‘Indo Thâwmte In Hria Ang’

Kum 1960 Journalist hna ka thawh ṭan aṭanga kum 60 chhûng chu indona chungchâng report 40 chuang ka lo pe tawh a. Cold War indona sosân chhoh dân leh a hnua a reh tâk thut dânte ka hmu a. Tûn hmaa indona ka lo hmuh tawh zawng zawngte aiin kum 2025-a indona thleng hi ka lungkham lehzual. A chhan pakhat chu, indona lian tham tak tak a thlen vâng a ni a. A chhan dang leh chu, chûng indonate chuan khawvêlah nghawng ṭha lo tak a neih theih vâng a ni.”—John Simpson-a, BBC world affairs editor.

Mite chuan khawvêl puma thleng mêk indona chungchângah lungkhamna an nei a. Mi tam tak chuan indonate a tâwp theih ngai dâwn leh dâwn loh an ngaihtuah a ni. Isua’n eng nge a zirtîr?

Isua zirtîr chu

Isua chuan tûn laia kan thil hmuhte hi a thlen tûr thu a lo sawi lâwk a. A hnungzuitute hnênah: “Indo thâwmte leh indo thuthangte in hre bawk ang,” tiin a vaukhân a ni.—Matthaia 24:6.

Tûn laia kan hmuh indona leh tharum thawhnate hi a beidawnthlâk hle a; mahse, beiseina neih chhan tûr ṭha tak kan nei a ni. Engvângin nge? A chhan chu Isua’n indona lian tham takte bâkah, thil thleng dang te, dinhmunte leh, mihring rilru put hmangte chu ‘khawvêl tâwpna’ hunah kan nung tih “chhinchhiahna” a ni tih a zirtîr vâng a ni. (Matthaia 24:3; Luka 21:7) Chumi awmzia chu Isua’n nakinah indonate chu a titâwp dâwn tihna a ni. Engtin nge a tihtâwp ang?

Isua tih tûr chu

Nakin lawkah Isua chuan Pathian Rama Lal a nih angin, “indonate chu kâwlkil thlengin a tireh” ang.—Sâm 46:9.

Hma lam hun muanawm tak chungchâng te, a lo thlen dân tûr te leh, i tâna awmzia a neih theih dânte chungchâng hriat belh nân, “Indona Tâwp Dân Tûr” tih thuziak chu chhiar ang che.