Lalram Chanchin Puangtute Report
Kingdom Hall Atâna Lâwmman Tangkapui
FINLAND ram Ministry of Environment chuan kum 2000 chu “Ram Leilung Cheimawi Kum” atân a ruat a. Huaihawttu pakhat sawi dân chuan “ram leilung cheimawi tih kum chânga [an] neih chhan chu chhehvêl hringdup mai hian kan nî tin nun leh kan hmakhaw ṭhatna chungah nghawng a neihzia kan zaa min hriatnawntîrtu atân a ni.”
January 12, 2001-ah chuan, Finnish Association of Landscape Industries (Finland ram leilung cheimawitu pâwl) aṭanga lehkha thawn chu Finland rama Jehova Thuhretute branch office-ah a lo thleng a. Lehkha thawn chuan Tikkurila khuaa Jehova Thuhretute Kingdom Hall chuan a chhehvêl ruahman dân nalh tak leh a huan an cheimawi nalh êm avângin ram leilung cheimawi kum lâwmman tangkapuite zînga pakhat a dawn thu a hrilhfiah a ni. Chu lehkha thawn chuan “Kingdom Hall hung chhûng chu, nipui lai leh thlasik lai pawhin hmuh a nuamin an chei nalh êm êm a, a changkâng hle bawk,” tih a târ lang tel a ni.
Lâwmman tangkapui chu Jehova Thuhretute hnênah Finland ram, Tampere khawpuia Rosendahl Hotel-ah pêk a ni a, chutah chuan mi thiamte leh sumdâwng mi 400 an tel a ni. Finnish Association of Landscape Industries pawhin chanchinbu mite a kawmnaah: “Kan ram hmun hrang hranga, Jehova Thuhretute Kingdom Hall zawng zawng deuhthaw chu ṭha taka ruahman a ni. A chhehvêl cheimawi dân chuan a bul hnaia kalte mit a la hle a. Tikkurila khuaa Kingdom Hall chu a mawi berte zînga pakhat a ni. A in leh a hung chhûng zau tak chu a inchawih hlein, a dam raih mai a ni” a ti bawk.
Finland ramah chuan Kingdom Hall 233 a awm a, tam tak chu huan mawi tak hualvêl a ni hlawm a. Amaherawhchu chutiang hmun timawitu taka chu biakna dik leh Bible zirtîrna hmunpui a nih vâng zâwk a ni. Khawvêl pum puia Jehova Thuhretu mi maktaduai ruk chuangte tân chuan a changkâng emaw, a tlâwm emaw pawh ni se, Kingdom Hall chu an hmun ngainat êm êm chu a ni a. Chuvângin taima tak leh duat takin an enkawl a ni. In vênga Kingdom Hall kawngkâte chu mi zawng zawng tân a inhawng reng a ni! (w02 10/1)