Khawvêl Tâwp Hun Tûr Hriltu Sanapui Chuan Zanlai A Hnaih Tawh Hle

Kum 2026, January ni 27 khân, scientist-te chuan Khawvêl Tâwp Hun Tûr Hriltu Sanapui chu zanlai hnaih takah an herhsawn a. Zanlai chuan mihringte’n an thlen khawvêl pum huapa chhiatna a kâwk a ni.

• “The Bulletin of the Atomic Scientists Science and Security Board chuan Khawvêl Tâwp Hun Tûr Hriltu Sanapui chu zanlai a thlenna tûr second 85 la ngaiah a herhsawn a, chu chu chhiatna thlen hun tûr chhût tawh zawng zawnga a la hnaih ber kum a ni.”—Bulletin of the Atomic Scientists.

• “Scientist-te chuan Khawvêl Tâwp Hun Tûr Hriltu Sanapui chu thil eng emaw min hrilh nân an hmang a. Khawvêlah dinhmun hlauhawm a tam chho telh telh a, mite chu an buaina chingfel tûrin an thawkho thei lo va, thil awm dân chuan chhiat lam a pan zawm zêl a ni. Inthlâk danglamna chu siam a ngaiin siam theih a ni bawk; mahse, khawvêl puma mite chuan an hruaitute chu rang taka hma la tûra an nawr a ngai a ni.”—Alexandra Bell, president leh CEO, Bulletin of the Atomic Scientists.

Mihringte tâwpna leh kan khawvêl tâwpna chu kan hnaih tawh em? Hma lam huna thil lo thleng tûr chu kan hnaih tawh em? Bible-in eng nge a sawi?

Hma lam huna thil lo thleng tûr

Bible chuan “lei hi erawh chu a awm reng mai” tiin a sawi a, mite chu “a chhûngah hian kumkhuain an awm ang” tiin a sawi bawk. (Thuhriltu 1:4; Sâm 37:29) Chuvângin, mihringte chuan khawvêl hi an tichhe lo vang a, leilung hi chên theih lohvin an siam hek lo vang.

Nimahsela, Bible chuan tâwpna chungchâng a sawi a. Entîr nân, “khawvêl hi . . . a boral mêk a ni,” tiin a sawi a ni.—1 Johana 2:17.

• Bible-in khawvêl tâwp chungchâng a sawi hian eng a sawina nge ni tih hriat nân, “Khawvêl Hi A Tâwp Thuai Ang Em? Apocalypse Chu Eng Nge Ni?” tih thuziak chu chhiar ang che.

• Khawvêl tâwp hun tûr chungchâng Bible sawite hriat nân, “When Will the World End?” tih thuziak chu chhiar ang che.

A êng zâwngin thil thlîr tlat rawh

Bible chuan khawvêlah harsatna a awm chung pawha a êng zâwnga thil thlîr tlat tûrin min ṭanpui thei a ni. Engtin nge?

• Bible chuan thurâwn ṭangkai tak min pe a ni. (2 Timothea 3:16, 17) Entîr nân, nuna harsatnate hmachhawn chung pawha a êng zâwnga thil thlîr tlat tûra Bible-in a ṭanpui theih dân che hriat nân, “How to Control Worry” tih thuziak chu chhiar ang che.

• Bible chuan hma lam hun beiseina rin tlâk tak min pe a. (Rom 15:4) Tûna thleng tûra kan beisei theihte leh hma lam huna thleng tûra kan beisei theihte min hrilh a, chu chuan khawvêlah eng thil pawh thleng se beiseina nei tûrin min ṭanpui a ni.

Bible chungchâng hriat belh tûrin, a thlâwna kaihruaitu nêna bible sawihona nei chhin tûrin kan sâwm a che.