Khawvêl Hi A Tâwp Thuai Ang Em? Apocalypse Chu Eng Nge Ni?
“Apocalypse” tih thu mal i hriat hian i rilruah eng nge lo lang? Khawvêl pum huap chhiatna râpthlâk tak, leia nunna nei zawng zawngte tâwpna ni tûrah i ngai pawh a ni thei. A bîk takin, a hnuaia chanchin tharte an chhiar hian mi ṭhenkhat chuan khawvêlin chutiang chhiatna chu a pan mêk niin an hria:
“Nuclear indona chu tum rêng vâng emaw, tihpalh thil thu emaw, a nih loh leh inhriatsualna ho tê vâng emawin a chhuak thei reng a ni.”—Bulletin of the Atomic Scientists.
“Kum sâwmbi kalta chhûng khân khawvêl pumah thlipui na tak te, ram kâng te, khawkhêng te, tuifinriat koral lung vârna te, khaw lum lutuk te, leh tui liante chu mak tih khawpin a rawn tam a ni.”—National Geographic.
“Africa rama khaukhuap puang chuan kum tam tak chhûngin a nasat ber ṭum a tawng a ni.”—The Associated Press.
Leilung hi khawvêl pum huap apocalypse-ah tihboral a ni ang em? Bible-in eng nge a sawi?
Leilung hi a tâwp ang em?
Tâwp lo vang. Pathian Thu, Bible chuan lei hi chatuanin a awm reng ang tih min tiam a. (Thuhriltu 1:4) Pathian chuan he lei a siam hi tihchhiat aiin, “lei tichhetute tihchhiat ve thung hun” a thlentîr zâwk ang.—Thu Puan 11:18.
Khawvêl hi a tâwp ang em?
Bible sawi dânin, “khawvêl” tâwp tûr chu Pathian ngaihsak lo leh mahni duh dân dâna nung mihringte tâwpna a ni. Pathian chuan Nova hun laia a tih ang khân, ‘amah ngaihsak lote awmna khawvêl’ tâwpna a rawn thlentîr ang.—2 Petera 2:5; 3:7.
Johana thawn khat 2:17 chuan, “khawvêl hi a châknate chawpin a boral mêk a ni,” tiin a sawi a. He châng hian Pathianin kan chênna leilung tak tak hi ni lovin, thil ṭha lo ti chhunzawm zêltu mihringte a tiboral ang tih a târ lang a ni.
Engtikah nge tâwpna a lo thlen ang?
Bible-in tâwpna thlen hun tûr chiah min hrilh lo va. (Matthaia 24:36) Mahse, tâwpna a hnai tawh hle tih erawh a târ lang a ni. Bible chuan hêngte hi a sawi lâwk:
Indona te, ei leh bâr tlâk chhamna te, hri lêng te, lîrnghîng nasa tak te chu “hmun hrang hrangah” a thleng ang.—Matthaia 24:3, 7, 14; Luka 21:10, 11; Thu Puan 6:1-8.
Mi a tam zâwkte chu mahni hma sial takte an ni ang. Entîr nân, anni chu “tangka ngainatu te,” “lâwm nachâng hre lo te,” leh “insûm thei lo te” an ni ang.—2 Timothea 3:1-5.
Mi tam takte chuan kum 1914 aṭang khân khawvêl dinhmun leh Bible hrilh lâwknate a inmil tih leh tâwpna a hnai tih an ring a. Hriat belh nân, “Bible Hun Chhuinain Kum 1914 Chungchâng Eng Nge A Târ Lan?” tih leh “‘Ni Hnuhnûng’ A Nih Loh Leh ‘Tâwpna Hun’ Chhinchhiahna Chu Eng Nge Ni?” tih thuziakte chu en rawh.
Bible-a “apocalypse” tih thumal hian eng awmzia nge a neih?
Bible-a “apocalypse” tia lehlin a tîra Grik thumal awmzia hian “hawng” a nih loh leh “khuhna hlîp” tih a kâwk tlângpui a. Chu thu mal chu thurûk inthup hailanna sawina atâna hman a ni ṭhîn. Bible pawhin leia suahsualna zawng zawng tiboral tûr leh Pathian betute lâwmman pe tûra a thiltihtheihna nêna Isua a lo lan hun tûr, ‘Lalpa Isua inlârna [a nih loh leh, apocalypse]’ chungchâng a sawi a ni.—2 Thessalonika 1:6, 7; 1 Petera 1:7, 13.
Bible bu hnuhnûng ber hian nakina thil thleng tûr a puan chhuah avângin A·po·kaʹly·psis, a nih loh leh Thu Puan tia hming pêk a ni. (Thu Puan 1:1) He lehkhabu hian chanchin ṭha leh beiseina thuchah a keng tel a. (Thu Puan 1:3) Pathianin rorêlna dik lo zawng zawng nuai bo va, lei hi paradis-a a chantîr dân tûr pawh a sawi a ni. Chutih hunah chuan mihringte chu an nain, hrehawm an tuarin, an thi leh tawh lo vang.—Thu Puan 21:3, 4.
Hêng Bible thutiam ropui takte hi hriat belh i duh em? Jehova Thuhretute chuan nangmah ṭanpui theitu a thlâwna Bible zirna program an nei a. Engvângin nge anni chu i biak pawh nghâl loh vang?