Bible Thute Hi Khawih Danglam A Ni Tawh Em?

Ni lo. Bible hi kum sâng tam tak chhûnga awlsam taka chhe thei thilte chunga ziak chhâwn a ni chung pawhin, hman lai kutziak lehkhate nêna khaikhin chuan a tlângpui thuin a thute chu a inthlâk lo a ni.

Hei hi ziah chhâwnnaah tihsual a awm ngai lo tihna a ni em?

Hmân lai kutziak Bible sâng tam tak chu hmuh chhuah a ni a. Chûng zînga ṭhenkhat chuan inan lohna tam tak a nei a, chu chuan ziak chhâwnnaah tihsual a awm tih a târ lang. Chûng inan lohna zawng zawng deuhthaw chu a tê thamin, chûng chuan a thu awmzia a thlâk chuang lo. Mahse, inan lohna lian tham hmuh chhuah ṭhenkhat chu Bible thuchah thlâk danglam duhtute’n hun rei tak ata tawha duh rêng vânga an belhte niin a lang. Entîrna pahnih lo ngaihtuah ila:

1. Bible lehin hlui ṭhenkhatah chuan 1 Johana 5:7-ah hêng thute hi a chuang a ni: “vânah, Pa, Thu, leh Tharau Thlianghlim an awm a: hêng pathumte hi pakhat a ni,” tiin. Mahse, kutziak lehkha rin tlâk takte chuan hêng thute hi a tîra ziakah a tel lo tih a nemnghet a. A hnua an belhchhah chawp a ni.a Chuvângin, tûn laia Bible lehlin rin tlâk takahte chuan telh a ni tawh lo.

2. Pathian hming bil hi hmân lai kutziak Bible-ahte chuan vawi sâng tam tak a lang a. Mahse, Bible lehlin tam takah chuan a nihna, “Lalpa,” a nih loh leh “Pathian,” tia thlâk a ni.

Engtin nge hmuh belh tûr tihsual tam tak a awm tawh lo tih kan chian theih?

Kutziak lehkha tam tak hmuh chhuah a nih tawh avângin, tûn hma zawng aiin a dik lo lai hmuh chhuah chu a awlsam tawh zâwk a.b Chûng lehkhate khaikhinna chuan tûn lai Bible dikna chungchângah eng nge a târ lan?

• Bible lama mi thiam William H. Green-a chuan Hebrai Pathian Lehkha Thu (“Thuthlung Hlui” tia koh ṭhin) chungchângah: “Hmân lai kut chhuak a enga mah hi hetiang khawpa dik a awm lo tih kan sawi thei var var ang,” tiin a sawi a ni.

• Bible lama mi thiam F. F. Bruce-a chuan Kristian Grik Pathian Lehkha Thu, a nih loh leh “Thuthlung Thar” chungchângah: “Hmân lai lehkhabu dang eng mahin hetiang khawpa a dikzia finfiahna tûr hlui leh tam a nei lo va; tin, ṭan lam nei lo Bible lama mi thiam tumahin a thute chu a him thawkhat a ni tih an hnial lo vang,” tiin a ziak a ni.

• Kutziak Bible zirmi mi thiam hriat hlawh tak Sir Frederic Kenyon-a chuan, miin “Bible bu pum hi kutah kengin, a thil ken hi kum zabi tam tak chhûnga a chhûng thu inthlâk danglamna lian tham awm lova chhuan lo awm zêlte hnêna hlan chhâwn Pathian Thu a ni, tiin huai tak leh tîmna nei lovin, a sawi thei ang,” tiin a sawi a ni.

Bible hi dik taka inhlan chhâwn zêl a ni tih kan rin theihna tûr chhan dang eng nge la awm?

• Bible ziak chhâwngtu Juda mite leh Kristiante chuan Pathian mite thil sual tih pawi tak takte pawh zêp nei lovin an ziak lang ve ve.c (Numbers 20:12; 2 Samuela 11:2-4; Galatia 2:11-14) Chutiang bawkin, Juda hnamte chu thuâwih lohna avânga thiam loh chantîr an nih dân leh mihring thu rochhiahte târ lanna Bible chângte pawh an paih lo bawk. (Hosea 4:2; Malakia 2:8, 9; Matthaia 23:8, 9; 1 Johana 5:21) Hêng thilthlengte dik taka ziak chhâwngin, a ziak chhâwngtute hian an rin tlâkzia leh Pathian Thu thianghlim an zahzia an târ lang a ni.

• A tîra thlarauva thâwk khum Bible min petu Pathian chuan a dikna pawh humhim zêl tûra ngaih chu a inâwm a ni lâwm ni?d (Isaia 40:8; 1 Petera 1:24, 25) Tihah chuan, hmân laia mite chauh ni lovin, tûn laia keini pawhin kan hlâwkpui a duh si a. (1 Korinth 10:11) A nihna takah chuan, “Pathian Lehkha Thua chhelna leh thlamuanna hmua beiseina kan neih theihna tûrin, hmânlaia ziak apiangte chu keimahni min zirtîrna tûrin ziak a ni.”—Rom 15:4.

• Isua leh a hnungzuite chuan hmân lai kutziak Hebrai Pathian Lekha Thu ziak chhâwnte chu rinhlelhna nei miah lovin an hmang a ni.—Luka 4:16-21; Tirhkohte 17:1-3.