak a lang bawk a, chûng zawng zawngah chuan thuâwihna a ṭûl vek a ni. Pathianin thuâwihna chu a pawmtlâk kan nih theih nâna thil ṭul tak angin a ngai tih a chiang hle a ni. Ni e, Jehova nêna inlaichînna siam dâwn chuan thuâwihna chu a tel lo thei lo. (1 Samuela 15:22) Mihringte pianpui rilru thlêk zâwng chu thuâwihna ni lovin, thuâwih lohna chu a ni ngei mai a. Bible pawhin, “Mihring rilru ngaihtuahnate chu an naupan têt ata a sual si a,” a ti a ni. (Genesis 8:21) Chuvângin, thuâwihna chu naupan lai chauhva zir tûr ni lovin, dam chhûnga zir tûr a ni zâwk. Chu chuan lâwmman ropui tak a thlen ṭhîn a ni.
Tirhkoh Paula sawi angin, nu leh pate thu âwih tûra thupêkah chuan thutiam pahnih a tel tih han ngaihtuah lêt leh la, chu chu “i tân a ṭha ang a, leiah hian i dam rei bawk ang,” tih te a nih kha. He thutiam hi Thufingte 3:1, 2 hian a rawn nemnghet a ni: “Ka fapa, ka dân chu theihnghilh suh la, i thinlungin ka thupêkte chu zâwm reng zâwk rawh se; dam nî leh kum te, thlamuanna te a pêk belhchhahsak dâwn che nia,” tiin. Thuâwihte lâwmman ropui tak chu, tûna Jehova nên mimal taka inlaichînna neih leh, remna khawvêl thara chatuana nunna a ni.—Thu Puan 21:3, 4. (w01 4/1)
[Phêk 30, 31-naa milemte]
Thuâwihna chuan chhûngkuaah te, hna thawhna hmunah te, leh Jehova nên pawh inlaichînna hlimawm tak a thlen