Kum Upa Nu leh Pate Enkawl Chungchângah Bible-in Eng Nge A Sawi?

Bible chhânna

Fa puitling tawhte chuan kum upa an nu leh pate enkawl tûrin mawhphurhna pawimawh tak an nei a. Bible chuan fa puitling tawhte chungchângah: “Pathian ngaihsaka awm leh anmahni hringtute chungah ṭhat ve thung zir zet rawh se; chu chu Pathian lâwmzâwng a ni si a,” tiin a sawi a ni. (1 Timothea 5:4) Fa puitling tawhte’n kum upa an nu leh pate an enkawl hian an nu leh pate chawimawi tûra Bible thupêk an zâwm tihna a ni bawk.—Ephesi 6:2, 3.

Bible-ah hian kum upa nu leh pate enkawl chungchânga kaihhruaina chipchiar tak a chuang lo va. Amaherawh chu, chutianga enkawltu rinna nei a hmei a pate entawn tûr a chuang a ni. Chu bâkah, anmahni enkawltute ṭanpui theitu tûr thurâwn ṭha tak a chuang bawk.

• Engtin nge Bible hun laia chhûngkuaa mite’n kum upa an nu leh pate an enkawl?

• Bible-a eng thurâwn ṭangkai takin nge a enkawltute ṭanpui thei?

• Bible-in kum upa nu leh pate chu in lama enkawl ngei tûr an ni tih a sawi em?

Engtin nge Bible hun laia chhûngkuaa mite’n kum upa an nu leh pate an enkawl?

An dinhmun azirin kawng hrang hrangin an enkawl a ni.

• Josefa chu a pa, tar tawh tak Jakoba hnên aṭanga hla takah a chêng a. Ani chuan a theih veleh, a pa chu amah hnaiha insawn tûrin ruahmanna a siam a ni. Tichuan, a pa tân chênna tûr in a pe a, a châwmin, a vênghim bawk a ni.—Genesis 45:9-11; 47:11, 12.

• Ruthi chu a pasala nu zuiin ram dangah a insawn a, amah enkawl tûrin rim takin hna a thawk a ni.—Ruthi 1:16; 2:2, 17, 18, 23.

• Isua chuan a thih hma lawkin hmeithai ni tawh mai tûr a nu Mari enkawltu tûr a thlang.—Johana 19:26, 27.a

Bible-a eng thurâwn ṭangkai takin nge a enkawltute ṭanpui thei?

Kum upa an nu leh pa enkawltute taksa lam leh rilru lama an chauh chânga ṭanpui theitu thu bulte Bible-ah a chuang a ni.

• I nu leh pa chawimawi rawh.

  Bible sawi dân: “I nu leh i pa chawimawi rawh.”—Exodus 20:12.

  Engtin nge he thu bul hi kan hman theih ang? I nu leh i pate chu anmahni mi mal nun an duh dân anga hman phalsakin chawimawi la. A theih ang tâwkin, enkawl an nih dân chungchângah anmahni thu tlûkna siamtîr rawh. Chutih rualin, a âwm tâwka ṭanpuina pein i zahzia lantîr ang che.

• Hriatthiamna nei leh ngaihdam peih tak ni rawh.

  Bible sawi dân: “A ngaihruat thiamnain mi a thin a tihnelsak ṭhîn a, bawhchhiatna hai der chu a ropuina a ni.”—Thufingte 19:11.

  Engtin nge he thu bul hi kan hman theih? I enkawl dân chungchângah kum upa i nu leh pate chuan ngilnei lo tak, a nih loh leh lâwm nachâng hre lo ang maia thu an sawi hunah, heti hian inzâwt rawh, ‘Anmahni angin hrisêlna ṭha nei lovin beidawnna nei ve ta ila, engtin nge ka awm ang?’ tiin. Hriatthiamna leh ngaihdam peih tak nih i tum chuan dinhmun tihchhiat zual i pumpelh thei ang.

• Mi dangte râwn rawh.

  Bible sawi dân: “Remruat lâwk lova thil tih a hlawhtling duh lo, remhria an tam chuan a hlawhtling ṭhîn.”—Thufingte 15:22.

  Engtin nge he thu bul hi kan hman theih ang? I nu leh pate’n hrisêlna lama harsatna an neihte enkawl dân chu zir bingna nei la. Anmahni enkawlnaa ṭanpui theitu che tualchhûnga thil awmte chu zawng chhuak ang che. Kum upa an nu leh pa lo enkawl tawhte chu bia la. Pianpui unau i nei a nih chuan i nu leh pate mamawh te, anmahni enkawl dân te, leh phurrit inchhâwk tawn dânte chu chhûngkuain sawiho vang che u.

  

• Inngaitlâwm rawh.

  Bible sawi dân: “Inngaitlâwmte hnênah chuan finna a awm.”—Thufingte 11:2.

  Engtin nge he thu bul hi kan hman theih ang? I theih chin tâwk hre rawh. Entîr nân, kan hun leh tha neihin chin tâwk a nei a. He chin tâwk neihna hian i nu leh pate i enkawlnaah nghawng a nei thei a ni. Ṭanpui ngai i nu leh pate i enkawlna avânga chau ngawih ngawiha i inhriat chuan i chhûngte, a nih loh leh mi thiam bîkte ṭanpuina dîl ang che.

• Ṭha takin inenkawl rawh.

  Bible sawi dân: “Tu mân mahni tisa an haw ngai si lo va; an châwmin an duat zâwk ṭhîn a ni.”—Ephesi 5:29.

  Engtin nge he thu bul hi kan hman theih ang? I nu leh pate enkawl tûrin mawhphurhna nei mah la, i mamawh leh kawppui nei i nih chuan i chhûngkaw mamawh i ngaihsak a ngai tel bawk. Chaw ṭha taka i ei a ngai a. Chawlh hahdamna leh mutna hun tam tâwk i neih a ngai bawk. (Thuhriltu 4:6) A theih chuan chawlh i lâk a ngai thei bawk. Hetianga i tih hian i nu leh pate enkawl tûrin rilru lam, ngaihtuahna lam, leh taksa lamah i lo chak ṭha lehzual ang.

Bible-in kum upa nu leh pate chu in lama enkawl ngei tûr an ni tih a sawi em?

Nu leh pate chu an fa puitling tawhte’n in lamah an enkawl ngei tûr a ni tih Bible-ah kaihhruaina chip chiar tak a chuang lo va. Chhûngkaw ṭhenkhat chuan a theih phawt chuan kum upa an nu leh pate chu in lama awmpui zawm zêl an thlang a. Mahse, dinhmun ṭhenkhatah chuan tar enkawlnaa dah chu a ṭhat zâwk an ring pawh a ni thei. Chhûngkua chu thu tlûkna ṭha ber siam tûrin an inrâwn khâwm thei a ni.—Galatia 6:4, 5.