Pathianin Thil Nung Chi Hrang Hrangte Siam Tûrin Chanchhâwnna A Hmang Em?

Bible Chhânna

Hmang lo. Bible chuan Pathianin mihringte mai bâkah, nungchate leh thlaite chu anmahni “chi” awm dân tûr ang zêlin a siam tih chiang takin a sawi a.a (Genesis 1:12, 21, 25, 27; Thu Puan 4:10, 11) Mihring zawng zawngte hi kan nu leh pa hmasa ber, Adama leh Evi-te thlah kan ni tih a sawi bawk. (Genesis 3:20; 4:1) Bible chuan Pathianin thil nung chi hrang hrangte siam nân chanchhâwnna a hmang tih ngaih dân chu a thlâwp lo va. Mahse, a nihna takah chuan, Bible-a thil engmah hian nunna nei chi khat chhûngah hian danglamna a awm thei tih scientist-te ngaih dân chu a kalh rêng rêng lo.b

• Pathianin chanchhâwnna a hmang em?

• Chanchhâwnna hi Bible nên a inrem em?

• Thlaite leh nungchate inthlâk danglam theihna hi eng nge ni?

Pathianin chanchhâwnna a hmang em?

Pathianin chanchhâwnna hmangin thil nung chi hrang hrangte a siam tih ringtute chuan ngaih dân hrang hrang an nei a. Encyclopædia Britannica sawi dân chuan, mi ṭhenkhatin “sik leh sa miltu nungcha leh thlaite dam khawchhuahna leh inthlah chhâwnna hmangin Pathianin khawvêl a thunun” niin an ring a ni.

Chu ngaih dânah chuan a hnuaia thute hi a tel thei bawk:

• Nunna nei zawng zawngte hi hun tam tak liam taa thlahtu thu hmun aṭanga lo chhuak vek an ni.

• Nunna chi khat hi nunna chi dang daihah a chang chhâwng thei.

• Hêng chanchhâwnnaah hian engtin emaw takin Pathian chu a mawhphurtu ber a ni.

Chanchhâwnna hi Bible nên a inrem em?

Chanchhâwnna hmangin Pathianin thil nungte a siam tih rinna chuan Bible-a Genesis-a kan hmuh thil siam chungchâng hi a dik vek lo tih a hril a. Mahse, Isua chuan Genesis thuziak chu thilthleng dik tak niin a nemnghet a ni. (Genesis 1:26, 27; 2:18-24; Matthaia 19:4-6) Bible chuan Isua chu he leia a rawn kal hmain, vânah Pathian bula a awm thu leh “thilsiam zawng zawng” siamnaah Pathian a ṭanpui thu a sawi. (Johana 1:3) Chuvângin, Pathianin thil nung chi hrang hrangte siam nân chanchhâwnna a hmang tih ngaih dân hi Bible zirtîrnate nên a inrem lo a ni.

Thlaite leh nungchate inthlâk danglam theihna hi eng nge ni?

Bible chuan thil nung chi khat aṭanga tlêma danglamna nei a dang lo chhuak thei zât chu a sawi lo va. Pathian siam nungchate inkârah leh thlaite inkâra inthlahpawlhna leh an awmna boruak azira inthlâk danglam theihna chu a kalh hek lo. Mi ṭhenkhat chuan chutianga inthlâk danglamna chu chanchhâwnna angin ngai mah se, nunna nei chi thar siam chhuah a ni lo.