Sum Hi Sual Tinrêng Bul A Ni Em?

Bible chhânna

Ni lo. Bible-in sum hi sual angin a sawi lo va, thil ṭha lo zawng zawng lo chhuahna bul angin a sawi hek lo. “Sum hi sual tinrêng bul a ni” tia a kim lova târ lanna hian, Bible hriat sualna a thlen a ni. Bible sawi dân dik tak zâwk chu “tangka sum ngainat hi sual tinrêng bul a ni,” tih a ni.—1 Timothea 6:10.

Bible-in sum chungchângah eng nge a sawi?

Bible-in sum chu fing taka hman a nih chuan a ṭangkai theiin “himna” a pe hial thei tih a pawm a. (Thuhriltu 7:12) Chu bâkah, sum pêk pawh tiamin, mi dangte chunga thilphalna lantîrtute chu a fak a ni.—Thufingte 11:25.

Chutih rualin, nunah sum leh pai dah pawimawh ber lo tûrin vaukhânna a pe bawk. Heti hian a sawi: “In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u,” tiin. (Hebrai 13:5) Zir tûr chu, a hmun dik taka sum dah leh hausak ûm loh hi a ni. Chu aiin, kan mamawh tak zet ei tûr te, silh leh fên te, leh chênna tûr in te neia lungawi kan tum tûr a ni.—1 Timothea 6:8.

**Engvângin nge Bible-in sum ngainatna chungchângah vaukhânna a pêk?**

Mi duhâmte chuan chatuana nunna an chang lo vang. (Ephesi 5:5) A chhan pakhat chu duhâmna chu milem biakna, a nih loh leh biakna dik lo ang a ni a. (Kolossa 3:5) A chhan dang leh chu, an duh zâwng nei tûra theih tâwp an chhuahnaah mi duhâmte chuan thu bul ṭhate an ngaihthah fo ṭhin vâng a ni. Thufingte 28:20 chuan chûng mite chungchângah, “hausak thuai tum erawh chu hrem lohvin a chhuak lo vang,” tiin a sawi a. Anni chu dân bawhchhiatna thil, hêng sum hmuh nâna thurûk engemaw puang chhuak tûra invauna te, sum inhneh chhuhna te, inbumna te, suma tlan atâna mihring rûk bona te, leh tualthahna te hial ti tûra thlêm an ni thei.

Sum ngainatna chuan nungchang ṭha lo thlen kher lo mah se, sawhkhâwk ṭha lo dang a nei thei a. Bible chuan, “hausak tumte chu thlêmnaah te, thangah te, âtthlâk leh tikhawlo thei duhna tam takah te an tlu lût ṭhîn,” tiin a sawi a ni.—1 Timothea 6:9.

Engtin nge sum chungchânga Bible thurâwn pêk chu kan hlâwkpui theih?

Sum leh pai avânga nungchang lam leh thlarau lama kan tlâk chhiat loh phawt chuan Pathian duhsakna leh ṭanpuina dawngin mahni inzahna kan nei ang. Tih tak zeta amah tihlâwm tumtute chu Pathianin: “Engtikah mah ka thlahthlam tawp lo vang chia, kal pawh ka kalsan tawp lo vang che,” tiin a tiam a. (Hebrai 13:5, 6) “Mi rinawm chuan malsâwmna a ngah ang,” tiin min tiam bawk a ni.—Thufingte 28:20.

Sum chungchânga Bible chângte

Thuhriltu 7:12: “Tangka sum himna a ni.”

A awmzia: Sum hi fing taka hman a nih chuan, himna engemaw chen a pêk theih avângin a ṭangkai a ni.

Luka 12:15: “Sum ngah hi mihring dam chhan a ni lo ve.”

A awmzia: Sum hi nuna thil pawimawh ber a ni lo va, min chhandam thei hek lo.

Timothea thawn khat 6:10: “Tangka sum ngainat hi sual tinrêng bul a ni si a; chu chu ṭhenkhatten an awt a, rinna chu an kal bosan a, anmahni leh anmahni lungngaihna tam takin an inchhun tlang ta chuk a.”

A awmzia: Sum hi amahin a sual ngawt lo. Mahse, sum ngainatute—an nuna dah pawimawh bertute—chuan chhûngkaw kehdarhna leh a lutuka hnathawhna avânga hrisêl lohna ang chi harsatna an inthlen a ni.

Hebrai 13:5: “In rilru putzia chu tangka ngainatna tel lo ni rawh se; in thil neih chhun chungahte chuan lungawi rawh u.”

A awmzia: Eng pawh huama hausakna ûm aiin, kan mamawh tak zette chunga lungawina neih hi a finthlâk a ni.

Matthaia 19:24: “Mi hausa Pathian rama luh aiin sanghâwngsei hriau benga luh tlang a awl zâwk.”

A awmzia: Isua’n ṭhalai hausa chu amah zui tûrin a sâwm a. Chu pa chuan a thil neihte a ngainat êm avângin, chu sâwmna chu a hnâwl a ni. Chuvângin, Isua’n heti hian vaukhânna a pe a. Pathian aia hausakna dah hmasatu chuan chatuana nunna a chân thei a ni.